1. Apay a nainkalintegan nga ibaga ni Jehova a kukuana ti amin a banag? (Kitaen ti ladawan iti rugi ti artikulo.)

KUKUA ni Jehova ti amin a banag! Kukuana ti “langlangit, ti mismo a langlangit ti langlangit, ti daga ken isuamin nga adda iti dayta.” (Deut. 10:14; Apoc. 4:11) Gapu ta pinarsua ni Jehova ti tao, kukuana amin ida. (Sal. 100:3) Ngem iti intero a historia ti tao, nangpili ti Dios iti espesipiko a grupo ti tattao kas kukuana iti espesial a pamay-an.

2. Siasino dagiti naawagan iti Biblia kas kukua ni Jehova iti espesial a pamay-an?

² Kas pagarigan, tukoyen ti Salmo 135 dagiti matalek nga agdaydayaw ken Jehova iti nagkauna nga Israel kas “naisangsangayan a sanikuana.” (Sal. 135:4) Impadto met ti libro nga Oseas nga agbalinto a paset ti ili ni Jehova ti dadduma a saan nga Israelita. (Os. 2:23) Natungpal ti padto ni Oseas idi inraman ni Jehova dagiti saan a Judio iti panagpilina kadagiti kaduanto ni Kristo nga agturay. (Ara. 10:45; Roma 9:23-26) Daytoy a “nasantuan a nasion” ti ‘naisangsangayan a sanikua’ ni Jehova iti nagpaiduma a pamay-an, ta napulotan dagiti miembrona iti nasantuan nga espiritu ken napilida nga agbiag idiay langit. (1 Ped. 2:9, 10) Komusta met ti kaaduan a matalek a Kristiano ita nga addaan iti naindagaan a namnama? Awagan  met ida ni Jehova kas ‘ilina’ ken ‘dagidiay pinilina.’​—Isa. 65:22.

3. (a) Siasino ita ti addaan iti naanamongan a relasion ken Jehova? (b) Ania ti maadal iti daytoy nga artikulo?

³ Ita, ti “bassit nga ipastoran,” nga addaan iti nailangitan a namnama, ken ti “sabsabali a karnero,” nga addaan iti naindagaan a namnama, buklenda ti “maymaysa nga arban” nga ibilang ni Jehova kas ilina. (Luc. 12:32; Juan 10:16) Sigurado a kayattayo nga ipakita ti naimpusuan a panagyaman ken Jehova ta impaayna kadatayo ti kasta a naanamongan a relasion kenkuana. Maadal iti daytoy nga artikulo ti nadumaduma a pamay-an a maipakitatayo ti panagyamantayo ken Jehova iti panangipaayna kadatayo iti dayta nga espesial a dayaw.

4. Kasano a makapagyamantayo ken Jehova iti panangipalubosna a maaddaantayo iti relasion kenkuana, ken kasano met nga inaramid ni Jesus ti kasta?

⁴ Maipakitatayo ti panagyamantayo ken Jehova babaen ti naimpusuan a panangidedikartayo ti biagtayo kenkuana. Babaen ti bautismo iti danum, pormal ken publiko nga ipakaammotayo a kukuanatayo ni Jehova ken situtuloktayo nga agpasakup kenkuana. (Heb. 12:9) Kasta ti inaramid ni Jesus idi nagpabautisar, a kasla imbagana ken Jehova: “Ti panangaramid iti pagayatam, O Diosko, nagragsakak.” (Sal. 40:7, 8) Impresentar ni Jesus ti bagina a mangaramid iti pagayatan ni Jehova, uray no nayanak a paset ti nasion a dedikadon iti Dios.

5, 6. (a) Ania ti inaramid ni Jehova idi nabautisaran ni Jesus? (b) Iyilustrarmo no apay nga apresiaren ni Jehova ti dedikasiontayo, uray no kukuanan ti amin.

⁵ Ania ti inaramid ni Jehova iti panagbautisar ni Jesus? Kuna ti Biblia: “Kalpasan a nabautisaran dagus a simmang-at ni Jesus manipud iti danum; ket, adtoy! naluktan ti langlangit, ket nakitana ti espiritu ti Dios a bumabbaba a kasla kalapati nga um-umay kenkuana. Adtoy! Kasta met, adda timek manipud iti langlangit a nagkuna: ‘Daytoy ti Anakko, ti dungdungnguen, nga inanamongak.’” (Mat. 3:16, 17) Nupay ni Jesus ket kukuan ti nailangitan nga Amana, naragsakan ni Jehova a makakita a situtulok ti Anakna a mangaramid laeng iti pagayatan ni Amana. Maragsakan met ni Jehova a mangawat iti dedikasiontayo, ken padayawannatayo babaen ti bendisionna.​—Sal. 149:4.

⁶ Kas panangyilustrar, ipapantayo a maysa a lalaki ti addaan iti hardin a napno iti napipintas a sabsabong. Naminsan, nangala ti balasitangna iti maysa kadagita a sabong sa inregalona ken amana. Saan kadi a kukua ti lalaki dayta a sabong? Kasano koma nga ited ti anak ti maysa a banag a kukuan ni amana? Saan a pulos panunoten ti maysa a naayat nga ama dagiti kasta a saludsod. Imbes ketdi, maragsakan a mangawat iti dayta a regalo kas pammaneknek ti ayat ti anakna. Sigurado a napatpateg kenkuana dayta a sabong nga inted ti anakna ngem iti amin a sabong iti hardinna. Maragsakan la ketdi ni Jehova no situtulok nga usarentayo ti biagtayo para laeng kenkuana.​—Ex. 34:14.

7. Kasano nga impaganetget ni Malakias ti rikna ni Jehova kadagidiay situtulok nga agserserbi kenkuana?

⁷ Basaen ti Malakias 3:16. No dika pay nagdedikar ken nagbautisar, panunotem ti kinapateg dagita. Kukuanakan ni Jehova sipud idi nayinawka, kasta met ti dadduma pay a tattao. Ngem panunotem no kasano karagsak ni Jehova no idedikarmo kenkuana ti biagmo ken aramidem ti pagayatanna kas panangbigbigmo iti kalinteganna nga agturay iti uniberso. (Prov. 23:15) Am-ammo ni Jehova dagidiay situtulok nga agserserbi kenkuana, ken isuratna ti naganda iti “libro a pakalaglagipan.”

8, 9. Ania ti namnamaen ni Jehova kadagidiay naisurat ti naganda iti “libro a pakalaglagipan”?

 ⁸ Adda obligasion a kakuykuyog ti pannakaisurat ti nagantayo iti “libro a pakalaglagipan” ni Jehova kas paset ti ilina. Espesipiko nga imbaga ni Malakias a masapul nga ‘agbutengtayo ken Jehova ken pampanunotentayo ti naganna.’ No agdayaw ken ipaaytayo ti debosiontayo iti asinoman wenno aniaman a banag, maikkat ti nagantayo iti piguratibo a libro ti biag.​—Ex. 32:33; Sal. 69:28.

⁹ Ti ngarud panagdedikartayo ken Jehova ket saan laeng a serioso a kari a mangaramid iti pagayatanna ken panagpabautisar iti danum. Apagbiit laeng dagitoy, ket alisto nga agbalin a paset ti napalabas. Karaman iti panagtalinaedtayo iti dasig ni Jehova kas adipenna ti panagtulnog kenkuana ita ken iti masanguanan​—bayat a sibibiagtayo.​—1 Ped. 4:1, 2.

10. Ania ti nalawag a nagdumaan dagidiay agserserbi ken Jehova ken dagidiay saan?

¹⁰ Iti napalabas nga artikulo, nausig dagiti salaysay ti Biblia maipapan kada Cain, Solomon, ken kadagiti Israelita. Ibagbagada nga agdaydayawda ken Jehova, ngem saan a naipamaysa ti debosionda kenkuana. Ipakita dagiti kapadasanda a dagidiay pudpudno a kukua ni Jehova ket masapul nga agtultuloy a suportaranda ti kinalinteg ken busorenda ti kinadakes. (Roma 12:9) Kalpasan a dinakamat ni Malakias ti “libro a pakalaglagipan,” imbaga ni Jehova nga adda nalawag a “pagdumaan iti nagbaetan daydiay nalinteg ken daydiay nadangkes, iti nagbaetan daydiay agserserbi iti Dios ken daydiay saan a nagserbi kenkuana.”​—Mal. 3:18.

11. Apay a nalawag koma iti sabsabali a ni laeng Jehova ti daydayawentayo?

¹¹ Adda pay sabali a pamay-an a maipakitatayo ti panagyamantayo ken Jehova ta pinilinatayo kas paset ti ilina. Masapul a “maiparangarang iti amin” ti naespirituan a panagrang-aytayo. (1 Tim. 4:15; Mat. 5:16) Isaludsodmo iti bagim: ‘Nalawag kadi a makita ti sabsabali a naan-anay a matalekak ken Jehova? Agsapsapulak kadi iti gundaway a mayam-ammok ti bagik kas maysa a Saksi ni Jehova?’ Kalpasan a pinilinatayo ni Jehova kas paset ti ilina, maladingitan unay no mabaintayo  a mangibaga iti sabsabali a kukuanatayo.​—Sal. 119:46; basaen ti Marcos 8:38.

12, 13. Kasano a pinagbalin ti dadduma a saan a nalawag ti pakabigbiganda kas Saksi ni Jehova?

¹² Makapaladingit ta pinagbalin ti dadduma nga indibidual a saan a nalawag ti ‘nagdumaan ti panagserbi iti Dios ken ti saan a panagserbi kenkuana’ ta tultuladenda ti “espiritu ti lubong.” (1 Cor. 2:12) Dayta nga espiritu ti mangrubrubrob kadagiti ‘derrep ti lasag’ ti maysa a tao. (Efe. 2:3) Kas pagarigan, uray nakaad-adun ti naibalakad maipapan iti di naemma nga estilo ti panagbadbado ken panaglanglanga, magusgustuan latta dayta ti dadduma. Agusarda iti nakipet ken makagargari a bado, uray kadagiti Nakristianuan a panagtataripnong. Wenno tuladenda ti naalas nga estilo ti pukis ken panagbubuok. (1 Tim. 2:9, 10) Kas resultana, no addada iti ayan ti adu a tattao, mabalin a narigat a maibaga no asino ti kukua ni Jehova ken no asino ti “gayyem ti lubong.”​—Sant. 4:4.

¹³ Adda met dagiti Saksi a nangtulad iti kababalin ti lubong. Ti panagsalsala ken panagtigtignayda kadagiti party ket saan a maitutop kadagiti Kristiano. I-post-da dagiti retrato ken komentoda iti social media a saan a maibagay kadagiti naespirituan a tattao. Mabalin a saanda a madisiplina iti kongregasion Kristiano gapu ta saan met a nadagsen a basol dayta, ngem saan a nasayaat ti impluensiada kadagiti kakabsat a mangikagkagumaan nga agtalinaed a nasayaat ti kababalinda iti tengnga ti ili ni Jehova.​—Basaen ti 1 Pedro 2:11, 12.

14. Ania ti napateg nga aramidentayo tapno maprotektarantayo ti espesial a relasiontayo ken Jehova?

¹⁴ Napalalo ti panangiparegta ti lubong iti ‘derrep ti lasag ken iti derrep dagiti mata ken iti panangiparammag iti sanikua a pagbiag ti maysa.’ (1 Juan 2:16) Ngem gapu ta kukuanatayo ni Jehova, maiparegta a ‘tallikudantayo ti di kinanadiosan ken nailubongan a tartarigagay ken agbiagtayo a buyogen ti kinasimbeng ti panunot ken kinalinteg ken nadiosan a debosion iti tengnga daytoy agdama a sistema ti bambanag.’ (Tito 2:12) Makita koma iti sasao, pannangan ken panaginum, panagbadbado ken panaglanglanga, kababalintayo iti trabaho​—amin nga aramidentayo​—a ni laeng  Jehova ti pagdaydayawantayo.​—Basaen ti 1 Corinto 10:31, 32.

15. Apay a naasi ken naayat koma ti panangtratotayo kadagiti kapammatiantayo?

¹⁵ Makita ti panagyamantayo iti espesial a relasiontayo ken Jehova iti panangtratotayo kadagiti kapammatiantayo. Kukua met ida ni Jehova. No silalagiptayo iti dayta, kanayon a naasi ken naayat ti panangtratotayo kadagiti kakabsattayo. (1 Tes. 5:15) Imbaga ni Jesus kadagiti pasurotna: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”​—Juan 13:35.

16. Ania a bilin iti Linteg ni Moises ti mangiladawan iti rikna ni Jehova iti ilina?

¹⁶ Kas panangiladawan no kasano a tratuentayo ti maysa ken maysa iti kongregasion, usigentayo daytoy: Dagiti alikamen iti templo ni Jehova ket naidedikar, wenno nailasin, para laeng iti pudno a panagdaydayaw. Naidetalye iti Linteg ni Moises ti panangaywan kadagitoy nga alikamen, ket mapapatay dagiti agsukir. (Num. 1:50, 51) No prinotektaran a naimbag ni Jehova dagitoy awanan biag a bambanag a mausar iti panagdayaw kenkuana, ad-adda pay a protektaranna dagiti matalek a dedikado nga agdaydayaw kenkuana a pinilina kas adipenna! Naminsan, imbaga ni Jehova iti ilina: “Ti mangsagid kadakayo sagidenna ti bukel ti matak.”​—Zac. 2:8.

17. Ania ti ‘ipangpangag ken im-imdengan’ ni Jehova?

¹⁷ Makapainteres ta imbaga ni Malakias a ‘mangipangpangag ken umim-imdeng’ ni Jehova bayat nga aglalangen dagiti tattaona. (Mal. 3:16) Talaga nga “ammo ni Jehova dagidiay kukuana.” (2 Tim. 2:19) Ammona ti tunggal banag nga aramiden ken ibagatayo. (Heb. 4:13) No saantayo a naasi kadagiti kapammatiantayo, ni Jehova ket ‘mangipangpangag ken umim-imdeng.’ No managpadagus, naparabur, manangpakawan, ken naasitayo iti maysa ken maysa, masiguradotayo met nga ammo dayta ni Jehova.​—Heb. 13:16; 1 Ped. 4:8, 9.

18. Kasanotayo a maipakita nga agyamyamantayo iti dayaw gapu iti panagbalintayo a paset ti ili ni Jehova?

¹⁸ Kayattay la ketdi ti agyaman ken Jehova ta pasetnatayo ti ilina. Ammotayo a nainsiriban no bigbigentayo a kukuanatayo babaen ti boluntario a panangidedikartayo iti biagtayo kenkuana. Uray no agbibiagtayo iti “tengnga ti nakillo ken tiritir a kaputotan,” kayattayo a makita dagiti tattao nga ‘awan pakababalawantayo ken natarnawtayo nga agsilsilnag kas silsilaw iti lubong.’ (Fil. 2:15) Determinadotayo a mangbusor iti kinadakes. (Sant. 4:7) Ket ipateg ken respetuentayo dagiti kapammatiantayo ta kukua met ida ni Jehova.​—Roma 12:10.

19. Kasano a gunggonaan ni Jehova dagidiay kukuana?

¹⁹ Inkari ti Biblia: “Saanto a baybay-an ni Jehova ti ilina.” (Sal. 94:14) Nabileg a pammatalged daytoy nga aniaman ti mapasamak kadatayo, kukuanatayo ni Jehova. Uray ni patay saanna a malapdan ti ayat ni Jehova kadatayo. (Roma 8:38, 39) “No agbiagtayo, agbiagtayo a maipaay ken Jehova, ket no mataytayo, mataytayo a maipaay ken Jehova. Gapuna agpadpada a no agbiagtayo ken no mataytayo, kukuanatay ni Jehova.” (Roma 14:8) Magagarantay la ketdi iti tiempo inton pagungarenen ni Jehova dagiti natayen a matalek a gagayyemna. (Mat. 22:32) Adun ti bendisiontayo uray ita. Kas kuna ti Biblia, “naragsak ti nasion a ti Diosna isu ni Jehova, ti ili a pinilina kas tawidna.”​—Sal. 33:12.