MAADAL NGA ARTIKULO 31
“Agbalinkayo a Natibker ken Di Magaraw”
“Patpatgek a kakabsat, agbalinkayo a natibker ken di magaraw.”—1 COR. 15:58.
KANTA 122 Agtalinaed a Natibker, Saan a Magaraw!
ITI DAYTOY A PANAGADAL a
1-2. Iti ania a pamay-an a ti maysa a Kristiano ket kas iti maysa a nangato a pasdek? (1 Corinto 15:58)
IDI 1978, naibangon ti 60 ti kadsaaranna a nangato a pasdek idiay Tokyo, Japan. Ngem masansan nga agginggined iti dayta a siudad isu a pampanunoten idi dagiti tattao a baka nalaka a marba dayta. Nupay kasta, inaramid dagiti inheniero dayta a pasdek a nalagda ken saan a maan-ano uray no dayyegen ti adu a ginggined. Dagiti Kristiano ket kas iti nangato a pasdek. Iti ania a pamay-an?
2 Masapul nga agtalinaed a balanse ti maysa a Kristiano no iti kinatibker ken pannakibagay. Rumbeng nga agbalin a natibker ken di magaraw no maipapan iti panangsurot kadagiti linteg ken pagalagadan ni Jehova. (Basaen ti 1 Corinto 15:58.) “Nakasagana nga agtulnog” ken saan nga agkompromiso. Ngem masapul nga agbalin a “nainkalintegan,” wenno mannakibagay, no posible wenno no kasapulan. (Sant. 3:17) No nasursuron ti maysa a Kristiano ti agbalin a balanse, saan nga istrikto unay wenno napanuynoy unay. Iti daytoy nga artikulo, usigentayo no kasanotayo nga agtalinaed a di magaraw. Kitaentayo met ti lima a pamay-an a padpadasen ni Satanas a pakapuyen ti determinasiontayo ken ammuentayo no kasanotayo a malabanan dagita.
KASANOTAYO NGA AGBALIN A NATIBKER?
3. Ania dagiti linteg ti Katan-okan a Manangted-linteg a mabasa iti Aramid 15:28, 29?
3 Ni Jehova ti Katan-okan a Manangted-linteg. Kanayon a sigsiguraduenna a nalawag a maawatan ti ilina dagiti lintegna. (Isa. 33:22) Kas pagarigan, imbaga ti bagi a manarawidwid idi umuna a siglo ti tallo a pamay-an a masapul nga agtalinaed a natibker dagiti Kristiano: (1) liklikan ti idolatria, ni laeng Jehova ti pagdayawan, (2) raemen ti kinasagrado ti dara, ken (3) agtulnog iti bilin ti Biblia a liklikan ti seksual nga immoralidad. (Basaen ti Aramid 15:28, 29.) Kasano nga agtalinaed a natibker dagiti Kristiano ita kadagita a tallo a pamay-an?
4. Kasanotayo a maited ken Jehova ti naipamaysa a debosion? (Apocalipsis 4:11)
4 Liklikantayo ti idolatria, ni laeng Jehova ti pagdayawantayo. Binilinna dagiti Israelita nga ipaayda kenkuana ti naipamaysa a debosion. (Deut. 5:6-10) Idi a ni Jesus ket sinulisog ti Diablo, nalawag nga imbagana a masapul a ni laeng Jehova ti pagdayawantayo. (Mat. 4:8-10) Saantayo ngarud nga agdaydayaw kadagiti narelihiosuan nga idolo. Saantayo met nga idoluen dagiti tattao—dagiti man lider ti relihion, politiko, wenno dagiti nalatak iti isports ken paglinglingayan—nga ibilangtayo ida a kasla dios. Ni Jehova ti dasigantayo ken ti laeng pagdayawantayo ket daydiay ‘nangparsua iti amin a banag.’—Basaen ti Apocalipsis 4:11.
5. Apay nga agtulnogtayo iti linteg ni Jehova maipapan iti kinasagrado ti biag ken dara?
5 Agtulnogtayo iti linteg ni Jehova maipapan iti kinasagrado ti biag ken dara. Apay? Imbaga ngamin ni Jehova a ti dara irepresentarna ti biag, a napateg a regalona. (Lev. 17:14) Idi impalubosen ni Jehova a kanen dagiti tattao ti karne, imbilinna a saanda a kanen ti dara dayta. (Gen. 9:4) Inulitna dayta a bilin idi intedna ti Mosaiko a Linteg iti Israel. (Lev. 17:10) Ken inwanwanna ti bagi a manarawidwid idi umuna a siglo a mangibilin iti amin a Kristiano nga ‘itultuloyda a liklikan ti dara.’ (Ara. 15:28, 29) Sititibker nga agtulnogtayo iti dayta a bilin no agdesisiontayo maipapan iti panagpaagas. b
6. Ania dagiti ikagumaantayo nga aramiden tapno masurottayo ti bilin ni Jehova a liklikantayo ti seksual nga immoralidad?
6 Siiinget nga agtulnogtayo iti bilin ni Jehova a liklikantayo ti seksual nga immoralidad. (Heb. 13:4) Nagusar ni apostol Pablo iti simboliko a sao a mangbalakad kadatayo a ‘patayentayo’ dagiti paset ti bagitayo—kayatna a sawen, aramidentayo ti amin a kabaelantayo tapno maikkat dagiti dakes a tarigagaytayo. Saantayo a kitaen wenno aramiden ti aniaman nga agresulta iti seksual nga immoralidad. (Col. 3:5; Job 31:1) No adda sulisog, dagus nga ikkatentayo iti panunottayo wenno ditay aramiden ti aniaman a mabalin a mangdadael iti pannakigayyemtayo iti Dios.
7. Ania ti masapul a determinasiontayo, ken apay?
7 Namnamaen ni Jehova a ‘naimpusuan nga agtulnogtayo.’ (Roma 6:17) Kanayon a pagsayaatantayo dagiti bilinna, ken ditay mabalin a baliwan dagita. (Isa. 48:17, 18; 1 Cor. 6:9, 10) Ikagumaantayo a paragsaken ni Jehova ken tuladen ti kababalin ti salmista a nangibaga: “Desididoak a kanayon a mangtungpal kadagiti regulasionmo, agingga a mapugsat ti maudi nga angesko.” (Sal. 119:112) Ngem padpadasen ni Satanas a pakapuyen ti determinasiontayo. Ania dagiti pamay-anna?
KASANO A PADPADASEN NI SATANAS A PAKAPUYEN TI DETERMINASIONTAYO?
8. Kasano nga us-usaren ni Satanas ti pannakaidadanes tapno pakapuyenna ti determinasiontayo?
8 Pannakaidadanes. Us-usaren ti Diablo ti pisikal ken emosional a panangatake tapno pakapuyenna ti determinasiontayo. Kayatnatayo nga ‘alun-onen’ tapno madadael ti relasiontayo ken Jehova. (1 Ped. 5:8) Dagiti Kristiano idi umuna a siglo ket napangpangtaan, nakabkabil, ken napapatay gapu iti determinasionda nga agtalinaed a natibker. (Ara. 5:27, 28, 40; 7:54-60) Agtultuloy nga us-usaren ni Satanas ti pannakaidadanes agingga ita. Makita dayta iti naranggas a pannakatrato dagiti kakabsattayo idiay Russia ken iti dadduma pay a pagilian ken iti panangidadanes dagiti bumusbusor.
9. Mangted iti pagarigan no apay a masapul nga agannadtayo kadagiti di madmadlaw a panangpilit.
9 Di madmadlaw a panangpilit. Us-usaren ni Satanas dagiti “nasikap nga aramid” malaksid iti direkta a panangatake. (Efe. 6:11) Kitaentayo ti napasamak iti brother a ni Bob a nayospital tapno maoperaan. Imbagana kadagiti doktor a saan a pulos nga agpayalison iti dara. Rinespeto ti surgeon ti desisionna. Ngem iti rabii sakbay a maoperaan ni Bob kalpasan a nakaawiden ti pamiliana, bimmisita ti anesthesiologist. Imbagana ken Bob a baka saanda nga agusar iti dara, ngem isaganada latta dayta no bilang kasapulan. Impagarup siguro ti doktor a baliwan ni Bob ti desisionna no nakaawiden ti pamiliana. Ngem nagtalinaed a natibker ni Bob, ket imbagana a saan nga agpayalison iti dara aniaman ti mapasamak.
10. Apay a maysa a silo ti panagrasrason ti tao? (1 Corinto 3:19, 20)
10 Panagrasrason ti tao. No kitaentayo dagiti bambanag sigun iti panangmatmat ti tao, baka saantayton nga ikankano ni Jehova ken dagiti pagalagadanna. (Basaen ti 1 Corinto 3:19, 20.) “Ti sirib daytoy a lubong” ket masansan a makaay-ayo kadagiti tarigagay ti tao. Tinulad ti sumagmamano a Kristiano idiay Pergamo ken Tiatira dagiti gagangay a kapanunotan dagiti immoral ken agdaydayaw iti idolo kadagita a siudad. Nangted ni Jesus iti nadagsen a balakad kadagita a kongregasion gapu ta pampanuynoyanda ti seksual nga immoralidad. (Apoc. 2:14, 20) Ita, im-impluensiaandatayo dagiti tattao iti aglawlawtayo a mangtulad kadagiti di umiso a kapanunotanda. Baka kombinsirendatayo dagiti kapamilia ken am-ammotayo nga istriktotayo unay ken durogandatayo nga agkompromiso. Kas pagarigan, baka ibagbagada a saan a dakes a pagustuantayo dagiti tarigagaytayo ken daanen dagiti pagalagadan ti Biblia maipapan iti moral.
11. Ania ti masapul a liklikantayo tapno agtalinaedtayo a natibker?
11 No dadduma, mabalin nga irasontayo a saan unay a nalawag dagiti instruksion ni Jehova. Baka kayattayo pay ketdi ti “lumbes iti bambanag a naisurat.” (1 Cor. 4:6) Kasta ti di umiso nga inaramid dagiti lider ti relihion idi panawen ni Jesus. Ti Linteg ket ninayonanda kadagiti bukodda a pagannurotan isu a pinadagsenanda dagiti ordinario a tattao. (Mat. 23:4) Ipapaayannatayo ni Jehova kadagiti nalawag nga instruksion babaen ti Sao ken organisasionna. Saanen a kasapulan a nayonantay pay dagita. (Prov. 3:5-7) Saantayo ngarud a lumbes kadagiti naisurat iti Biblia wenno mangaramid kadagiti bukodtayo a pagannurotan para kadagiti kapammatiantayo maipapan iti personal a bambanag.
12. Kasano nga us-usaren ni Satanas dagiti “ulbod a panagrasrason”?
12 Panangallilaw. Us-usaren ni Satanas dagiti “ulbod a panagrasrason” ken “pagdamdamuan a bambanag iti lubong” tapno iyaw-awan ken pagsisinaenna dagiti tattao. (Col. 2:8) Idi umuna a siglo, karaman kadagita dagiti pilosopia a naibatay kadagiti panagrasrason ti tao, di nainkasuratan a sursuro dagiti Judio, ken ti sursuro a masapul a suroten dagiti Kristiano ti Mosaiko a Linteg. Panangallilaw dagita ta iyadayoda dagiti tattao ken Jehova, ti pudpudno a Gubuayan ti sirib. Ita, us-usaren ni Satanas ti media ken social network tapno iwarasna dagiti naim-imbento a damag (conspiracy theories) ken peke a damag nga iwarwaras dagiti lider ti politika. Nagadu dagita bayat ti COVID-19 pandemic. c Nakaro ti panagdanag dagidiay dimngeg kadagita a makaallilaw nga impormasion. Ngem saan a kasta dagiti Saksi ni Jehova a dimngeg kadagiti instruksion ti organisasiontayo.—Mat. 24:45.
13. Apay a masapul nga agannadtayo kadagiti pakasingaan?
13 Pakasingaan. Masapul nga agtultuloytayo a nakapokus kadagiti “napatpateg a bambanag.” (Fil. 1:9, 10) Gapu kadagiti pakasingaan, mabalin a masayang ti adu a tiempo ken pigsatayo. Mabalin a masingatayo kadagiti gagangay nga ar-aramidentayo—kas iti pannangan, panaginum, panaglinglingay, ken panagtrabaho—no ipalubostayo a dagita ti ipangpangrunatayo iti biagtayo. (Luc. 21:34, 35) Inaldaw met nga adda dagiti damdamag maipapan kadagiti isyu iti politika ken kagimongan. Saantayo koma nga agpasinga kadagita a debate. Ta no saan, mabalin a mangrugin nga adda dasigantayo iti isip ken pusotayo. Us-usaren ni Satanas amin dagita a nadakamaten a pamay-an tapno mapakapuyna ti determinasiontayo a mangaramid iti umiso. Ammuentayo no kasanotayo a malabanan dagiti panagreggetna tapno agtalinaedtayo a natibker.
KASANOTAYO NGA AGTALINAED A NATIBKER?
Tapno agtalinaedka a natibker, laglagipem ti panagdedikar ken panagpabautisarmo, adalem ken utobem ti Sao ti Dios, patibkerem ti pusom, ken agtalekka ken Jehova (Kitaen ti parapo 14-18)
14. Ania ti maysa a makatulong tapno agtalinaedtayo a natibker iti dasig ni Jehova?
14 Laglagipem ti panagdedikar ken panagpabautisarmo. Inaramidmo dagita gapu ta kayatmo ti dumasig ken Jehova. Panunotem dagiti nakatulong kenka isu a nakombinsirka a nasarakamon ti kinapudno. Naaddaanka iti umiso a pannakaammo maipapan ken Jehova isu nga immuneg ti panagraem ken panagayatmo kenkuana kas nailangitan nga Amam. Naaddaanka iti pammati isu a natignayka nga agbabawi. Tinignaynaka ti pusom a mangisardeng kadagiti di umiso nga ar-aramidem idi tapno agbiagkan a maitunos iti pagayatan ti Dios. Nabang-aranka idi nariknam a pinakawannakan ti Dios. (Sal. 32:1, 2) Inatenderam dagiti gimong ken inkasabamon dagiti nagsayaat a naammuam. Kas dedikado ken bautisado a Kristiano, magmagnakan iti dalan nga agturong iti biag, ket determinadoka nga agtultuloy a magna iti dayta.—Mat. 7:13, 14.
15. Apay a makagunggona ti panagadal ken panagutob?
15 Adalem ken utobem ti Sao ti Dios. Saan a nalaka a matumba ti kayo a nauneg dagiti ramutna. Makapagtalinaedtayo met a natibker no nauneg ti pannakairamut ti pammatitayo iti Sao ti Dios. Bayat a dumakdakkel ti maysa a kayo, umun-uneg ken agsaksaknap dagiti agsasanga a ramutna. No agadal ken agutobtayo, pabpabilgentayo ti pammatitayo ken mas kombinsidotayo a dagiti dalan ti Dios ti kasayaatan. (Col. 2:6, 7) Panunotem no kasano a nakatulong ti panangisuro, panangiwanwan, ken pannalaknib ni Jehova kadagiti adipenna idi un-unana. Kas pagarigan, dimngeg a naimbag ni Ezekiel bayat a rukrukoden a naimbag ti maysa nga anghel ti nasirmatana a templo. Dayta a sirmata ti nangpatibker ken Ezekiel, ken mangipaay kadatayo kadagiti praktikal a leksion no kasanotayo a masurot dagiti pagalagadan ni Jehova para iti nadalus a panagdaydayaw. d (Ezek. 40:1-4; 43:10-12) Magunggonaantayo met no mangiwayatayo iti tiempo nga agadal ken agutob kadagiti naun-uneg a bambanag iti Sao ti Dios.
16. Kasano a nagbalin a proteksion ken Bob ti natibker a puso? (Salmo 112:7)
16 Patibkerem ti pusom. Imbaga idi ni Ari David a saanna a pukawen ti panagayatna ken Jehova idi inkantana: “O Dios, natibker ti pusok.” (Sal. 57:7) Kayatayo met ti maaddaan iti natibker a puso a naan-anay nga agtalek ken Jehova. (Basaen ti Salmo 112:7.) Kitaentayo no kasano a nakatulong dayta ken Bob a nadakamaten. Idi naipakaammo kenkuana nga adda naisagana a dara no bilang kasapulan, dagus nga imbagana a no adda posibilidad a mayalisonan iti dara, dagus a pumanaw iti ospital. Imbaga ni Bob idi agangay, “Diak pulos nagduadua ken diak nagbuteng iti aniaman a mapasamak.”
No natibker ti pundasiontayo iti naespirituan, makapagtalinaedtayo a natibker aniaman a suot ti pakaipasanguantayo (Kitaen ti parapo 17)
17. Ania dagiti masursurotayo iti kapadasan ni Bob? (Kitaen met ti ladawan.)
17 Natibker ni Bob gapu ta nabayagen a desidido nga agtalinaed a natibker sakbay pay a nayospital. Umuna, kayatna a paragsaken ni Jehova. Maikadua, inadalna a naimbag ti ibagbaga ti Biblia ken dagiti publikasiontayo a naibatay iti Biblia maipapan iti kinasagrado ti biag ken dara. Maikatlo, kombinsido a manayon a gunggona ti resulta ti panangsurot iti bilin ni Jehova. Kayatayo met ti maaddaan iti natibker a puso, aniaman a suot ti pakaipasanguantayo.
Ni Barak ken dagiti kakaduana a situtured nga umatake iti armada ni Sisera (Kitaen ti parapo 18)
18. Ania ti masursurotayo ken Barak maipapan iti panagtalek ken Jehova? (Kitaen ti ladawan iti akkub.)
18 Agtalekka ken Jehova. Kitaentayo no kasano a nagballigi ni Barak ta nagtalek iti instruksion ni Jehova. Nupay awan idi ti kalasag wenno gayang iti intero nga Israel, binilin ni Jehova a makigubat kadagiti kompleto ti armasna a puersa militar ni Sisera a pangulo ti armada ti Canaan. (Uk. 5:8) Imbaga ni propeta Debora ken Barak a sumalog iti kapatagan tapno sabtenna ni Sisera ken ti 900 a karuahena. Nupay marigatan dagiti Israelita a makilaban kadagiti napartak a karuahe iti kapatagan, nagtulnog latta ni Barak. Bayat a sumalsalog dagiti soldado iti Bantay Tabor, pinagtudo ni Jehova iti napigsa. Nailumlom dagiti karuahe ni Sisera iti kapitakan, ket pinagballigi ni Jehova ni Barak. (Uk. 4:1-7, 10, 13-16) Pagballigiennatayo met ni Jehova no agtalektayo kenkuana ken iti instruksion nga ipapaayna babaen ti organisasionna.—Deut. 31:6.
DETERMINADO NGA AGTALINAED A NATIBKER
19. Apay a kayatmo ti agtalinaed a natibker?
19 Agtultuloy ti panangikagumaantayo nga agtalinaed a natibker agingga nga agbibiagtayo iti daytoy a sistema ti bambanag. (1 Tim. 6:11, 12; 2 Ped. 3:17) Determinadotayo koma a saan nga agpaabak iti pannakaidadanes, di madmadlaw a panangpilit, panagrasrason ti tao, panangallilaw, ken pakasingaan. (Efe. 4:14) Agtalinaedtay ketdi a natibker iti debosiontayo ken Jehova ken kanayon nga agtulnogtayo kadagiti bilinna. Ngem masapul met nga agbalintayo a nainkalintegan. Iti sumaruno nga artikulo, ammuentayo no kasano a da Jehova ken Jesus ti perpekto nga ulidan iti kinanainkalintegan.
KANTA 129 Masapul nga Itultuloytayo ti Agibtur
a Manipud pay idi panawen da Adan ken Eva, ikagkagumaan ni Satanas a kombinsiren dagiti tattao a masapul nga isuda ti agdesision no ania ti umiso ken di umiso. Kayatna a kasta met ti kapanunotantayo maipapan kadagiti linteg ni Jehova ken kadagiti instruksion a maaw-awattayo manipud iti organisasion. Makatulong daytoy nga artikulo tapno maliklikantayo nga aramiden ti kaykayattayo nga isursuro ti lubong ni Satanas ken tapno determinadotayo a kanayon nga agtulnog ken Jehova.
b Tapno maammuam no kasano a matulad dagiti Kristiano ti panangmatmat ti Dios iti dara, kitaem ti leksion 39 ti libro nga Agbiagka a Naragsak iti Agnanayon!
c Kitaen ti artikulo a “Protektaram ti Bagim iti Di Umiso nga Impormasion” iti jw.org.
d Para kadagiti detalye, kitaen ti kapitulo 13 ken 14 ti libro a Nadalus a Panagdaydayaw ken Jehova—Naisubli Met Laengen!