Ni Tatang ket maysa nga elder iti United Church of Canada iti lugarmi, isu a kada lawas ipannakami ken adingko iti Sunday school. Kalpasanna, iti 11:00 ti bigat, agkakaduakami a makimisa. Iti malem, agkakaduakami kada Nanang a mapan iti Kingdom Hall. Naglakami a nakita ti nagdumaan ti dua a relihion.

Inlawlawag ni Nanang dagiti nasursurona manipud iti Biblia kadagiti nabayagen a gagayyemna a da Bob ken Marion Hutcheson ket nagbalinda met a Saksi ni Jehova. Idi 1958, intugotdak ti pamilia Hutcheson a kadua ti tallo nga annakda a lallaki iti walo nga aldaw a Divine Will nga Internasional nga Asamblea idiay New York City. No lagipek dayta, naamirisko a saan a nalaka para kadakuada nga itugotdak. Ngem dayta nga asamblea ti maysa kadagiti diak malipatan a pasamak iti biagko.

Idi tin-edyerak, nagtarakenkami kadagiti animal ket magusgustuak dayta. Kayatko idi ti agbalin a beterinario. Nadakamat dayta ni Nanang iti maysa a panglakayen iti kongregasion. Siaayat nga impalagip kaniak ti panglakayen nga agbibiagtayon iti “maudi nga al-aldaw” ken dinamagna no ania ti epekto iti relasionko ken Jehova no ageskuelaak iti unibersidad iti sumagmamano a tawen. (2 Tim. 3:1) Gapu iti dayta, nagdesisionak a saanak nga ageskuela iti unibersidad.

Diak pay latta idi ammo no ania ti aramidek kalpasan a naggraduarak iti hayskul. Uray no mangaskasabaak iti kada ngudo ti lawas, saanko idi a ma-enjoy ti ministerio ken saanko a plano ti agpayunir. Iti dayta a tiempo, parparegtaendak da Tatang ken ti angkelko a saan a Saksi nga agtrabahoak iti full-time iti dakkel a kompania ti insurance iti Toronto. Nangato ti posision ni angkelko sadiay isu nga inawatko ti trabaho.

 Idiay Toronto, kanayon nga ag-overtime-ak ken makikadkaduaak kadagiti saan a Saksi isu a saanak a regular a makagimong ken mangasaba. Idi damo, nakipagyanak iti saan a Saksi a lolok. Ngem idi natayen, masapul nga agbirokak iti sabali a pagyanak.

Imbilangko a nagannak ti agassawa a Hutcheson a nangikuyog kaniak iti kombension idi 1958. Pinagyandak iti balayda ken tinulongandak a rumang-ay iti naespirituan. Idi 1960, nagpabautisarak a kadua ti anakda a ni John. Dagus a nagpayunir ni John isu a naparegtaak nga aggaggaget a mangasaba. Nakita dagiti kakabsat ti panagrang-ayko, ket naapointaranak idi agangay a mangidaulo iti Teokratiko nga Eskuelaan ti Panagministro. a

Idi 1966, nagkasarkami ken Randi Berge a maysa a naregta a payunir. Magagaran nga agserbi iti lugar a dakdakkel ti panagkasapulanna. Impakitaannakami iti personal nga interes ti manangaywan iti sirkitomi ket pinaregtanakami a tumulong iti kongregasion iti Orillia, Ontario. Isu a nagempake ken immakarkami sadiay.

Di nagbayag kalpasan a nakadanonkami iti Orillia, nagpayunirak metten kas ken Randi. Naakaranak iti kinaregtana! Idi impapusok ti agpayunir, nariknak a nagragsak gayam ti panangusar iti Biblia ken ti pannakakitak a maaw-awatan dagiti tattao ti kinapudno. Makaparagsak ta natulongak ti maysa a nagsayaat nga agassawa iti Orillia a mangbalbaliw iti biagda ken agbalin nga adipen ni Jehova.

Bayat ti panagpasiarmi idiay Toronto, naam-ammok ni Arnold MacNamara, maysa kadagiti mangidadaulo iti Bethel. Dinamagna no kayatmi ti agbalin nga special pioneer. Dagus nga insungbatko: “Wen! Uray sadino, basta saan nga idiay Quebec!” Naimpluensiaanak iti negatibo a rikna  dagiti agsasao iti English iti Canada maipapan iti gulo iti probinsia ti Quebec a French ti lengguahena. Iti dayta a tiempo, agprotprotesta dagiti tattao ta kayatda ti sumina iti Canada.

Kuna ni Arnold, “Idiay laeng Quebec ti pangibabaonan ita ti sangay kadagiti special pioneer.” Dagus nga immanamongak a mapankami. Ammok ngamin a kayat met ni Randi ti agserbi sadiay. Idi agangay, nabigbigko a maysa dayta kadagiti kasayaatan a desisionmi!

Lima a lawas a nagsursurokami iti French. Kalpasanna, kaduami ken Randi ti maysa nga agassawa a napan idiay Rimouski, agarup 540 a kilometro (336 a milia) iti amianan a daya ti Montreal. Adu pay ti masapul a sursuruenmi. Madlaw unay dayta iti maysa a gimong idi imbasak ti sumagmamano a pakaammo. Imbagak nga iti asidegen a kombension, adu ti sumangpet nga “ostrich a delegado” imbes nga “Austrian a delegado.”

Idiay Rimouski, malaksid kadakami nga uppat, nakaduami pay ti uppat a nareregta a babbalasang ken ti agassawa a Huberdeau ken ti dua nga annakda a babbai. Nagabang da Brother ken Sister Huberdeau iti maysa a dakkel a balay a pito ti kuartona. Inawaganmi dayta iti White House ta puraw ti pintura ti sango ken dagiti adigina. Nagtitinnulonganmi amin a payunir ti pagabang iti dayta. Kaaduanna a 12 agingga iti 14 ti aggigian sadiay. Kas special pioneer, mangasabakami ken Randi iti bigat, malem, ken rabii, isu nga apresiarenmi no kanayon nga adda makaduami a rummuar uray kadagiti nalamiis a rabii bayat ti winter.

Simmingedkami kadagidiay a matalek a payunir isu nga imbilangmi ida a kapamiliami. No dadduma, ag-bonfire-kami wenno adda aw-awaganmi iti “pierogi day.” Aldaw dayta nga aglutokami amin iti pierogi wenno dumpling nga agduduma ti palamanna. Musikero ti maysa kadagiti brother isu a kada rabii ti Sabado, masansan nga agkakanta ken agsasalakami.

Nabunga ti teritoriami idiay Rimouski! Iti uneg ti lima a tawen, maragsakankami ta nagpabautisar ti sumagmamano nga iyad-adalanmi iti Biblia. Agarup 35 ti nagbalin nga agibumbunannag iti kongregasionmi.

Nagsayaat ti pannakasanaymi kas ebanghelisador idiay Quebec. Nakitami no kasano a tinulongannakami ni Jehova iti ministerio ken kadagiti material a kasapulanmi. Nasursuromi met nga ayaten dagiti French, ti lengguaheda, ken ti kulturada. Gapu iti dayta, inayatmi met ti dadduma a kultura.—2 Cor. 6:13.

Dimi ninamnama a kiddawen ti sangay nga umakarkami iti ili ti Tracadie. Masarakan dayta iti makindaya a paset ti New Brunswick. Agproblemakami idi ta kapirpirmami ti kontrata nga abanganmi ti maysa nga apartment ken adda kontratak nga agisuro iti part-time iti maysa nga eskuelaan. Dadduma met nga iyad-adalanmi iti Biblia ti nabiit pay a nagbalin nga agibumbunannag ken madamakami nga agipatpatakder iti Kingdom Hall.

Iti intero a ngudo ti lawas, inkarkararagmi ti iyaakarmi. Pimmasiarkami met idiay Tracadie, ket nakitami a naiduma unay iti Rimouski. Ngem determinadokami a mapan sadiay gapu ta dayta ti kayat ni Jehova a papananmi. Sinubokmi ni Jehova ket nakitami nga inikkatna ti tunggal lapped. (Mal. 3:10) Kas iti dati, nalaklaka ti iyaakarmi gapu ta nabileg ti espiritualidad ni Randi, managsakripisio, ken managpakatawa.

 Ni laeng Robert Ross ti panglakayen iti baro a kongregasionmi. Nagpayunirda sadiay ken ni baketna a ni Linda. Ken uray idi naipasngay ti umuna nga anakda, nagdesisionda nga agtalinaed sadiay. Nupay adda idi ay-aywananda a bassit nga anakda, naparegtadakami unay ken Randi gapu ta managpadagusda, nagaget ken naregtada iti ministerio.

Kalpasan a nagpayunirkami iti dua a tawen iti Tracadie, nakaawatkami manen iti di ninamnama a sorpresa—agserbikami iti trabaho a panagdaliasat. Pito a tawen a nagserbikami kadagiti English a sirkito. Kalpasanna, nayakarkami iti French a sirkito idiay Quebec. Ni Léonce Crépeault ti manangaywan iti distrito idiay Quebec. Masansan a komendarannak gapu kadagiti palawagko. Ngem idi agangay, kanayon nga isaludsodna, “Kasano ngata nga agbalin a mas praktikal dagiti palawagmo?” b Nakatulong dayta a personal nga atensionna tapno pagbalinek a mas espesipiko ken nalaklaka a maawatan ti panangisurok.

Ti maysa kadagiti diak malipatan nga asaynmentko ket iti 1978 a “Naballigi a Pammati” nga Internasional a Kombension iti Montreal. Nagtrabahoak iti Food Service. Ekspektarenmi a 80,000 ti umatender ken adda baro nga urnos iti panagpakan. Baro ti amin: dagiti equipment, ti menu, ken ti pamay-an ti panagsagana. Addaankami iti agarup 20 a dadakkel a refrigerated trailer nga agperdi no dadduma. Sakbay ti umuna nga aldaw ti kombension, sakami la nakastrek iti istadium idi tengngan ti rabii ta adda ti immun-una a nayeskediul a paay-ayam. Parbangon pay laeng, masapul a papudotenmin dagiti oven tapno aglutokami iti pammigat! Nabambannogkami, ngem adu ti nasursurok kadagiti nagagaget, nataengan iti naespirituan, ken managpakatawa a padak a boluntario. Simmingedkami iti maysa ken maysa ket aggagayyemkami agingga ita. Nakaragragsakak ta addaak idi iti dayta a nakallalagip a kombension idiay Quebec, ti probinsia a nagpasar iti nakaro a pannakaidadanes bayat ti 1940’s ken 1950’s!

Adu ti nasursurok kadagiti padak a manangaywan bayat dagiti dadakkel a kombension idiay Montreal. Naminsan, ni David Splane a miembro itan ti Bagi a Manarawidwid ti nagserbi kas  convention overseer. Idi naited kaniak dayta nga asaynment iti simmaruno a kombension, naan-anay a timmulong ni David.

Kalpasan ti 36 a tawen a panagserbimi iti trabaho a panagdaliasat, naawisak nga agserbi kas instruktor iti School for Congregation Elders idi 2011. Iti dua laeng a tawen, 75 a nagduduma a kama ti nagturoganmi ken Randi, ngem sulit ti amin a sakripisiomi. Iti ngudo ti kada lawas, agyamyaman unay dagiti panglakayen ta nakitada a talaga a maseknan ti Bagi a Manarawidwid iti espiritualidad dagiti panglakayen.

Idi agangay, nagisuroak iti School for Kingdom Evangelizers. Masansan a madandanagan dagiti estudiante gapu ta nagadu ti aramidenda: pito nga oras kada aldaw ti klaseda, tallo nga oras kada rabii nga aramidenda dagiti asaynmentda, ken uppat wenno lima ti pasetda kada lawas. Inlawlawagmi ti kaduak nga instruktor a saanda a maaramidan dagita no awan ti tulong ni Jehova. Kanayon a malaglagipko ti ragsakda idi naamirisda a gapu ta nagpatulongda ken Jehova, ad-adu nga amang ti naaramidanda ngem iti impagarupda.

Ti personal nga interes ni Nanang ti nakatulong kadagiti iyad-adalanna iti Biblia tapno rumang-ayda. Nakatulong met dayta ken Tatang tapno lumukneng ti pusona ken awatenna ti kinapudno. Tallo nga aldaw kalpasan a natay ni Nanang, sinorpresanakami ni Tatang ta immay iti Kingdom Hall tapno dumngeg iti palawag publiko, ket intultuloyna ti nakigimong iti simmaruno a 26 a tawen. Uray no saan a nabautisaran ni Tatang, imbaga kaniak dagiti panglakayen nga isu ti kanayon a kasapaan kadagiti gimong iti kada lawas.

Nagsayaat met ti ulidan ni Nanang kadakami nga annakna. Amin a tallo a kakabsatko a babbai ken dagiti assawada ket matalek nga agserserbi ken Jehova. Dua a kakabsatko ti agserserbi kadagiti sanga nga opisina—maysa idiay Portugal ken ti sabali ket idiay Haiti.

Agserserbikami itan ken Randi kas special pioneer iti Hamilton, Ontario. Idi addakami iti trabaho a panagdaliasat, maragragsakankami a makikadua iti dadduma kadagiti panagsarungkar ken panangyadalda iti Biblia. Ngem ita, maragragsakankami a makakita iti panagrang-ay dagiti iyad-adalanmi. Ken bayat a makisinsinningedkami kadagiti kakabsat iti baro a kongregasionmi, maparparegtakami a makakita no kasano a tultulongan ida ni Jehova iti rigat ken nam-ay.

No lagipek ti napalabas, ap-apresiarenmi unay ti personal nga interes kadakami ti adu a kakabsat. Isu nga ikagkagumaanmi met nga ipakita ti ‘napasnek a pannakaseknan’ iti dadduma ken parparegtaenmi ida nga aramidenda ti amin a kabaelanda nga agserbi ken Jehova. (2 Cor. 7:6, 7) Kas pagarigan, iti maysa a pamilia, payunir ti asawa a babai, ti anak a lalaki, ken ti anak a babai. Dinamagko iti asawa a lalaki no adda planona nga agpayunir. Imbagana a tallo a payunir ti supsuportaranna. Isu a dinamagko, “Asino ngata ti nasaysayaat a mangsuporta kadakuada, sika wenno ni Jehova?” Pinaregtak a padasenna ti matagtagiragsakda. Innem a bulan kalpasanna, nagpayunir metten.

Itultuloymi ken Randi nga ‘ipakaammo iti sumaruno a henerasion’ ti maipapan ‘kadagiti nakaskasdaaw nga aramid’ ni Jehova ken namnamaenmi a matagiragsakda ti agserbi ken Jehova a kas kadakami.—Sal. 71:17, 18.