1. Ania ti kasasaad dagiti Kristiano idi umuna a siglo?

IDI agarup 62-64 C.E., sinuratan ni apostol Pedro dagiti “temporario nga agnanaed a naiwarawara idiay Ponto, Galacia, Capadocia, Asia, ken Bitinia.” (1 Ped. 1:1) Agkasapulan iti pammaregta ken panangiwanwan dagitoy a kongregasion iti Asia Menor a nagduduma ti kultura dagiti kamengna. Agib-ibturda idi gapu iti ibubusor ken makapasakit a sasao. Naipasangoda iti arig ‘uram’ a pakasuotan. Kasta met, nagbiagda iti narigat a tiempo. Insurat ni Pedro: “Ti panungpalan ti amin a bambanag immasidegen.” Wen, awan pay sangapulo a tawen, dumtengen ti naranggas a panagpatingga ti sistema ti bambanag dagiti Judio. Ania ti nakatulong kadagiti Kristiano idi a mangsango kadagita, sadinoman ti ayanda?​—1 Ped. 4:4, 7, 12.

2, 3. Apay nga imparegta ni Pedro nga agbalin a managpadagus dagiti kakabsatna? (Kitaen ti ladawan iti rugi ti artikulo.)

² Daytoy ti maysa kadagiti imparegta ni Pedro kadagiti kakabsatna: “Managpadaguskayo koma iti maysa ken maysa.” (1 Ped. 4:9) Ti Griego a sao a naipatarus kas “kinamanagpadagus” literal a kaipapananna ti “panangayat, wenno panangngaasi, iti ganggannaet.”  Ngem paliiwentayo ta kinuna ni Pedro kadagiti Kristiano a kakabsatna nga agbalinda a managpadagus iti “maysa ken maysa,” kadagidiay am-ammoda ken makalkalangendan. Ania ti maitulong kadakuada ti panagbalinda a managpadagus?

³ Mangpasinged dayta kadakuada. Panunotem dagitoy: Naragsakanka kadi idi adda nangawis kenka iti balayda? Saan kadi a malaglagipmo dayta? Idi addada sinangailim a kakongregasionmo, saan kadi a dimmekket ti panaggagayyemyo? No sangailientayo dagiti kakabsattayo, ad-adda a maam-ammotayo ida ngem iti dadduma a gundaway. Masapul nga agbalin a nadekdekket dagiti Kristiano idi panawen ni Pedro ta dumakdakes idin ti kasasaad. Kasta met laeng kadagiti Kristiano kadagitoy “maudi nga aldaw.”​—2 Tim. 3:1.

4. Ania dagiti saludsod nga usigentayo iti daytoy nga artikulo?

⁴ Ania dagiti gundaway a maipakitatayo ti kinamanagpadagus iti “maysa ken maysa”? Kasano a mapagballigiantayo dagiti manglapped kadatayo nga agpadagus? Ania ti makatulong tapno agbalintayo a nasayaat a sangaili?

5. Kasano a maipakitatayo ti kinamanagpadagus kadagiti gimongtayo?

⁵ Gimong: Abrasaentayo ti amin nga umatender kadagiti gimongtayo kas padatayo a bisita iti naespirituan a pannangan. Ni Jehova ken ti organisasionna ti mangsangsangaili kadatayo. (Roma 15:7) No adda dagiti kabbaro nga umatender, karamantayo met a mangsangaili kadakuada. Dagus koma nga abrasaentayo ida, aniaman ti bado wenno langada. (Sant. 2:1-4) No awan pay ti nangasikaso iti maysa a bisita, mabalin kadi nga awisem iti abaymo? Mabalin a maragsakan no tulongam a mangsurot iti programa ken nalabit mangbirok iti maibasbasa a teksto. Nagsayaat dayta a pamay-an tapno ‘masurottayo ti dalan ti kinamanagpadagus.’​—Roma 12:13.

6. Siasino koma dagiti kangrunaan a sangailientayo?

⁶ Merienda wenno pannangan: Idi panawen ti Biblia, gagangay a paset ti panagpadagus ti panangawis iti pagtaengan para iti pannangan. (Gen. 18:1-8; Uk. 13:15; Luc. 24:28-30) No iyawismo ti pannangan, iyaw-awismo met ti pannakigayyem ken pannakikappia. Siasino koma dagiti kangrunaan a sangailientayo? Dagidiay kanayon a makalkalangentayo, dagiti kakongregasiontayo. No adda rigat, saan kadi a datayo ti agtitinnulong? Kasapulan a nasayaat ken natalna ti relasiontayo kadakuada. Makapainteres ta idi 2011, binaliwan ti Bagi a Manarawidwid ti oras ti Panagadal iti Pagwanawanan ti pamilia ti Bethel iti United States, manipud 6:45 p.m. nagbalin a 6:15 p.m. Apay? Nadakamat iti pakaammo a mabalin nga ad-adu a Bethelite ti agawis ken mangawat iti awis no nasapsapa a malpas ti panagadal. Sinurot met dayta ti dadduma a sangay. Gapu iti dayta nga urnos, nasingsinged itan dagiti miembro ti pamilia ti Bethel.

7, 8. Kasano a maipakitatayo ti kinamanagpadagus kadagiti bumisbisita a pannakabagi ti organisasion ni Jehova?

⁷ Gundawaytayo nga ipakita ti kinamanagpadagus no adda bumisita nga ispiker manipud iti sabali a kongregasion, no bumisita ti manangaywan iti sirkito, ken no dadduma, dagiti pannakabagi ti sangay. (Basaen ti 3 Juan 5-8.) Ti maysa a nasayaat a pamay-an a maaramidtayo dayta ket ti panagpamerienda wenno panagpakan. Mabalinmo kadi nga aramiden dayta?

⁸ Malagip ti maysa a sister idiay United States: “Adun a tawen a sangsangailienmi ken lakayko ti adu nga ispiker ken dagiti assawada. Nagragsak ti tunggal panangsangailimi, ken kangrunaanna, makapabileg iti naespirituan. Dimi pulos pagbabawyan dayta.”

9, 10. (a) Asino dagiti mabalin nga agkasapulan iti mabayag a panangpadagus? (b) Mabalin kadi met a tumulong dagiti nanumo ti balayda? Mangted iti pagarigan.

⁹ Dagiti agbayag a sangaili: Idi un-unana,  masansan a ramanen ti kinamanagpadagus ti panangipaay iti pagdagusan kadagiti mapagtalkan a bisita. (Job 31:32; Flm. 22) Kasapulan met dayta iti panawentayo. Masansan a kasapulan dagiti manangaywan iti sirkito ti pagdagusan no bumisitada kadagiti kongregasion. Mabalin met nga agkasapulan iti pagdagusan dagiti estudiante kadagiti teokratiko nga eskuelaan, kasta met dagiti boluntario iti konstruksion. Mabalin met a mapukawan iti pagtaengan ti dadduma a pamilia gapu kadagiti natural a didigra. Agkasapulanda iti pagyanan agingga nga awan pay tumulong a mangtarimaan iti balayda. Ditay koma panunoten a dagidiay laeng napintas ti balayda ti mabalin a tumulong; mabalin a namin-adun nga inaramidda dayta. Mabalinmo met kadi ti mangpadagus uray no nanumo laeng ti panagbiagmo?

¹⁰ Maragragsakan ti maysa a brother a taga-South Korea a manglagip iti panangpadagusna kadagiti estudiante iti teokratiko nga eskuelaan. Insuratna: “Agkedkedak idi damo ta kakaskasarmi pay laeng ken bassit ti balaymi. Ngem nagragsak a kapadasan ti panangpadagusmi kadagiti estudiante. Kas baro nga agassawa, nakitami a nakaragragsak gayam ti agassawa no agserserbida ken Jehova ken agkaduada a mangragpat kadagiti naespirituan a kalat.”

11. Apay a mabalin a kasapulan dagiti kabbaro iti kongregasiontayo ti maipakitaan iti kinamanagpadagus?

¹¹ Dagiti kabbaro iti kongregasion: Mabalin nga adda dagiti indibidual ken pamilia nga umakar iti lugaryo. Mabalin a dadduma ti immay ta dakkel ti panagkasapulan iti lugaryo. Mabalin nga adda dagiti payunir a naibaon a tumulong iti kongregasionyo. No kasangsangpetda, medio maikawada iti baro a lugar, baro a kongregasion, nalabit iti baro a lengguahe wenno kultura pay ketdi. No awisentayo ida nga agmerienda, mangan, wenno aglinglingay, nalaklakada a maaddaan iti baro a gagayyem ken mairuam iti baro a situasionda.

12. Ania a kapadasan ti mangipakita a saan a kasapulan nga adu unay ti isagana no agpadagustayo?

¹² Saan a masapul nga adu ti isaganatayo no agpadagustayo. (Basaen ti Lucas 10:41, 42.) Inyestoria ti maysa a kabsat ti kapadasanda idi damoda ti agserbi kas misionero: “Ubbingkami pay idi, awan unay kapadasanmi, ken mail-iliwkami. Maysa a rabii, kasta unay ti iliw ni baketko, ket diak maep-ep dayta. Ngem idi agarup 7:30 ti rabii, adda nagtuktok. Nakatakder iti ridaw ti maysa a mayad-adalan iti Biblia nga adda awitna a tallo a naranghita (orange). Immay tapno abrasaennakami. Pinastrekmi ken inikkanmi iti sangabaso a danum. Kalpasanna, nangidasarkami iti tsa ken napudot a tsokolate. Saanmi pay idi nga ammo ti agsao iti Swahili, ken dina met ammo ti ag-Ingles. Ngem dayta a pasamak ti nangrugian ti nakaragragsak a pannakigayyemmi kadagiti lumugar a kakabsat.”

13. Ania ti pagimbagan ti panagbalin a managpadagus?

¹³ Nagkedkedka kadin nga agpadagus? No wen, mabalin a naikapiska iti gundaway para iti naragsak a panaglalangen ken manayon a panaggagayyem. Ti panagpadagus ti maysa a kasayaatan a panglaban iti liday. Ngem mabalin a mapanunotmo no apay nga agkedked ti dadduma. Mabalin nga adda dagiti rason.

14. Ania ti mabalin nga aramidentayo no agkurang ti panawen ken pigsatayo nga agpadagus wenno mangawat iti awis?

¹⁴ Panawen ken pigsa: Okupado unay dagiti adipen ni Jehova ken masansan nga adu ti as-asikasuenda. Mabalin a marikna ti dadduma nga awan ti panawen wenno pigsada nga agsangaili. No kasta ti situasionmo, nalabit masapul a sukimatem ti agdama nga eskediul dagiti aktibidadmo. Mabalin kadi a mangaramidka kadagiti panagbalbaliw tapno adda panawen ken pigsam a mangsangaili wenno mangawat iti awis? Iparegta ti Kasuratan kadagiti  Kristiano nga agbalinda a managpadagus. (Heb. 13:2) Saan a dakes nga iwayaan dayta; kinapudnona, dayta ti umiso nga aramiden. Siempre, mabalin a masapul a situtulokka a mangkissay kadagiti di unay napateg nga aktibidadmo.

15. Ania dagiti mabalin a pakadanagan ti dadduma no maipapan iti panagpadagus?

¹⁵ Panagriknam iti bagim: Kayatmo met kadi koma ti agpadagus ngem panagriknam ket dimo kabaelan? Managbabain ti dadduma ken maamakda amangan no awanto ti maibagada wenno saanto a maragsakan dagiti sangailida. Limitado met ti masapulan ti dadduma ken panagriknada ket saanda a kabaelan nga isagana ti kas iti kabaelan ti dadduma iti kongregasionda. Laglagipentayo a ti kapatgan iti maysa a pagtaengan ket saan a ti kinapintasna no di ket ti kinaurnos, kinadalus, ken ti kinamanangsangaili dagiti bumalay.

16, 17. Apay a saanka koma a madanagan a mangsangaili?

¹⁶ No madanaganka a mangsangaili, saanka nga agmaymaysa. Inamin ti maysa a panglakayen a taga-Britain: “Medio makapadanag ti agsagana para kadagiti bisita. Ngem kas iti aniaman a banag a mainaig iti panagserbi ken Jehova, dagiti bendision ken pannakapnek a resultana ket lab-awanna ti aniaman a danag. Maragragsakanak a makisango kadagiti bisita bayat nga agkakape ken agsasaritakami.” Laglagipenyo a kanayon a makatulong ti panangipakita iti personal nga interes kadagiti sangaili. (Fil. 2:4) Dandani amin ket maragsakan a mangyestoria kadagiti kapadasanda. Mabalin a kadagitoy laeng a panaglalangen a maammuan ti dadduma dagiti kapadasantayo. Insurat ti sabali pay a panglakayen: “No agawisak kadagiti kakongregasionko iti balaymi, ad-adda a maawatak ida ken gundaway dayta tapno maam-ammok ida, nangruna no kasano a naammuanda ti kinapudno.” No interesadotayo iti sabsabali, makaparagsak ti aniaman a panaglalangen.

¹⁷ Inamin ti maysa a sister a payunir a mangpadpadagus kadagiti estudiante iti nagduduma a teokratiko nga eskuelaan: “Idi damo, madanaganak ta nakanumnumo ti pagtaengak ken segundamano laeng dagiti mueblesko. Ngem naawan ti danagko idi nakasaritak ti asawa ti maysa kadagiti instruktor. Imbagana nga idi agserserbida iti sirkito, dagiti kasayaatan a lawasda ket ti pannakipagyanda iti naespirituan a kakabsat a nupay bassit ti sanikuada, kapadada a nakapokus iti panagserbi ken Jehova ken iti panangtaginayon iti simple a biag. Nalagipko ti kanayon nga ibaga ni Nanang idi ubbingkami: ‘Nasaysayaat ti putahe a natnateng a sadiay adda ayat.’” (Prov. 15:17) Gapu koma iti ayat nga agpadaguska, ken awan ti pagdanagam.

18, 19. Kasano a makatulong ti kinamanagpadagus tapno maikkat dagiti negatibo a rikriknatayo iti sabsabali?

¹⁸ Ti panagriknam iti dadduma: Adda kadi kakongregasionmo a nakapasakit kenka? Mabalin a madi ti riknam kenkuana ken mabalin nga agtultuloy dayta no awan ti aramidem a panagbalbaliw. Mabalin a dimo kayat a sangailien ti maysa a dimo kayat ti ugalina, wenno ti nakapasakit kenka iti napalabas a dimo pay nalipatan.

¹⁹ Irekomenda ti Biblia ti panagbalin a managpadagus tapno sumayaat ti relasiontayo iti sabsabali, uray pay iti kabusortayo. (Basaen ti Proverbio 25:21, 22.) No agpadagustayo, maksayan ti tension ken di nasayaat a rikrikna. Mabalin a makitatayo dagiti napintas a kababalin ti bisitatayo a nakita ni Jehova idi inyasidegna dayta a tao iti kinapudno. (Juan 6:44) No ayat ti motibom a nangawis iti maysa a saan nga ageks-ekspektar a maawis, mabalin a sumayaat ti relasionyo. Kasano a masiguradom nga ayat ti motibom? Ti maysa a pamay-an ket ti panangsurot iti pammaregta ti Filipos 2:3: “Buyogen ti kinapakumbaba iti isip nga ibilangyo a ti dadduma nangatngatoda ngem dakayo.” No mangbiroktayo iti rason  a mangibilang a nangatngato dagiti kakabsat ngem datayo, ti man pammatida, panagibtur, kinatured, wenno dadduma pay a Nakristianuan a kababalinda, bumileg ti panagayattayo kadakuada. Kas resultana, nalaklaka a maipakitam ti pudno a kinamanagpadagus a mangpasayaat iti relasionyo.

20. Apay ken kasano a tungpalentayo ti saotayo no adda inawattayo nga awis?

²⁰ Insaludsod ni salmista David: “O Jehova, siasinonto ti sangaili iti toldam?” (Sal. 15:1) Kalpasan dayta, dinakamatna dagiti naespirituan a kababalin a sapsapulen ti Dios kadagiti sangailina. Ti maysa ket ti panangtungpal iti saotayo: “Isu nakapagsapata iti pagdaksanna, ket kaskasdi nga isu saan nga agbaliw.” (Sal. 15:4) No inawattayo ti maysa nga awis, saantay koma a kanselaren dayta nga awan gapgapuna. Mabalin a nagsagana a naimbag ti nagawis kadatayo, ket masayang laeng ti bannogna no basta kanselarentayo lattan dayta. (Mat. 5:37) No dadduma, adda dagiti mangkanselar iti immuna nga awis gapu ta kasla nasaysayaat ti sabali nga awis. Panangipakita kadi dayta iti ayat ken panagraem? Masapul koma a naimpusuan nga apresiarentayo ti sagana ti nagawis aniaman ti nabaelanna. (Luc. 10:7) Ngem no talaga a kasapulan a kanselarentayo ti awis gapu ta di ipalubos ti kasasaad, panangipakita iti ayat ken konsiderasion no nasaksakbay a pakaammuantayo ti nagawis.

21. Kasano a makatulong kadatayo nga agbalin a nasayaat a sangaili ti panangrespeto kadagiti lokal a kaugalian?

²¹ Nagpateg met a respetuentayo dagiti lokal a kaugalian. Iti dadduma a kultura, maawat latta dagiti di naawis a bisita; iti met dadduma, masapul ti nasaksakbay a panangyurnos iti dayta. Iti dadduma a lugar, maidasar nga umuna kadagiti bisita ti kasayaatan a taraon, sa sumaruno ti pamilia; iti met dadduma, pagririnnanudan ti amin ti naisagana. Iti dadduma pay a lugar, gagangay nga agitugot iti makan dagiti bisita; iti met dadduma, naragragsakda no saanen nga agitugot dagiti inawisda. Ken iti dadduma a kultura, manamnama a sidadayaw a pagkedkedan ti naawis ti umuna wenno ti maikadua nga imbitasion; iti met dadduma, ti panagkedked ti maysa ket panangipakita a dina apresiaren ti awis. Aramidentayo koma ti amin a kabaelantayo tapno maragsakan ti nangawis kadatayo.

22. Apay a nagpateg a ‘managpadagustayo iti maysa ken maysa’?

²² Itan ti dakdakkel a kaitungpalan ti sasao a “ti panungpalan ti amin a bambanag immasidegen.” (1 Ped. 4:7) Nakaas-asidegen ti kakaruan pay laeng a rigat a pakaipasanguan ti lubong. Bayat a rumigrigat ti kasasaad, masapul a nakabilbileg ti ayattayo iti maysa ken maysa kas agkakabsat. Ad-adda itan nga agaplikar ti balakad ni Pedro kadagiti Kristiano: “Managpadaguskayo koma iti maysa ken maysa.” (1 Ped. 4:9) Wen, ti kinamanagpadagus ket makaparagsak ken nagpateg a paset ti biagtayo ita, ken iti agnanayon.