1-2. (a) Sigun iti bilin ni Jesus iti Mateo 28:18-20, ania ti kangrunaan a mision ti kongregasion Kristiano? (b) Ania dagiti saludsod a sungbatantayo iti daytoy nga artikulo?

MAGAGGAGARAN la ketdi dagiti apostol idi nagtitiponda iti sikigan ti maysa a bantay. Kalpasan ti panagungar ni Jesus, inyurnosna nga agkikitada iti dayta a lugar. (Mat. 28:16) Nalabit dayta ti tiempo a “nagparang iti nasurok a 500 a kakabsat iti maysa a gundaway.” (1 Cor. 15:6) Apay nga inyurnosna daytoy a panagkikitada? Tapno itedna daytoy a makapagagar a mision: “Inkayo ngarud kadagiti tattao iti amin a nasion ket pagbalinenyo ida nga adalak.”​—Basaen ti Mateo 28:18-20.

² Dagiti adalan a dimngeg iti sasao ni Jesus ket nagbalin a paset ti kongregasion Kristiano idi umuna a siglo. Ti kangrunaan a mision dayta a kongregasion ket ti panangtulong iti ad-adu pay a tattao nga agbalin nga adalan ni Kristo. * Adda itan rinibribu a pudpudno a kongregasion Kristiano iti intero a daga, ket dayta pay laeng ti kangrunaan a misionda. Iti daytoy nga artikulo, sungbatantayo ti uppat a saludsod: Apay a nakapatpateg ti panangtulong kadagiti tattao nga agbalin nga adalan? Ania ti ramanen dayta? Adda kadi paset ti amin a Kristiano iti dayta a trabaho? Ken apay a masapul nga agan-anustayo iti daytoy a trabaho?

3. Sigun iti Juan 14:6 ken 17:3, apay a nakapatpateg ti panangtulong kadagiti tattao nga agbalin nga adalan?

³ Apay a nakapatpateg ti trabaho a panangtulong kadagiti tattao nga agbalin nga adalan? Gapu ta dagiti laeng adalan ni Kristo ti agbalin a gayyem ti Dios. Kasta met, dagidiay sumursurot ken Kristo sumayaat ti biagda itan ken adda namnamada nga agbiag nga agnanayon. (Basaen ti Juan 14:6; 17:3.) Wen, adda napateg a responsabilidad nga intalek kadatayo ni Jesus, ngem saantayo nga agmaymaysa a mangitungpal iti dayta. Insurat ni apostol Pablo maipapan iti bagina ken iti dadduma a nasinged a kakaduana: “Katrabahuannakami ti Dios.” (1 Cor. 3:9) Anian a nagsayaat a pribilehio nga inted ni Jehova ken ni Kristo kadatayo nga imperpekto a tattao!

4. Ania ti masursurotayo iti kapadasan da Ivan ken Matilde?

⁴ Dakkel a rag-o ti mariknatayo no tulongantayo dagiti tattao nga agbalin nga adalan. Alaentayo a pagarigan ti kapadasan ti agassawa a da Ivan ken Matilde a taga-Colombia. Kinasabaanda ti maysa nga agtutubo nga agnagan Davier, a nangibaga kadakuada: “Kayatko ti agbalbaliw, ngem kasla diak kaya.” Boksingero ni Davier, agdrogdroga, mammartek, ken kabkabbalayna ti nobiana a ni Erika. Inlawlawag ni Ivan: “Inrugimi nga iyadalan iti Biblia. Adayo ti lugarda ket masapul nga agbisikletakami iti adu nga oras iti napitak a kalsada. Nakipagadal met ni Erika idi nadlawna a simmayaat ti kababalin ni Davier.” Idi agangay, saanen nga agdrogdroga ni Davier, saan metten nga agin-inum, ken insardengnan ti panagboksing. Nagkasarda metten ken Erika. Kuna ni Matilde: “Idi nagbautisar da Davier ken Erika idi 2016, malagipmi ti ibagbaga idi ni Davier, ‘Kayatko ti agbalbaliw, ngem kasla diak kaya.’ Uraykami la nakasangit.” Awan duadua a mariknatayo ti napalalo a rag-o no matulongantayo dagiti tattao nga agbalin nga adalan ni Kristo.

5. Ania ti umuna nga addang tapno matulongantayo dagiti tattao nga agbalin nga adalan?

⁵ Ti umuna nga addang tapno matulongantayo dagiti tattao nga agbalin nga adalan ket ti ‘panangbirok’ kadagidiay mayat nga agsursuro maipapan ken Jehova. (Mat. 10:11) Pampaneknekantayo a talaga a Saksinatayo ni Jehova no kasabaantayo ti amin a makasaritatayo. Pampaneknekantayo a pudnotayo a Kristiano no surotentayo ti bilin ni Kristo a mangasaba.

6. Ania ti makatulong tapno naballigi ti ministeriotayo?

⁶ Adda dagiti magagaran a mangammo kadagiti kinapudno iti Biblia, ngem adu a makasaritatayo ti kasla saan nga interesado iti damo. Mabalintayo a tukayen ti interesda. Tapno naballigi ti ministeriotayo, masapul a napagpanunotan ti pamay-antayo a mangasaba. Mangpilika kadagiti espesipiko a topiko a posible a makapainteres kadagiti makasaritam. Kalpasanna, iplanom no kasano nga irugi ti tunggal topiko.

7. Kasano a mairugim ti makisarita iti maysa a tao, ken apay a napateg a dumngegka ken respetuem ti opinionna?

⁷ Kas pagarigan, mabalinmo nga ibaga iti bumalay: “Adda koma damagek kadakayo. Adu a problematayo ita ti mapaspasaran met dagiti tattao iti intero a lubong. Panagkunayo, kasapulan ngata ti maysa a gobierno a mangituray iti intero a lubong tapno masolbar dagitoy a problema?” Kalpasanna, ilawlawagmo ti Daniel 2:44. Wenno mabalinmo nga  ibaga iti maysa a tao: “Panagkunayo, ania ngata ti tulbek tapno dumakkel a nasingpet dagiti ubbing?” Kalpasanna, ilawlawagmo ti Deuteronomio 6:6, 7. Aniaman a topiko ti piliem, panunotem dagiti tattao a makasaritam. Panunotem no kasano a magunggonaanda no maammuanda ti talaga nga isursuro ti Biblia. No makisarsaritaka kadakuada, masapul a dumngegka ken respetuem ti opinionda. Iti kasta, ad-addanto a matarusam ida, ket ad-addanto met a kayatda ti dumngeg kenka.

8. Apay a kasapulan nga itultuloytayo ti agsarungkar?

⁸ Sakbay nga agpayadal iti Biblia ti maysa a tao, baka kasapulan nga an-anusam a sarungkaran. Apay? Gapu ta mabalin nga awan isuna wenno dimo makasarita inton agsublika. Kasta met, baka kasapulan a mamin-adu a subliam sakbay a kayatna ti makipagadal iti Biblia. Laglagipem a nalaklaka a dumakkel ti mula no regular a masibugan. Kasta met, posible a dumakkel ti ayat ti maysa a tao ken Jehova ken ni Kristo no regular nga ilawlawagtayo kenkuana ti Sao ti Dios.

9-10. Apay a maibagatayo a karaman ti tunggal Kristiano iti panagbirok kadagiti tattao a nasingpet ti panagpuspusona?

⁹ Karaman ti tunggal Kristiano iti panagbirok kadagiti tattao a nasingpet ti panagpuspusona. Mayarigtayo daytoy a trabaho iti panagbirok iti napukaw nga ubing. Kasano? Alaentayo a pagarigan ti napasamak iti nayaw-awan nga ubing a tallo ti tawenna. Agarup 500 a tattao ti nakiraman iti panagbirok kenkuana. Kalpasan ti 20 nga oras, maysa a boluntario ti nakasarak iti mapukpukaw nga ubing iti nalawa a kamamaisan. Saan a kayat ti boluntario ti mapadayawan. Kinunana: “Adukami a nagtitinnulong a nangbirok kenkuana.”

¹⁰ Adu a tattao ti kas iti dayta nga ubing a  nayaw-awan. Awan ti namnamada, ngem kayatda ti matulongan. (Efe. 2:12) Nasuroktayo a walo a milion a mangbirbirok kadagitoy a maikari a tattao. Baka awan ti nabirokam a mayat a makipagadal iti Biblia. Ngem dagiti kakaduam nga agibumbunannag iti teritoriayo mabalin nga adda nabirokanda a kayatna a maammuan ti kinapudno iti Sao ti Dios. No ti maysa a kabsat ket nakabirok iti agbalin nga adalan ni Kristo, nakaragragsak ti tunggal maysa a nakiraman iti panagbirok.

11. Uray no awan ti iyad-adalam iti Biblia ita, ania dagiti pamay-an a makatulongka iti panagbalin dagiti tattao nga adalan?

¹¹ Uray no awan ti iyad-adalam iti Biblia ita, adda maitulongmo tapno agbalin dagiti tattao nga adalan. Kas pagarigan, mabalinmo a kablaawan ken gayyemen dagiti kabbaro no makigimongda iti Kingdom Hall. Iti kasta, makatulongka a mangkombinsir kadakuada nga ayat ti pakabigbigan dagiti pudno a Kristiano. (Juan 13:34, 35) Uray kadagiti ababa a sungbatmo iti gimong, masursuruam dagiti kabbaro a mangyebkas iti pammatida iti naimpusuan ken nadayaw a pamay-an. Mabalinmo met a kaduaen iti ministerio ti kabbaro nga agibumbunannag ken tulongam nga agusar iti Biblia a mangisuro kadagiti tattao. No aramidem dayta, isursurom a tuladenna ni Kristo.​—Luc. 10:25-28.

12. Masapul kadi a nakalalaingtayo tapno adda mayadalantayo iti Biblia? Ilawlawag.

¹² Saantayo koma a panunoten a masapul a nakalalaingtayo tapno masuruantayo dagiti tattao nga agbalin nga adalan ni Jesus. Apay? Alaentayo a pagarigan ni Faustina a taga-Bolivia. Saan a makabasa idi damo a makasarita dagiti Saksi ni Jehova. Ngem nakasursuro bassit nga agbasa. Bautisado itan, ket magusgustuanna ti mangisuro. Kaaduanna a mangikondukta iti lima a panagadal iti Biblia iti linawas. Nupay saan pay a nalaing nga agbasa a kas iti kaaduan nga iyad-adalanna, addan innem a natulonganna nga agpabautisar.​—Luc. 10:21.

13. Uray no okupadotayo, ania ti dadduma a bendision iti panangtulongtayo kadagiti tattao nga agbalin nga adalan?

¹³ Okupado ti adu a Kristiano a mangas-asikaso kadagiti napateg a responsabilidadda. Ngem iwaywayaanda latta ti mangyadal iti Biblia, ket maragragsakanda iti dayta. Usigentayo a pagarigan ni Melanie a taga-Alaska. Agsolsolo nga ina nga adda balasitangna a walo ti tawenna. Adda met full-time a trabahona ken tumultulong a mangaywan iti nagannakna nga adda kanserna. Maymaysa ni Melanie a Saksi iti naiputputong nga ilida. Kanayon nga ikararagna a maaddaan koma iti bileg a mapan mangasaba uray nakalamlamiis ta talaga a kayatna ti makabirok iti mayadalan iti Biblia. Idi agangay, nasarakanna ni Sara, a  maragragsakan idi naammuanna nga adda nagan ti Dios. Idi kuan, nagpayadal iti Biblia ni Sara. Kuna ni Melanie: “Nabambannogakon iti rabii ti Biernes, ngem mapanak latta mangyadal a kaduak ti balasangko ket agpadakami a magunggonaan. Magusgustuanmi nga i-research ti sungbat dagiti saludsod ni Sara, ket maragragsakankami a makakita iti panagbalinna a gayyem ni Jehova.” Nabusbusor ni Sara ngem situtured a nagibtur, pinanawanna ti relihionna, sa nagpabautisar.

14. (a) Kasano a mayarig iti panagkalap ti panagbirok kadagiti agbalin nga adalan? (b) Ania koma ti epekto kenka ti sasao ni Pablo iti 2 Timoteo 4:1, 2?

¹⁴ Uray no kasla saan a nabunga ti ministeriom, dika sumuksuko nga agbirok kadagiti potensial nga agbalin nga adalan. Laglagipem nga inyarig ni Jesus ti trabahotayo iti panagkalap iti ikan. Mabalin nga adu nga oras ti busbosen dagiti mangngalap sakbay nga adda makalapda. Masansan nga agkalapda iti tengnga ti rabii wenno iti parbangon, ket no dadduma, masapul a mapanda iti adayo. (Luc. 5:5) Iti umasping a pamay-an, adu nga oras a siaanus nga “agkalkalap” ti dadduma a Kristiano iti nagduduma a gundaway ken lugar. Apay? Tapno ad-adu ti tsansa a makasaritada dagiti tattao. Masansan a magunggonaan dagidiay kasta ti panagsakripisioda ta makabirokda kadagiti interesado iti mensahetayo. Mabalin kadi a padasem ti mangasaba iti sabali nga oras ti aldaw wenno iti lugar a posible nga ad-adu ti makasaritam?​—Basaen ti 2 Timoteo 4:1, 2.

15. Apay a kasapulan ti kinaanus iti panangyadal iti Biblia?

¹⁵ Apay a kasapulan ti kinaanus iti panangyadal  iti Biblia? Ti maysa a rason ket saantayo laeng a tulongan ti iyad-adalantayo a mangammo ken mangipateg kadagiti doktrina iti Biblia. Kasapulan a tulongantayo ti iyad-adalantayo a mangammo ken mangayat iti Autor ti Biblia, ni Jehova. Malaksid nga isurotayo ti iyad-adalantayo no ania dagiti kalikaguman ni Jesus kadagiti adalanna, masapul met nga isurotayo no kasano ti agbiag kas pudno a Kristiano. Masapul a siaanus a tulongantayo bayat nga ikagkagumaanna nga iyaplikar dagiti prinsipio ti Biblia. Nabalbaliwan ti dadduma ti panagpampanunot ken ugalida iti sumagmamano laeng a bulan. Ngem napapaut ti kasapulan ti dadduma.

16. Ania ti nasursurom iti kapadasan maipapan ken Raúl?

¹⁶ Ipakita ti kapadasan ti maysa a misionero idiay Peru ti gunggona ti kinaanus. “Duan a libro ti nalpasmi iti iyad-adalak iti Biblia a ni Raúl,” kuna ti misionero. “Ngem adda pay laeng dagiti nakaro a problemana. Nagulo ti panagasawana, agsasao iti dakes, ken saan a resrespetuen dagiti annakna gapu iti dakes a kababalinna. Nupay kasta, regular a makigimgimong, isu nga intultuloyko a bisitaen tapno tulongak isuna ken ti pamiliana. Nasurok a tallo a tawen kalpasan a nangrugi nga agadal, nakualipikar nga agpabautisar.”

17. Ania ti usigentayo iti sumaruno nga artikulo?

¹⁷ Imbaga ni Jesus nga “inkayo . . . kadagiti tattao iti amin a nasion ket pagbalinenyo ida nga adalak.” Tapno maaramidtayo dayta, kasapulan met a kasaritatayo dagiti tattao a naiduma ti opinionda, a pakairamanan dagidiay awan ti relihionna wenno saan a mamati nga adda Dios. Usigen ti sumaruno nga artikulo no kasano a maipakaammotayo kadakuada ti naimbag a damag.