NAKAAD-ADU ti sakripisio dagiti Kristiano idi umuna a siglo tapno maikasabada ti “naimbag a damag ti pagarian” iti adu a tattao. (Mat. 24:14) Adda pay ketdi dagiti napan iti sabali a pagilian. Kas pagarigan, napan ni apostol Pablo iti lugar a maaw-awagan itan iti Turkey, ken adu a lugar ti nangasabaanna bayat ti panagmisionerona. * Agarup 2,000 a tawen kalpasan dayta, idi 2014, naipamaysa manen iti Turkey ti espesial a kampania ti panangasaba. Apay a nayurnos dayta a kampania? Siasino dagiti nakiraman?

Nasurok a 2,800 ti Saksi idiay Turkey ngem 79 a milion ti populasionna. Kayatna a sawen nga adda 1 a Saksi iti kada 28,000 a tattao idiay Turkey. Wen, bassit laeng ti kabaelan a kasabaan dagiti kakabsat iti dayta a pagilian. Nayurnos ti espesial a kampania tapno adu ti makasabaan iti uneg ti ababa a panawen. Agarup 550 a kakabsat a makasao iti Turkish ti napan idiay Turkey tapno kaduaenda dagiti kakabsat a mangasaba bayat ti kampania. Ania ti resultana?

Nakaad-adu ti nakasabaan. Insurat ti maysa a kongregasion idiay Istanbul: “No makitadakami idi dagiti tattao, kunada: ‘Adda kadi special convention ditoy? Agkaiwara dagiti Saksi!’” Insurat met ti maysa a kongregasion iti siudad ti Izmir: “Adda lalaki nga agtrabtrabaho iti pagurayan iti taxi nga immasideg iti maysa nga elder ken dinamagna, ‘Ania ti mapaspasamak? Nakaad-adukayo, ken nakagaggagetkayo!’” Talaga a nakadkadlaw ti kampania.

Permi a nagustuan dagiti kakabsat a naggapu iti sabali a pagilian ti panangasaba. Kuna ni Steffen, a naggapu iti Denmark: “Inaldaw nga adda makasabaak a saan pay a nakangngeg iti maipapan ken Apo Jehova. Nariknak a talaga a naipakaammok ti nagan ni Jehova.” Insurat met ni Jean-David a taga-France: “Maysa la a kalsada ti nangasabaanmi iti adu nga oras. Nakamaymayat! Kaaduan a tattao ti saan a makaam-ammo kadagiti Saksi ni Jehova. Dandani adda makasaritami iti kada balay, makaipabuyakami iti video, ken makaipaimakami.”

 Iti laeng dua a lawas, nakaipaima ti 550 a kakabsat iti agarup 60,000 a publikasion. Talaga a nakaad-adu ti nakasabaan!

Naparegta dagiti kakabsat. Nagsayaat ti epekto ti espesial a kampania kadagiti kakabsat a taga-Turkey. Adu ti nagplano nga agpayunir. Iti uneg ti 12 a bulan kalpasan ti kampania, ngimmato iti 24 a porsiento ti bilang ti regular pioneer idiay Turkey.

Inyebkas dagiti kakabsat a naggapu iti sabali a pagilian ti epekto ti kampania iti ministerioda. Insurat ni Şirin, kabsat a babai a taga-Germany: “Naglaing a mangasaba iti di pormal dagiti kakabsat a taga-Turkey. Managbabainak a mangasaba iti di pormal. Ngem gapu iti espesial a kampania, ti ulidan dagiti kakabsat iti Turkey, ken adu a kararag, naaramidak ti diak maaramidan idi. Nakapangasaba ken nakaipaimaak pay ketdi kadagiti tract iti pagluganan iti tren! Ita, saanakon a managbabain a kas idi.”

“Adda nasursurok a kayatko nga aramiden iti ministeriok,” kuna ni Johannes a taga-Germany. “Determinado dagiti kakabsat a taga-Turkey a mangasaba iti adu a tattao. Mangasabada iti amin a gundaway. Tinuladko dayta idi nagsubliak ditoy Germany. Ad-adun ti makaskasabaak ita.”

“Nagdakkel ti epekto ti kampania iti ministeriok. Pinaturednak ken tinulongannak a mas agtalek ken Jehova,” kuna ni Zeynep a taga-France.

Nagbalin a nadekdekket dagiti kakabsat. Nakamaymayat ti epekto ti ayat ken panagtutunos dagiti kakabsat a naggapu iti agduduma a pagilian. “‘Nananammi’ ti kinamanangsangaili dagiti kakabsat,” kuna ni Jean-David a nadakamat itay. Kinunana pay: “Imbilangdakami a gagayyem ken kapamiliada. Pinagdagusdakami kadagiti balayda. Ammok a sangalubongan ti panagkakabsattayo; namin-adun a nabasak dayta kadagiti publikasiontayo. Ngem ita, napadasak a mismo dayta. Mas maipagpannakkelkon a maysaak a Saksi ni Jehova, ken agyamanak iti Dios gapu kadaytoy a dayaw.”

“Idiay man Denmark, France, Germany, wenno Turkey  ti naggapuanmi, maymaysakami latta a pamilia. Kasla nangala ti Dios iti dakkel nga eraser a nangpunas kadagiti boundary dagiti pagilian,” kuna ni Claire a taga-France.

Kuna met ni Stéphanie a taga-France: “Nasursuromi iti espesial a kampania a saan a ti kultura wenno lengguahe ti mamagkaykaysa kadakami no di ket ti ayatmi ken Apo Jehova.”

Adu a kakabsat a naggapu iti sabali a pagilian ti nagplano nga umakar iti Turkey tapno tumulongda iti dakkel a trabaho a masapul a maituloy. Adun ti immakar. Maapresiar unay dagitoy a managsakripisio a kakabsat.

Kas pagarigan, adda grupo iti nasulinek a lugar a buklen ti 25 a kakabsat. Adu a tawen a maymaysa ti panglakayenda. Panunotenyo ti ragsak dagiti kakabsat idi 2015, idi innem a kakabsat a naggapu iti Germany ken Netherlands ti immakar iti lugarda tapno tumulong!

Komusta ngay itan ti biag dagiti kakabsat nga immakar idiay Turkey? Agpayso a narigat no dadduma, ngem nakaragragsak ti biagda gapu iti iyaakarda. Kitaentayo ti kuna ti dadduma:

“Gapu ta bassit ti sanikuak, nariknak a nawaywayaak ken ad-adda a maipamaysak dagiti kapatgan a banag,” kuna ni Federico, a taga-Spain, addaan asawa, ken agtawen iti nasurok nga 40. Mairekomendana ngata ti kasta a panagserbi? “Siempre!” kunana. “No umakarka iti sabali a pagilian tapno tulongam dagiti tattao a mangam-ammo ken Jehova, italtalekmo kenkuana ti biagmo. Talaga a mariknam ti ad-adda a panangaywan kenka ni Jehova.”

“Nagmayat ti riknami ta kasla dakami ti mangyun-una ken ikaskasabami ti kinapudno iti nakaad-adu a tattao a saan pay a nakangngeg kadayta,” kuna ni Rudy, a taga-Netherlands, addaan asawa, ken agtawen iti dandani 60. “Maragsakanka no  makitkitam ti ragsak dagiti tattao nga umawat iti kinapudno.”

Kuna ni Sascha, a taga-Germany, addaan asawa ken agtawen iti nasurok nga 40: “Kada addaak iti pangasabaan, adda dagiti makasaritak a damoda ti makasabaan. Nagmayat ti riknak no matulongak ida a mangam-ammo ken Jehova.”

Kuna met ni Atsuko, a taga-Japan, addaan asawa, ken agtawen iti nasurok a 30: “Ibagbagak idi nga umay koman ti Armagedon. Ngem idi immakarak iti Turkey, agyamyamanak ken Jehova ta agan-anus latta agingga ita. No makitkitak ti panangiturong ni Jehova kadagiti bambanag, ad-adda met a kayatko ti agbalin pay a nadekdekket kenkuana.”

Kuna ni Alisa, agtawen iti nasurok a 30 ken taga-Russia: “Nakatulong kaniak daytoy a panagserbi ken Jehova tapno mananamko ti amin a kinaimbagna.” (Sal. 34:8) Kunana pay: “Saanko laeng nga Ama ni Jehova no di ket nadekket pay a Gayyemko, nga ad-adda a maam-ammok iti nagduduma a kasasaad. Napno ti biagko kadagiti nakaragragsak a pasamak, nagpipintas a kapadasan, ken nakaad-adu a bendision!”

Gapu iti espesial a kampania idiay Turkey, naidanon ti naimbag a damag iti ad-adu a tattao. Ngem adu pay ti saan a naas-asak a teritoria. Inaldaw nga adda dagiti tattao a saan pay a makaam-ammo ken Jehova a makaskasabaan dagiti kakabsat nga immakar idiay Turkey. Kayatmo kadi ti mapan kadagita a teritoria? No wen, paregtaendaka a ‘mangitannawag kadagiti matam ket matmatam dagiti talon, ta purawdan a maipaay iti pannakaani.’ (Juan 4:35) Mabalinmo kadi ti tumulong iti lugar a ‘purawen a maipaay iti pannakaani’? No wen, agawaam itan a gaw-aten dayta a planom. Daytoy ti sigurado: No ad-adu ti maaramidam iti panangikasaba iti naimbag a damag “agingga iti kaadaywan a paset ti daga,” agliplippiasto dagiti bendision a maawatmo!—Ara. 1:8.