1. Apay a nainsiriban a saganaantayo dagiti didigra?

 TI PANAGSAGANA ket mangsalbar iti biag. Kas pagarigan, no adda didigra, dakdakkel ti posibilidad a makalasat dagidiay nagsagana para iti dayta ken makatulongda iti sabsabali. Kuna ti maysa nga organisasion iti Europe a tumultulong kadagiti tattao: “Ti panagsagana a naimbag ket mangsalbar iti biag.”

2. Apay a masapul a saganaantayo ti dakkel a rigat? (Mateo 24:44)

² Biglanto a mangrugi ti “dakkel a rigat.” (Mat. 24:21) Ngem saan a kas iti adu a dadduma a didigra, ammotayo a dumteng ti dakkel a rigat. Ngamin, agarup 2,000 a tawenen ti napalabas, impakpakauna ni Jesus kadagiti pasurotna a saganaanda dayta nga aldaw. (Basaen ti Mateo 24:44.) No nakasaganatayo, nalaklakatayo nga ibturan dayta a narigat a tiempo ken tulongan ti dadduma nga agibtur met.—Luc. 21:36.

3. Kasano a makatulong ti panagibtur, pannakipagrikna, ken ayat tapno masaganaantayo ti dakkel a rigat?

³ Usigentayo ti tallo a kualidad a makatulong tapno masaganaantayo ti dakkel a rigat. Anianto ti aramidentayo no maibilin nga ikasabatayo ti nasakit a mensahe ti panangukom ket busorendatayo dagiti saan a mamati? (Apoc. 16:21) Kasapulantayto ti panagibtur tapno agtulnogtayo ken Jehova ta agtalektayo a protektarannatayo. Anianto ti aramidentayo no mapukaw dagiti kakabsat ti dadduma wenno amin a material a sanikuada? (Hab. 3:17, 18) Kasapulanto a makipagriknatayo tapno ipaayantayo ida iti tulong a kasapulanda. Anianto ti aramidentayo no kapilitan a maymaysa pay laeng ti pagyanantayo a kadua dagiti kakabsat gapu iti iyaatake ti aliansa dagiti nasion? (Ezek. 38:10-12) Masapul nga ad-addanto nga ayatentayo ida tapno maibturantayo amin dayta a narigat a tiempo.

4. Kasano nga ipakita ti Biblia a masapul nga itultuloytayo a kultibaren ti panagibtur, pannakipagrikna, ken ayat?

⁴ Parparegtaennatayo ti Sao ti Dios nga itultuloytayo a kultibaren  ti panagibtur, pannakipagrikna, ken ayat. Kuna ti Lucas 21:19: “Maisalakanyonto ti biagyo no agibturkayo.” Ibaga ti Colosas 3:12: “Ikawesyo ti . . . pannakipagrikna.” Kuna pay ti 1 Tesalonica 4:9, 10: “Sinursuruannakayo ti Dios nga agiinnayat. . . . Ngem iparparegtami, kakabsat, nga itultuloyyo nga ad-adda pay nga aramiden dayta.” Naiturong amin dagita a bersikulo kadagiti adalan a nangipakitan iti panagibtur, pannakipagrikna, ken ayat. Ngem masapul nga itultuloyda idi a kultibaren dagita a kualidad. Kasta met ti masapul nga aramidentayo. Makatulong no usigentayo no kasano nga impakita dagiti nagkauna a Kristiano ti tunggal maysa kadagita a kualidad. Kalpasanna, kitaentayo no kasanotayo a matulad dagidiay nga adalan. Iti kasta, mapaneknekantayo a nakasaganatayo para iti dakkel a rigat.

5. Kasano a naibturan dagiti nagkauna a Kristiano dagiti suot a napasaranda?

⁵ Masapul idi nga agibtur dagiti nagkauna a Kristiano. (Heb. 10:36) Malaksid kadagiti problema a gagangay idi iti amin a tao, adda pay dagiti suot a napasaranda. Adu kadakuada ti naidadanes. Indadanes ida dagiti Judio a lider ti relihion, dagiti agtuturay iti Roma, ken uray dagiti mismo a kapamiliada. (Mat. 10:21) Iti met uneg ti kongregasion, adda dagiti tiempo a masapul a labananda ti impluensia dagiti apostata ken dagiti mamagsisina a pannursuroda. (Ara. 20:29, 30) Ngem nakapagibtur dagidiay a Kristiano. (Apoc. 2:3) Kasano? Pinampanunotda dagiti naisurat iti Kasuratan nga ulidan iti panagibtur kas ken Job. (Sant. 5:10, 11) Inkararagda met iti Dios a pabilgenna ida. (Ara. 4:29-31) Ken nagpokusda kadagiti nasayaat a resulta ti panagibturda.—Ara. 5:41.

6. Ania ti masursurom iti inaramid ni Merita tapno maibturanna ti ibubusor?

⁶ Makapagibturtayo met no regular nga adalen ken utobentayo dagiti ulidan iti panagibtur a naisurat iti Sao ti Dios ken kadagiti publikasiontayo. Kasta ti inaramid ti sister a ni Merita a taga-Albania, isu a naibturanna ti naranggas nga ibubusor ti pamiliana. Imbagana: “Bimmileg ti pakinakemko idi inadalko ti salaysay ti Biblia maipapan ken Job. Nagkaro ti sinagabana—a dina ammo no asino ti makinnakem kadagita—ngem naibagana latta: ‘Agingga a matayak, agtalinaedak nga awan pagkuranganna!’ (Job 27:5) Adayo a nakarkaro gayam dagiti sinagaba ni Job ngem iti napasarak. Ngem saan a kas kenkuana, ammok no asino ti adda iti likudan dagita a suot.”

7. Uray no awan ti madama a nakaro a pakasuotantayo, ania ti masapul a sursuruentayo nga aramiden itan?

⁷ Masursurotayo ti ad-adda pay nga agibtur no masansan ken sipapasnek nga ibagatayo ken Jehova ti amin a pakaseknan ken pakadanagantayo. (Fil. 4:6; 1 Tes. 5:17) Baka awan ti nakaro a pakasuotam ita. Ngem no ngay masuronka, mariribukanka, wenno dimo ammo ti aramidem, agpatpatulongka kadi ken Jehova? No kanayon nga agpatulongka iti Diostayo kadagiti inaldaw ken babbabassit a problemam, dikanton agpangadua nga agpatulong no maipasangoka iti daddadakkel a problema. Masiguradom nga ammona ti eksakto a tiempo a tulongannaka ken ti eksakto a tulong a kasapulam.—Sal. 27:1, 3.

8. Kasano nga ipakita ti kapadasan ni Mira a makatulong ti panagibtur kadagiti pakasuotan ita tapno maibturantayo dagiti pakasuotan iti masanguanan? (Santiago 1:2-4) (Kitaen met ti ladawan.)

⁸ Ad-adda a makapagibturtayo inton dakkel a rigat no ibturantayo dagiti pakasuotantayo ita. (Roma 5:3) Apay a maibagatayo dayta? Napaneknekanen ti adu a kakabsat a tunggal pakasubokan ti pammati a naibturanda ket nakatulong  tapno maibturanda ti sumaruno a suot. Gapu iti panagibturda, simmayaat ti personalidadda, ken bimmileg ti pammatida a sisasagana ken situtulok ni Jehova a tumulong kadakuada. Gapu iti dayta a pammatida, naibturanda ti sumaruno a suot. (Basaen ti Santiago 1:2-4.) Napaneknekanen ti payunir a ni Mira a taga-Albania a nakatulong ti panagibturna iti napalabas tapno agtultuloy nga agibtur. Inaminna nga adda dagiti tiempo a mariknana nga isuna laeng ti addaan iti nagadu a problema. Ngem lagipenna no kua no kasano kaadun ti panangtulong kenkuana ni Jehova iti napalabas a 20 a tawen, sa ibagana iti bagina: ‘Agtalinaedka a matalek. Dimo sayangen amin dagidiay a tawen a tinulongannaka ni Jehova nga agballigi iti amin a rigat.’ Panunotem met no kasano a tultulongannaka ni Jehova nga agibtur. Agtalekka a makitkitanaka iti tunggal kanito nga adda ib-ibturam a suot ken gunggonaannakanto. (Mat. 5:10-12) Ket inton mangrugi ti dakkel a rigat, nasursuromon no kasano ti agibtur ken determinadokanto nga agtultuloy nga agibtur.

9. Kasano a nakipagrikna ti kongregasion idiay Antioquia iti Siria?

⁹ Usigentayo ti napasamak idi naapektaran dagiti Kristiano idiay Judea iti nakaro a bisin. Kalpasan a nadamag ti kongregasion idiay Antioquia iti Siria ti maipapan iti bisin, sigurado a nakipagriknada kadagiti kakabsat idiay Judea. Ngem adda ti inaramidda tapno matulonganda ida. “Inkeddeng dagiti adalan, sigun iti kabaelan ti tunggal maysa, a mangipatulodda iti tulong kadagiti kakabsat nga agnanaed idiay Judea.” (Ara. 11:27-30) Uray nakaad-adayo ti paggigianan dagiti kakabsat a naapektaran iti bisin, determinado dagiti Kristiano idiay Antioquia a tumulong kadakuada.—1 Juan 3:17, 18.

10. Ania dagiti pamay-an a makipagriknatayo kadagiti kapammatiantayo a nadidigra? (Kitaen met ti ladawan.)

¹⁰ Mabalintayo met ti makipagrikna ita no maammuantayo a nadidigra dagiti kapammatiantayo. Dagus a tumulongtayo—nalabit damagentayo kadagiti panglakayen no mabalintayo ti tumulong iti maysa a proyekto, agdonar para iti sangalubongan a trabaho, wenno ikararagantayo dagidiay nadidigra. b (Prov. 17:17) Kas pagarigan, idi 2020, nasurok a 950 a Disaster Relief Committee ti nabuangay iti intero a lubong tapno matulongan dagidiay naapektaran iti COVID-19 pandemic. Dagiti kakabsat a tumultulong kadagiti relief committee ket maikari iti naimpusuan a komendasiontayo. Makipagriknada kadagiti kakabsat isu a mangitultulodda kadagiti material a tulong ken mangipapaayda iti naespirituan a pammaregta. Iti dadduma a kaso, tartarimaanen wenno ibangbangonda manen dagiti balay wenno lugar a pagdaydayawan dagiti kakabsat.—Idilig ti 2 Corinto 8:1-4.

11. Kasano a mapadayawan ti nailangitan nga Amatayo no makipagriknatayo?

¹¹ No makipagriknatayo kalpasan ti maysa a didigra, madlaw ti dadduma dagiti panagsakripisiotayo. Kas pagarigan, idi 2019, dinadael ti Bagyo a Dorian ti maysa a Kingdom Hall idiay Bahamas. Idi ibangbangon manen dagiti kakabsat ti Kingdom Hall, dinamagda iti saan a Saksi a kontraktor no mano ti bayadanda tapno malpas ti trabaho. Imbagana kadakuada: “Siakon ti makaammo kadagiti . . . alikamen, trabahador, ken materiales. . . . Kayatko nga aramiden daytoy para iti organisasionyo. Bilibak ngamin iti panangisakityo kadagiti kapammatianyo.” Kaaduan a tattao ditoy lubong  ti saan a makaam-ammo ken Jehova. Ngem adu kadakuada ti mangob-obserbar kadagiti Saksi ni Jehova. Maragsakantayo unay ta dagiti ar-aramidentayo a pannakipagrikna mayasidegna dagiti tattao iti Daydiay “napnuan iti asi”!—Efe. 2:4.

12. Kasano a ti panangkultibar iti pannakipagrikna ita isagsagananatayo para iti dakkel a rigat? (Apocalipsis 13:16, 17)

¹² Apay a kasapulantayto ti makipagrikna bayat ti dakkel a rigat? Ibaga ti Biblia a dagidiay saan a mangsuporta iti napolitikaan a sistema ket maipasango kadagiti problema—ita ken bayat ti dakkel a rigat. (Basaen ti Apocalipsis 13:16, 17.) Mabalin a kasapulanto dagiti kakabsat ti tulong tapno maaddaanda kadagiti kasapulanda iti inaldaw. Inton umay mangukom ti Aritayo a ni Kristo Jesus, sapay koma ta makitanatayo a madama a makipagrikna ket awisennatayo a ‘mangtawid iti Pagarian.’—Mat. 25:34-40.

13. Sigun iti Roma 15:7, kasano a pinauneg dagiti nagkauna a Kristiano ti ayatda iti maysa ken maysa?

¹³ Ti ayat ti pakailasinan dagiti nagkauna a Kristiano. Ngem nalaka la kadi nga ipakitada idi ti ayat? Usigentayo ti nadumaduma a kakabsat a nangbukel iti kongregasion idiay Roma. Dadduma kadakuada ket Judio a napadakkel nga agtulnog iti Mosaiko a Linteg. Adda met dagiti Gentil a naiduma unay ti pannakapadakkelda. Posible unay a ti dadduma a Kristiano ket adipen idinto ta siwayawaya met ti dadduma—ken nalabit adda met dagiti amo nga addaan kadagiti adipen. Kasano a napagballigian dagidiay a Kristiano ti kasta a nagdudumaanda ken napaunegda ti ayatda iti maysa ken maysa? Imparegta kadakuada ni apostol Pablo nga ‘awatenda ti maysa ken maysa.’ (Basaen ti Roma 15:7.) Ania ti kayatna a sawen? Ti sao a naipatarus nga “awaten” kaipapananna ti siaayat a panangawat iti maysa a tao kas gayyem wenno panangpasangbay kenkuana iti pagtaengan. Kas pagarigan, imbaga ni Pablo ken Filemon no kasano ti panangawatna iti nagtalaw idi nga adipenna a ni Onesimo: “Siaayat nga awatem.” (Flm. 17) Inawat da Priscila ken Aquila ni Apolos a basbassit pay la idi ti ammona ngem kadakuada maipapan iti panagbalin a Kristiano babaen ti ‘panangikuyogda’ kenkuana. (Ara. 18:26) Inawat dagidiay a Kristiano ti maysa ken maysa ken dida impalubos a ti nagdudumaanda ti mangdadael iti relasionda iti maysa ken maysa.

14. Kasano nga impakita ni Anna ken ni lakayna ti ayatda?

¹⁴ Maipakitatayo met ti ayat kadagiti kakabsat no gayyementayo ida. Masansan nga ipakitadanto met ti ayatda kadatayo. (2 Cor. 6:11-13) Kitaentayo ti kapadasan ni Anna ken ni lakayna. Di nagbayag kalpasan nga immakarda iti baro a nakaibaonanda kas misionero idiay West Africa, nangrugi ti COVID-19 pandemic. Gapu ta kasangsangpetda, dida personal a makita dagiti kakongregasionda. Kasano nga impakita ti agassawa ti ayatda? Inusarda ti videoconferencing tapno makontakda dagiti kakabsat ken imbagada a kayatda la unayen a maam-ammo ida a naimbag. Permi ti ragsak dagiti pamilia isu a masansan a tawagan ken teksanda ida. Apay nga inkagumaan dagitoy nga agassawa ti makisinninged kadagiti kakabsat? Imbaga ni Anna, “Diak pulos malipatan ti ayat a naipakita kaniak ken iti pamiliak bayat dagiti naragsak ken naliday a tiempo ti biagmi, isu a kayatko met nga ipakita ti ayat.”

15. Ania ti masursurom iti kapadasan ni Vanessa maipapan iti panangayat iti amin a kakabsat? (Kitaen met ti ladawan.)

¹⁵ Adu kadatayo ti naitimpuyog kadagiti kongregasion a buklen ti kakabsat a nagduduma ti pannakapadakkel ken personalidadda. Mapaunegtayo  ti ayattayo kadakuada amin no agpokustayo kadagiti nasayaat a kualidadda. Ti sister a ni Vanessa nga agserserbi idiay New Zealand ket marigatan idi a makilangen iti dadduma a kakongregasionna. Ngem imbes a liklikanna dagidiay makapasuron kenkuana ti personalidadda, kinaaduna ketdi ti tiempona a makikadua kadakuada. Dayta ti nakatulong tapno makitana dagiti ap-apresiaren ni Jehova kadakuada. Imbagana: “Manipud idi nagbalin a manangaywan iti sirkito ni lakayko, ad-adun a kakabsat a nagduduma ti personalidadda ti makalkalangenmi, isu a nalaklakak idan a makatunosan. Magusgustuak itan ti kinanadumaduma dagiti kakabsat. Nalawag a magusgustuan met dayta ni Jehova ta impalubosna nga agdaydayaw kenkuana ti nadumaduma a klase ti tattao.” No sursuruentayo a tuladen ti panangmatmat ni Jehova iti sabsabali, pampaneknekantayo nga ay-ayatentayo ida.—2 Cor. 8:24.

16. Apay a nagpategto ti ayat bayat ti dakkel a rigat? (Kitaen met ti ladawan.)

¹⁶ Nagpategto ti ayat bayat ti dakkel a rigat. Inton mangrugi dayta, pakasarakantayto iti proteksion? Usigentayo ti imbilin ni Jehova iti ilina idi naraut ti nagkauna a Babilonia: “Mapanka, O ilik, sumrekka kadagiti makin-uneg a kuartom, ket irikepmo dagiti ruanganmo. Aglemmengka iti apagbiit agingga a lumabas ti pungtot.” (Isa. 26:20) Mabalin a masapul a surotentayto dagita met laeng nga instruksion bayat ti dakkel a rigat. Dagiti ‘makin-uneg a kuarto’ ket mabalin a tumukoy kadagiti kongregasiontayo. Bayat ti dakkel a rigat, mariknatayto ti proteksion nga inkari ni Jehova no agtalinaedtayo a naikaykaysa kadagiti kapammatiantayo. Masapul ngarud nga ita pay laeng, ikagumaantayon nga an-anusan ken ayaten dagiti kakabsat. Mabalin a nakadepende iti dayta ti pannakaisalakantayo!

17. No agsaganatayo itan, anianto dagiti kayatayo nga aramiden bayat ti dakkel a rigat?

¹⁷ “Ti dakkel nga aldaw ni Jehova” ket mangyegto iti rigat iti sangatauan. (Sof. 1:14, 15) Ti ili ni Jehova ket maipasangonto met iti rigat. Ngem no agsaganatayo itan, makapagtalinaedtayto a kalmado ken matulongantayto ti dadduma. Maibturantayto ti aniaman a problema a dumteng. No agsagaba dagiti kapammatiantayo, aramidentayto ti amin a kabaelantayo a tumulong babaen ti pannakipagrikna ken panangipaaytayo kadagiti kasapulanda. Agtalinaedtayto met a nasinged kadagiti kakabsat a nasursurotayon nga ayaten. Gunggonaannatayonto ni Jehova iti biag nga agnanayon iti lubong a sadiay, nalipatantayton ti amin a didigra ken rigat.—Isa. 65:17.