NAGKASAR da Daniel ken Miriam idi Septiembre 2000, ket nagyanda iti siudad ti Barcelona, Spain. “Nanam-ay idi ti biagmi,” kuna ni Daniel. “Gapu iti nasayaat a trabahomi, makapangankami kadagiti agkakangina a panganan, makapasiar iti sabali a pagilian, ken makagatang kadagiti nangina a bado. Kanayonkami met a makiraman iti panangasaba.” Ngem nagbaliw dagita.

Iti kombension idi 2006, namagpanunot ken Daniel ti saludsod iti maysa a palawag: “Ar-aramidentayo kadi ti amin a kabaelantayo a mangtulong kadagidiay ‘agbarbariring nga agturong iti pannakagudas’ tapno magnada iti dalan nga agturong iti agnanayon a biag?” (Prov. 24:11) Nayunay-unay iti dayta ti responsabilidad a mangipakaammo iti makaisalakan a mensahe ti Biblia. (Ara. 20:26, 27) Kuna ni Daniel, “Kasla siak a mismo ti kasarsarita idi ni Apo Jehova.” Nadakamat pay iti palawag a naragragsak ti maysa no palawaenna ti ministeriona. Ammo ni Daniel nga agpayso dayta. Payunir idin ni Miriam ken adu a bendision ti maaw-awatna.

Imbaga ni Daniel, “Kinunak iti bagik a masapul a baliwakon ti direksion ti biagko.” Ket kasta ti inaramidna. Kinissayanna ti kapaut ti panagtrabahona, nagpayunir, ken pinampanunotna ti ragsakda ken Miriam no agserbida iti lugar nga agkasapulan iti ad-adu a manangaskasaba iti Pagarian.

Idi Mayo 2007, nagikkat da Daniel ken Miriam iti pagobraanda sa napanda idiay Panama, pagilian a napasiarda idin. Adu ti isla iti baro a teritoriada a Bocas del Toro Archipelago iti Caribbean Sea, a kaaduan kadagiti umili ket katutubo a Ngabe. Nakita da Daniel ken Miriam nga umanay ti urnongda tapno mabalinda ti agyan idiay Panama iti agarup walo a bulan.

Agbangka ken agbisikletada kadagiti isla. Dida la ketdi a malipatan ti damo a panagbisikletada iti 32 a kilometro a katurturodan, ken nakapudpudot! Dandani naawanan iti puot ni Daniel gapu iti bannog. Ngem nakasingsingpet dagiti Ngabe a pamilia a nalabsanda, aglalo idi nasursuron ti agassawa ti dadduma a sao iti lengguahe dayta a lugar. Di nagbayag, addan 23 nga ikonkonduktada a panangyadal iti Biblia.

Ngem idi maib-ibusen ti urnongda, nasuktan iti liday ti ragsakda. Kuna ni Daniel: “Makasangsangitkami, ket mapampanunotmin ti agsubli idiay Spain. Malidayankami a mangpanaw kadagiti iyad-adalanmi.” Ngem kalpasan ti makabulan, adda naawatda a makaparagsak a damag. Kuna ni Miriam: “Naawiskami nga agserbi kas special pioneer. Nakaragragsakkami ta makapagtalinaedkami iti teritoriami!”

Idi 2015, gapu kadagiti panagbalbaliw iti organisasion, nakiddaw kada Daniel ken Miriam nga ituloyda ti panagserbida kas regular pioneer. Ania ti aramidendan? Nagtalekda iti kari a mabasa iti Salmo 37:5: “Iyadanim ken Jehova ti dalanmo, ket agkammatalekka kenkuana, ket isu agtignayto.” Nakasarakda iti pagtrabahuanda tapno masuportaranda ti panagpayunirda, ket ita, agserserbida iti maysa a kongregasion iti probinsia ti Veraguas, Panama.

Kuna ni Daniel: “Sakbay idi a pumanawkami idiay Spain, agduaduakami no kabaelanmi ti agbiag a simple. Ita, simplen ti panagbiagmi ken saankam a pulos agkurang kadagiti talaga a napateg a bambanag.” Ania ti kangrunaan a mangparparagsak kadakuada? Kunada, “Awan a pulos pangisukatanmi iti ragsak ti panangtulong kadagiti napakumbaba a tattao a mangam-ammo ken Apo Jehova!”