BAYAT nga agsagsagana dagiti Israelita a bumallasiw iti Karayan Jordan a mapan iti daga nga inkari ti Dios kadakuada, adda dagiti simmangpet a bisitada. Dagitoy ket babbai a saan nga Israelita a nangawis kadagiti lallaki iti maysa a padaya. Kasla nagmayat dayta nga oportunidad. Sigurado a nakaragragsak ti makiam-ammo kadagiti baro a gagayyem, makisala kadakuada, ken mangan iti naiimas a makan. Dagiti kaugalian ken ar-aramid dagitoy a babbai ket saan a maitunos iti Linteg ti Dios iti Israel, ngem mabalin nga inrason ti dadduma nga Israelita a lallaki: ‘Saankaminto a maimpluensiaan. Agan-annadkami.’

 Ania ti napasamak? Kuna ti Biblia: “Nakidennada kadagiti babbai iti Moab.” Kinapudnona, kayat dagita a babbai nga agdayaw dagiti Israelita a lallaki kadagiti ulbod a dios, ket kasta ti napasamak. Isu a “nakapungtot unay ni Jehova iti Israel.”​—Num. 25:1-3.

Sinukir dagiti Israelita ti Linteg ti Dios iti dua a pamay-an: Nagdayawda kadagiti idolo, ken nagaramidda iti seksual nga immoralidad. Rinibu ti natay gapu iti panagsukirda. (Ex. 20:4, 5, 14; Deut. 13:6-9) Apay a nakasasaem daytoy a trahedia? Gapu ta no saan a sinukir dagita a rinibu a lallaki nga Israelita ti Linteg ti Dios, nakaballasiwda koma iti Jordan ket nakadanonda iti Naikari a Daga.​—Num. 25:5, 9.

Maipapan kadagita a pasamak, insurat ni apostol Pablo: “Napasamak dagitoy a banag kas pakasursuruantayo, ken naisurat kas pakdaar kadatayo tapno datayo nga agbibiag iti panungpalan daytoy a sistema ti bambanag ket saan nga agbalin a kas kadakuada.” (1 Cor. 10:7-11) Sigurado a naragsakan ni Satanas a nakaaramid iti nadagsen a basol ti dadduma nga Israelita ken saanda a nakastrek iti Naikari a Daga. Masapul nga ipapusotayo dayta a pakdaar ta ammotayo a maragsakan unay ni Satanas no malapdannatayo a sumrek iti baro a lubong ti Dios!

Dagiti Kristiano ti puntiria ni Satanas, ket us-usarenna dagiti taktika a nakitana nga epektibo. Kas naammuantayo iti napasamak kadagiti Israelita, inusarna ti immoral a pannakidenna. Agingga ita, napeggad latta a silo ti immoralidad. Ti maysa nga epektibo a pamay-an a masiluantayo iti dayta ket ti panagbuya iti pornograpia.

Ita, makabuyan ti maysa iti pornograpia a saan a maammuan ti dadduma. Kadagiti napalabas a dekada, no kayat ti maysa ti agbuya iti pornograpia, masapul a mapan iti pagsinean tapno makabuya kadagiti immoral a pelikula wenno mapan kadagiti paggatangan iti libro ken magasin a naglaon iti pornograpia. Mabalin a saan a kayat ti adu ti mapan kadagita a lugar ta mabainda a makita ida ti dadduma. Ngem ita, no adda Internet ti maysa, makabuyan iti pornograpia uray adda iti pagtrabahuan wenno iti nakaparada a lugan. Ken iti adu a lugar, makabuyan iti pornograpia ti maysa a lalaki wenno babai iti mismo a balayna.

Saan la a dayta. Gapu kadagiti gadyet, nalaklakan ti makakita iti pornograpia. Magmagna man dagiti tattao iti kalsada wenno nakaluganda iti bus wenno tren, mabalindan ti agbuya kadagiti immoral a ladawan iti selpon wenno tablet-da.

Gapu ta nalaklaka itan ti makabuya iti pornograpia ken mangilemmeng iti panagbuya iti dayta, ad-adun ti apektado kadagiti dakes nga epektona. Adu nga agbuybuya iti pornograpia ti mangdaddadael iti panagasawada, dignidadda, ken konsiensiada. Nakarkaro pay, daddadaelenda ti relasionda iti Dios. Talaga ngarud a makadangran dayta kadagiti agbuybuya. Kaaduanna a dayta ti pakaigapuan dagiti nauneg nga emosional a sugat. Posible nga in-inut nga aglunit dagita ngem mabalin a mangibati kadagiti piglat a narigat a maikkat.

Ngem laglagipentayo a mangipapaay ni Jehova iti proteksion tapno saantayo a mabiktima iti dayta a silo ni Satanas. No kayattayo a protektarannatayo ni Jehova, masapul nga aramidentayo ti banag a saan nga inaramid dagiti Israelita a lallaki idi un-unana​—“ikagumaan[tayo] ti agtulnog” kenkuana. (Ex. 19:5) Masapul a bigbigentayo a kagura unay ni Jehova ti panagbuya iti pornograpia. Apay a maibagatayo a kasta?

Panunotem daytoy: Naidumduma dagiti linteg nga inted ti Dios iti nagkauna a nasion ti Israel. Kas iti pader, dagita a linteg ti mangsalaknib kadagiti Israelita manipud kadagiti nasion iti aglawlawda ken iti dakes nga ar-aramidda. (Deut. 4: 6-8) Nalawag nga isuro dagita a linteg daytoy a nagpateg a kinapudno: Kagura ni Jehova ti seksual nga immoralidad.

Idi dinakamat ni Jehova dagiti nakaro nga immoral nga ar-aramid dagiti nasion iti aglawlaw dagiti Israelita, imbagana: “Diyo tultuladen dagiti maar-aramid idiay Canaan, a pangipanak kadakayo. . . . Nagbalin a narugit ti daga ket dusaekto dagiti umili gapu kadagiti basolda.” Para iti nasantuan a Dios ti Israel, nakadakdakes ti panagbiag dagiti Canaanita nga uray la imbilangna a narugit ti daga a pagnanaedanda.​—Lev. 18:3, 25.

Nupay dinusa ni Jehova dagiti Canaanita, intultuloy latta ti dadduma a tattao ti agaramid iti seksual nga immoralidad. Kalpasan ti nasurok a 1,500 a tawen, imbaga ni Pablo a ‘kimmalio ti konsiensia’ dagiti tattao kadagiti nasion a nagnaedan dagiti Kristiano. Kinapudnona, “igaggagarada ti nakaal-alas a kababalinda ken ti amin a kita ti kinarugit ken kinaagum.” (Efe. 4:17-19) Adu met ita ti nakaro ti kinaimmoralda ken ipagpannakkelda dayta. Masapul ngarud a liklikan dagiti pudno nga adipen ti Dios a kitaen dagiti immoral nga ar-aramid dagiti tattao ditoy lubong.

Ti pornograpia ket nakaro a kinaawan panagraem iti Dios. Pinarsua ti Dios dagiti tattao a kaladladawanna ken inikkannatayo iti abilidad a mangilasin iti naimbag ken dakes. Nainsiriban a nangted kadagiti limitasion iti seksual nga ar-aramid tapno matagiragsak dagiti agassawa ti panagdenna. (Gen. 1:26-28; Prov. 5:18, 19) Ngem ania ti ar-aramiden dagiti mangpatpataud wenno mangitantandudo iti pornograpia? Saanda nga ikankano dagiti moral a pagalagadan ti Dios. Saanda a raraemen ni Jehova. Ukomento ti Dios dagitoy nga agar-aramid wenno mangitantandudo kadagiti material a naglaon iti immoralidad.​—Roma 1:24-27.

Ngem dagiti ngay mangigaggagara nga agbasa wenno agbuya iti pornograpia? Mabalin nga ibilang dayta ti dadduma nga awan pagdaksanna a paglinglingayan. Ngem ti agpayso, supsuportaranda dagidiay saan a mangraraem kadagiti pagalagadan ni Jehova. Mabalin a saan a kasta ti intensionda idi inrugida ti agbuya iti pornograpia. Ngem nalawag nga ibaga ti Biblia a  masapul a guraen dagiti adipen ti pudno a Dios ti pornograpia. Ibalakad ti Biblia: “O dakayo a mangay-ayat ken Jehova, guraenyo ti dakes.”​—Sal. 97:10.

Mabalin a marigatan a mangyaplikar iti dayta uray dagidiay manglikliklik nga agbuya iti pornograpia. Gapu ta imperpektotayo, mabalin a kasapulan a labanantayo dagiti narugit a seksual a tarigagay. Kasta met, posible nga ikalintegan ti imperpekto a pusotayo a saan met a dakes ti agbuya iti pornograpia. (Jer. 17:9) Ngem adu a nagbalin a Kristiano ti nagballigi a nanglaban iti dayta. Makaparegta dayta ta ipakitana a kabaelam met a liklikan ti pornograpia. Kitaem no kasano a matulongannaka ti Sao ti Dios a mangliklik iti silo ni Satanas a pornograpia.

Kas naammuantayon, impalubos ti adu nga Israelita nga agbanag iti didigra dagiti immoral a tarigagayda. Posible a mapasamak met dayta ita. Dineskribir ni Santiago a kabsat ni Jesus ti peggad a resulta dayta: “Maallukoy ken masulisog [ti tunggal maysa] iti bukodna a tarigagay. Kalpasanna inton mayinawen ti tarigagay, mangyanak iti basol.” (Sant. 1:14, 15) No ipalubos ti maysa nga agtubo iti pusona ti immoral a tarigagay, mabalin a makaaramid iti basol. Isu a masapul nga ikkatentayo dagita iti panunottayo​—saantayo a sangkapanunot dagita.

No adda immoral a banag a sumrek iti panunotmo, agtignayka a dagus. Kinuna ni Jesus: “No ta imam wenno sakam ti mangitibkol kenka, putdem ket ibellengmo. . . . No ta matam met ti mangitibkol kenka, suatem ket ibellengmo.” (Mat. 18:8, 9) Saan a literal ti ibagbaga ni Jesus. Nagusar iti ilustrasion tapno maawatantayo a masapul a dagus nga ikkatentayo ti pakaitibkolantayo. Kasano a mayaplikartayo dayta a balakad no maipapan iti pornograpia?

No makakitaka iti pornograpia, saanmo nga irason, ‘Saanak a maimpluensiaan.’ Baliwam a dagus ti kitaem. Iddepem a dagus ti TV. Patayem a dagus ti kompiuter wenno ti gadyetmo. Sa agpokuska iti banag a nadalus. Makatulong dayta tapno makontrolmo ti pampanunotmo imbes a kontrolennaka dagiti dakes a tarigagaymo.

Kasanon no naisardengmon ti agbuya iti pornograpia, ngem malagipmo latta no dadduma dagiti nabuyam? Posible nga agpaut iti panunot ti maysa dagiti pornograpiko a kapanunotan wenno ladawan, ket mabalin a bigla a malagipna dagita. No mapasamak dayta kenka, baka mariknam a kayatmo ti agaramid iti narugit a banag, kas iti masturbasion. Laglagipem dayta, ket agsaganaka a manglaban kadagita.

Pabilgem ti determinasionmo nga agpanunot ken agtignay maitunos iti pagayatan ti Dios. Tuladem ni apostol Pablo, a situtulok a ‘nangdanog ken nangadipen iti bagina.’ (1 Cor. 9:27) Saanka nga agpaadipen kadagiti dakes a tarigagay. ‘Pabaruem ti kinataom babaen ti panangbalbaliwmo iti panunotmo, tapno mapaneknekam iti bagim ti nasayaat, makaay-ayo, ken perpekto a pagayatan ti Dios.’ (Roma 12:2) Laglagipem: Naragragsakka no agpanunot ken agtignayka maitunos iti pagayatan ti Dios ngem no pagustuam dagiti dakes a tarigagaymo.

Agikabesaka kadagiti teksto ti Biblia. Ket no adda malagipmo nga immoral a bambanag, ikagumaam a panunoten dagita a teksto. Makatulong kenka dagiti teksto a kas iti Salmo 119:37; Isaias 52:11; Mateo 5:28; Efeso 5:3; Colosas 3:5; ken 1 Tesalonica 4:4-8 tapno matuladmo ti panangmatmat ni Jehova iti pornograpia ken maaramidmo ti pagayatanna.

Ania ti aramidem no marigatanka a manglaban iti tarigagaymo nga agbuya wenno agpanunot iti immoral a bambanag? Ikagumaam a tuladen ti Ulidantayo, ni Jesus. (1 Ped. 2:21) Kalpasan a nabautisaran, intultuloy a sinulisog ni Satanas. Ania ti inaramid ni Jesus? Saan a timmulok. Nagusar kadagiti teksto bayat a lablabananna dagiti sulisog ni Satanas. Kinunana: “Pumanawka, Satanas!” ket pinanawan ni Satanas. Saan a nagsardeng ni Jesus a nanglaban iti pannulisog ni Satanas, ket kastaka met koma. (Mat. 4:1-11) Itultuloy ni Satanas ken ti lubongna a punnuen ti panunotmo iti immoral a bambanag, ngem dika sumuksuko. Malabanam ti tarigagaymo nga agbuya iti pornograpia. Iti tulong ni Jehova, maabakmo ti kabusormo.

Itultuloymo nga ikararag ti tulong ni Jehova. Imbaga ni Pablo: “Ipakaammoyo koma iti Dios ti amin a kiddawyo . . . ket ti talna ti Dios a mangartap iti amin a pannakaawat salaknibannanto ti puso ken isipyo babaen ken Kristo Jesus.” (Fil. 4:6, 7) Maikkannaka ti Dios iti talna ti panunot tapno malabanam ti tarigagay nga agaramid iti dakes. No umasidegka ken Jehova, ‘umasidegto kenka.’​—Sant. 4:8.

Ti kasayaatan a proteksionmo iti peggad ket ti nasinged a relasionmo iti Kangatuan iti uniberso. Kinuna ni Jesus: “Um-umayen ti agturay iti lubong [ni Satanas], ngem saannak a makontrol.” (Juan 14:30) Apay nga addaan ni Jesus iti kasta a panagtalek? Inlawlawagna: “Kaduak Daydiay nangibaon kaniak; saannak a binaybay-an nga agmaymaysa, ta kanayon nga ar-aramidek ti makaay-ayo kenkuana.” (Juan 8:29) No aramidem dagiti makaay-ayo ken Jehova, dinaka met pulos baybay-an. Liklikam ti silo ti pornograpia, ket saannakanto a mabiktima ni Satanas.