1-2. (a) Ania ti makitkita ni Jehova no agtataripnong ti minilion para iti Pangrabii ti Apo? (Kitaen ti ladawan iti akkub.) (b) Ania ti adalentayo iti daytoy nga artikulo?

PANUNOTEM no ania ti makitkita ni Jehova iti panagtataripnong ti minilion iti intero a lubong para iti Pangrabii ti Apo. Saan laeng a ti kaadu ti tao ti makitana; kitkitaenna ti tunggal indibidual a presente. Kas pagarigan, kitkitaenna dagiti tinawen nga umat-atender. Mabalin a dadduma kadakuada ti immatender uray nakaro ti pannakaidadanesda. Adda met dagiti saan a regular nga umat-atender iti dadduma a gimong, ngem ibilangda a napateg ti kaaddada iti Memorial. Makitkita met ni Jehova dagiti mabalin a damoda ti umatender, a mabalin a kayatda laeng ti agobserbar.

² Sigurado a maragsakan ni Jehova a makakita iti adu nga umatender iti Memorial. (Luc. 22:19) Ngem saan a ti kaadu ti umatender ti kangrunaan a paginteresan ni Jehova no di ket ti rason nga umatenderda; nakapatpateg ken Jehova ti motibo. Iti daytoy nga artikulo, pagsasaritaantayo ti napateg a saludsod: Apay a saan laeng a ti tinawen a panangselebrar iti Memorial ti atenderantayo no di pay ket dagiti linawas a gimong nga inyurnos ni Jehova para kadagiti mangay-ayat kenkuana?

3-4. (a) Apay nga umatendertayo kadagiti gimong? (b) Ania dagiti kualidad a maipakitatayo no umatendertayo kadagiti gimong? (c) Sigun iti 1 Corinto 11:23-26, apay a saantayo koma a liwliwayan ti Memorial?

³ Ti kangrunaan a rason nga umatendertayo kadagiti gimong  ti kongregasion ket gapu ta paset dagita ti panagdaydayawtayo. Umatendertayo met gapu ta sursuruannatayo ni Jehova kadagiti gimong. Saan a patien dagiti napannakkel a tattao a kasapulanda ti maisuro. (3 Juan 9) Ngem naidumatayo ta maragsakantayo nga agpaisuro ken Jehova ken iti us-usarenna nga organisasion.​—Isa. 30:20; Juan 6:45.

⁴ No umat-atendertayo iti gimong, ipakpakitatayo a napakumbabatayo, a nakasagana ken situtuloktayo a masursuruan. Iti rabii ti Memorial ti ipapatay ni Jesus, atenderantayo daytoy a kapatgan nga okasion saan laeng a gapu ta obligasiontayo no di ket sipapakumbaba met nga agtulnogtayo iti bilin ni Jesus: “Itultuloyyo nga aramiden daytoy kas panglaglagip kaniak.” (Basaen ti 1 Corinto 11:23-26.) Patibkeren dayta a gimong ti namnamatayo iti masanguanan ken ipalagipna nga ay-ayatennatayo unay ni Jehova. Ngem ammo ni Jehova a saan laeng a maminsan iti makatawen a kasapulantayo ti pammaregta ken pammasiguro. Isu nga inyurnosna dagiti linawas a gimong ken paregtaennatayo nga atenderantayo dagita. Agtultulnogtayo gapu iti kinapakumbaba. Adu nga oras ti maus-usartayo iti linawas a panagsagana ken iyaatender kadagita a gimong.

5. Apay nga awaten dagiti napakumbaba a tattao ti awis ni Jehova?

⁵ Tinawen nga adu a napakumbaba a tattao ti umawat iti awis ni Jehova nga isurona ida. (Isa. 50:4) Naragsakanda nga immatender iti Memorial, isu nga immatenderda pay iti dadduma a gimong. (Zac. 8:20-23) Maragsakantayo amin nga agpaisuro ken agpaiwanwan ken Jehova, a “tumulong ken mangisalakan” kadatayo. (Sal. 40:17) Adda kadi pay naragragsak​—wenno napatpateg—ngem iti panangawat iti awis nga agpaisuro ken Jehova ken ni Jesus, ti Anak a patpatgenna unay?​—Mat. 17:5; 18:20; 28:20.

6. Kasano a nakatulong ti kinapakumbaba iti maysa a lalaki nga umatender iti Memorial?

⁶ Tinawen nga ikagkagumaantayo nga imbitaran ti adu nga umatender iti Memorial ti ipapatay ni Jesus. Nagunggonaan ti adu a napakumbaba a tattao gapu iti panangawatda iti imbitasiontayo. Kitaentayo daytoy a pagarigan. Sumagmamano a tawenen ti napalabas, adda lalaki a naikkan iti imbitasion iti Memorial, ngem imbagana iti brother a nangawis kenkuana a di makaatender. Ngem iti rabii ti Memorial, nasdaaw ti brother idi immay ti lalaki iti Kingdom Hall. Nagustuan ti lalaki ti nabara a pannakaabrasana ket nangrugi nga umatender iti linawas a gimongtayo. Kinapudnona, namitlo laeng a saan a nakagimong iti simmaruno a tawen. Apay a positibo ti reaksionna? Gapu ta naemma, binalbaliwanna ti panunotna. Kinuna idi agangay ti brother a nangimbitar kenkuana, “Nakapakpakumbaba a tao.” Sigurado nga inyasideg ni Jehova daytoy a lalaki nga agdayaw Kenkuana, ket bautisado itan.​—2 Sam. 22:28; Juan 6:44.

7. Kasano a matulongannatayo nga agbalin a napakumbaba ti masursurotayo kadagiti gimong ken ti mabasatayo iti Biblia?

⁷ Ti masursurotayo iti gimong ken ti mabasatayo iti Biblia ti makatulong iti panagbalintayo a napakumbaba. Sumagmamano a lawas sakbay ti Memorial, masansan a nakapokus dagiti gimongtayo iti ulidan ni Jesus ken iti kinapakumbabana idi intedna ti biagna kas subbot. Ket sumagmamano nga aldaw sakbay ti Memorial, maparegtatayo a mangbasa kadagiti salaysay ti Biblia maipapan kadagiti pasamak iti ipapatay ken panagungar ni Jesus. Ti masursurotayo kadagita a gimong ken ti mabasatayo kadagita a  salaysay ti Biblia ti mangpauneg iti panagyamantayo iti panagsakripisio ni Jesus para kadatayo. Matignaytayo a mangtulad iti kinapakumbabana ken mangaramid iti pagayatan ni Jehova, uray no narigat dayta kadatayo.​—Luc. 22:41, 42.

8. Kasano nga impakita ni Jesus ti tured?

⁸ Ikagumaantayo met a tuladen ti kinatured ni Jesus. Panunotem ti tured nga impakitana kadagiti aldaw sakbay ti ipapatayna. Ammona nga asideg idin nga ibabain, kabilen, ken papatayen dagiti kabusorna. (Mat. 20:17-19) Ngem situtulok a sinangona ti ipapatay. Idi dimtengen ti tiempo, imbagana kadagiti matalek nga apostolna, a kaduana idiay Getsemani: “Tumakderkayo, intayon. Adtoy! Addan ti mangtraidor kaniak!” (Mat. 26:36, 46) Idi addan dagiti armado a lallaki a mangaresto kenkuana, nagpasango, inyam-ammona ti bagina, sa imbilinna kadagiti soldado a bay-anda a pumanaw dagiti apostolna. (Juan 18:3-8) Anian a kinatured! Ita, dagiti napulotan a Kristiano ken ti sabsabali a karnero ikagkagumaanda a tuladen ti kinatured ni Jesus. Kasano?

9. (a) Apay a kasapulantayo no dadduma ti tured a makigimong? (b) Ania ti epekto ti ulidantayo kadagiti kakabsattayo a nakabalud gapu iti pammatida?

⁹ Tapno regulartayo kadagiti gimong, mabalin a kasapulantayo nga ipakita ti tured kadagiti narigat a situasion. Adda kakabsattayo a makigimong latta uray agladladingit, maup-upay, wenno masakitda. Dadduma met ti makigimong uray nakaro ti ibubusor dagiti kapamiliada wenno dagiti opisial ti gobierno. Panunotentayo ti epekto ti ulidantayo kadagiti kakabsattayo a nakabalud gapu iti pammatida. (Heb. 13:3) No madamagda nga itultuloytayo ti agserbi ken Jehova uray masusuottayo, mapabilegda a mangitultuloy iti pammati, tured, ken kinamatalekda. Kasta idi ti narikna ni apostol Pablo. Idi nakabalud idiay Roma, naragsakan a makadamag a matalek nga agserserbi iti Dios dagiti kakabsatna. (Fil. 1:3-5, 12-14) Sakbay wenno kalpasan unay a nawayawayaan ni Pablo, nagsurat kadagiti Hebreo. Pinaregtana dagiti matalek a Kristiano nga “itultuloy[da] ti agiinnayat kas agkakabsat” ken dida baybay-an ti aggigimong.​—Heb. 10:24, 25; 13:1.

10-11. (a) Siasino dagiti awisentayo iti Memorial? (b) Ania a rason ti ibaga ti Efeso 1:7 nga aramidentayo dayta?

¹⁰ Maipakitatayo ti tured no awisentayo iti Memorial dagiti kabagian, katrabahuan, ken kaarrubatayo. Apay nga awisentayo ida? Agyamyamantayo unay iti inaramid kadatayo ni Jehova ken ni Jesus isu a magagarantayo a mangawis iti sabsabali. Kayattayo a masursuroda no kasano a magunggonaanda met iti ‘nagpaiduma a kinaimbag’ ni Jehova babaen ti subbot.​—Basaen ti Efeso 1:7; Apoc. 22:17.

¹¹ No ipakitatayo ti tured babaen ti pannakigimong, ipakpakitatayo met ti sabali  pay a nagpateg a kualidad nga impakita ni Jehova ken ti Anakna iti naisangsangayan a pamay-an.

12. (a) Kasano nga umuneg ti ayattayo ken Jehova ken ni Jesus babaen kadagiti gimong? (b) Ania ti iparegta ti 2 Corinto 5:14, 15 nga aramidentayo tapno matuladtayo ni Jesus?

¹² Ti ayattayo ken Jehova ken ni Jesus ti mangtignay kadatayo a makigimong. Ti masursurotayo kadagiti gimong ti mangpauneg iti ayattayo ken Jehova ken iti Anakna. Regular a maipalpalagip kadatayo iti gimong no ania ti inaramidda para kadatayo. (Roma 5:8) Nangnangruna nga ipalagip kadatayo ti Memorial no kasano kauneg ti ayatda kadatayo, uray kadagidiay saan pay a makatarus iti pateg ti subbot. Gapu ta agyamyamantayo, ikagumaantayo a tuladen ni Jesus iti inaldaw a panagbiagtayo. (Basaen ti 2 Corinto 5:14, 15.) Kasta met, matignay ti pusotayo a mangidaydayaw ken Jehova iti panangipaayna iti subbot. Ti maysa a pamay-an a maidaydayawtayo isuna ket ti naimpusuan a panagkomentotayo iti gimong.

13. Kasano a maipakitatayo ti kauneg ti ayattayo ken Jehova ken iti Anakna? Ilawlawag.

¹³ Maipakitatayo no kasano kauneg ti ayattayo ken Jehova ken iti Anakna babaen ti situtulok a panagsakripisiotayo para kadakuada. Masansan a nadumaduma a panagsakripisio ti aramidentayo tapno makaatendertayo iti gimong. Adu a kongregasion ti aggigimong iti malem kalpasan ti trabaho ket mabalin a nabannogtayon. Sa aggigimongtayo pay iti ngudo ti lawas bayat nga agin-inanan ti dadduma. Makitkita kadi ni Jehova a makigimgimongtayo latta uray nabannogtayon? Wen! Kinapudnona, no ad-adu ti panagsakripisiotayo, ad-adda nga apresiaren ni Jehova ti ayat nga ipakpakitatayo kenkuana.​—Mar. 12:41-44.

14. Kasano nga inyulidan ni Jesus ti panangipakita iti managsakripisio nga ayat?

¹⁴ Inyulidan kadatayo ni Jesus ti panangipakita iti managsakripisio nga ayat. Saan laeng a situtulok a matay para kadagiti adalanna no di pay ket sisasagana a nagsakripisio tapno mayun-unana ti pagsayaatanda. Kas pagarigan, kinasaritana dagiti pasurotna uray nabambannog wenno marirriribukan. (Luc. 22:39-46) Ken nagpokus iti maipaayna iti sabsabali, saan nga iti  maalana kadakuada. (Mat. 20:28) No kasta kabileg ti ayattayo ken Jehova ken kadagiti kakabsat, aramidentayo ti amin tapno makaatendertayo iti Pangrabii ti Apo ken iti dadduma pay a gimong ti kongregasion.

15. Siasino koma ti nangnangruna a tulongantayo?

¹⁵ Pasetnatayo ti kakaisuna a pudno a Nakristianuan a panagkakabsat, ket maragsakantayo a mangusar iti adu a tiempo a mangawis kadagiti kabbaro a makikadua kadatayo. Ngem nangnangruna nga interesadotayo a tumulong kadagidiay “kapammatiantayo” a saanen nga aktibo. (Gal. 6:10) Mapaneknekantayo ti ayattayo kadakuada no paregtaentayo ida nga umatender kadagiti gimongtayo, nangnangruna iti Memorial. Kas ken Jehova ken ni Jesus, maragragsakantayo no ti maysa a di aktibo ket agsubli ken Jehova, ti naayat nga Ama ken Pastortayo.​—Mat. 18:14.

16. (a) Kasano a makapagpipinnaregtatayo, ken ania ti maaramidan kadatayo dagiti gimong? (b) Apay a nasayaat nga ita a tiempo ti tawen a lagipentayo ti sasao ni Jesus iti Juan 3:16?

¹⁶ Iti sumaruno a lawlawas, awisentayo ti adu a tattao nga umatender iti Memorial inton rabii ti Biernes, Abril 19, 2019. (Kitaen ti kahon nga “ Awisemto Kadi Ida?”) Iti intero a tawen, sapay koma ta agpipinnaregtatayo babaen ti regular nga iyaatendertayo iti amin a gimong nga ipapaay kadatayo ni Jehova. Bayat nga umas-asideg ti panagpatingga daytoy a sistema, kasapulantayo dagiti gimong a tumulong kadatayo nga agtalinaed a napakumbaba, natured, ken naayat. (1 Tes. 5:8-11) Naimpusuan koma nga ipakitatayo ti marikriknatayo ken Jehova ken iti Anakna gapu iti napalalo nga ayatda kadatayo!​—Basaen ti Juan 3:16.