PARPAREGTAEN ni Apo Jehova dagiti Kristiano nga ipategda ti talna; pagbalinenda dayta a napateg a paset ti biagda. Tagtagiragsaken dagiti pudno nga agdaydayaw iti Dios ti talna gapu ta mannakikappiada. Makatulong dayta tapno agbalin ti kongregasion Kristiano a makaay-ayo kadagiti mayat nga agbalin a natalna ti biagda.

Kas pagarigan, napaliiw ti maysa a pagaammo nga albolario idiay Madagascar nga agtutunos dagiti Saksi ni Jehova. Kinunana iti nakemna, ‘No bilang ta sumrekak iti maysa a relihion, daytoyen ti piliek.’ Idi agangay, insardengnan dagiti espiritistiko nga aramidna, adu a bulan nga inasikasona ti panagasawana tapno agbalin a legal dayta, ken nagbalin nga agdaydayaw ken Jehova, ti Dios ti talna.

Kas iti dayta a lalaki, nakaad-adu ti desperado a mangbirbirok iti talna. Iti kada tawen, rinibu kadakuada ti nakasapul iti dayta iti uneg ti kongregasion Kristiano. Ngem kuna ti Biblia a ti “napait nga imon ken rinnupir” iti kongregasion mabalin a dadaelenna ti panaggagayyem ken mangpataud iti di pagkikinnaawatan. (Sant. 3:14-16) Makaparagsak ta nangted ti Biblia kadagiti balakad no kasano a maliklikan dagitoy a problema ken no kasano a mapagtalinaed ti talna. Tapno maaramidtayo dayta, kitaentayo dagitoy a kapadasan.

“Dikam agkinnaawatan iti kabsat a katrabahuak. Naminsan, nagbinnugkawkami. Idi kuan, adda dua a lallaki nga immay ket nakitada ti panagapami.”—CHRIS.

“Adda kabsat a kanayon a kaduak a mangasaba ngem bigla lattan a dinak kadkaduaen, agingga a dinak payen kasarsarita. Diak ammo no apay.”—JANET.

“Tallokami idi nga agsasarita iti telepono. Nagpakadan ti maysa, ket kunak no imbabanan ti teleponona isu a tila imbagbagakon maipapan kenkuana. Ngem dina pay met gayam imbaba.”—MICHAEL.

“Iti kongregasionmi, adda di nagkinnaawatan ti dua a payunir. Pinagsasawan ti maysa ti padana a payunir. Makapaupay dayta iti dadduma.”—GARY.

Mabalin nga ibilangmo a babassit laeng a banag dagita. Ngem mabalin latta nga agresulta iti napaut a sakit ti nakem ken pannakadadael ti espiritualidad. Nupay kasta, makaparagsak ta nagkakappia met laeng dagitoy a kakabsat ta nagpaiwanwanda iti Biblia. Panagkunam, ania dagiti balakad ti Biblia nga inyaplikarda?

 “Dikay karurod ti maysa ken maysa iti dalan.” (Gen. 45:24) Imbalakad dayta ni Jose kadagiti kakabsatna nga agaw-awid idin iti ayan ti amada. Nagsayaat dagita a sasaona! No di matengngel ti maysa ti emosionna ket masuron a dagus, mabalin a mapagpungtotna ti dadduma. Nabigbig ni Chris a ti kinapannakkelna ken ti dina panangimdeng iti instruksion ti pagkapuyanna. Kayatna ti agbalbaliw isu a nagpadispensar iti kabsat a nakasubangna ket inkagumaannan a kontrolen ti pungtotna. Gapu ta nagregget ni Chris nga agbalbaliw, nagbalbaliw met ti katrabahuanna. Naragsakda itan nga agkadua nga agserserbi ken Jehova.

“Adda pannakapaay dagiti gakat no sadino nga awan ti kompidensial a saritaan.” (Prov. 15:22) Naamiris ni Janet a masapul nga ipapusona pay dayta a kinapudno. ‘Kinasaritana’ ngarud ti kabsat. Bayat ti panagsaritada, naannad a dinamag ni Janet no apay nga agsaksakit ti nakem ti kabsat. Idi damo, medio nabara ti panagsaritada, ngem bimmaaw met laeng idi kalmado a nagsaritaanda ti problema. Naammuan ti sister a kamali gayam ti pampanunotenna. Kinapudnona, saan pay ketdi a karaman ni Janet iti daydiay a banag. Nagpakawan ti kabsat, ket agkaduada manen nga agserserbi ken Jehova.

“No, ngarud, ip-ipanmo ti sagutmo iti altar ket sadiay malagipmo a ti kabsatmo addaan iti maysa a banag a maibusor kenka, panawam ti sagutmo sadiay sanguanan ti altar, ket mapanka; umuna a makikappiaka ken kabsatmo.” (Mat. 5:23, 24) Imbalakad dayta ni Jesus iti Sermon iti Bantay. Permi ti bain ni Michael idi naamirisna a nagmadi ti inaramidna. Inkagumaanna ti makikappia. Napan ni Michael iti kabsat a nasaktanna ket sipapakumbaba a nagpakawan. Ania ti resultana? Kuna ni Michael, “Naimpusuan a pinakawannak ti kabsatko.” Naisubli ti panaggayyemda.

“Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali.” (Col. 3:12-14) Iti met kasasaad ti dua a nabayagen a payunir, imbaga kadakuada ti maysa a nasingpet a panglakayen nga isaludsodda iti bagida: ‘Adda kadi karbenganta a mangpaliday iti dadduma gapu laeng ta adda dita nagkinnaawatan? Adda kadi nadagsen a rason tapno saanta nga aginnanus ken saanta a makapagtultuloy nga agserbi ken Jehova a sitatalna?’ Inawatda ti balakad ti panglakayen ken inyaplikarda. Agtunosda itan a mangikaskasaba iti naimbag a damag.

 No adda nangpasakit kenka, mabalin a makatulong a dagus ti panangyaplikar iti kadakdakamat a balakad ti Biblia iti Colosas 3:12-14. Adun ti nakapaneknek a kabaelanda ti mangpakawan ken manglipat no napakumbabada. No kasla narigat latta, makatulong ngata ti prinsipio ti Mateo 18:15? Dayta a balakad ni Jesus ket agaplikar no adda nadagsen a basol a naaramid ti maysa iti sabali. Ngem mabalin a dayta ti kasapulan nga aramidem. Makisaritaka iti kabsatmo, agpakumbabaka, ken pagtungtonganyo a nasayaat ti diyo nagkinnaawatan ken urnosenyo dayta.

Siempre, adu pay dagiti nasayaat a balakad ti Biblia. Ti maysa ket ti panangipakitam iti “bunga ti espiritu,” kas iti “ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.” (Gal. 5:22, 23) Kas iti asete a mangpalamuyot iti panagandar ti makina, makatulong dagitoy a galad tapno natalna a masolbar dagiti di pagkikinnaawatan.

Mabalin a mangpapintas iti panaggagayyem ti personalidad—dagiti naidumduma a kababalin nga adda kadatayo nupay agduduma dagita iti tunggal tao. Mabalin met a mangpataud iti di pagkikinnaawatan ti agduduma a personalidad. Maysa a nabayagen a panglakayen ti nangted iti daytoy a pagarigan: “Mabalin a marigatan a makikadua ti maysa a managbabain iti mannanao ken managestoria a tao. Kasla bassit a banag dayta, ngem mabalin a pangrugian iti dakkel a problema.” Ngem talaga kadi a saanen nga agkatunosan dagiti agduma ti personalidadna? Alaentayo a pagarigan ti dua nga apostol. Ania ti kababalin ni Pedro? Mabalin a mapanunotmo a prangka ken nadarasudos. Ni met ngay Juan? Mabalin a mapanunottayo a naayat ken naannad ti panagsasao ken panagtigtignayna. Mabalin nga adda pangibasarantayo kadagita. Agparang nga agdumada  ngem agkatunosanda latta. (Ara. 8:14; Gal. 2:9) No kasta, posible ngarud nga agtunos dagiti Kristiano a dakkel ti nagdumaan ti personalidadda.

Nalabit adda kakongregasionmo a dimo kayat ti panagsasao ken panagtigtignayna. Ngem ammom a natay ni Kristo para kenkuana ken masapul nga ipakitam ti ayat. (Juan 13:34, 35; Roma 5:6-8) Imbes ngarud a panunotem nga awan serserbina a makigayyemka kenkuana wenno liklikam pay ketdi, isaludsodmo: ‘Adda kadi ar-aramidenna a nalawag a maisalungasing iti Kasuratan? Igaggagaranak kadi a suronen? Wenno agduma la a talaga ti personalidadmi?’ Nagpateg met daytoy a saludsod: ‘Ania dagiti nasayaat a kababalinna a makatulong kaniak?’

Nagpateg dayta a saludsod. No nalaing a makisarita ket mabilbilang laeng ti saom, panunotem no kasano kalaka para kenkuana ti mangasaba. Mabalin nga ibagam a makikaduaka kenkuana iti ministerio ket kitaem dagiti masursurom. No met naparabur iti dadduma, ket medio nakirmetka, apay a dimo padasen ti ragsak ti panangted iti masapsapul dagiti nataengan, masakit, wenno marigrigat? Ti punto ket uray no agduma ti personalidadyo, mabalin nga agbalinkayo a nadekdekket no dagiti positibo a kababalin ti kitaenyo. Mabalin a saankayo met nga agbalin a nadekket nga aggayyem, ngem makatulong dayta tapno agtunoskayo ken maadda ti talna—iti nagbaetanyo ken iti kongregasion.

Mabalin a dakkel ti nagdumaan da Euodia ken Sintique. Ngem kuna kadakuada ni apostol Pablo nga “agmaymaysa koma ti panunotda iti Apo.” (Fil. 4:2) Aramidem met kadi dayta tapno adda talna?

Kas kadagiti ruot a rumaber iti nagbabaetan dagiti agsabong a mula, kumaro dagiti negatibo a rikrikna no ditay paruten dagita. No napnon iti sakit ti nakem ti puso ti maysa,  mabalin a maapektaran uray ti kongregasion. No ay-ayatentayo ni Jehova ken dagiti kakabsat, aramidentayo ti amin tapno saan a madadael ti talna iti ili ti Dios gapu iti nagdudumaantayo.

No solbarentayo dagiti di pagkikinnaawatan tapno adda ti talna, mabalin a masdaawtayo kadagiti nagsayaat a resultana. Kitaentayo ti kapadasan ti maysa a kabsat: “Kaslaak la ubing no tratuennak ti maysa a kabsat. Makapasuron. Kimmaro ti rurodko, isu nga awan babainkon kenkuana. Kinunak iti panunotko, ‘Dinakto pay respetuen, pambarak ngay a mangrespeto kenkuana!’”

Pinampanunot daytoy a kabsat ti inaramidna. “Nakitak a nagmadi ti ugalik, isu a nasuronak iti bagik. Naamirisko a masapul a balbaliwak ti panagpampanunotko. Kalpasan nga inkararagko dayta ken Apo Jehova, inggatangak ti kabsat iti bassit a regalo. Pinasurotak iti kard a naglaon iti panagpakawanko ta nagmadi ti impakpakitak. Naginnarakupkami ken nagsaritaanmi a lipatenmin ti napasamak. Awanen ti nagbalin a problemami manipud idi.”

Talaga a kasapulan dagiti tattao ti talna. Ngem adu kadakuada ti makiriri no maapektaranen ti posisionda wenno mabaddekan ti pride-da. Kasta ti kaaduan kadagiti saan nga agdaydayaw ken Jehova, ngem kappia ken panagkaykaysa koma ti mapaturay iti nagbabaetan dagiti adipenna. Impaisuratna ken Pablo: “Siak, . . . dawatek kadakayo a magnakayo a maikari iti pannakaayab a nakaayabanyo, buyogen ti naan-anay a kinapakumbaba iti panagpampanunot ken kinaalumamay, agraman ti mabayag a panagitured, nga agiinnanuskayo iti ayat, a sipapasnek nga ikagumaanyo a salimetmetan ti panagmaymaysa ti espiritu iti mamagkaykaysa a singgalut ti talna.” (Efe. 4:1-3) Nakapatpateg dayta a “mamagkaykaysa a singgalut ti talna.” Pairutantayo koma dayta ken ikagumaantayo a solbaren ti aniaman a di pagkikinnaawatan iti nagbabaetantayo.