Ni Jehova ‘Maseknan Kenka’
APAY a masiguradom a pudno dagita a sasao ken talaga a maseknan ni Jehova kenka? Gapu ta ibaga a mismo ti Biblia dayta. Kuna ti 1 Pedro 5:7: ‘Iyallatiwmo kenkuana ti isuamin a pakaringgoram, agsipud ta isu maseknan kenka.’ Ania ti mangipakita a maseknan kenka ni Apo Jehova?
IPAPAAY TI DIOS TI MATERIAL A KASAPULAN DAGITI TATTAO
Inyulidan ni Jehova ti panagbalin a naasi ken naparabur
Addaan ti Dios kadagiti galad a mabalin a birbirokem kadagiti nasinged a gagayyemmo. Masansan nga agbalin a nasinged nga aggayyem dagiti naasi ken naparabur iti maysa ken maysa. Nalawag a makitkitam nga inaldaw a naasi ken naparabur ni Jehova kadagiti tattao. Kas pagarigan: “Pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.” (Mat. 5:45) Ania ti maipaay ti init ken tudo? Babaen kadagitoy, naan-anay a penken ti Dios dagiti tattao iti taraon ken punnuenna ti pusoda iti ragsak. (Ara. 14:17) Wen, siguraduen ni Jehova a mangpataud ti daga iti adu a taraon, ken adu pay ti mangparagsak kadatayo malaksid iti naimas a makan.
Ngem apay ngarud nga adu ti agbisin? Gapu ta masansan nga ipamaysa dagiti agtuturay ti pananggun-od iti pannakabalin ken kinabaknang imbes a tulonganda dagiti tattao tapno sumayaat ti biagda. Dandanin ikkaten ni Jehova ti kasta a kinaagum. Sukatannanto ti agdama a sistema ti politika iti nailangitan a Pagarian nga iturayan ti Anakna. Iti dayta a tiempo, awanton ti agbisin. Nupay kasta, iti Sal. 37:25) Saan kadi nga ipakita dayta ti pannakaseknanna?
agdama, saan a baybay-an ti Dios dagiti matalek nga adipenna. (NAPARABUR NI JEHOVA ITI TIEMPONA
Inyulidan ni Jehova ti panagbalin a naparabur iti tiempo
Ti nasayaat a gayyem mangipaay iti panawenna kenka. Mabalin nga adu nga oras a makisarita kenka maipapan kadagiti paginteresanyo a dua. Dumngeg met a naimbag no ibagam dagiti problemam ken pakaseknam. Kasta met kadi ni Jehova? Wen! Denggenna dagiti kararagtayo. Gapuna, paregtaennatayo ti Biblia a ‘reggetantayo ti agkararag,’ ken ‘agkararagtayo a di agressat.’—Roma 12:12; 1 Tes. 5:17.
Kasano kabayag a situtulok a dumngeg ni Jehova kadagiti kararagmo? Ipakita ti maysa a pagarigan iti Biblia ti sungbat. Sakbay a pinili ni Jesus dagiti apostolna, “agpatpatnag a nagkararag iti Dios.” (Luc. 6:12) Iti dayta a kararag, mabalin a linagip ni Jesus ti nagan dagiti adalanna, inkabilanganna dagiti ugali ken pagkapuyanda, ken kiniddawna ti tulong ni Amana iti panangpilina kadakuada. Idi simmingisingen ti init kabigatanna, ammo ni Jesus a napilina dagiti maikari nga agbalin nga apostolna. Kas ti “Managdengngeg iti kararag,” maragsakan ni Jehova a dumngeg iti amin a napasnek a kararag. (Sal. 65:2) Uray no adu nga oras nga ikararag ti maysa ti pakaseknanna unay, saan nga or-orasan ni Jehova dayta.
SISASAGANA A MAMAKAWAN TI DIOS
Inyulidan ni Jehova ti panagbalin a sisasagana a mamakawan
No dadduma, marigatan nga agpinnakawan uray dagiti nasayaat nga aggayyem. Aglinnipat pay ketdin ti dadduma a nabayagen nga aggayyem ta marigatanda nga agpinnakawan. Saan a kasta ni Jehova. Aw-awisen ti Biblia ti amin a napudno nga indibidual a dumawatda iti pammakawan kenkuana, ta ‘dakkel ti pammakawanna.’ (Isa. 55:6, 7) Apay a sisasagana a mamakawan ti Dios?
Gapu iti kasta unay nga ayatna. Ay-ayatenna unay ti lubong isu nga intedna ti Anakna, ni Jesus, tapno maispal dagiti tattao manipud iti basol ken ti makadangran a resultana. (Juan 3:16) Kinapudnona, saan laeng a dayta ti maipaay ti subbot. Babaen ti sakripisio ni Kristo, sisasagana ti Dios a mangpakawan kadagiti ay-ayatenna. Insurat ni apostol Juan: “No ipudnotayo dagiti basoltayo, isu matalek ken nalinteg tapno pakawanennatayo kadagiti basoltayo.” (1 Juan 1:9) Gapu iti pammakawan ni Jehova, agtultuloy a matagiragsak dagiti tattao ti pannakigayyemda kenkuana, ket matukay ti riknatayo gapu iti dayta.
SIDADAAN A TUMULONG KENKA NO KASAPULAN
Inyulidan ni Jehova ti panagbalin a sidadaan a tumulong
Ti pudno a gayyem ket nakasagana a tumulong iti sabsabali no kasapulan. Kasta met kadi ni Jehova? Kuna ti Saona: “Nupay [ti maysa nga adipen ni Jehova] mabalin a matuang, saanto a mapadso, ta ti imana sarsaranayen ni Jehova.” (Sal. 37:24) Ni Jehova ‘saranayenna dagiti adipenna’ iti nagduduma a pamay-an. Paliiwem daytoy a kapadasan manipud idiay St. Croix a maysa nga isla iti Caribbean.
Maysa a balasitang ti uy-uyawen dagiti kaklasena ta saan nga agsaludo iti bandera. Nagkararag ken Jehova, ket inkeddengna a sanguen ti problema. Inlawlawagna iti sumaruno a reportna iti klase ti maipapan iti panagsaludo iti bandera. Inusarna ti libro a Ti Librok Dagiti Estoria ti Biblia ket imbagana a naibatay ti desisionna iti salaysay maipapan kada Sidrac, Mesac, ken Abednego. Kinunana, “Sinalakniban ni Jehova dagiti tallo a Hebreo gapu ta saanda a nagdayaw iti ladawan.” Kalpasanna, intukonna ti libro kadagiti kaklasena. Kayat ti 11 a padana nga estudiante ti maaddaan iti kopia. Maragragsakan ti balasitang ta ammona a ni Jehova ti nangipaay iti tured ken sirib kenkuana tapno makapangasaba mainaig iti dayta a sensitibo a topiko.
No agduaduaka a maseknan ni Jehova kenka, utobem dagiti teksto ti Biblia kas iti Salmo 34:17-19; 55:22; ken 145:18, 19. Damagem kadagiti nabayagen a Saksi no kasano nga inaywanan ida ni Jehova. Ken no kasapulam ti tulong ti Dios, agkararagka kenkuana. Ket mariknamto a ni Jehova ‘maseknan kenka.’