Ni Haykanush, a maysa a di bautisado nga agibumbunannag a taga-Armenia, ket nakasarak iti pasaporte iti asideg ti balayna. Naisapit iti pasaporte ti dadduma a debit card ken dakkel a gatad ti kuarta. Imbagana dayta ken lakayna, a maysa met a di bautisado nga agibumbunannag.

Agkasapulan unay dagitoy nga agassawa iti kuarta ken adu ti utangda, ngem inkeddengda nga ipan ti kuarta iti adres a naikabil iti pasaporte. Nasdaaw ti lalaki a makinkukua, kasta met ti pamiliana. Inlawlawag ni Haykanush ken kasta met ni lakayna a mapagpiaranda gapu kadagiti maad-adalda iti Biblia. Ammoda a masapul nga agbalinda a mapagpiaran, ket inusarda daytoy a gundaway a mangisarita iti maipapan kadagiti Saksi ni Jehova ken mangibati kadagiti literatura iti daytoy a pamilia.

Kayat ti pamilia ti mangted iti kuarta kas gunggona ken Haykanush, ngem saanna nga inawat. Kabigatanna, ti asawa ti makinkukua iti pasaporte binisitana ti agassawa iti balayda ket impilitna nga awaten ni Haykanush ti singsing a diamante kas panagyamanda.

Kas iti dayta a pamilia, adu ti masdaaw iti kinamapagpiaran ni Haykanush ken ni lakayna. Ngem masdaaw kadi ni Jehova? Ania ti panangmatmatna iti kinamapagpiaranda? Sayang kadi ti kinamapagpiaranda?

Saan a narigat a sungbatan dagita a saludsod. Gapu ta ammo dagiti adipen ti Dios a ti panangipakitada kadagiti galad ni Jehova ket napatpateg iti imatang ti Dios ngem iti diamante, balitok, wenno dadduma pay a material a bambanag. Wen, ti panangmatmat ni Jehova no ania ti makaay-ayo ken saan ket naiduma unay iti panangmatmat ti kaaduan. (Isa. 55:8, 9) Ken para kadagiti adipenna, ti naan-anay a panangipakita kadagiti galad ni Jehova ket awan kaaspingna a gapuanan.

Makitatayo daytoy iti kuna ti Biblia maipapan iti pannakaawat ken sirib. Kuna ti Proverbio 3:13-15: “Naragsak ti tao a nakasarak iti sirib, ken ti tao a makagun-od iti panangilasin, ta ti pannakagun-od iti dayta kas gunggona ket nasaysayaat ngem iti pannakagun-od iti pirak kas gunggona ken ti pannakagun-od iti dayta kas apit ngem iti mismo a balitok. Napatpateg ngem kadagiti korales, ket amin a sabsabali pay a pakaragsakam saan a maipada iti dayta.” Nalawag a napatpateg ken Jehova dagita a kababalin ngem iti aniaman a gameng.

Komusta ngay ti kinamapagpiaran?

Ni Jehova ket napudno; “saanna a mabalin ti agulbod.” (Tito 1:2) Pinaltiinganna ni apostol Pablo nga agsurat kadagiti Hebreo a Kristiano idi umuna a siglo: “Itultuloydakami nga ikararagan, ta agtalekkami nga addaankami iti napudno a konsiensia, yantangay kayatmi ti agbiag a mapagtalkan iti amin a bambanag.”—Heb. 13:18.

Nangipaay ni Jesu-Kristo iti nagsayaat nga ulidan iti panagbalin a mapagpiaran. Kas pagarigan, lagipem idi imbaga ti nangato a padi a ni Caifas: “Babaen iti sibibiag a Dios pagsapataenka nga ibagam kadakami no sika ti Kristo nga Anak ti Dios!” Impudno ni Jesus nga isu ti Mesias, nupay no ti panangibagana iti pudno ket pakaigapuan ti panangibaga ti Sanhedrin nga isu ket agtabtabbaaw ken pakaigapuan ti pannakapapatayna.—Mat. 26:63-67.

Datayo ngay? No addatayo iti situasion a mabalin a saantayo nga ibaga ti amin wenno adda mabalin a baliwantayo tapno adda material a magunggonatayo, agbalintayo kadi latta a mapagpiaran?

Kinapudnona, talaga a narigat ti agbalin a mapagpiaran kadagitoy maudi nga al-aldaw ta adu ti ‘managayat iti bagbagida, managayat iti  kuarta.’ (2 Tim. 3:2) No adda pinansial a parikut wenno narigat ti agbirok iti trabaho, adu ti mangibaga a saan a dakes ti agtakaw, agkusit, wenno agbalin a saan a mapagpiaran. Nakasaksaknap daytoy a kapanunotan ta adu payen ti mangibaga a saanen a napateg ti agbalin a mapagpiaran nangruna no adda magun-odan a material a gunggona. Kasta ti inaramid ti sumagmamano a Kristiano ket gapu iti ‘kinaagumda iti material a gunggona,’ napukawda ti nasayaat a takderda iti kongregasion.—1 Tim. 3:8; Tito 1:7.

Ngem adu a Kristiano ti mangtultulad ken Jesus. Ammoda a napatpateg dagiti galad ti Dios ngem ti aniaman a kinabaknang wenno pagimbagan. Gapuna, dagiti agtutubo a Kristiano saanda nga agkusit tapno nangato ti gradoda idiay eskuelaan. (Prov. 20:23) Agpayso a ti panagbalin a mapagpiaran saan a kanayon a mangipaay iti gunggona, a kas ken Haykanush. Nupay kasta, nasayaat iti imatang ti Dios ti agbalin a mapagpiaran, ken makatulong daytoy tapno mataginayontayo ti nakapatpateg a nadalus a konsiensia.

Ipakita dayta ti kapadasan ni Gagik. Kunana: “Sakbay a nagbalinak a Kristiano, agtrabtrabahoak idi iti dakkel a kompania a sadiay ti makinkukua iti kompania saanna a baybayadan ti kompleto a buis babaen ti panangireportna a bassit laeng ti ganansia ti kompania. Kas direktor a mangimanmanehar iti kompania, namnamaenna a ‘makitulagak’ iti ahente nga agsingsingir iti buis a mangtedak iti pasuksok tapno saanna a dillawen ti panagkusit ti kompania. Gapu iti dayta, am-ammodak a saan a mapagpiaran. Idi naammuak ti kinapudno, saankon a kayat nga aramiden dayta, uray pay no nangato ti sueldok. Imbes ketdi, nanglukatak iti bukodko a negosio. Ket manipud iti umuna nga aldaw, legal nga inrehistrok ti kompaniak ken binayadak ti amin a buisko.”—2 Cor. 8:21.

Insalaysay ni Gagik: “Kagudua laengen ti birokko iti dati a sapulko, isu a marigatanak a mangipaay iti kasapulan ti pamiliak. Nupay kasta, naragragsakak itan. Nadalusen ti konsiensiak iti imatang ni Jehova. Nagbalinak a nasayaat nga ulidan iti dua a babbarok, ken nagbalinak a kualipikado a maaddaan iti pribilehio iti kongregasion. Kadagiti ahente nga agsingsingir iti buis ken dadduma pay a pakilangenak iti negosio, am-ammodak itan a mapagpiaran a tao.”

Ay-ayaten ni Jehova dagidiay mangarkos iti pannursurona babaen ti panangipakitada kadagiti nagsasayaat a galadna, agraman ti kinamapagpiaran. (Tito 2:10) Pinaltiinganna ni Ari David a mangipasigurado iti daytoy: “Maysaak idi nga agtutubo, kasta met a limmakayakon, ket kaskasdi a saanak a nakakita iti asinoman a nalinteg a naan-anay a nabaybay-an, wenno uray dagiti putotna nga agsapsapul iti tinapay.”—Sal. 37:25.

Ti kapadasan ti matalek a ni Ruth ti mangipakita iti daytoy. Nagtalinaed iti katuganganna a ni Noemi, imbes a panawanna idi baketen. Immakar ni Ruth idiay Israel, a sadiay mabalinna ti agdayaw iti pudno a Dios. (Ruth 1:16, 17) Idi adda idiay Israel, impakita ni Ruth nga isu ket mapagpiaran ken nagaget, a sigagaget a nagadas kas nalawag a naibilin iti Linteg. Kas iti napasaran ni David idi agangay, ni Jehova saanna a binaybay-an ni Ruth ken ni Noemi. (Ruth 2:2-18) Saan laeng a material a banag ti impaay ni Jehova ken Ruth. Pinilina ni Ruth nga agbalin a pagtaudan ni Ari David ken uray ti naikari a Mesias!—Ruth 4:13-17; Mat. 1:5, 16.

Mabalin nga adda dagiti kasasaad a marigatan ti dadduma nga adipen ni Jehova a maaddaan iti umdas a kasapulanda iti biag. Imbes nga agkusitda, gagetanda ti agtrabaho. Ipakpakitada  ngarud nga ipatpategda dagiti nagsasayaat a galad ti Dios, a pakairamanan ti kinamapagpiaran, ngem iti aniaman a banag.—Prov. 12:24; Efe. 4:28.

Kas ken Ruth, dagiti Kristiano iti intero a lubong impakitada ti pammati a tulongan ida ni Jehova. Naan-anay nga agtalekda iti Daydiay nangikari iti daytoy iti Saona: “Saankanto a pulos panawan ket saankanto a pulos baybay-an.” (Heb. 13:5) Maulit-ulit nga impakita ni Jehova a kabaelanna ken tulonganna dagiti marigrigat a kanayon a mangipakita iti kinamapagpiaran. Tungtungpalenna ti karina nga ipaayna dagiti kasapulantayo.—Mat. 6:33.

Wen, mabalin nga ipateg dagiti tattao ti diamante ken ti dadduma pay a banag. Ngem masiguradotayo nga ipatpateg nga amang ti Amatayo idiay langit ti panangipakitatayo iti kinamapagpiaran ken ti dadduma pay a galadna ngem iti aniaman a napateg a gameng!