1, 2. (a) Ania ti reaksion ti dadduma a nagannak no ibagan ti anakda a kayatnan ti agpabautisar? (b) Apay a maisaludsod kadagiti kandidato ti bautismo no indedikardan ti biagda ken Jehova? (Kitaen ti ladawan iti rugi ti artikulo.)

BUYBUYAEN dagiti Kristiano a nagannak ti siam ti tawenna a balasitangda, nga awagantayo iti Maria, a timmakder a kadua dagiti kandidato ti bautismo. Sinungbatanna iti napigsa ken nalawag ti dua a saludsod ti ispiker. Kalpasanna, isu ket nabautisaran.

² Maragragsakan dagiti nagannak ni Maria iti desisionna a mangidedikar iti biagna ken Jehova ken agpabautisar. Ngem sakbay dayta, napampanunot ni nanangna: ‘Saan ngata a naubing unay ni Maria nga agpabautisar? Talaga ngata a maawatanna ti kinaserioso ti aramidenna? Saan ngata a nasaysayaat nga itantanna pay laeng ti agpabautisar?’ Adu a naayat a nagannak ti mangpampanunot kadagita no ibagan ti anakda a kayatnan ti agpabautisar. (Ecl. 5:5) Ngamin, ti panagdedikar ken panagpabautisar ti kapatgan nga aramiden ti maysa a Kristiano iti biagna.​—Kitaen ti kahon nga “ Indedikarmo Kadin ti Biagmo ken Jehova?”

3, 4. (a) Kasano nga inyilustrar ni apostol Pedro ti kinapateg ti bautismo? (b) Kasano a mayarig ti bautismo iti panangibangon ni Noe iti daong?

 ³ Idi dinakamat ni apostol Pedro ti maipapan iti bautismo, innaigna dayta iti panangibangon ni Noe iti daong. Kinunana: “Daydiay katupag daytoy ket isalsalakannakayo met ita, awan sabali, ti bautismo.” (Basaen ti 1 Pedro 3:20, 21.) Ti daong ket makita a pammaneknek nga impamaysa ni Noe nga aramiden ti pagayatan ti Dios. Simamatalek nga intungpalna ti trabaho nga intalek kenkuana ni Jehova. Wen, gapu iti pammati, naisalakan ni Noe ken ti pamiliana bayat ti Layus. Ania ti punto ti ilustrasion ni Pedro?

⁴ No kasano a ti daong ket pammaneknek iti pammati ni Noe, ti met bautismo ket makita a pammaneknek para kadagiti makaimatang. Ipakita dayta a ti maysa a Kristiano nga adalan indedikarnan ti biagna ken Jehova maibatay iti pammatina iti napagungar a ni Kristo. Kas ken Noe, natulnog met dagiti dedikado nga adalan a mangitungpal iti trabaho nga intalek kadakuada ti Dios. Naisalakan ni Noe iti Layus. Maisalakanto met dagiti matalek a bautisado inton agpatingga daytoy dakes a lubong. (Mar. 13:10; Apoc. 7:9, 10) Nakapatpateg ngarud ti panagdedikar ken panagpabautisar. No awan gapgapuna nga itantan ti maysa ti panagpabautisarna, mabalin a mapukawna ti namnamana a biag nga agnanayon.

5. Ania ti usigentayo iti daytoy nga artikulo?

⁵ Gapu ta naammuantayon a nagpateg ti bautismo, usigentayo ti tallo a saludsod. Ania ti kuna ti Biblia maipapan iti bautismo? Ania dagiti masapul nga aramiden ti maysa sakbay nga agpabautisar? Apay a masapul a sipapanunottayo iti kinapateg ti bautismo no iyad-adalantayo iti Biblia ti anaktayo wenno ti dadduma?

6, 7. (a) Ilawlawag ti kaipapanan ti panangbautisar ni Juan. (b) Ania a naisangsangayan a panangbautisar ti inaramid ni Juan?

⁶ Ti kaunaan a bautismo a mabasatayo iti Biblia ket ti inaramid ni Juan a Mammautisar. (Mat. 3:1-6) Nagpabautisar dagiti tattao ken Juan kas pammaneknek iti panagbabawida iti panangsukirda iti Mosaiko a Linteg. Ngem makapainteres ta ti kapatgan a panangbautisar nga inaramid ni Juan ket saan a mainaig iti panagbabawi. Naaddaan ni Juan iti naisangsangayan a pribilehio a mangbautisar ken Jesus, ti perpekto a tao nga Anak ti Dios. (Mat. 3:13-17) Awan basol ni Jesus isu a saanna a kasapulan ti agbabawi. (1 Ped. 2:22) Ti panagbautisarna ket simbolo ti situtulok a panangusarna iti biagna a mangaramid iti pagayatan ti Dios.​—Heb. 10:7.

⁷ Bayat ti ministerio ni Jesus ditoy daga, nangbautisar met dagiti adalanna. (Juan 3:22; 4:1, 2) Kas kadagiti bautismo nga inaramid ni Juan, isimbolo dagita ti panagbabawi dagiti nabautisaran iti panangsukirda iti Mosaiko a Linteg. Nupay kasta, kalpasan ti ipapatay ken panagungar ni Jesus, nagdakkelen ti nakaidumaan ti kaipapanan ti bautismo kadagiti pasurotna.

8. (a) Ania ti imbilin ni Jesus kadagiti pasurotna kalpasan ti panagungarna? (b) Ilawlawag ti kinapateg ti bautismo dagiti Kristiano.

⁸ Idi 33 C.E., nagparang ni napagungar a Jesus iti nasurok a 500 a lallaki, babbai, ken mabalin nga uray ubbing. Mabalin nga iti dayta a gundaway nga imbagana daytoy: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.” (Mat. 28:19, 20; 1 Cor. 15:6) Wen, agparang a ginasut a pasurot ni Jesus ti adda idi imbilinna nga agaramidda iti ad-adalan. Impakaammo ngarud ni Jesus a masapul nga agpabautisar dagidiay mangawat iti sangol, wenno responsabilidad, ti panagbalin a Kristiano nga adalan. (Mat. 11:29, 30) No kayat ti maysa a makaay-ayo iti Dios ti panagserbina, masapul a bigbigen ken awatenna ti akem ni Jesus iti pannakaitungpal ti panggep ni Jehova. No inaramidnan dayta, mabalinen a mabautisaran. Dayta laeng a panagpabautisar iti danum ti awaten ti Dios. Naglaon ti Biblia iti adu nga ebidensia a maawatan dagiti baro nga adalan ni Kristo idi umuna a siglo ti kinapateg ti bautismo. Ken saanda nga intantan ti nagpabautisar nga awan gapgapuna.​—Ara. 2:41; 9:18; 16:14, 15, 32, 33.

9, 10. Ania ti masursurotayo maipapan iti bautismo ti proselita nga Etiope ken ni apostol Pablo?

⁹ Basaen ti Aramid 8:35, 36. Usigentayo ti maipapan iti proselita nga Etiope nga agaw-awid kalpasan ti panagdaydayawna idiay Jerusalem. Iti panangiturong ti anghel ni Jehova, inasitgan ni Felipe ti Etiope ket “indeklarana kenkuana ti naimbag a damag maipapan ken Jesus.” Ania ti reaksion ti Etiope? Nalawag nga ipakita ti sumaruno nga inaramidna a naimpusuan nga inawatna dagiti kinapudno a naammuanna. Kayatna ti agtignay maitunos iti urnos ti Dios isu a dagus a nagpabautisar.

¹⁰ Ti maikadua nga usigentayo ket maipapan iti maysa a Judio a nangidadanes kadagiti Kristiano. Isu ket nayanak iti nasion a dedikado iti Dios. Ngem napukaw dagiti Judio ti naisangsangayan a relasionda ken Jehova. Sireregta a sursuroten dayta a lalaki dagiti tradision ti Judaismo, ngem adda nasaysayaat a sursuro a naammuanna. Ti napagungar ken naipadayag a ni Jesu-Kristo ti mismo a nakisarita kenkuana. Ania ti reaksionna? Inawatna ti tulong ti Kristiano nga adalan a ni Ananias. Kuna ti Biblia  maipapan iti daytoy a lalaki: “Timmakder ket nabautisaran.” (Ara. 9:17, 18; Gal. 1:14) Sigurado nga ammoyo a dayta a Judio a lalaki ket ti nagbalin idi agangay nga apostol Pablo. Ngem siputanyo ta idi naawatan ni Pablo ti kinapudno maipapan iti akem ni Jesus iti pannakaitungpal ti panggep ti Dios, dagus a nagpabautisar.​—Basaen ti Aramid 22:12-16.

11. (a) Ania ti mangtignay kadagiti mayad-adalan iti Biblia ita nga agpabautisar? (b) Ania ti mariknatayo no makitatayo nga agpabautisar dagiti kabbaro a nagdedikar?

¹¹ Kasta met laeng kadagiti agad-adal iti Biblia ita, ubing man wenno nataengan. Magagaran a mangidedikar iti biagda ken agpabautisar dagidiay addaan iti pammati ken talaga a mangap-apresiar iti kinapudno iti Biblia. Ti palawag a nangnangruna a para kadakuada ti maysa a tampok iti tunggal asamblea ken kombension. Maragsakan dagiti Saksi ni Jehova no awaten ti maysa a mayad-adalan iti Biblia ti kinapudno ken rumang-ay agingga a mabautisaran. Saan kadi a maragsakan dagiti Kristiano a nagannak no makitada nga agpabautisar dagiti annakda a kadua dagiti baro nga adalan? Bayat ti 2017 a tawen serbisio, nasurok a 284,000 a “siuumiso nga agannayas” nga indibidual ti nangipakita nga indedikardan ti biagda ken Jehova babaen iti panagpabautisarda iti danum. (Ara. 13:48) Nalawag a maawatan dagitoy a baro nga adalan a kasapulan ti bautismo kadagiti Kristiano. Ania dagiti inaramidda sakbay a mabautisaranda?

12. Ania dagiti masapul nga aramiden ti mayad-adalan iti Biblia sakbay a mabautisaran?

¹² Sakbay a mabautisaran ti mayad-adalan iti Biblia, masapul a mapatanorna ti pammati a naibatay iti umiso a pannakaammo iti Dios, iti panggep ni Jehova, ken iti inaramidna tapno maisalakantayo. (1 Tim. 2:3-6) Ti kasta a pammati tignayenna ti mayad-adalan a mangtallikud kadagiti aramid a kagura ti Dios ken agbiag maitunos kadagiti nalinteg a pagalagadan ni Jehova. (Ara. 3:19) Nalawag ngarud a saan nga awaten ti Dios ti panagdedikar ti maysa no agar-aramid iti mangdiskualipikar kenkuana nga agtawid iti Pagarian. (1 Cor. 6:9, 10) Ngem saan laeng a ti panangsurot iti nangato a moral a pagaladan ni Jehova ti kasapulan. Ti maysa a mangikagkagumaan a mangaramid iti kinalinteg ket masapul nga atenderanna dagiti gimong ken regular a makiraman iti makaisalakan a trabaho a panangasaba ken panagaramid iti adalan. Imbaga ni Jesus nga itungpal dagiti pudno nga adalanna daytoy a trabaho. (Ara. 1:8) No naaramiden dagita ti baro nga adalan, mabalinnan ti agdedikar ken Jehova babaen ti kararag ken mabalinnan nga isimbolo ti dedikasionna babaen ti panagpabautisarna iti imatang dagiti tattao.

13. Apay a silalagip koma dagiti mangyad-adal iti Biblia a kasapulan ti bautismo kadagiti Kristiano?

¹³ Bayat a tultulongantayo dagiti annaktayo ken ti dadduma nga iyad-adalantayo iti Biblia a mangaramid kadagitoy napateg nga addang, laglagipentayo koma a masapul a mabautisaranda tapno agbalinda a pudpudno nga adalan. No silalagiptayo iti dayta, nalaklakatay a maibaga kadakuada ti kinapateg ti dedikasion ken bautismo iti maitutop a gundaway. Wen, kayattayo a rumang-ayda agingga iti bautismo!

14. Apay a ditay koma piliten ti asinoman nga agpabautisar?

¹⁴ Siempre, saan koma nga agpabautisar ti maysa gapu iti panangpilit ti nagannak, mangyad-adal, wenno asinoman iti kongregasion. Saan a kasta ti kayat ni Jehova. (1 Juan 4:8) Imbes ketdi, bayat a mangyad-adaltayo, masapul nga ipaganetgettayo ti kinapateg ti panangpatanor iti personal  a relasion iti Dios. Ti mangtignay iti mayad-adalan nga agpabautisar ket ti naimpusuan a panangapresiarna iti kinapudno ken ti tarigagayna a mangibaklay iti obligasion ti maysa a pudpudno a Kristiano.​—2 Cor. 5:14, 15.

15, 16. (a) Adda kadi naikeddeng nga edad iti panagpabautisar? Ilawlawagmo. (b) Apay a masapul a mabautisaran kas maysa a Saksi ni Jehova ti mayad-adalan iti Biblia uray no nabautisaran idin iti sabali a relihion?

¹⁵ Awan ti naikeddeng nga edad iti panagpabautisar. Nagduduma ti kapartak ti panagrang-ay ken panagmataengan ti tunggal mayad-adalan. Adu ti nabautisaran bayat nga ubbingda pay, ken nagtultuloyda a matalek ken Jehova. Adda met dagiti nagpabautisar kalpasan a naammuanda ti kinapudno iti Biblia idi nataengandan, ket dadduma ti agtawen iti nasurok a 100!

¹⁶ Maysa a baketen a mayad-adalan iti Biblia ti nangdamag iti mangyad-adal kenkuana no masapul pay laeng a mabautisaran manen. Nabautisaran ngamin idin iti nagduduma a relihion. Pinagsaritaanda dagiti teksto a sungbat iti saludsodna. Naawatanna nga ibagbaga ti Biblia a masapul nga aramidenna dayta isu a di nagbayag, nagpabautisar. Uray no agtawenen iti dandani 80, nariknana a nakapatpateg ti panagpabautisar. Wen, ti pudpudno a bautismo ket naibatay iti umiso a pannakaammo iti pagayatan ni Jehova. Masapul ngarud a mabautisaran dagiti baro nga adalan uray no nabautisaranda idin iti sabali a relihion.​—Basaen ti Aramid 19:3-5.

17. Ania ti rumbeng nga utoben ti maysa iti aldaw ti bautismona?

¹⁷ Nakaragragsak nga aldaw ti panagpabautisar ti maysa. Panawen met dayta ti panagutob. Ti panagbiag maitunos iti dedikasion ramanenna ti panagregget. Dayta ti rason nga inyarig ni Jesus iti sangol ti panagbalin a Kristiano nga adalan. Dagiti adalan ni Jesus masapul a “saanda koman nga agbiag nga agpaay iti bagbagida, no di ket agpaay kenkuana a natay maipaay kadakuada ken naibangon.”​—2 Cor. 5:15; Mat. 16:24.

18. Ania dagiti saludsod nga usigentayo iti sumaruno nga artikulo?

¹⁸ Dagita met laeng ti mapampanunot ti nanang ni Maria idi insaludsodna iti bagina dagiti nadakamat iti rugi. No maysaka a nagannak, mabalin a naisaludsodmon iti bagim: ‘Talaga kadi a nakasaganan ti anakko nga agpabautisar? Umdas kadin ti pannakaammona tapno idedikarnan ti biagna? Masapul kadi a mangala pay iti nangato nga edukasion ken maaddaan iti trabaho sakbay nga agpabautisar? Kasanon no makaaramid iti nadagsen a basol inton nabautisaranen?’ Usigentayo dagita iti sumaruno nga artikulo ken pagsasaritaantayo no kasano a mapagtalinaed dagiti Kristiano a nagannak ti balanse a panangmatmat iti bautismo.