1. Ania dagiti naammuam a kinapudno idi nangrugika nga agadal iti Biblia?

 MALAGIPMO pay idi nangrugika nga agadal iti Biblia? Mabalin a nasdaawka idi naammuam nga adda nagan ti Dios. Baka nabang-aranka idi naammuam a saan a tutuoken ti Dios dagiti tattao iti umap-apuy nga impierno. Ken naragsakanka la ketdi iti namnama a makitamto manen dagiti ipatpategmo a natayen ken agkakaduakayto nga agbiag iti paraiso a daga.

2. Malaksid a naammuam dagiti kinapudno iti Biblia, ania pay dagiti nagrang-ayam? (Efeso 5:1, 2)

² Bayat nga ad-adda nga adalem ti Sao ti Dios, umun-uneg met ti ayatmo ken Jehova. Dayta nga ayat ti nangtignay kenka a mangyaplikar kadagiti nasursurom. Nangaramidka kadagiti nasaysayaat a desision a naibatay kadagiti prinsipio ti Biblia. Pinasayaatmo ti panagpampanunot ken kababalinmo ta kayatmo a paragsaken ti Dios. Kas iti maysa nga anak a tultuladenna ti naayat a nagannakna, tultuladem met ti nailangitan nga Amam.—Basaen ti Efeso 5:1, 2.

3. Ania dagiti mabalin nga isaludsodtayo iti bagitayo?

³ Mabalin nga isaludsodtayo iti bagitayo: ‘Naun-uneg kadi itan ti ayatko ken Jehova ngem idi kababautisarko? Sipud idi nagbautisarak, ti kadi panagpampanunot ken panagtigtignayko ket ad-addan a kas ken Jehova—aglalo iti panangipakita iti ayat kadagiti kakabsat?’ No medio limmamiis ti ‘damo nga ayatmo,’ saanka koma a maupay. Kasla kasta ti napasamak kadagiti Kristiano idi umuna a siglo. Ngem inayat latta ida ni Jesus, ken kasta met laeng ti marikriknana kadatayo. (Apoc. 2:4, 7) Ammona a kayatayo a pabaraen manen ti ayat a nariknatayo idi damo a naammuantayo ti kinapudno.

4. Ania ti adalentayo iti daytoy nga artikulo?

⁴ Iti daytoy nga artikulo, adalentayo no kasanotayo a maitultuloy a paunegen ti ayattayo ken Jehova ken iti sabsabali.  Kalpasanna, ammuentayo ti dadduma a bendision a maawattayo ken ti sabsabali no paunegentayo ti ayattayo.

5-6. Ania dagiti rigat a napasaran ni apostol Pablo bayat ti ministeriona, ngem apay a kayatna latta ti agtultuloy nga agserbi ken Jehova?

⁵ Naragsak ni apostol Pablo nga agserbi ken Jehova, ngem adu a rigat ti napasaranna. Masansan a nagdaliasat ni Pablo kadagiti adayo a lugar, ken narigat idi nga aramiden dayta. Bayat dagiti panagdaliasatna, adda dagiti tiempo a ‘nagpeggad kadagiti karayan’ ken “kadagiti tulisan.” Adda met dagiti tiempo a kinabkabil dagiti bumusbusor. (2 Cor. 11:23-27) Ken saan a kanayon nga inapresiar dagiti kapammatian ni Pablo dagiti napasnek a panagreggetna a tumulong kadakuada.—2 Cor. 10:10; Fil. 4:15.

⁶ Ania ti nakatulong ken Pablo tapno agtultuloy nga agserbi ken Jehova? Nagadu ti nasursuro ni Pablo maipapan iti personalidad ni Jehova manipud iti Kasuratan ken kadagiti mismo a kapadasanna. Gapu iti dayta, kombinsido ni Pablo nga ay-ayaten isuna ni Jehova a Dios. (Roma 8:38, 39; Efe. 2:4, 5) Nasursurona met nga ayaten unay ni Jehova. Impakita ni Pablo nga ay-ayatenna ni Jehova ‘babaen ti panagserbina ken agtultuloy a panagserbina kadagiti nasantuan.’—Heb. 6:10.

7. Ania ti maysa a pamay-an a mapaunegtayo ti ayattayo ken Jehova?

⁷ Mapaunegtayo ti ayattayo iti Dios no gagetantayo nga adalen ti Saona. Bayat a basbasaem ti Biblia, ikagumaam nga ammuen ti isuro ti tunggal bersikulo maipapan ken Jehova. Isaludsodmo iti bagim: ‘Kasano nga ipakita daytoy a salaysay nga ay-ayatennak ni Jehova? Ania dagiti rason a maammuak iti dayta tapno ayatek ni Jehova?’

8. Kasano a makatulong ti kararag tapno umuneg ti ayattayo iti Dios?

⁸ Ti sabali pay a pamay-an a mapaunegtayo ti ayattayo ken Jehova ket kanayon nga ibagatayo kenkuana ti marikriknatayo babaen ti kararag. (Sal. 25:4, 5) Sungbatan met ni Jehova dagiti kararagtayo. (1 Juan 3:21, 22) Imbaga ti sister a ni Khanh a taga-Asia: “Idi damo, ay-ayatek ni Jehova gapu kadagiti naammuak maipapan kenkuana. Ngem immuneg dayta nga ayat bayat a makitkitak no kasano a sungsungbatanna dagiti kararagko. Isu a kayatko nga aramiden dagiti banag a mangparagsak kenkuana.” b

9. Kasano nga impakita ni Timoteo nga immuneg ti ayatna kadagiti kakabsat?

⁹ Sumagmamano a tawen kalpasan a nagbalin a Kristiano ni Pablo, naam-ammona ti maysa a mapagwadan nga agtutubo a lalaki a ni Timoteo. Ay-ayaten ni Timoteo ni Jehova ken dagiti tattao. Imbaga ni Pablo kadagiti taga-Filipos: “Awan ti sabali a maibaonko nga addaan iti kababalin a kas [ken Timoteo] a napaypayso a mangasikaso kadagiti pakaseknanyo.” (Fil. 2:20) Saan a dinakamat ditoy ni Pablo ti abilidad ni Timoteo kas nalaing a mangorganisar wenno agpalawag, ngem nalawag a nakita ni Pablo nga ay-ayaten unay ni Timoteo dagiti kakabsat. Sigurado a segseggaan dagiti kongregasion ti panagbisita manen ni Timoteo.—1 Cor. 4:17.

10. Kasano nga impakita ni Anna ken ni lakayna ti ayatda kadagiti kakabsat?

¹⁰ Mangbiroktayo met kadagiti pamay-an tapno matulongantayo dagiti kakabsat. (Heb. 13:16) Usigentayo ti kapadasan ni Anna a nadakamat iti napalabas nga artikulo. Kalpasan ti maysa a napigsa a bagyo, napanda ken  lakayna iti balay ti maysa a pamilia a padada a Saksi. Nakitada a nadadael ti atep ti balay dayta a pamilia isu nga awan ti nadalus a badoda. Imbaga ni Anna: “Inyawidmi dagiti badoda, linabaanmi, sa insublimi a naplansa ken nakupinen. Para kadakami, bassit laeng dayta. Ngem gapu iti inaramidmi, nagbalinkami a nasinged nga aggagayyem agingga ita.” Ay-ayaten ni Anna ken ni lakayna dagiti kakabsat isu a natignayda a mangipaay iti praktikal a tulong.—1 Juan 3:17, 18.

11. (a) Ania ti masansan a marikna ti dadduma no ipakitatayo nga ay-ayatentayo ida? (b) Sigun iti Proverbio 19:17, ania ti aramiden ni Jehova no ipakpakitatayo ti ayat?

¹¹ No naimbagtayo ken ipakpakitatayo ti ayat iti dadduma, masansan a makitada dagiti panagreggettayo a mangtulad iti panagpampanunot ken ar-aramiden ni Jehova. Ken mabalin nga ad-adda nga apresiarenda ti kinaimbagtayo ngem iti ipagaruptayo. Malaglagip unay ni Khanh a nadakamat itay dagidiay timmulong kenkuana. Imbagana: “Agyamyamanak unay iti amin a naayat a sister a nangikuyog kaniak iti ministerio. Dinagasdak, inawisdak nga agmerienda wenno mangaldaw, ken intuloddak tapno natalgedak a makaawid iti balayko. Naamirisko itan nga adu ti inaramidda a sakripisio gapu ta ay-ayatendak.” Siempre, saan nga amin ket agyaman kadatayo iti ar-aramidentayo para kadakuada. Imbaga ni Khanh maipapan kadagidiay timmulong kenkuana: “Kayatko koma a subadan ti adu a kinaimbagda kaniak. Ngem diak ammo no sadinon ti paggigiananda. Ngem ammo ni Jehova, isu nga ikarkararagko nga isuna la koman ti mangsubad kadagiti inaramidda para kaniak.” Husto ni Khanh. Makitkita ni Jehova uray ti kabassitan a kinaimbag nga ar-aramidentayo para iti dadduma. Ibilangna dayta kas napateg a sakripisio ken kas utang a bayadannanto.—Basaen ti Proverbio 19:17.

12. Kasano a maipakita dagiti kakabsat a lallaki ti ayatda iti kongregasion? (Kitaen met dagiti ladawan.)

 ¹² No maysaka a brother, ania dagiti aramidem tapno maipakitam nga ay-ayatem ken tultulongam ti dadduma? Dinamag ti agtutubo a brother a ni Jordan iti maysa a panglakayen no kasano nga ad-adda a makatulong iti kongregasion. Kinomendaran ti panglakayen dagiti nagrang-ayanna ken nangted kadagiti singasing no kasano nga ad-adu ti maaramidanna. Kas pagarigan, imbagana a sapsapaen ni Jordan ti sumangpet iti Kingdom Hall ken kablaawanna dagiti umatender, agkomento kadagiti gimong, regular a mangasaba a kadua dagiti kagrupona, ken mangpanunot kadagiti praktikal a pamay-an a matulonganna ti dadduma. Idi inaramid ni Jordan dagita, saanna la a nasursuro dagita no di ket immuneg met ti ayatna kadagiti kakabsat. Nasursuro ni Jordan a no agbalin a ministerial nga adipen ti maysa a brother, saanna la a rugian ti tumulong, no di ket agtultuloy a tumulong.—1 Tim. 3:8-10, 13.

13. Kasano a ti ayat ti nangtignay iti kabsat a ni Christian tapno makualipikar manen kas panglakayen?

¹³ Kasanon no maysaka idi a ministerial nga adipen wenno panglakayen? Malaglagip ni Jehova dagiti inaramidmo ken ti ayat a nangtignay kenka a mangaramid kadagita. (1 Cor. 15:58) Makitkitana met ti ayat nga agtultuloy nga ipakpakitam. Naupay ti kabsat a ni Christian idi naikkat a panglakayen. Ngem imbagana: “Inkeddengko nga aramidek ti amin a kabaelak nga agserbi ken Jehova gapu iti ayat—adda man wenno awan ti pribilehiok.” Idi agangay, naapointaran manen kas panglakayen. Inamin ni Christian: “Medio agnerbiosak idi nga agserbi manen kas panglakayen. Ngem napanunotko a gapu iti asi ni Jehova, ipalpalubosna nga agserbiak manen kas panglakayen. Isu nga awatek  dayta a pribilehio ta ay-ayatek isuna ken dagiti kakabsat.”

14. Ania ti masursurom iti imbaga ti maysa a sister a taga-Georgia?

¹⁴ Ipakpakita met dagiti agserserbi ken Jehova nga ay-ayatenda dagiti kaarrubada. (Mat. 22:37-39) Kas pagarigan, imbaga ti sister a ni Elena a taga-Georgia: “Idi damo, ti laeng rason a kayatko ti mangasaba ket gapu ta ay-ayatek ni Jehova. Ngem bayat nga umun-uneg ti ayatko iti nailangitan nga Amak, umun-uneg met ti ayatko kadagiti tattao. Ikagkagumaak a panunoten dagiti problema a mapaspasaranda ken no ania a topiko ti mabalin a mangdanon iti pusoda. Gapu ta masansan a kasta ti pampanunotek, lallalo a kayatko a tulongan ida.”—Roma 10:13-15.

15-16. Kas nayakto kadagiti ladawan, ania dagiti bendision a maawattayo no ipakpakitatayo ti ayat iti sabsabali?

¹⁵ No ipakpakitatayo ti ayattayo kadagiti kakabsat, saan la nga isuda ti mabenepisiaran. Kalpasan a nangrugi ti COVID-19 pandemic, insuro ti brother a ni Paolo ken ti asawana ti adu a babbaket a kakabsat no kasanoda nga usaren dagiti gadyetda iti panangasaba. Nalaing itan ti maysa a sister a marigatan idi damo a mangusar iti gadyetna. Nausarna dayta a mangawis kadagiti kabagianna iti Memorial. Innem a pulo kadakuada ti immatender babaen ti videoconference! Ti sister ken ti amin a kabagianna ket nabenepisiaran iti panagregget ni Paolo ken ni baketna. Idi agangay, insurat  ti sister ken Paolo: “Agyamanak iti panangisuroyo kadakami a babbaket. Diakto pulos malipatan ti pannakaseknan ni Jehova ken ti kanayon a panagreggetyo a tumulong.”

¹⁶ Gapu kadagiti kapadasan a kas iti dayta, adda napateg a nasursuro ni Paolo. Naamirisna a napatpateg ti ayat ngem iti pannakaammo wenno natural nga abilidad. Malagipna: “Agserserbiak idi kas manangaywan iti sirkito. Ita, naamirisko a nupay mabalin a nalipatanen dagiti kakabsat dagiti palawagko, malaglagipda latta ti praktikal a tulong nga impaayko kadakuada.”

17. Asino pay ti mabenepisiaran no ipakpakitatayo ti ayat?

¹⁷ No ipakitatayo ti ayat iti sabsabali, datayo a mismo ket mabenepisiaran kadagiti di ninamnama a pamay-an. Patalgedan dayta ni Jonathan a taga-New Zealand. Maysa a malem ti Sabado, nakitana ti maysa a payunir a mangaskasaba iti igid ti kalsada uray nakapudpudot. Inkeddeng ni Jonathan ti makikadua iti dayta a payunir kadagiti sumaruno a malem ti Sabado. Dina idi naamiris nga isu a mismo ket mabenepisiaran iti dayta a kinaimbagna. “Diak unay idi ma-enjoy ti mangasaba,” inamin ni Jonathan. “Ngem bayat a dumdumngegak iti pamay-an dayta a payunir a mangisuro ken no kasano kabunga ti ministeriona, talaga a na-enjoy-ko met laengen daytoy a trabaho. Naaddaanak met iti nasinged a gayyem a timmulong tapno rumang-ayak iti naespirituan, ma-enjoy-ko ti ministerio, ken lallalo a sumingedak ken Jehova.”

18. Ania ti kayat ni Jehova nga aramidentayo?

¹⁸ Kayat ni Jehova nga amintayo ket umuneg ti ayattayo kenkuana ken iti sabsabali. Kas iti naadaltayo, mapaunegtayo ti ayattayo ken Jehova no regular a basaentayo ti Saona, utobentayo dayta, ken makisaritatayo kenkuana babaen ti kararag. Mapaunegtayo met ti ayattayo kadagiti kakabsat no tulongantayo ida kadagiti praktikal a pamay-an. Bayat nga umun-uneg ti ayattayo, sumingsingedtayo ken Jehova ken iti naespirituan a pamiliatayo. No aramidentayo dagita, agnanayon a matagiragsaktayo dagita a panaggagayyem!