1-2. (a) Apay a saantay a masdaaw no maiparit ti panagdaydayawtayo? (b) Ania ti usigentayo iti daytoy nga artikulo?

IDI 2018, nasurok a 223,000 nga agibumbunannag iti naimbag a damag ti agnanaed kadagiti pagilian a maparparitan wenno malimlimitaran dagiti naespirituan nga aktibidadtayo. Saan a nakaskasdaaw daytoy. Kas naadaltayo iti napalabas nga artikulo, ekspektaren dagiti pudno a Kristiano a maidadanesda. (2 Tim. 3:12) Sadinoman ti paggigianantayo, mabalin a bigla ken di ninamnama nga iparit ti gobierno ti panagdaydayawtayo iti ay-ayatentayo a Dios, ni Jehova.

² No iparit ti gobierno iti lugaryo ti panagdaydayaw ken Jehova, isaludsodmo dagitoy iti bagim: ‘No maidadanestayo, kayatna kadi a sawen a napukawtayon ti pabor ti Dios? Mapasardeng kadi ti pannakaiparit ti panagdaydayawtayo ken Jehova? Masapul kadi nga umakarak iti pagilian a nawayaak a makapagdayaw iti Dios?’ Pagsasaritaantayo dagita iti daytoy nga artikulo. Usigentayo met no kasano a maitultuloytayo ti agdayaw ken Jehova uray maiparit ti trabahotayo ken no ania ti masapul a liklikantayo.

3. Sigun iti 2 Corinto 11:23-27, ania a pannakaidadanes ti napasaran ni apostol Pablo, ken ania ti maadaltayo iti dayta?

³ No iparit ti gobierno ti panagdaydayawtayo, baka ipapantayo nga awan kadatayo ti pamendision ti Dios. Ngem laglagipentayo a no maidadanestayo, dina kayat a sawen a saanen a maragsakan ti Dios kadatayo. Alaentayo a pagarigan ni apostol Pablo. Sigurado nga adda kenkuana ti pabor ti Dios. Naaddaan iti pribilehio a mangisurat iti 14 a surat iti Kristiano  a Griego a Kasuratan, ken nagbalin nga apostol kadagiti nasion. Nupay kasta, nagsagaba iti nakaro a pannakaidadanes. (Basaen ti 2 Corinto 11:23-27.) Ipakita ti kapadasan ni apostol Pablo a mabalin nga ipalubos ni Jehova a maidadanes dagiti matalek nga adipenna.

4. Apay a guraennatayo ti lubong?

⁴ Inlawlawag ni Jesus no apay nga ekspektarentayo a maidadanestayo. Imbagana a maguratayo gapu ta saantayo a paset ti lubong. (Juan 15:18, 19) No maidadanestayo, dina kayat a sawen nga awan kadatayo ti pamendision ni Jehova. Imbes ketdi, ebidensia dayta nga ar-aramidentayo ti umiso!

5. Mapasardeng kadi dagiti tattao ti panagdaydayawtayo ken Jehova? Ilawlawag.

⁵ Saan a naan-anay a mapasardeng dagiti tattao ti panagdaydayawtayo iti mannakabalin-amin a Dios, ni Jehova. Adu ti nangpadas ngem napaayda. Kitaentayo ti napasamak idi Gubat Sangalubongan II. Nakaro idi ti panangidadanes ti adu a gobierno iti ili ti Dios. Saan laeng a ti partido a Nazi idiay Germany ti nangiparit iti trabaho dagiti Saksi ni Jehova no di pay ket dagiti gobierno ti Australia, Canada, ken dadduma pay a pagilian. Ngem kitaentayo ti napasamak. Idi nangrugi ti gubat idi 1939, adda 72,475 nga agibumbunannag iti intero a lubong. Ipakita dagiti report nga idi agpatingga ti gubat idi 1945, addan 156,299 nga agibumbunannag gapu iti pamendision ni Jehova! Nasurok a doble ti ngimmatuan ti bilang dagiti agibumbunannag!

6. Imbes a mapabutngantayo, ania ti mabalin a resulta ti pannakaidadanes? Mangted iti pagarigan.

⁶ Imbes a mapabutngantayo, mabalin a makatulong ti pannakaidadanes tapno mas determinadotayo nga agserbi ken Jehova. Kas pagarigan, maysa nga agassawa nga adda bassit nga anakda ti agnanaed iti pagilian a mangiparparit iti panagdaydayawtayo. Imbes nga agpaabakda iti buteng, nag-regular pioneer-da. Nagikkat pay ketdi ti asawa a babai iti trabahona a nangato ti sueldona tapno makapagpayunir. Imbaga ti asawa a lalaki a gapu iti pannakaiparit, adu ti naginteres kadagiti Saksi ni Jehova. Kas resultana, alisto a nakairugi kadagiti panangyadal iti Biblia. Adda pay nasayaat nga epekto ti pannakaiparit. Imbaga ti maysa a panglakayen iti dayta a pagilian nga adu kadagiti nagsardeng nga agserbi ken  Jehova ti nangrugin a makigimong ken nagbalin manen nga aktibo.

7. (a) Ania ti maadaltayo iti Levitico 26:36, 37? (b) Ania ti aramidem no iparit ti gobierno ti trabahotayo?

⁷ No iparit dagiti bumusbusor ti panagdaydayawtayo, namnamaenda nga agbutengtayo ket saantayon nga agserbi ken Jehova. Mabalin met nga agiwarasda kadagiti ulbod nga estoria, mangibaonda kadagiti mangsukisok iti balaytayo, ipandatayo iti korte, wenno ibaludda pay ketdi ti dadduma kadatayo. Mangnamnamada a mapabutngantayo no maibaludda ti sumagmamano kadatayo. No agbutengtayo kadakuada ken iti mabalin nga aramidenda kadatayo, baka datayon a mismo ti “mangiparparit” iti bukodtayo a panagdaydayaw. Saantay a kayat ti agbalin a kas kadagiti nadeskribir iti Levitico 26:36, 37. (Basaen.) Ditay koma ipalubos a ti buteng ti mangkissay iti regtatayo wenno mangpasardeng iti naespirituan nga aktibidadtayo. Naan-anay nga agtalektayo ken Jehova ken saantayo nga agdanag. (Isa. 28:16) Ikararagtayo nga iwanwannatayo ni Jehova. Ammotayo a babaen ti tulongna, uray ti kabibilgan a gobierno ti tao saannatayo a mapasardeng a simamatalek nga agdayaw iti Diostayo.​—Heb. 13:6.

8-9. (a) Ania a personal a desision ti aramiden ti tunggal ulo ti pamilia wenno tunggal indibidual? (b) Ania ti makatulong iti maysa tapno makaaramid iti umiso a desision?

⁸ No iparit ti gobierno iti lugaryo ti panagdaydayawtayo, baka panunotem a masapul nga umakarka iti pagilian a nawayaka nga agserbi ken Jehova. Personal a desision dayta. Ngem sakbay nga agdesisionka, makatulong no usigem ti inaramid dagiti Kristiano idi umuna a siglo idi naidadanesda. Kalpasan a natay ni Esteban gapu iti pannakauborna, dagiti adalan idiay Jerusalem immakarda idiay Judea ken Samaria ken uray idiay Fenicia, Chipre, ken Antioquia. (Mat. 10:23; Ara. 8:1; 11:19) Ngem mabalin met a panunotem ti napasamak idi naidadanes manen dagiti Kristiano idi umuna a siglo. Nagdesision ni apostol Pablo a saan a pumanaw kadagiti lugar a mangbusbusor iti trabaho a panangasaba. Imbes ketdi, uray nagpeggad ti biagna, inkasabana ti naimbag a damag ken pinabilegna dagiti kakabsat kadagiti siudad a nakaro ti pannakaidadanes.​—Ara. 14:19-23.

⁹ Ania ti maadaltayo kadagitoy a salaysay? Personal a desision ti ulo ti pamilia no umakarda wenno saan. Sakbay nga agdesision, masapul nga agkararag ken panunotenna a naimbag ti kasasaad ti pamiliana ken dagiti mabalin a positibo ken negatibo nga epekto kadakuada ti panagakarda. Iti daytoy a banag, tunggal Kristiano ‘ibaklayna ti bukodna nga awit.’ (Gal. 6:5) Saantay koma nga ukomen ti dadduma iti desisionda.

10. Ania dagiti instruksion nga ited ti sanga nga opisina ken dagiti panglakayen?

¹⁰ Kasanom a maitultuloy ti agdayaw ken Jehova no adda panangiparit? Ti sanga nga opisina ikkanna dagiti panglakayen kadagiti instruksion ken praktikal a suhestion no kasano ti makaala iti naespirituan a taraon, no kasano ti panaggigimong, ken no kasano nga ikasaba ti naimbag a damag. No saan a makontak ti sanga nga opisina dagiti panglakayen, dagiti panglakayen ti tumulong kenka ken iti amin a miembro ti kongregasion tapno maitultuloyyo ti agdayaw ken Jehova. Mangtedda kadagiti instruksion a naibatay iti Biblia ken kadagiti publikasiontayo.​—Mat. 28:19, 20; Ara. 5:29; Heb. 10:24, 25.

11. Apay a masiguradom nga addanto naespirituan a taraonmo, ken ania ti aramidem tapno maprotektaram dayta?

 ¹¹ Inkari ni Jehova a mapnek iti naespirituan a taraon dagiti adipenna. (Isa. 65:13, 14; Luc. 12:42-44) Masiguradom ngarud nga aramiden ti organisasionna ti amin tapno maipaay ti pammaregta a kasapulam. Ania ti mabalinmo nga aramiden? Bayat ti pannakaiparit, mangbirokka iti nasayaat a lugar a pangidulinam iti Bibliam ken iti dadduma pay a naespirituan a taraon nga adda kenka. Dimo ibatbati dagita a napapateg a banag​—nayimprenta man wenno digital—​iti lugar nga alisto a masarakan. Masapul nga aramidentayo ti kabaelantayo tapno agtalinaedtayo a nabileg iti naespirituan.

12. Ania nga urnos ti aramiden dagiti panglakayen tapno saan a madmadlaw dagiti bumusbusor ti panaggigimongtayo?

¹² Dagiti ngay linawas a gimong? Mangyurnosto dagiti panglakayen kadagiti gimong a di madmadlaw dagiti bumusbusor. Mabalin nga ibagada nga aggigimongkayo iti babassit a grupo ken posible a baliwbaliwanda ti oras ken lokasion dagita. Maprotektaram dagiti kakabsat nga umatender no ikapkapsutmo ti agsao no mapanka iti gimong wenno no agawidka. Baka nasayaat met no saan unay a pormal ti pagbadom.

13. Ania ti maadaltayo kadagiti kakabsattayo iti dati a Soviet Union?

¹³ Maipapan iti panangasaba, agduduma ti situasion iti tunggal lugar. Ngem gapu ta ay-ayatentayo ni Jehova ken maragsakantayo a mangipakaammo iti Pagarianna, mangbiroktayo iti pamay-an a mangasaba. (Luc. 8:1; Ara. 4:29) Maipapan iti panangasaba dagiti Saksi ni Jehova iti dati a Soviet Union, kuna ti historiador a ni Emily B. Baran: “Idi imbaga ti gobierno a maiparit ti panangasaba dagiti Saksi, nakisaritada kadagiti kaarruba, katrabahuan, ken gagayyemda. Idi naipan dagiti Saksi kadagiti kampo konsentrasion gapu iti dayta, kinasabaanda dagiti padada a balud.” Saan a nagsardeng a nangasaba dagiti kakabsattayo iti dati a Soviet Union uray naparitanda. No bilang maiparit ti panangasaba iti lugaryo, sapay koma ta kasta met ti determinasionmo!

14. Ania ti pakdaar kadatayo ti Salmo 39:1?

¹⁴ Agannadka kadagiti impormasion nga ibagam. Bayat ti pannakaiparit, masapul nga ammotayo no kaano ti “tiempo ti panagulimek.” (Ecl. 3:7) Ditay koma ibagbaga dagiti impormasion a masapul nga isekreto, kas iti nagan dagiti kakabsattayo, ti lokasion dagiti gimong, no kasanotayo a mangaskasaba, ken no kasano nga umaw-awattayo iti naespirituan a taraon. Saantay nga ibagbaga dagitoy kadagiti agtuturay wenno kadagiti kasla maseknan a gagayyem ken kakabagiantayo iti  lugartayo wenno iti sabali a pagilian, Saksida man wenno saan. No ibagatayo dagita, irisrisgotayo ti biag dagiti kakabsattayo.​—Basaen ti Salmo 39:1.

15. Ania ti padpadasen ni Satanas nga aramiden kadatayo, ken kasanotayo a mapagballigian dayta?

¹⁵ Ditay ipalubos a dagiti babassit a problema ti mamagsisina kadatayo. Ammo ni Satanas a nalaka a marpuog ti nasinasina a sangakabbalayan. (Mar. 3:24, 25) Kanayon a padpadasenna ti mangpataud iti banag a mamagsisina kadatayo, ta kayatna a datayo ti aglalaban imbes nga isu ti labanantayo.

16. Ania a nagsayaat nga ulidan ti impakita ni Sister Gertrud Poetzinger?

¹⁶ Uray dagiti nataenganen a Kristiano masapul nga agannadda iti daytoy a silo ni Satanas. Kitaentayo ti kapadasan ti dua a napulotan a kakabsat a babbai, da Gertrud Poetzinger ken Elfriede Löhr. Naibaludda a kadua ti dadduma a Kristiano a babbai iti kampo konsentrasion dagiti Nazi. Nagimon ni Gertrud idi nangipaay ni Elfriede kadagiti makaparegta a palawag iti dadduma a sister iti kampo. Idi agangay, nakarikna ni Gertrud iti bain ket impakaasina a tulongan ni Jehova. Insuratna: “Masapul nga akseptarentayo a nalalaing wenno ad-adu ti pribilehio ti dadduma ngem kadatayo.” Kasano a nalabananna ti imonna? Nagpokus ni Gertrud iti kinasingpet ni Elfriede ken iti dadduma pay a nasayaat a kababalinna. Kas resultana, naisubli ti nasayaat a relasionna ken Elfriede. Agpada a nalasatanda ti pannakaibaludda ket nagserbida a simamatalek ken Jehova agingga a nagpatingga ti biagda ditoy daga. No ikagumaantayo a solbaren dagiti di pagkikinnaawatan iti nagbabaetantayo nga agkakabsat, awan ti makapagsisina kadatayo.​—Col. 3:13, 14.

17. Apay a ditay koma agbalin a nadarasudos?

¹⁷ Dika agbalin a nadarasudos. No surotentayo ti instruksion dagiti mapagtalkan ken nadutokan a kakabsat a lallaki, maliklikantayo dagiti problema. (1 Ped. 5:5) Kas pagarigan, iti maysa a pagilian a maiparit ti trabahotayo, inyurnos dagiti nadutokan a kakabsat ti impormal a panangasaba ngem imbilinda a saan nga agibati dagiti agibumbunannag iti nayimprenta a literatura. Ngem adda payunir a brother a saan a nagtulnog ket nangibati iti literatura. Ania ti resultana? Di nagbayag kalpasan ti panangasabada, inimbestigaran ida dagiti polis. Agparang nga adda opisial a nangsipsiput kadakuada ket nakompiskarna ti literatura nga imbatida. Ania ti maadaltayo iti daytoy a kapadasan? Masapul a sumurottayo iti instruksion uray no panagkunatayo ket nasaysayaat ti ammotayo. Kanayon a bendisionannatayo ni Jehova no makitinnulongtayo  kadagiti kakabsat a naapointaran a mangidaulo kadatayo.​—Heb. 13:7, 17.

18. Apay a masapul a liklikantayo ti agaramid kadagiti di kasapulan a paglintegan?

¹⁸ Dika agar-aramid kadagiti di kasapulan a paglintegan. No agaramid dagiti panglakayen kadagiti kasta a paglintegan, padpadagsenanda dagiti kakabsatda. Malagip ni Brother Juraj Kaminský ti napasamak bayat ti pannakaiparit iti dati a Czechoslovakia: “Kalpasan a naaresto ti adu a panglakayen, ti dadduma a nabati a panglakayen a mangidadaulo kadagiti kongregasion ken sirkito nagaramidda kadagiti paglintegan no ania ti aramiden ken saan nga aramiden dagiti kakabsat.” Saannatayo nga inikkan ni Jehova iti autoridad a mangidesision iti dadduma. Ti maysa nga agar-aramid kadagiti di kasapulan a paglintegan saanna a salsalakniban dagiti kakabsatna​—padpadasenna ketdi nga iturayan ti pammatida.​—2 Cor. 1:24.

19. Iti laksid ti panangikagumaan ni Satanas, ania ti ipasigurado ti 2 Cronicas 32:7, 8?

¹⁹ Saanto nga agsardeng ti kangrunaan a kabusortayo, ni Satanas a Diablo, a mangidadanes kadagiti matalek nga adipen ni Jehova. (1 Ped. 5:8; Apoc. 2:10) Padpadasen ni Satanas ken dagiti sumupsuporta kenkuana nga iparit ti panagdaydayawtayo ken Jehova. Ngem saantayo nga agpaabak iti buteng! (Deut. 7:21) Kaduatayo ni Jehova, ken itultuloynatayo a tulongan uray no maiparit ti trabahotayo.​—Basaen ti 2 Cronicas 32:7, 8.

20. Ania ti determinasionmo?

²⁰ Sapay koma ta tuladentayo ti determinasion dagiti kakabsattayo idi umuna a siglo, a nangibaga kadagiti agtuturay idi panawenda: “No ipagarupyo a nalinteg iti imatang ti Dios nga agtulnogkami kadakayo imbes nga iti Dios, dakayo ti agdesision. Ngem no dakami, saan a mabalin nga isardengmi nga ibaga ti bambanag a nakita ken nangngegmi.”​—Ara. 4:19, 20.