1. Apay a ni Jehova ti Naindaklan nga Agdamdamili?

IDI Nobiembre 2010, nailako iti dandani 70 a milion a doliar idiay London, England ti maysa a damili a plorera a naaramid idiay China idi maika-18 a siglo. Nalawag a kabaelan ti agdamdamili a pagbalinen a napintas ken nangina nga obra maestra ti adu ken awan balorna a pila. Ngem awan ti tao nga agdamdamili a kapada ni Jehova. Iti maudi a paset ti maikanem nga aldaw ti panamarsua, inaramid ti Dios “manipud tapok [pila] a naggapu iti daga” ti perpekto a tao ket inikkanna iti abilidad a mangtulad kadagiti kualidad ti Namarsua kenkuana. (Gen. 2:7) Dayta a perpekto a tao, ni Adan, a naaramid manipud iti daga ket maitutop a maawagan “anak ti Dios.”—Luc. 3:38.

2, 3. Kasano a matuladtayo ti kababalin dagiti agbabbabawi nga Israelita?

² Ngem idi nagrebelde ni Adan, napukawna ti pribilehiona nga agbalin nga anak ti Namarsua kenkuana. Nupay kasta, adda ‘dakkel nga ulep’ dagiti annak ni Adan a nangpili nga agpaituray iti Dios. (Heb. 12:1) Babaen ti sipapakumbaba a panagpasakupda iti Namarsua kadakuada, impakitada a kayatda a ni Jehova, saan a ni Satanas, ti agbalin nga Amada ken Agdamdamili kadakuada. (Juan 8:44) Ti kinasungdoda iti Dios ipalagipna kadatayo dagiti  sasao ni Isaias maipapan kadagiti agbabbabawi nga Israelita: “O Jehova, sika ti Amami. Dakami ti pila, ket sika ti Managdamilimi; ket dakami amin aramidnakami ta imam.”—Isa. 64:8.

³ Ita, ikagkagumaan ti amin nga agdaydayaw ken Jehova iti espiritu ken kinapudno nga ipakita ti kasta a kinapakumbaba ken panagpasakup. Ibilangda a dayaw ti panangawag ken Jehova kas Ama ken agpasakupda kenkuana kas Agdamdamili kadakuada. Makitkitam kadi ti bagim kas nalukneng a pila iti ima ti Dios, a situtulok nga agpasukog tapno agbalin a maysa a basehas a makaay-ayo iti matana? Makitkitam met kadi dagiti kakabsat nga agtultuloy a suksukogen ti Dios? Tapno matulongantayo a mangtarus iti dayta, usigentayo ti tallo a banag nga ar-aramiden ni Jehova kas Agdamdamili kadatayo: No kasano a pilienna dagiti sukogenna, no apay a sukogenna ida, ken no kasano nga aramidenna dayta.

4. Kasano a pilien ni Jehova dagiti iyadanina kenkuana? Mangted kadagiti pagarigan.

⁴ No kitaen ni Jehova dagiti tattao, saanna a kitaen ti makinruar a langada. Imbes ketdi, sukimatenna ti puso, ti makin-uneg a kinatao. (Basaen ti 1 Samuel 16:7b.) Impakita dayta ti Dios idi binukelna ti kongregasion Kristiano. Inyadanina kenkuana ken iti Anakna ti adu nga indibidual a kasla awan serserbina iti imatang ti tao. (Juan 6:44) Ti maysa a pagarigan ti kasta a tao ket ti Fariseo nga agnagan Saulo—maysa a ‘managtabbaaw ken manangidadanes ken nakuspag a tao.’ (1 Tim. 1:13) Ngem “ti manangsukimat kadagiti puso,” saanna a kinita ni Pablo kas awan serserbina a pila. (Prov. 17:3) Imbes ketdi, kinita ti Dios kas maysa a tao a mabalin a sukogenna tapno agbalin a makaay-ayo a basehas. Kinapudnona, maysa a “napili a basehas” a mangsaksi “kadagiti nasion kasta met iti ar-ari ken iti annak ti Israel.” (Ara. 9:15) Dadduma a nakita ti Dios a mabalin nga agbalin a basehas “maipaay iti nadayaw a pakausaran” ket dagiti dati a mammartek, immoral, ken mannanakaw. (Roma 9:21; 1 Cor. 6:9-11) Bayat nga umad-adu ti maammuanda nga umiso a pannakaammo iti Sao ti Dios ken bumilbileg ti pammatida, ipalpalubosda a sukogen ida ni Jehova.

5, 6. Kasano a ti panagtalektayo ken Jehova kas Agdamdamili kadatayo apektaranna ti kababalintayo kadagiti (a) tattao iti teritoriatayo? (b) kakabsat?

⁵ Kasano a makatulong dayta kadatayo? Ti koma panagtalektayo iti abilidad ni Jehova a mangbasa iti puso ken mangyadani kenkuana kadagiti pilienna ti manglapped kadatayo a mangukom iti sabsabali, iti man teritoria wenno iti kongregasiontayo. Usigentayo ti kapadasan ni Michael. Malagipna: “No umaydak idi kasabaan dagiti Saksi ni Jehova, pumanawak a kasla awan ti nakitak. Talaga a dakes idi ti ugalik! Idi agangay, adda naam-ammok a pamilia a magusgustuak gapu ta nagsayaat ti ugalida. Idi kuan, maysa nga aldaw, nakigtotak idi naammuak a dagitoy ket Saksi ni Jehova gayam! Gapu iti kababalinda, natignayak a mangusig no apay a kagurgurak ida. Nabigbigko idi agangay a ti ugalik ket naibatay iti kinaignorante ken kadagiti nadamdamagko, saan nga iti pudno nga impormasion.” Nagadal ni Michael iti Biblia tapno maammuanna ti kinapudno. Idi agangay, nabautisaran ken nagserbi kas amin-tiempo a ministro.

⁶ Ti panangbigbigtayo ken Jehova kas Agdamdamili kadatayo apektaranna met ti kababalintayo kadagiti kakabsat. Kitkitaem kadi dagiti kakabsat kas iti panangkita ti Dios kadakuada—saan a nalpasen a damili, no di ket madama pay laeng a maar-aramid? Makitana ti makin-uneg a kinatao ken ti kita ti tao a pagbalinan ti maysa. Gapuna, kitaen ni Jehova ti positibo kadagiti tattao ket saanna nga ipamaysa a kitaen dagiti pagkapuyanda a temporario laeng. (Sal. 130:3) Matuladtayo  ni Jehova no kitaentayo dagiti adipenna iti positibo a pamay-an. Kinapudnona, mabalin a makipagtrabahotayo iti Agdamdamili kadatayo babaen ti panangtulongtayo kadagiti kakabsat bayat nga ikagkagumaanda ti rumang-ay iti naespirituan. (1 Tes. 5:14, 15) Kas “sagut a tattao,” dagiti koma panglakayen ti mangidaulo iti dayta.—Efe. 4:8, 11-13.

7. Apay nga apresiarem ti disiplina ni Jehova?

⁷ Mabalin nga adda nangnangngegmon a nangibaga: ‘Naan-anay a naapresiarko laeng ti disiplina dagiti nagannakko idi naaddaanakon kadagiti annak.’ Bayat nga umad-adu ti kapadasantayo, mabalin a nasaysayaat met ti panangmatmattayo iti disiplina ken matmatantayo dayta kas iti panangmatmat ni Jehova, kas panangipakita iti ayat. (Basaen ti Hebreo 12:5, 6, 11.) Wen, gapu iti ayatna kadagiti annakna, siaanus a sukogennatayo ni Jehova. Kayatna nga agbalintayo a masirib ken naragsak, kasta met, kayatna a subadantayo ti ayatna. (Prov. 23:15) Saanna a kayat nga agrigattayo ken saanna a kayat a mataytayo kas ‘annak ti pungtot,’ a dayta ti pagbanagan a natawidtayo ken Adan.—Efe. 2:2, 3.

8, 9. Kasano nga isursuronatayo ita ni Jehova, ken kasano nga agtultuloy daytoy nga edukasion iti masanguanan?

⁸ Kas ‘annak ti pungtot,’ adda idi dagiti ugalitayo a saan a makaay-ayo iti Dios, nalabit dadduma ti inaanimal pay ketdi! Ngem gapu iti panangsukog ni Jehova, nagbalbaliwtayo. Nagbalintayo a kasla karnero. (Isa. 11:6-8; Col. 3:9, 10) Gapuna, ti lugar a pangsuksukogan ita ni Jehova kadatayo ket maibilang kas naespirituan a paraiso. Natalna ken natalgedtayo uray no nagdakes ti lubong a pagbibiagantayo. Kasta met, ditoy a narikna ti dadduma kadatayo a dimmakkel iti awanan ayat a pamilia ti pudpudno nga ayat. (Juan 13:35) Ken nasursurotayo nga ipakita ti ayat iti sabsabali. Kangrunaanna, naam-ammotayo ni Jehova ken marikriknatayo ti ayatna kas Amatayo.—Sant. 4:8.

⁹ Idiay baro a lubong, naan-anay a matagiragsaktayto dagiti bendision ti naespirituan a paraiso. Kalpasanna, addanton naan-anay a katupag ti naespirituan a paraiso. Dayta ti literal a paraiso nga iturayan ti Pagarian ti Dios. Iti dayta a tiempo ti sangalubongan a panagbalbaliw, itultuloy ni Jehova a sukogen dagiti agnanaed iti daga ken isurona kadakuada ti awan kaaspingna nga edukasion a saantayo pay a mailadawan ita. (Isa. 11:9) Kasta met, pagbalinento ti Dios a perpekto ti panunot ken bagitayo tapno maawatantayo ti pannursurona ken naan-anay a maaramidtayo ti pagayatanna. Determinadotayo koma ngarud nga agtultuloy nga agpasakup ken Jehova, nga ipakitatayo a matmatantayo ti panangsukogna kas ebkas ti ayatna kadatayo.—Prov. 3:11, 12.

10. Kasano nga impakita ni Jesus ti kinaanus ken kinalaing ti Naindaklan nga Agdamdamili?

¹⁰ Kas iti nalaing nga agdamili, ammo ni Jehova ti kita ken kasasaad “ti pila” a sukogenna, isu nga ibagayna ti panangsukogna iti dayta. (Basaen ti Salmo 103:10-14.) Kinapudnona, tratuennatayo kas indibidual, nga ikabilanganna dagiti pagkapuyan, limitasion, ken ti panagrang-aytayo iti naespirituan. Impakita ti Anakna ti panangmatmatna kadagiti imperpekto nga adipenna. Usigentayo no kasano a minatmatan ni Jesus ti pagkapuyan dagiti adalanna, nangruna ti pagannayasanda nga agririri mainaig iti posision. No nakitam koma ti nabara a panagsusupiat dagiti apostol, panunotem ngata a naemma ken nalakada a masukog? Ngem saan a negatibo ti panangmatmat kadakuada ni Jesus. Ammona a dagiti matalek nga apostolna ket masukogda babaen iti naasi ken naanus a balakad ken babaen ti panangpaliiwda iti kinapakumbabana. (Mar. 9:33-37; 10:37, 41-45; Luc. 22:24-27) Kalpasan a napagungar ni Jesus ken  naiparukpok ti nasantuan nga espiritu kadagiti apostol, impamaysada nga inaramid ti trabaho nga intedna kadakuada, saan ket a ti posision wenno kinalatak.—Ara. 5:42.

11. Kasano nga impakita ni David nga isu ket kas iti nalukneng a pila, ken kasano a matuladtayo?

¹¹ Suksukogen ni Jehova dagiti adipenna ita babaen ti Saona, ti nasantuan nga espirituna, ken ti kongregasion Kristiano. Sukogennatayo ti Sao ti Dios no basaen, utoben, ken agpatulongtayo ken Jehova a mangyaplikar iti dayta. Insurat ni David: “No malaglagipka idi iti rabaw ti pagiddaak, bayat dagiti panagbantay iti rabii mennamennaenka.” (Sal. 63:6) Insuratna pay: “Bendituekto ni Jehova, a nangipaay kaniak iti balakad. Pudno, bayat dagiti rabii linintegdak dagiti bekkelko.” (Sal. 16:7) Wen, impalubos ni David nga umukuok iti kaungganna ti balakad ti Dios tapno dayta ti mangsukog iti pampanunot ken rikriknana, uray no nadagsen ti balakad. (2 Sam. 12:1-13) Talaga a nagsayaat ti kinapakumbaba ken panagpasakup nga inyulidan ni David kadatayo! Ut-utobem met kadi ti Sao ti Dios, a bay-am nga umukuok dayta iti kaunggam? Wenno masapul nga ad-adda pay nga utobem ti Sao ti Dios?—Sal. 1:2, 3.

12, 13. Kasano a sukogennatayo ni Jehova babaen ti nasantuan nga espiritu ken ti kongregasion Kristiano?

¹² Iti adu a pamay-an, sukogennatayo ti nasantuan nga espiritu. Kas pagarigan, tulongannatayo a mangpatanor iti personalidad a kas ken Kristo ken tulongannatayo a mangipakita kadagiti aspeto ti bunga ti espiritu ti Dios. (Gal. 5:22, 23) Ti maysa nga aspetona ket ayat. Ay-ayatentayo ti Dios ken kayattayo ti agtulnog ken agpasukog kenkuana, ta ammotayo a saan a nadagsen dagiti bilinna. Pabilgennatayo met ti nasantuan nga espiritu a manglaban iti panangsukog ti lubong ken ti dakes nga impluensiana. (Efe. 2:2) Idi agkabannuag pay ni apostol Pablo, nakaro idi ti impluensia kenkuana ti kinatangsit dagiti Judio a lider ti relihion. Idi agangay, insuratna: “Ta iti amin a bambanag addaanak iti bileg gapu iti daydiay mangmangted kaniak iti pannakabalin.” (Fil. 4:13) Kas ken Pablo, itultuloytayo ngarud a kiddawen ti nasantuan nga espiritu. Denggen ni  Jehova dagiti napasnek a kiddaw ti naemma.—Sal. 10:17.

¹³ Us-usaren ni Jehova ti kongregasion Kristiano ken dagiti panglakayen a mangsukog kadatayo kas indibidual. Kas pagarigan, no makita dagiti panglakayen nga adda problema iti espiritualidadtayo, ikagumaandatayo a tulongan a saan a naibatay iti sirib ti tao. (Gal. 6:1) Imbes ketdi, sipapakumbaba nga agkiddawda iti Dios iti pannakaawat ken sirib. Bayat a sipapanunotda iti kasasaadtayo, agtignayda maitunos iti kararagda babaen ti panagsukimatda iti Sao ti Dios ken kadagiti publikasiontayo. Daytoy ti tumulong kadakuada a mangipaay iti maitutop a tulong kadatayo. No umasidegda kenka tapno tulongandaka iti naasi ken naayat a pamay-an, kas koma iti estilo ti panagbadbadom, awatem kadi ti balakadda kas ebkas ti ayat ti Dios kenka? No kasta ti aramidem, agbalinka a kas iti nalukneng a pila iti ima ni Jehova, a sisasagana nga agpasukog para iti pagimbagam.

14. Nupay adda autoridad ni Jehova iti pila, kasano nga ipakitana a raraemenna ti wayawayatayo nga agpili?

¹⁴ No maawatantayo no kasano a sukogennatayo ti Dios, makatulong daytoy kadatayo iti pannakilangentayo kadagiti kakabsat ken iti panangmatmattayo kadagiti tattao iti teritoriatayo, agraman dagiti iyad-adalantayo. Idi tiempo ti Biblia, saan nga agkali iti pila ti agdamdamili sa sukogenna a dagus dayta. Isaganana nga umuna ti pila, mabalin nga ikkatenna dagiti bato ken ti dadduma a saan a kasapulan. Iti naespirituan nga anag, tumulong ti Dios tapno maisagana dagiti natulok a tattao tapno masukogna ida. Saanna ida a piliten nga agbalbaliw, imbes ketdi, ibagana dagiti nalinteg a pagalagadanna tapno madalusanda ti biagda wenno tapno situtulok a makapagbalbaliwda.

15, 16. Kasano nga ipakita dagiti agad-adal iti Biblia a kayatda a sukogen ida ni Jehova? Mangted iti pagarigan.

¹⁵ Alaentayo a pagarigan ni Tessie, maysa a kabsat a babai a taga-Australia. “Nalaing ken nalaka a naawatan ni Tessie ti kinapudno iti Biblia,” kinuna ti kabsat a babai a nangyadal kenkuana. “Ngem saan unay a rimmang-ay iti naespirituan—saan pay a makigimong! Gapuna, kalpasan ti napasnek a panangikararagko iti dayta, inkeddengko nga isardeng nga iyadalan. Idi kuan, adda nakaskasdaaw a napasamak. Iti impagarupko a maudin a panagadalmi, nagpudno ni Tessie. Imbagana a nariknana nga isu ket kasla agpampammarang ta pagay-ayatna ti agsugal. Ngem desididon a mangisardeng iti dayta.”

¹⁶ Di nagbayag, nakigimongen ni Tessie ken impakitana dagiti kababalin a maitutop iti maysa a Kristiano—uray no uy-uyawen dagiti dati a gagayyemna. Kinuna pay ti kabsat: “Idi agangay, nabautisaran ni Tessie ken nagbalin a regular pioneer, uray babassit pay idi dagiti annakna.” Wen, no balbaliwan dagiti agad-adal iti Biblia ti biagda tapno maparagsakda ti Dios, umadani ni Jehova kadakuada ket sukogenna ida nga agbalin a makaay-ayo a basehas.

17. (a) Ania ti magustuam ken Jehova kas Agdamdamili kadatayo? (b) Ania a paset ti panangsukog ti usigentayo iti sumaruno nga artikulo?

¹⁷ Ita, dadduma a damili ti maar-aramid pay laeng babaen iti ima, a naipamaysa ti agdamdamili iti damili nga aramidenna. Kasta met, ti Agdamdamili kadatayo ipamaysa ken siaanus a sukogennatayo babaen iti balakadna ken paliiwenna ti reaksiontayo. (Basaen ti Salmo 32:8.) Mariknam kadi ti pannakaseknan ni Jehova kenka? Makitkitam kadi ti bagim a suksukogenna iti nadungngo nga imana? No kasta, ania pay dagiti kualidad a makatulong kenka nga agtalinaed a kas iti nalukneng ken nalaka a masukog a pila iti imatang ni Jehova? Ania dagiti kababalin a masapul a liklikam tapno saanka nga agbalin a natangken wenno narigat a masukog? Ken kasano a dagiti nagannak makitinnulongda ken Jehova a mangsukog kadagiti annakda? Masungbatan iti sumaruno nga artikulo dagita a saludsod.