1. Kasanotayo a makagun-od iti sirib, ken ania ti pagimbagan dayta?

NI Jehova ti Gubuayan ti sirib, ken sipaparabur nga itedna dayta. Kuna ti Santiago 1:5: “No ti asinoman kadakayo agkurang iti sirib, agtultuloy koma nga agdawat iti Dios, ta isu mangted a sipaparabur kadagiti isuamin ken awanan panangumsi.” Makagun-odtayo iti sirib manipud iti Dios no awatentayo ti disiplina. Protektarannatayo dayta a sirib iti moral ken naespirituan a peggad. (Prov. 2:10-12) Kas resultana, ‘mapagtalinaedtayo ti bagitayo iti ayat ti Dios maipaay iti agnanayon a biag.’​—Jud. 21.

2. Kasano a maipategtayo ti disiplina ti Dios?

² Ngem gapu iti kinaimperpektotayo, pannakapadakkeltayo, ken dadduma pay a rason, mabalin a marigatantayo a mangawat iti disiplina wenno mangibilang a pagsayaatantayo dayta. Maipategtayo ti disiplina no makitatayo a pagimbagantayo dayta, a mangpaneknek iti ayat ti Dios kadatayo. ‘Ti disiplina ni Jehova, O anakko, saanmo a laksiden agsipud ta daydiay ayaten ni Jehova tubngarenna,’ kuna ti Proverbio 3:11, 12. Wen, laglagipentayo koma a kayat ni Jehova ti kasayaatan para kadatayo. (Basaen ti Hebreo 12:5-11.) Gapu ta am-ammonatayo unay ti Dios, kanayon a maitutop ti disiplinana. Usigentayo ita ti uppat nga aspeto ti disiplina: (1) disiplina iti bagi, (2) disiplina dagiti nagannak, (3) disiplina iti  uneg ti kongregasion, ken (4) banag a nasaksakit ngem iti temporario a saem a resulta ti disiplina.

3. Kasano a maaddaan ti ubing iti disiplina iti bagi? Iyilustrarmo.

³ Ramanen ti disiplina iti bagi ti panangkontrol iti bagitayo tapno sumayaat ti kababalin ken pampanunottayo. Saantayo a nayanak nga addaan iti disiplina iti bagi. Masapul a sursuruentayo dayta. Kas panangyilustrar: No agsursuro ti ubing nga agbisikleta, gagangay a tenglen nga umuna ni tatangna ti bisikleta tapno saan a matumba. Ngem no medio ammon ti ubing ti agbalanse, sagpaminsan a siaannad nga ibbatan ni tatangna. Inton naan-anay a kabaelanen ti ubing ti agbalanse, baybay-anen ni tatangna. Kasta met, no kanayon ken siaanus a sanayen dagiti nagannak ti annakda iti “disiplina ken panangiturong-panunot ni Jehova,” tultulonganda met ida a maaddaan iti disiplina iti bagi ken sirib.​—Efe. 6:4.

4, 5. (a) Apay a nagpateg a paset ti “baro a personalidad” ti disiplina iti bagi? (b) Apay a ditay sumuko uray no arigna ‘matuangtayo iti mamimpito’?

⁴ Agaplikar met dayta a prinsipio kadagiti nakaam-ammo ken Jehova idi adultodan. Mabalin nga addaanda met iti disiplina iti bagi. Ngem no kabbaroda pay laeng nga adalan, saanda pay a nataengan iti naespirituan. Nupay kasta, in-inut ken agtultuloy nga agbalinda a nataengan bayat a sursuruenda nga ikawes ti “baro a personalidad” ket tuladenda ni Kristo. (Efe. 4:23, 24) Ti disiplina iti bagi ket nagpateg a paset dayta a panagmataengan. Iti kasta, masursurotayo a “tallikudan ti di kinanadiosan ken nailubongan a tartarigagay ken agbiag a buyogen ti kinasimbeng ti panunot ken kinalinteg ken nadiosan a debosion iti tengnga daytoy agdama a sistema ti bambanag.”​—Tito 2:12.

⁵ Nupay kasta, agbasoltayo amin. (Ecl. 7:20) Ngem no agkamalitayo, dina kayat a sawen a kurang wenno awanantayo iti disiplina iti bagi. “Daydiay nalinteg mabalin a matuang iti uray mamimpito a daras, ket sigurado a tumakderto,” kuna ti Proverbio 24:16. Ania ti makatulong kenkuana tapno agballigi? Saan a ti bukodna a determinasion no di ket ti espiritu ti Dios. (Basaen ti Filipos 4:13.) Karaman iti bunga dayta nga espiritu ti panagteppel, a mainaig unay iti disiplina iti bagi.

6. Kasanotayo nga agbalin a naan-anep nga agadal iti Sao ti Dios? (Kitaen ti ladawan iti rugi ti artikulo.)

⁶ Tapno mapatanortayo ti disiplina iti bagi, nagpateg ti naimpusuan a panagkararag, panagadal iti Biblia, ken panagutob. Kasanon no marigatanka nga agadal iti Sao ti Dios? Mabalin a saanka a nagaget nga agadal. Ngem laglagipem a tulongannaka ni Jehova no ipalubosmo. Matulongannaka a ‘mangpatanor iti panagtarigagay’ iti Saona. (1 Ped. 2:2) Umuna, ikararagmo ken Jehova a tulongannaka a maaddaan iti disiplina iti bagi a mangadal iti Saona. Kalpasanna, agtignayka maitunos iti dayta. Mabalin nga iti un-unana, mabiit laeng ti panagadalmo. Inton agangay, nalaklaka ken ad-addanton a makaparagsak ti panagadalmo! Magusgustuamton ti agmaymaysa a mangut-utob iti nagpapateg a pampanunot ni Jehova.​—1 Tim. 4:15.

7. Kasano a matulongannatayo ti disiplina iti bagi a manggaw-at iti naespirituan a kalat?

⁷ Makatulong ti disiplina iti bagi tapno magaw-attayo dagiti naespirituan a kalat. Kas pagarigan, narikna ti maysa nga ulo ti pamilia a medio bimmaaw ti regtana. Gapu ta madanagan, pinagbalinna a kalat ti panagregular payunir. Binasana met dagiti artikulo kadagiti magasintayo maipapan iti dayta ken nagkararag. Dayta ti nangparegta ken nangpabileg kenkuana iti naespirituan. Nag-auxiliary pioneer met no kabaelanna. Ania ti  resultana? Uray adda dagiti lapped, nagpokus iti kalatna a panagregular payunir ket nagaw-atna dayta idi agangay.

8-10. Ania ti makatulong kadagiti Kristiano a nagannak tapno mapadakkelda dagiti annakda nga agserbi ken Jehova? Iyilustrarmo.

⁸ Addaan dagiti Kristiano a nagannak iti nagpateg a pribilehio​—ti panangpadakkel iti annakda iti “disiplina ken panangiturong-panunot ni Jehova.” (Efe. 6:4) Nagrigat nga aramiden dayta, aglalo ita. (2 Tim. 3:1-5) Siempre, no mayanak ti ubing, dina pay ammo ti naimbag ken dakes. Nupay addaanen iti konsiensia, masapul pay a maisuro, wenno madisiplina dayta. (Roma 2:14, 15) Kuna ti maysa nga eskolar ti Biblia a ti Griego a sao a naipatarus a “disiplina” ket mabalin a maipatarus a “panagmataengan ti ubing.”

⁹ Gagangay a natalged ti rikna dagiti annak a siaayat a nadisiplina. Masursuroda nga adda limitasion ti wayawaya ken adda dakes wenno naimbag nga epekto dagiti desision ken aramidda. Nagpateg ngarud nga agpaidalan ken Jehova dagiti Kristiano a nagannak. Siempre, agduduma ti pamay-an dagiti nagannak depende iti kultura ken henerasionda. No agtulnog dagiti nagannak iti Dios, agbalin a naballigi ti panangpadakkelda iti annakda ta saanda a pugpugtuan ti aramidenda wenno agdepende iti kapadasan wenno kapanunotan ti tao.

¹⁰ Kas panangyilustrar, usigentayo ti ulidan ni Noe. Idi binilin ni Jehova nga agaramid iti daong, saan a mabalin nga agtalek iti kapadasanna. Ngamin, dina pay napadasan ti nagaramid iti daong isu a masapul nga agpannuray ken Jehova. Gapuna, “inaramidna ti kasta met laeng,” ti kas iti imbaga ni Jehova. (Gen. 6:22) Ania ti resultana? Umiso ti panangaramid ni Noe iti daong. Ket masapul a kasta tapno maisalakan ti pamiliana! Nagballigi met ni Noe kas ulo ti pamilia. Maigapu met laeng dayta iti panagtalekna iti sirib ti Dios. Gapuna, naisurona a naimbag dagiti annakna ken nagsayaat ti impakitana nga ulidan kadakuada, banag a nagrigat nga aramiden sakbay ti Layus.​—Gen. 6:5.

11. Apay a nagpateg ti ulidan dagiti nagannak iti panangisuroda iti annakda?

¹¹ Kas nagannak, kasanom nga aramiden ti “kasta met laeng” iti imatang ti Dios? Dumngegka ken Jehova. Bay-am nga isuronaka iti panangpadakkelmo iti annakmo babaen ti Saona ken ti panangidalan ti organisasionna. Inton agangay, mabalin nga agyamanto kenka dagiti annakmo ta inaramidmo dayta! Insurat ti maysa a brother: “Agyamyamanak unay gapu iti panangpadakkel kaniak dagiti nagannakko. Inaramidda ti amin tapno madanonda ti pusok. Nagdakkel ti utangko kadakuada iti naespirituan a panagrang-ayko.” Ngem uray no aramiden dagiti nagannak ti amin a kabaelanda, adda latta dagiti annak a mangpanaw ken Jehova. Nupay kasta, nadalus ti konsiensia dagiti nagannak a nangikagumaan  a mangimula iti kinapudno iti puso ti anakda. Mabalinda met a namnamaen nga addanto tiempo nga agsubli ti anakda ken Jehova.

12, 13. (a) Kasano a maipakita dagiti Kristiano a nagannak nga agtultulnogda iti Dios no nailaksid ti anakda? (b) Kasano a nagimbagan ti maysa a pamilia ti panagtulnog dagiti nagannak ken Jehova?

¹² Ti maysa a kadakkelan a mangsubok iti kinatulnog ti dadduma a nagannak ket ti relasionda iti nailaksid nga anakda. Usigentayo ti maysa nga ina nga addaan iti nailaksid nga anak a pimmanaw iti balayda. Inaminna: “Nagbirokak iti rason kadagiti publikasiontayo tapno makalangenko ti anakko ken ti apokok.” Innayonna: “Ngem siaanus a tinulongannak ni lakayko tapno maawatak a saanmin a responsabilidad ti anakmi ken saankamin a makibiang.”

¹³ Kalpasan ti sumagmamano a tawen, naisubli ti anakda. “Dandani inaldaw a tumawag wenno agteks ti balasangmi!” kuna ti ina. “Ken dakkel ti panagraemna kadakami ken lakayko ta ammona a nagtulnogkami iti Dios. Nagsayaat itan ti relasionmi.” No adda nailaksid nga anakmo, “agtalekka [kadi] ken Jehova buyogen ti isuamin a pusom ket dika agkammatalek iti bukodmo a pannakaawat”? (Prov. 3:5, 6) Laglagipem a makita iti disiplina ni Jehova ti awan kapadana a sirib ken ayatna. Ken intedna ti Anakna para kadatayo amin, a pakairamanan ti anakmo. Dina kayat a madadael ti asinoman. (Basaen ti 2 Pedro 3:9.) Agtalekka ngarud nga umiso ti disiplina ken panangidalan ni Jehova. Tungpalem ti ibagbaga ni Jehova uray nasakit kenka dayta. Agtulnogka iti disiplina ti Dios ken dimo kontraen dayta.

14. Kasano a magunggonaantayo iti instruksion ni Jehova nga ipapaayna babaen ti “matalek a mayordomo”?

¹⁴ Inkari ni Jehova nga aywanan, protektaran, ken isurona ti kongregasion Kristiano. Adu ti pamay-anna a mangaramid iti dayta. Kas pagarigan, impaaywanna ti kongregasion iti Anakna a nangdutok iti “matalek a mayordomo” a mangipaay iti naespirituan a taraon iti umiso a tiempo. (Luc. 12:42) Dayta a taraon a magun-odan iti nagduduma a pamay-an ipapaayannatayo iti nagpateg nga instruksion, wenno disiplina. Isaludsodmo iti bagim, ‘Matigtignayak kadi a mangbalbaliw iti pampanunot wenno tigtignayko gapu kadagiti palawag wenno artikulo iti publikasiontayo?’ No nagbalbaliwka, agragsakka! Ipalpalubosmo ngamin a sukogen, wenno disiplinaennaka ni Jehova para iti pagsayaatam.​—Prov. 2:1-5.

15, 16. (a) Kasanotayo a magunggonaan kadagiti “sagut a tattao” iti kongregasion? (b) Kasanotayo a matulongan dagiti panglakayen tapno naragragsakda a mangitungpal iti annongenda?

¹⁵ Nangted met ni Kristo iti kongregasion iti “sagut a tattao,” dagiti panglakayen a mangipastor iti arban ti Dios. (Efe. 4:8, 11-13) Kasanotayo a magunggonaan kadagita a nagpateg a sagut? Ti maysa a pamay-an ket ti panangtulad iti pammati dagiti panglakayen ken iti nasayaat nga ulidanda. Ti maysa pay ket ti panangipangag iti Nainkasuratan a balakadda. (Basaen ti Hebreo 13:7, 17.) Laglagipem nga ipatpategdatayo dagiti panglakayen ken kayatda a rumang-aytayo iti naespirituan. Kas pagarigan, no nadlawda nga adda dagiti tiempo nga awantayo iti gimong wenno bumabaaw ti regtatayo, sigurado a dagus a tumulongda. Dumngegda ken ikagumaandatayo a pabilgen babaen iti makaparegta ken maitutop a Nainkasuratan a balakad. Ibilangmo kadi dagita a tulong kas ebkas ti ayat ni Jehova kenka?

¹⁶ Laglagipentayo a mabalin a saan a nalaka kadagiti panglakayen ti umasideg tapno balakadandatayo. Kas pagarigan, panunotentayo no kasano karigat ken propeta Natan ti makisarita idi ken David a nangilemmeng iti nadagsen a basolna! (2 Sam. 12:1-14)  Kasta met, sigurado a nagurnong ni apostol Pablo iti tured tapno mailintegna ni Pedro, ti maysa kadagiti 12 nga apostol, idi nangipakita ti paboritismo kadagiti Judio a kakabsat. (Gal. 2:11-14) Kasanom ngarud a mapalag-an ti awit dagiti panglakayen iti kongregasionyo? Agbalinka a napakumbaba, nalaka a maas-asitgan, ken managyaman. Ibilangmo ti tulongda kas ebkas ti ayat ti Dios kenka. Saanmo laeng a pagimbagan dayta, naragragsakda pay a mangitungpal iti annongenda.

17. Kasano a nagunggonaan ti maysa a sister iti naayat a tulong dagiti panglakayen?

¹⁷ Gapu iti napalabas ti maysa a sister, marigatan a mangayat ken Jehova. Kinunana: “Idi nakariknaak iti nakaro a liday gapu iti napalabasko ken dadduma pay a problemak, ammok a masapul a makisaritaak kadagiti panglakayen. Saandak nga inungtan wenno krinitikar. Imbes ketdi, pinaregta ken pinabilegdak. Kada malpas ti gimong, adda latta maysa kadakuada a mangkomusta kaniak uray okupadoda. Gapu iti napalabasko, panagriknak, diak maikari iti ayat ti Dios. Ngem maulit-ulit nga inusar ni Jehova ti kongregasion ken dagiti panglakayen a mangpatalged iti ayatna kaniak. Ikarkararagko a diakto koma pulos pampanawan isuna.”

18, 19. Ania ti nasaksakit ngem iti saem a resulta ti disiplina? Iyilustrarmo.

¹⁸ Nupay mabalin a nasakit ti disiplina, adda pay nasaksakit ngem iti dayta, isu ti dakes nga epekto ti saan a panangawat iti disiplina. (Heb. 12:11) Usigentayo ti dua a pagarigan, da Cain ken Ari Zedekias. Gapu iti nakaro a gura ni Cain, kayatna idi a patayen ni Abel isu nga imbalakad ti Dios: ‘Apay nga agpupudotka buyogen ti unget ken apay a nagliday ti rupam? No agaramidka iti naimbag, awanto aya ti pannakaitan-ok? Ngem no saanka nga agaramid iti naimbag, adda basol a kumkumleb iti pagserkan, ket sika ti paggargartemanna; ket sika, iti biangmo, maparukmamto kadi dayta?’ (Gen. 4:6, 7) Saan a dimngeg ni Cain isu nga inabak ti basol. Gapuna, sinagabana ti saem ken rigat nga epekto dayta! (Gen. 4:11, 12) No dimngeg ni Cain iti panangtubngar ti Dios, saan koma a kasta ti saem a napadasanna.

¹⁹ Ti takrot ken dakes nga ari a ni Zedekias ket nagturay idi nakarigrigat ti kasasaad iti Jerusalem. Maulit-ulit a binalakadan ni propeta Jeremias ni Zedekias nga isardengnan ti dakes nga ar-aramidenna, ngem saanna nga inawat ti disiplina. Nagkas-ang met laeng ti resulta dayta. (Jer. 52:8-11) Talaga a kayat ni Jehova a mailikliktayo iti kasta a nakaro a saem!​—Basaen ti Isaias 48:17, 18.

20. Anianto ti mapasamak kadagiti mangawat iti disiplina ti Dios ken kadagiti saan a mangawat iti dayta?

²⁰ Iti daytoy a lubong, tagtagibassiten dagiti tattao ti disiplina, a pakairamanan ti disiplina iti bagi. Ngem sigurado a sagabaendanto ti epekto dayta a kababalinda. (Prov. 1:24-31) Gapuna, ‘umimdengtayo iti disiplina ket agbalintayo a masirib.’ Kas iti kuna ti Proverbio 4:13, “petpetam ti disiplina; saanmo a palusposan. Saluadam dayta, ta dayta ti biagmo.”