1, 2. Ania dagiti tumaud a saludsod gapu iti sasao ni Jesus a masarakan iti Mateo 24:14?

AWATENDATAYO man wenno busorendatayo dagiti tattao, manmano ti mangilibak a datayo a Saksi ni Jehova kas grupo ket pagaammo iti trabaho a panangasaba. Mabalin pay ketdi nga adda dagiti nasarakam iti ministerio a nangibaga a nupay saanda nga umanamong kadagiti patpatientayo, raemendatayo gapu iti trabahotayo. Ammotayo nga impakpakauna ni Jesus a ti naimbag a damag ti Pagarian ket maikaskasaba iti intero a mapagnaedan a daga. (Mat. 24:14) Ngem kasanotayo nga ammo a ti trabaho nga ar-aramidentayo ket kaitungpalan ti padto ni Jesus? Kinapannakkel kadi iti biangtayo no panunotentayo a datayo ti mangar-aramid iti daytoy a trabaho?

² Adu a relihioso a grupo ti agkuna nga ikaskasabada ti Ebanghelio, wenno naimbag a damag. Ngem masansan a ti laeng ar-aramidenda ket panangiranud iti bukod a testimonia, sermon iti simbaan, wenno dagiti programa iti radio, telebision, wenno iti Internet. Ibaga met ti dadduma a mangipapaayda iti tulong  kadagiti agkasapulan wenno tulong mainaig iti medisina ken edukasion. Maitunos kadi dagita nga ar-aramidenda iti imbilin ni Jesus a masapul nga aramiden dagiti adalanna?

3. Sigun iti Mateo 28:19, 20, ania dagiti uppat a banag a masapul nga aramiden dagiti pasurot ni Jesus?

³ Masapul kadi nga urayen lattan dagiti adalan ni Jesus nga umasideg dagiti tattao kadakuada? Saan! Kalpasan ti panagungarna, imbaga ni Jesus kadagiti ginasut nga adalanna: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida . . . , nga isuroyo kadakuada a tungpalenda ti amin a bambanag nga imbilinko kadakayo.” (Mat. 28:19, 20) Ngarud, adda uppat a nasken a maaramid. Agaramidtayo iti ad-adalan, bautisarantayo ida, ken isurotayo ida. Ngem ania ti umuna a masapul nga aramidentayo? Kinuna ni Jesus: “Inkayo”! Maipapan iti daytoy a bilin, kinuna ti maysa nga eskolar ti Biblia: “Ti bilin nga ‘inkayo’ ket rebbengen ti tunggal manamati, iti man ballasiw ti dalan wenno ballasiw ti taaw.”—Mat. 10:7; Luc. 10:3.

4. Ania ti ramanen ti panagbalin a “dumadaklis iti tattao”?

⁴ Tuktukoyen kadi ni Jesus ti indibidual a panagregget dagiti pasurotna, wenno tuktukoyenna ti organisado a panangikasaba iti naimbag a damag? Gapu ta saan a kabaelan ti maysa ti mapan “iti amin a nasion,” ipakita dayta a masapul ti organisado a panagregget ti adu. Impaganetget dayta ni Jesus idi inawisna dagiti adalanna nga agbalin a “dumadaklis [wenno, mangngalap] iti tattao.” (Basaen ti Mateo 4:18-22.) Ti tinukoy ni Jesus a panagkalap ket saan a daydiay agmaymaysa nga agkalap nga agusar laeng iti banniit ken appan a nakatugaw ken agur-uray iti ikan a mabanniitanna. Imbes ketdi, panagkalap dayta babaen iti iket—trabaho nga agkasapulan iti panagregget ken panagtitinnulong ti adu a tattao.—Luc. 5:1-11.

5. Ania dagiti uppat a saludsod a masapul a masungbatan, ken apay?

⁵ Tapno maammuantayo no siasino dagiti mangikaskasaba iti naimbag a damag ita kas kaitungpalan ti impadto ni Jesus, masapul a sungbatantayo dagitoy nga uppat a saludsod:

• Ania koma a mensahe ti maikaskasaba?

• Ania koma ti motibotayo a mangaramid iti daytoy a trabaho?

• Ania dagiti pamay-an a masapul a mausar?

• Kasano koma kasaknap ken kabayag ti trabaho a panangasaba?

Dagiti sungbat dagitoy a saludsod ti tumulong kadatayo saan laeng a tapno maammuantayo no siasino dagiti mangar-aramid iti daytoy makaispal-biag a trabaho no di ket tapno mapabileg ti determinasiontayo nga agtultuloy a matalek a mangaramid iti dayta.—1 Tim. 4:16.

6. Apay nga agtalekka nga umiso ti mensahe nga ikaskasaba dagiti Saksi ni Jehova?

⁶ Basaen ti Lucas 4:43. Inkasaba ni Jesus ti “naimbag a damag ti pagarian,” ket namnamaenna a kasta met ti aramiden dagiti adalanna. Siasino dagiti mangikaskasaba iti dayta a mensahe iti “amin a nasion”? Nalawag ti sungbat—dagiti laeng Saksi ni Jehova. Bigbigen dayta uray dagiti bumusbusor. Kas pagarigan, maysa a misionero a padi ti nangibaga iti maysa a Saksi a nagduduma a nasion ti napanannan ken dinamagna kadagiti Saksi sadiay no ania a mensahe ti ikaskasabada. Ania ti sungbatda kenkuana? Kinuna ti padi: “Agpapadada a maag ta maymaysa ti sungbatda: ‘Ti naimbag a damag maipapan iti Pagarian.’” Ngem saan a “maag” dagidiay a Saksi, imbes ketdi, agtutunos ti ibagbagada, a rumbeng a makita kadagiti pudno a Kristiano. (1 Cor. 1:10) Ken ibagbagada ti mensahe a linaon ti  magasin a Ti Pagwanawanan Mangibumbunannag iti Pagarian ni Jehova. Daytoy a magasin ket magun-odanen iti 254 a lengguahe, ken mapan a 59 a milion a kopia ti mapatpataud iti tunggal ruar. Gapuna, dayta ti kasasaknapan a maiwarwaras a magasin iti intero a lubong.

7. Apay a maikunatayo a saan nga umiso ti mensahe nga ikaskasaba dagiti lider ti Kakristianuan?

⁷ Saan nga ikaskasaba dagiti lider ti Kakristianuan ti Pagarian ti Dios. No ibagada man ti maipapan iti Pagarian, adu ti agkuna a dayta ket maysa a rikna wenno kasasaad nga adda iti puso ti maysa a Kristiano. (Luc. 17:21) Saanda nga isursuro kadagiti tattao a ti Pagarian ti Dios ket maysa a gobierno idiay langit a ni Jesu-Kristo ti Agturay, nga isu ti solusion ti amin a problema ti sangatauan, ken dandani pukawennan amin a kinadakes ditoy daga. (Apoc. 19:11-21) Imbes ketdi, kaykayatda a lagipen ni Jesus bayat ti Krismas ken Easter. Agparang nga awan ti ammoda iti aramidento ni Jesus kas baro nga Agturay iti daga. Gapu ta saanda nga ammo ti mensahe a rumbeng koma nga ikasabada, pakasdaawan kadi a saanda met nga ammo ti rumbeng koma a motibo iti panangaramid iti daytoy a trabaho?

8. Ania ti di umiso a motibo iti panangaramid iti trabaho a panangasaba?

⁸ Ania koma ti motibo iti panangaramid iti trabaho a panangasaba? Saan koma a tapno agkolekta iti kuarta ken agibangon kadagiti dadakkel ken napipintas a pasdek. Imbaga ni Jesus kadagiti adalanna: “Inawatyo nga awan bayadna, itedyo nga awan bayadna.” (Mat. 10:8) Saan koma a maaramid a negosio ti Sao ti Dios. (2 Cor. 2:17) Saan koma a sapulen dagiti mangaskasaba ti bukodda a pagimbagan iti trabaho nga ar-aramidenda. (Basaen ti Aramid 20:33-35.) Nupay nalawag daytoy a bilin, adu a relihion ti saan a mangtungtungpal iti dayta ta agkolektada iti kuarta tapno agtalinaed ti relihionda ken masuelduanda dagiti lider ti relihionda ken ti dadduma pay nga empleadoda. Kaaduanna, bimmaknang ti adu a lider ti Kakristianuan.—Apoc. 17:4, 5.

9. Kasano nga ipakpakita dagiti Saksi ni Jehova nga umiso ti motiboda iti panangaramidda iti trabaho a panangasaba?

⁹ Komusta met dagiti Saksi ni Jehova no maipapan iti panagkolekta? Masupsuportaran ti trabahoda babaen kadagiti boluntario a donasion. (2 Cor. 9:7) Awan ti maaramid a panagkolekta kadagiti Kingdom Hall wenno kombensionda. Nupay kasta, idi laeng napan a tawen, nangbusbos dagiti Saksi ni Jehova iti 1.93 a bilion nga oras a nangikasaba iti naimbag a damag ken nangikonduktada iti nasurok a siam a milion a libre a panagadal iti Biblia iti binulan. Makapaamanga ta ar-aramidenda daytoy a trabaho uray awan sueldoda ken maragsakanda a mangusar iti bukodda a kuarta. Maipapan iti trabaho dagiti Saksi ni Jehova, imbaga ti maysa a researcher: “Ti kangrunaan a panggep ket panangasaba ken panangisuro. . . . Awan ti padi, isu a bassit ti gastos.” Ania ngarud ti motibotayo iti panangaramid iti daytoy a trabaho? Boluntario nga ar-aramidentayo daytoy a trabaho gapu ta ay-ayatentayo ni Apo Jehova ken dagiti tattao. Ti kinatuloktayo ket kaitungpalan ti padto iti Salmo 110:3. (Basaen.)

10. Ania dagiti pamay-an nga inusar ni Jesus ken dagiti adalanna a nangasaba?

¹⁰ Ania dagiti pamay-an nga inusar ni Jesus ken dagiti adalanna tapno maikasaba ti naimbag a damag? Napanda kadagiti lugar a pakasarakan kadagiti tattao—iti publiko a lugar ken iti balbalayda. Ramanen daytoy ti panangbirok kadagidiay maikari iti tunggal balay. (Mat. 10:11; Luc. 8:1; Ara. 5:42; 20:20) Daytoy nga organisado a pamay-an ipakitana ti saan a panangidumduma.

11, 12. No maipapan iti panangikasaba iti naimbag a damag, kasano a naiduma ti ar-aramiden ti Kakristianuan no idilig kadagiti adipen ni Jehova?

 ¹¹ Komusta dagiti relihion ti Kakristianuan no maipapan iti daytoy a banag? Kaaduanna, maragragsakan dagiti miembro ti relihion a mangipabiang iti panangasaba iti masuelsuelduan a lider. Ngem imbes nga agbalinda a “dumadaklis iti tattao,” dagiti lider ti Kakristianuan ad-adda a maseknanda laeng a pagtalinaeden dagiti “ikan” wenno dagiti miembroda. Agpayso a no dadduma, adda met dagiti lider ti relihion a mangiparegta iti panangasaba. Kas pagarigan, iti nasapa a paset ti tawen 2001, kinuna ni Pope John Paul II iti maysa a surat: “Iti adu a tawen, kanayon nga ibagbagak ti awis iti baro a panagebanghelio. Ita, ibagak manen . . . Masapul a biagentayo iti bagitayo ti napalaus a gagar ni Pablo a nangikuna: ‘Asiak pay no diak ikasaba ti Ebanghelio.’” Kinuna pay ti papa a daytoy a trabaho a panangasaba ket saan laeng nga aramiden ti sumagmamano a nasanay a tattao no di ket amin a miembro ti simbaan. Ngem mano ti nagtignay iti daytoy nga awis?

¹² Komusta met ti pakasarsaritaan dagiti Saksi ni Jehova? Isuda laeng ti mangikaskasaba nga agturturayen ni Jesus kas Ari manipud 1914. Kas imbilin ni Jesus, ibilangda a kapatgan ti trabaho a panangasaba. (Mar. 13:10) Kuna ti libro a Pillars of Faith—American Congregations and Their Partners: “Para kadagiti Saksi ni Jehova, ti panangasaba ti kangrunaan a pakaseknanda.” Kinuna pay ti autor maipapan iti imbaga ti maysa a Saksi: “No adda agpasar iti bisin, agladladingit, ken agsakit, ikagumaanda ti tumulong, . . . ngem saanda a lipatan a ti kangrunaan a trabahoda ket ti panangidanon iti naespirituan a mensahe maipapan iti iyaay ti panungpalan ti lubong ken ti kinapateg ti pannakaisalakan.” Itultuloy nga ibagbaga dagiti Saksi ni Jehova dayta a mensahe, nga usarenda dagiti pamay-an nga inusar ni Jesus ken dagiti adalanna.

13. Kasano koma ti kasaknap ti trabaho a panangasaba?

¹³ Dineskribir ni Jesus ti kasaknap ti trabaho a panangasaba idi imbagana a ti naimbag a damag ket maikasaba “iti intero a mapagnaedan a daga.” (Mat. 24:14) Mapagbalin nga ad-adalan ‘dagiti tattao iti amin a nasion.’ (Mat. 28:19, 20) Kaipapanan dayta ti panangasaba iti intero a lubong.

14, 15. Ania ti mangipakita nga itungtungpal dagiti Saksi ni Jehova ti padto ni Jesus no maipapan iti kasaknap ti panangasaba? (Kitaen ti ladawan iti rugi ti artikulo.)

¹⁴ Tapno maawatan no kasano nga itungtungpal dagiti Saksi ni Jehova ti padto ni Jesus no maipapan iti kasaknap ti trabaho a panangasaba, usigentayo ti sumagmamano nga impormasion. Adda agarup 600,000 a lider ti nagduduma a relihion idiay United States, nga ayan ti dandani 1,200,000 a Saksi ni Jehova. Iti intero a lubong, adda nasurok nga 400,000 a padi a Romano Katoliko. Ita, idiligmo ti bilang dagiti Saksi a karaman iti naibatay iti Biblia a trabaho a panangikasaba iti Pagarian. Iti intero a lubong, adda walo a milion a boluntario a mangaskasaba  kadagiti tattao iti 240 a pagilian. Talaga a nakaskasdaaw a trabaho ti magapgapuananda, a maipaay amin iti pannakaidaydayaw ken pannakaipadayag ni Jehova!—Sal. 34:1; 51:15.

¹⁵ Kas Saksi ni Jehova, kayattayo nga idanon ti naimbag a damag iti adu a tattao agingga a mabalin sakbay a dumteng ti panungpalan. Gapuna, naidumdumatayo no maipapan iti trabahotayo a panagipatarus ken panangipablaak kadagiti literatura a naibatay iti Biblia. Minilion a libro, magasin, tract, ken imbitasion iti kombension ken Memorial ti libre a maiwarwaras. Nakapataudtayon iti nagduduma a publikasion iti nasurok a 700 a lengguahe. Nasurok a 200 a milion a kopia ti New World Translation of the Holy Scriptures ti naipablaaken iti nasurok a 130 a lengguahe. Idi laeng napan a tawen, nakapataudtayo iti agarup 4.5 a bilion a kopia ti literatura a naibatay iti Biblia. Iti opisial a website-tayo, magun-odanen dagiti impormasion iti nasurok a 750 a lengguahe. Adda kadi pay sabali a grupo a mangar-aramid iti kasta a trabaho?

16. Apay a maikunatayo nga adda kadagiti Saksi ni Jehova ti espiritu ti Dios?

¹⁶ Kasano kabayag nga agtultuloy ti naipadto a panangasaba a trabaho? Kinuna ni Jesus nga agtultuloy daytoy a sangalubongan a trabaho bayat ti maudi nga al-aldaw, “ket iti kasta umayton ti panungpalan.” Adda kadi sabali a narelihiosuan a grupo a nagtultuloy a nangikasaba iti naimbag a damag iti daytoy maudi nga al-aldaw? Mabalin a kuna ti dadduma a masarakantayo iti ministerio: “Adda kadakami ti nasantuan nga espiritu, ngem dakayo ti mangar-aramid ti trabaho.” Ngem saan kadi a ti panagtultuloytayo iti trabaho ti mangipakita nga adda kadatayo ti espiritu ti Dios? (Ara. 1:8; 1 Ped. 4:14) Adda dagiti gundaway a padasen ti dadduma a relihion ti ar-aramiden dagiti Saksi ni Jehova, ngem masansan a saan nga agballigi dagita. Makiraman ti dadduma iti trabaho a panangasaba iti sumagmamano laeng a tiempo ngem inton agangay agsublida met laeng iti normal a rutinada. Agbalaybalay met ti dadduma, ngem ania ti ikaskasabada? Nalawag nga ipakita ti sungbat dayta a saludsod a saanda nga ar-aramiden ti trabaho nga inrugi ni Kristo.

17, 18. (a) Apay a masiguradotayo a dagiti laeng Saksi ni Jehova ti mangikaskasaba iti naimbag a damag ti Pagarian ita? (b) Kasano a posible a maitultuloytayo daytoy a trabaho?

¹⁷ Siasino ngarud a talaga ti mangikaskasaba iti naimbag a damag ti Pagarian ita? Kombinsidotayo a mangibaga: “Dagiti Saksi ni Jehova!” Apay a maikunatayo ti kasta? Gapu ta ikaskasabatayo ti umiso a mensahe, ti naimbag a damag ti Pagarian. Babaen ti panangdanontayo kadagiti tattao, us-usarentayo met dagiti umiso a pamay-an. Mangaskasabatayo nga addaan iti umiso a motibo—ayat, saan a tapno makakuarta. Ti trabahotayo ti kasaknapan, ta idandanontayo ti mensahe kadagiti tattao iti amin a nasion ken lengguahe. Ken saantayo a sumardeng a mangitultuloy iti daytoy a trabaho agingga nga umay ti panungpalan.

¹⁸ Talaga a masmasdaawtayo iti magapgapuanan ti ili ti Dios iti daytoy tiempo a pagbibiagantayo. Ngem apay a posible a maaramid amin dagitoy? Kinuna ni apostol Pablo iti suratna kadagiti taga-Filipos: “Ti Dios isu daydiay, maigapu iti pakaragsakanna unay, agtigtignay kadakayo tapno agpadpada nga agtarigagay ken agtignaykayo.” (Fil. 2:13) Amintayo ket agtultuloy koma a mapapigsa babaen ti nailangitan nga Amatayo bayat nga ar-aramidentayo ti amin a kabaelantayo a mangitungpal iti ministeriotayo.—2 Tim. 4:5.