1, 2. (a) Apay a nainsiriban ti dumasig ken Jehova? (b) Ania ti adalentayo iti daytoy nga artikulo?

MASIRIBTAYO no kumpettayo ken Jehova. Awanen ti mas mannakabalin, masirib, wenno naayat ngem iti Diostayo! Asino kadatayo ti saanna a kayat ti dumasig kenkuana? (Sal. 96:4-6) Ngem ti dadduma nga agdaydayaw iti Dios ket saan a dimmasig ken Jehova idi kasapulan nga aramidenda dayta.

² Iti daytoy nga artikulo, adalentayo ti maipapan kadagiti indibidual a nangibaga nga addada iti dasig ni Jehova nupay di makaay-ayo kenkuana ti panagbiagda. Naglaon dagitoy a salaysay iti napapateg a leksion a makatulong iti naan-anay a panagtalinaedtayo a matalek ken Jehova.

3. Apay a nakisarita ni Jehova ken Cain, ken ania ti imbagana kenkuana?

³ Alaentayo a pagarigan ni Cain. Awan ti sabali a dios nga ibagbagana a pagdaydayawanna no di laeng ni Jehova. Ngem  saan nga inawat ti Dios ti panagdaydayawna. Adda dagiti bukel ti kinadakes nga agtubtubo iti pusona. (1 Juan 3:12) Kinasarita ni Jehova ni Cain: “No tumurongka iti panagaramid iti naimbag, awanto aya ti pannakaitan-ok? Ngem no saanka a tumurong iti panagaramid iti naimbag, adda basol a kumkumleb iti pagserkan, ket sika ti paggargartemanna; ket sika, iti biangmo, maparukmamto kadi dayta?” (Gen. 4:6, 7) Kasla ibagbaga ni Jehova ken Cain, “No agbabawika ken agtalinaedka iti dasigko, addaakto met kenka.”

4. Ania ti inaramid ni Cain idi adda gundawayna a dumasig ken Jehova?

⁴ No ilinteg ni Cain ti panagpampanunotna, awaten manen ni Jehova ti panagdaydayawna. Ngem saan a dimngeg ni Cain iti balakad. Ti di umiso a panagpampanunot ken tarigagayna ti rason a nakaaramid iti dakes. (Sant. 1:14, 15) Idi agtutubo pay ni Cain, mabalin a saanna a pulos pinanunot ti bumusor ken Jehova. Ngem idi agangay, nagrebelde iti Dios ken pinatayna ti mismo a kabsatna!

5. Ania a panagpampanunot ti mabalin a pakapukawantayo iti pabor ni Jehova?

⁵ Kas ken Cain, mabalin a sursuroten ti maysa a Kristiano ita ti di umiso a dalan uray ibagbagana nga agdaydayaw ken Jehova. (Jud. 11) Kas pagarigan, mabalin nga isu ket aktibo iti ministerio ken regular iti gimong. Ngem baka adda dagiti immoral wenno inaagum a pampanunotenna, wenno adda sakit ti nakemna iti padana a Kristiano. (1 Juan 2:15-17; 3:15) Daytoy a panagpampanunot ket mabalin nga agresulta iti panagaramid iti basol. Mabalin a di ammo ti dadduma ti pampanunoten ken ar-aramidentayo, ngem makitkita ni Jehova ti amin a banag ken ammona no saan a naimpusuan ti kaaddatayo iti dasigna.​—Basaen ti Jeremias 17:9, 10.

6. No agtalinaedtayo iti dasig ni Jehova, kasano a tulongannatayo a ‘mangparukma’ kadagiti dakes a tarigagaytayo?

⁶ Nupay kasta, saan a dagus a sumuko ni Jehova. Ibagbagana no umad-adayon ti maysa nga adipenna: ‘Agsublika kaniak, ket agsubliakto kenka.’ (Mal. 3:7) Kayat ni Jehova a labanantayo ti dakes, nangruna no adda pagkapuyan a lablabanantayo. (Isa. 55:7) No aramidentayo dayta, tulongannatayo ken ikkannatayo iti naespirituan, emosional, ken pisikal a pigsa tapno ‘maparukmatayo’ wenno maparmektayo dagiti dakes a tarigagaytayo.​—Gen. 4:7.

7. Kasano a napukaw ni Solomon ti nasayaat a relasionna ken Jehova?

⁷ Adu ti masursurotayo ken Ari Solomon. Idi agtutubo pay, nagpaiwanwan ken Jehova. Inikkan ti Dios iti naisangsangayan a sirib ken intalekna kenkuana ti pannakaibangon ti nadayag a templo idiay Jerusalem. Ngem napukaw ni Solomon ti relasionna ken Jehova. (1 Ar. 3:12; 11:1, 2) Iparit ti Linteg ti Dios a mangala ti Hebreo nga ari iti ‘adu nga assawa, tapno saan a sumiasi ti pusona.’ (Deut. 17:17) Nagsukir ni Solomon, ket naaddaan iti 700 nga assawa idi agangay. Nangala pay iti 300 a sabali nga assawa. (1 Ar. 11:3) Saan nga Israelita ti kaaduan nga assawana, ket agdaydayawda kadagiti ulbod a dios. Gapuna, sinukir met ni Solomon ti linteg ti Dios a mangiparit iti panagasawa iti ganggannaet a babbai.​—Deut. 7:3, 4.

8. Kasano kakaro ti panagsukir ni Solomon ken ni Jehova?

⁸ Gapu iti in-inut a panagsukir ni Solomon iti linteg ni Jehova, nakaaramid iti nakaro a kinadakes idi agangay. Nangibangon iti altar para iti diosa a ni Astoret ken sabali pay nga altar para iti ulbod a dios a ni Kemos. Kaduaenna sadiay dagiti assawana nga agdaydayaw  kadagiti ulbod a dios. Adu a lugar ti mabalinna a pangipatakderan kadagita nga altar, ngem impatakderna dagita iti maysa a bantay iti mismo a sango ti Jerusalem, a nangibangonanna iti templo ni Jehova! (1 Ar. 11:5-8; 2 Ar. 23:13) Mabalin nga impagarup ni Solomon a palabsen ni Jehova ti panagsukirna no la ket ta itultuloyna ti agdaton iti templo.

9. Ania ti resulta ti di panangipangag ni Solomon kadagiti pakdaar ti Dios?

⁹ Ngem saan a pulos palabsen ni Jehova ti dakes nga aramid. Ibaga ti Biblia: “Ni Jehova nagpungtot unay ken Solomon, agsipud ta ti pusona nagannayas nga immadayo ken Jehova . . . , daydiay nagparang kenkuana iti namindua. Ket maipapan itoy a banag imbilinna kenkuana a saan a sumurot kadagiti sabali a didios; ngem saanna a sinalimetmetan daydiay imbilin ni Jehova.” Kas resultana, saanen nga inaprobaran ken sinuportaran ti Dios. Saan a nagturay dagiti kaputotanna iti intero a nasion ti Israel ken nagsagabada kadagiti nakaro a problema iti ginasut a tawen.​—1 Ar. 11:9-13.

10. Ania ti posible a mangdadael iti nasayaat a relasiontayo iti Dios?

¹⁰ Kas iti kaso ni Solomon, ti maysa a posible a mangdadael iti espiritualidad ket ti pannakigayyem kadagidiay saan a makatarus wenno mangresrespeto kadagiti pagalagadan ni Jehova. Mabalin a dagitoy ket ti dadduma a miembro ti kongregasion a nakapuy ti espiritualidadda. Mabalin met a dagiti kabagian, kaarruba, katrabahuan, wenno kaeskuelaan a saan nga agdaydayaw ken Jehova. Aniaman ti kasasaad, no saan nga ipatpateg dagiti nasinged a kakaduatayo dagiti pagalagadan ni Jehova, mabalin a madadaelto ti nasayaat a relasiontayo iti Dios.

11. Ania ti makatulong kadatayo a mangilasin no kasapulan a liklikan ti maysa a kadua?

¹¹ Basaen ti 1 Corinto 15:33. Nasayaat ti kababalin ti adu a tattao, ken adu a saan a miembro ti kongregasion ti di agar-aramid iti dakes. No kasta dagiti kakaduam, ibilangmo kadi ida a nasayaat a kakadua? Isaludsodmo iti bagim no ania ti epektona iti relasionmo ken Jehova ti pannakikadkaduam kadakuada. Mapasayaatda kadi dayta? Ania ti adda iti pusoda? Kas pagarigan, ti laeng kadi pagsasaritaanda ket maipapan iti uso, kuarta, gadyet, panaglinglingay, wenno dadduma pay a material a banag? Masansan kadi a mangipababa iti sabsabali ti ibagbagada wenno narugit ti panagang-angawda? Impakdaar ni Jesus: “Ti naruay iti puso sawen ti ngiwat.” (Mat. 12:34) No makitam a posible a madadael ti nasayaat a relasionmo ken Jehova gapu kadagiti kakaduam, agtignayka a dagus ket limitaram ken, no kasapulan, isardengmon ti pannakigayyemmo kadakuada.​—Prov. 13:20.

12. (a) Ania ti nalawag nga impakaammo ni Jehova kadagiti Israelita di nagbayag kalpasan a pimmanawda idiay Egipto? (b) Ania ti insungbat dagiti Israelita iti kiddaw ti Dios a naipamaysa a debosion?

¹² Adda pay dagiti maadaltayo iti napasamak di nagbayag kalpasan a pimmanaw dagiti Israelita idiay Egipto. Nagtitiponda iti sango ti Bantay Sinai. Nalawag nga impakita ni Jehova ti kaaddana. Nangpataud iti nangisit nga ulep, sa gurruod, kimat, asuk, ken kasla napigsa ken agtultuloy nga uni ti tangguyob. (Ex. 19:16-19) Impakaammo ni Jehova ti bagina kadagiti Israelita kas “Dios a mangalkalikagum iti naipamaysa a debosion.” Impasiguradona nga agbalin a matalek kadagidiay mangay-ayat kenkuana ken mangtungpal kadagiti bilinna. (Basaen ti Exodo 20:1-6.) Kasla ibagbaga ni Jehova iti ilina, “No agtalinaedkayo iti dasigko, addaakto met kadakayo.” Ania ti aramidem no inkari ni Jehova a Dios nga agbalin a matalek kenka? Sigurado nga aramidem met ti inaramid dagiti Israelita. “Simmungbatda iti maymaysa a timek ket kinunada: ‘Situtulokkami a mangaramid iti amin a sasao a sinao ni Jehova.’” (Ex. 24:3) Ngem di nagbayag, adda nakasubokan ti kinamatalek dagiti Israelita a dida ninamnama.

13. Ania dagiti situasion a nakasubokan ti kinamatalek dagiti Israelita?

¹³ Nagbuteng dagiti Israelita iti nangisit nga ulep, gurruod, ken dadduma pay a nakaskasdaaw a pagilasinan manipud iti Dios. Immanamong ni Moises iti kiddawda nga agbalin a pannakangiwatda iti amin a pannakikomunikarda ken Jehova iti Bantay Sinai. (Ex. 20:18-21) Nabayag ni Moises iti tuktok ti bantay. Agyan kadi lattan dagiti Israelita iti let-ang nga awanen ti talkenda a lider? Nalawag a nakadepende unay ti pammatida iti pisikal a kaadda ni Moises. Nagdanagda ket imbagada ken Aaron: “Iyaramidannakami iti dios a mapanto nga umun-una kadakami, agsipud ta no maipapan itoy a Moises, ti lalaki a nangipanaw kadakami iti daga ti Egipto, pudno unay a saanmi nga ammo no ania ti napasamaken kenkuana.”​—Ex. 32:1, 2.

14. Ania ti di umiso a pinanunot dagiti Israelita, ken ania ti reaksion ni Jehova iti inaramidda?

¹⁴ Ammo dagiti Israelita a nadagsen a basol ken Jehova ti panagdayaw iti idolo. (Ex. 20:3-5) Ngem nagdayawda iti balitok nga urbon a baka! Uray nalawag a nagsukirda, inallilawda ti bagida ta pinanunotda nga addada pay laeng iti dasig ni Jehova. Inawagan pay ketdi ni Aaron ti panagdaydayaw iti urbon a baka kas “piesta ken Jehova”! Ania ti narikna ni Jehova? Kasla natraidor. Imbagana ken Moises a ‘nagtignay dagiti Israelita iti makadadael’ ken ‘simmiasida iti dalan nga imbilinna a papananda.’ ‘Gimmil-ayab ti unget’ ni Jehova ket kayatna pay ketdi idin nga ibusen ti baro a nasion ti Israel.​—Ex. 32:5-10.

15, 16. Kasano nga impakita da Moises ken Aaron a talaga nga addada iti dasig ni Jehova? (Kitaen ti ladawan iti rugi ti artikulo.)

¹⁵ Nagdesision ni Jehova a dina ibusen dagiti Israelita. Gapu iti asina, naikkan dagiti matalek nga agdaydayaw iti gundaway nga agtalinaed iti dasigna. (Ex. 32:14) Idi nakita ni Moises ti kinagulo dagiti tattao​—nga agpupukkaw, agkakanta, ken agsasalada iti sango ti maysa nga idolo​—rinumekrumekna ti balitok nga urbon a baka. Sa impakaammona: “Siasino ti adda iti dasig ni Jehova? Umay kaniak!” Nagtignay ti ‘amin nga annak ni Levi ket naguurnongda’ iti aglawlaw ni Moises.​—Ex. 32:17-20, 26.

¹⁶ Nupay adda paset ni Aaron iti pannakaaramid ti idolo, nagbabawi ken kimmadua iti dadduma pay a Levita iti dasig ni Jehova. Saan laeng a dimmasig ken Jehova dagitoy a matalek no di ket simminada pay kadagiti agar-aramid iti dakes. Nainsiriban dayta a tignay, ta rinibu ti napapatay iti dayta  nga aldaw gapu iti idolatria. Ngem inkari ni Jehova a bendisionanna dagidiay dimmasig kenkuana.​—Ex. 32:27-29.

17. Ania ti maadaltayo iti sasao ni Pablo iti pasamak maipapan iti balitok nga urbon a baka?

¹⁷ Dinakamat ni apostol Pablo ti pasamak maipapan iti balitok nga urbon a baka sa impakdaarna: “Dagitoy a banag nagbalinda a pagulidanantayo, tapno ditay agbalin . . . a managrukbab iti idolo, kas iti inaramid ti sumagmamano kadakuada. Naisuratda a pammakdaar kadatayo a nadatngan dagiti panungpalan dagiti sistema ti bambanag. Iti kasta ti mangipagarup nga isu sitatakder agannad koma a saan a maikulbo.” (1 Cor. 10:6, 7, 11, 12) Kas impaganetget ni Pablo, posible a mairaman iti dakes nga aramid uray dagiti agdaydayaw ken Jehova. Mabalin a panunoten dagidiay tumulok iti sulisog a nasayaat latta ti relasionda ken Jehova. Ngem dina kayat a sawen a gapu ta kayat ti maysa ti agbalin a gayyem ni Jehova wenno ibagbagana a matalek Kenkuana, anamonganen isuna ni Jehova.​—1 Cor. 10:1-5.

18. Ania ti mabalin a mangyadayo kadatayo ken Jehova, ken ania ti resultana?

¹⁸ Nadanagan dagiti Israelita iti panagbayag ni Moises idiay Sinai, ket mabalin a madanagantayo met iti kasla nabayag nga idadateng ti aldaw a panangukom ni Jehova ken iti iyaay ti baro a lubong. Mabalin a kasla mabayag pay a matungpal dagitoy a kari wenno kasla saan a nakappapati. No saan a mailinteg ti kasta a panagpampanunot, mabalin nga iyun-unatayon ti nainlasagan a tarigagaytayo imbes a ti pagayatan ni Jehova. Inton agangay, umadayotayon ken Jehova ket agaramidtayon iti bambanag a ditayo pulos pinanunot nga aramiden idi nasayaat pay ti espiritualidadtayo.

19. Ania koma ti ditayo liplipatan, ken apay?

¹⁹ Ditayo koma liplipatan a kidkiddawen kadatayo ni Jehova ti naimpusuan a panagtulnog ken naipamaysa a debosion. (Ex. 20:5) Aniaman nga iyaadayo iti panagdaydayaw ken Jehova kaipapananna ti panagaramid iti pagayatan ni Satanas, ket agresulta laeng dayta iti didigra. Isu nga impalagip ni Pablo: “Dikay mabalin ti uminum iti kopa ni Jehova ken iti kopa dagiti sairo; dikay mabalin ti makiraman iti ‘lamisaan ni Jehova’ ken iti lamisaan dagiti sairo.”​—1 Cor. 10:21.

20. Kasano a matulongannatayo ni Jehova uray nagkamalitayo?

²⁰ Adda napateg a pagpapadaan dagiti salaysay ti Biblia maipapan kada Cain, Solomon, ken dagiti Israelita idiay Bantay Sinai. Adda idi gundaway dagitoy nga indibidual nga ‘agbabawi ken agbaw-ing.’ (Ara. 3:19) Nalawag a saan a dagus a tallikudan ni Jehova dagidiay nakaaramid iti kamali. Iti kaso ni Aaron, pinakawan isuna ni Jehova. Ita, mabalin a pakdaarannatayo ni Jehova babaen ti maysa a salaysay iti Biblia, naibatay-Biblia a publikasion, wenno naayat a balakad ti padatayo a Kristiano. No ipangagtayo dagita a pakdaar, masiguradotayo ti asi ni Jehova.

21. Ania koma ti determinasiontayo no masubok ti kinamatalektayo ken Jehova?

²¹ Adda panggep ti di kaikarian a kinamanangngaasi ni Jehova. (2 Cor. 6:1) Ikkannatayo iti gundaway a ‘mangtallikud iti di kinanadiosan ken nailubongan a tartarigagay.’ (Basaen ti Tito 2:11-14.) Bayat nga addatayo iti “tengnga daytoy agdama a sistema ti bambanag,” maipasangotayo kadagiti situasion a mangsubok iti naipamaysa a debosiontayo ken Jehova. Determinadotayo koma nga agtalinaed iti dasigna, ta ‘rebbeng nga agbutengtayo ken Jehova a Diostayo. Rebbeng nga agserbitayo kenkuana, ket rebbeng a kumpettayo kenkuana’!​—Deut. 10:20.