1. Ania ti impalgak ni Jehova idiay Eden maipapan iti kabusortayo?

SIGURADO nga ammo ni Adan a di makasao dagiti uleg. Gapuna, mabalin a napanunotna nga espiritu a parsua ti nakisarita ken Eva babaen ti uleg. (Gen. 3:1-6) Gistay awan ammo da Adan ken Eva maipapan iti daytoy nga espiritu. Uray no kasta, inggagara ni Adan ti timmallikud iti naayat a nailangitan nga Amana ket nakikadua iti dina am-ammo tapno bumusor iti pagayatan ti Dios. (1 Tim. 2:14) Dagus nga adda impalgak ni Jehova maipapan iti daytoy a kabusor a nangimpluensia kada Adan ken Eva, ket inkarina a madadaelto dayta. Ngem impakdaar met ni Jehova nga adda impalubosna a tiempo a busoren daytoy dakes nga espiritu dagiti mangipatpateg iti Dios.​—Gen. 3:15.

2, 3. Apay a saan unay a nadakamat ni Satanas sakbay ti iyaay ti Mesias?

² Nainsiriban a saan a pulos nga imbaga ni Jehova kadatayo ti personal a nagan ti nagrebelde nga anghel nga anakna. * Sa laeng nangted iti nagan a mangiladawan iti dayta a kabusor agarup 2,500 a tawen kalpasan ti panagrebeldena. (Job 1:6) Kinapudnona, tallo laeng a libro iti Hebreo a Kasuratan, ti 1 Cronicas, Job,  ken Zacarias, ti nangdakamat iti Satanas, a kaipapananna “Bumusbusor.” Apay a saan unay a nadakamat ti kabusortayo sakbay ti iyaay ti Mesias?

³ Nalawag a saan a kayat ni Jehova a mapadayawan ni Satanas babaen ti adu a pannakadakamatna ken dagiti aramidna iti Hebreo a Kasuratan. Ti kangrunaan a panggep dayta a paset ti Kasuratan ket ti panangyam-ammo iti Mesias ken panangiturong iti ili ti Dios kenkuana. (Luc. 24:44; Gal. 3:24) Idi napasamaken dayta ket dimtengen ti Mesias, inusar ni Jehova ti Mesias ken dagiti adalanna a nangipalgak iti kaaduan nga ammotayo ita maipapan ken Satanas ken kadagiti anghel a kimmappon kenkuana. * Mayanatup dayta ta ni Jesus ken dagiti napulotan a kaduana nga agturay ti usarento ni Jehova a mangdadael ken Satanas ken kadagiti pasurotna.​—Roma 16:20; Apoc. 17:14; 20:10.

4. Apay a saantayo unay a pakadanagan ti Diablo?

⁴ Inladawan ni apostol Pedro ni Satanas a Diablo kas “leon a ngumerngernger,” ken inawagan met ni Juan iti “serpiente” ken “dragon.” (1 Ped. 5:8; Apoc. 12:9) Ngem saantay unay a pakadanagan ti Diablo​—limitado ti pannakabalinna. (Basaen ti Santiago 4:7.) Adda iti likudantayo ni Jehova, ni Jesus, ken dagiti matalek nga anghel. Iti tulongda, kabaelantayo a labanan ti kabusortayo. Ngem kasapulantayo latta a maammuan ti sungbat ti tallo a nagpateg a saludsod: Kasano kasaknap ti impluensia ni Satanas? Kasano nga im-impluensiaanna dagiti tattao? Ken ania ti limitasion ti pannakabalinna? Bayat a pagsasaritaantayo dagitoy a saludsod, usigentayo met dagiti maadaltayo.

5, 6. Apay a saan a maaramid ti gobierno ti tao ti panagbalbaliw a kasapulan unay ti sangatauan?

⁵ Adu nga anghel ti kimmappon iti panagrebelde ni Satanas. Sakbay ti Layus, sinulisog ni Satanas ti dadduma kadakuada a makidenna kadagiti babbai ditoy daga. Ipalgak ti Biblia dayta a kinapudno babaen ti panangiladawanna a ginuyod ti dragon ti kakatlo dagiti bituen idiay langit. (Gen. 6:1-4; Jud. 6; Apoc. 12:3, 4) Idi tinallikudan dagita nga anghel ti pamilia ti Dios, kontrolado idan ni Satanas. Ngem saan a basta grupo dagiti manangriribuk dagitoy a rebelde. Nangaramid ni Satanas iti gobiernona, kas panangtuladna iti Pagarian ti Dios. Pinagbalinna ti bagina nga ari, inorganisar ken inikkanna dagiti demonio iti autoridad, ken pinagbalinna ida nga agtuturay iti lubong.​—Efe. 6:12.

⁶ Babaen ti organisasion ni Satanas, adda autoridadna iti amin a gobierno ti tao. Nalawag dayta idi impakitana ken Jesus ti “amin a pagarian ti mapagnaedan a daga” sa kinunana: “Itedkonto kenka amin daytoy nga autoridad ken ti dayagda, agsipud ta nayawat kaniak, ket iti asinoman a kayatko itedko dayta.” (Luc. 4:5, 6) Nupay dakes ti impluensia ni Satanas, adu a gobierno ti mangar-aramid iti naimbag kadagiti umilida. Ken mabalin a nasayaat met ti intension ti dadduma nga agturay. Ngem awan gobierno ti tao wenno indibidual a makabael a mangaramid iti panagbalbaliw a kasapulan unay ti sangatauan.​—Sal. 146:3, 4; Apoc. 12:12.

7. Kasano a saan laeng a dagiti gobierno ti us-usaren ni Satanas no di ket uray ti ulbod a relihion ken ti sistema ti komersio? (Kitaen ti ladawan iti rugi ti artikulo.)

⁷ Saan laeng a dagiti gobierno ti us-usaren ni Satanas ken dagiti demonio a mangyaw-awan iti “intero a mapagnaedan a daga” no di ket uray ti ulbod a relihion ken ti sistema ti komersio. (Apoc. 12:9) Babaen ti ulbod a  relihion, isursuro ni Satanas ti kinaulbod maipapan ken Jehova. Kasta met, ikagkagumaan ti Diablo nga ilemmeng kadagiti tattao ti nagan ti Dios. (Jer. 23:26, 27) Kas resultana, ipagarup dagiti nasingpet a tattao nga agdaydayawda iti Dios ngem dagiti gayam demonio ti pagdaydayawanda. (1 Cor. 10:20; 2 Cor. 11:13-15) Isaksaknap met ni Satanas ti kinaulbod babaen ti sistema ti komersio. Kas pagarigan, masansan nga isursuro dayta a sistema a kuarta ken sanikua ti kangrunaan a makaited iti kinaragsak. (Prov. 18:11) Dagidiay mamati iti dayta usarenda ti biagda nga agserbi iti “Kinabaknang” imbes nga iti Dios. (Mat. 6:24) Inton agangay, ti panagayatda iti material a bambanag ti mangleppes iti panagayatda iti Dios.​—Mat. 13:22; 1 Juan 2:15, 16.

8, 9. (a) Ania ti dua a mabalin a masursurotayo iti inaramid da Adan, Eva, ken dagiti rebelde nga anghel? (b) Ania ti pagsayaatanna no ammotayo ti kasaknap ti impluensia ni Satanas?

⁸ Adda dua a napateg a masursurotayo iti inaramid da Adan ken Eva ken dagiti rebelde nga anghel. Umuna, dua laeng ti pagpiliantayo, ket masapul a maysa laeng ti pilientayo. Agtalinaedtayo a nasungdo ken Jehova wenno dumasigtayo ken Satanas. (Mat. 7:13) Maikadua, limitado laeng ti gunggona dagidiay makikadua ken Satanas. Naaddaan da Adan ken Eva iti gundaway a mangikeddeng iti naimbag ken dakes, ken naaddaan dagiti demonio iti impluensia kadagiti gobierno ti tao. (Gen. 3:22) Ngem kanayon a dakes ti resulta ti pannakikadua ken Satanas; awan ti maipaayna a pudpudno a gunggona.​—Job 21:7-17; Gal. 6:7, 8.

⁹ Ania ti pagsayaatanna no ammotayo ti kasaknap ti impluensia ni Satanas? Balanse ti panangmatmattayo kadagiti sekular nga agtuturay ken matignaytayo a mangasaba. Ammotayo a kayat ni Jehova a raementayo dagiti agtuturay iti gobierno. (1 Ped. 2:17) Namnamaenna met nga agtulnogtayo kadagiti linteg dagiti gobierno ti tao no la ket ta saan a maikontra dagita kadagiti pagalagadanna. (Roma 13:1-4) Ngem ammotayo a masapul a neutraltayo, ket awan ti paborantayo a partido ti politika wenno agturay. (Juan 17:15, 16; 18:36) Gapu ta ammotayo ti ar-aramiden ni Satanas iti nagan ken reputasion ni Jehova, ad-adda a matignaytayo a mangisuro iti kinapudno maipapan iti Dios. Ipagpannakkeltayo nga awiten ken usaren ti naganna ta ammotayo nga ad-adu nga amang ti magunggonatayo iti panangayattayo kenkuana ngem iti panangayat iti kuarta wenno bambanag.​—Isa. 43:10; 1 Tim. 6:6-10.

10-12. (a) Ania nga appan ti mabalin nga inusar ni Satanas kadagiti anghel a kakabsatna? (b) Ania dagiti masursurotayo iti pannakatnag ti adu nga anghel iti sulisog?

¹⁰ Us-usaren ni Satanas dagiti epektibo a pamay-an a mangimpluensia kadagiti tattao.  Kas pagarigan, agusar iti appan tapno maallukoyna ida nga agaramid iti kayatna. Kasta met, butbutngenna ida tapno aramidenda ti kayatna.

¹¹ Kitaentayo no kasano kaepektibo ti appan ni Satanas tapno masulisogna ti adu nga anghel a kakabsatna. Nabayag la ketdi a pinalpaliiwna ida sakbay nga inallilawna ida a kumadua kenkuana. Idi naallilawna ti dadduma kadagitoy nga anghel ken nakidennada kadagiti babbai, naaddaanda iti annak a nangdominar kadagiti tattao. (Gen. 6:1-4) Nalabit saan laeng a ti immoral a pannakidenna ti inusar ni Satanas a mangsulisog kadagiti di matalek nga anghel no di ket inkarina pay a maaddaanda iti pannakabalin a mangituray iti sangatauan. Mabalin a panggepna a lapdan ti iyaay ti naikari a ‘bin-i ti babai.’ (Gen. 3:15) Ngem dinadael ni Jehova dagita a plano ni Satanas ken dagiti rebelde nga anghel iti daydi a tiempo idi inyegna ti Layus.

¹² Ania ti masursurotayo iti dayta? Ditay koma tagtagibassiten ti kinapeggad ti immoralidad ken kinapannakkel. Di mabilang a tawtawen a nagserbi iti Dios dagiti anghel a nakikappon ken Satanas. Ngem uray iti dayta a nagsayaat a kasasaadda, impalubos ti dadduma kadakuada nga agtubo ken dumakkel ti dakes a tarigagay. Kasta met, mabalin nga adun a tawen nga agserserbitayo iti naindagaan a paset ti organisasion ti Dios. Ngem uray no nadalus ti kasasaadtayo iti naespirituan, mabalin nga agtubo dagiti narugit a tarigagay. (1 Cor. 10:12) Nakapatpateg ngarud a kanayon a sukimatentayo ti pusotayo, laksidentayo dagiti immoral a panagpampanunot, ken liklikan ti kinapannakkel!​—Gal. 5:26; basaen ti Colosas 3:5.

13. Ania pay ti epektibo nga appan ni Satanas, ken kasano a maliklikantayo dayta?

¹³ Ti maysa pay nga epektibo nga appan ni Satanas ket ti panaginteres iti espiritismo. Saan laeng a ti ulbod a relihion ti us-usarenna tapno aginteres dagiti tattao kadagiti demonio. Us-usarenna pay ti industria ti panaglinglingay. Pagparparangen dagiti pelikula, video game, ken ti media a makapagagar ti espiritismo. Kasano a maliklikantayo ti masiluan iti dayta? Ditay koma namnamaen nga ilista ti organisasion ti Dios dagiti dakes ken nasayaat a paglinglingayan. Masapul a sanayentayo ti konsiensiatayo tapno maitunos dayta kadagiti pagalagadan ti Dios. (Heb. 5:14) Ngem nainsiriban ti pilitayo no iyaplikartayo ti naipaltiing a balakad ni apostol Pablo nga “awan koma ti panaginsisingpetna” ti ayattayo iti Dios. (Roma 12:9) Isaludsodtayo iti bagitayo: ‘Ipakpakita kadi dagiti paglinglingayak nga aginsisingpetak? No makita dagiti iyad-adalak iti Biblia wenno sarsarungkarak dagiti paglinglingayak, maibagada ngata nga ar-aramidek  ti ikaskasabak?’ No agtunos ti sao ken aramidtayo, narigat a matnagtayo iti silo ni Satanas.​—1 Juan 3:18.

14. Kasano a mabalin a butbutngennatayo ni Satanas, ken kasano a mapagballigiantayo dayta?

¹⁴ Malaksid iti appan, us-usaren pay ni Satanas ti panangbutbuteng tapno ikompromisotayo ti kinamatalektayo ken Jehova. Kas pagarigan, maimaniobrana dagiti gobierno tapno maparitan ti panangasabatayo. Wenno mabalin nga impluensiaanna dagiti katrabahuan wenno kaeskuelaantayo tapno laisendatayo gapu iti tarigagaytayo nga agbiag maitunos kadagiti moral a pagalagadan ti Biblia. (1 Ped. 4:4) Mabalin met nga impluensiaanna dagiti kapamiliatayo tapno paritandatayo a makigimong. (Mat. 10:36) Kasano a mapagballigiantayo dagita? Umuna, masapul a namnamaentayo daytoy a direkta a panangatakar​—gubgubatennatayo ni Satanas. (Apoc. 2:10; 12:17) Kasta met, masapul a kitaentayo ti dakdakkel nga isyu​—ibagbaga ni Satanas nga agserbitayo laeng ken Jehova no kombiniente dayta kadatayo. Kunana a no marigatantayon, tallikudantayon ti Dios. (Job 1:9-11; 2:4, 5) Masapul met nga agpannuraytayo ken Jehova tapno maaddaantayo iti bileg a mangsango iti dayta nga isyu. Laglagipentayo a dinatay pulos baybay-an ni Jehova.​—Heb. 13:5.

15. Mapilitnatayo kadi ni Satanas a mangaramid iti saantayo a kayat? Ilawlawagmo.

¹⁵ Saan a mapilit ni Satanas dagiti tattao a mangaramid iti saanda a kayat. (Sant. 1:14) Saan nga ammo ti adu a maitunos iti panggep ni Satanas ti ar-aramidenda. Ngem no maammuandan ti kinapudno, masapul nga agpilida no asino ti pagserbianda. (Ara. 3:17; 17:30) No determinadotayo a mangaramid iti pagayatan ti Dios, saan a madadael ni Satanas ti kinatarnawtayo.​—Job 2:3; 27:5.

16, 17. (a) Ania pay ti saan a kabaelan ni Satanas ken dagiti demonio? (b) Apay a ditay koma mabuteng a mangipigsa iti kararagtayo ken Jehova?

¹⁶ Adda pay saan a kabaelan nga aramiden ni Satanas ken dagiti demonio. Kas pagarigan, awan ti mabasatayo iti Kasuratan a mangipakita a mabasada ti puso ken panunot ti tao. Ni laeng Jehova ken ni Jesus ti nadakamat a makabael iti dayta. (1 Sam. 16:7; Mar. 2:8) Ngem no ngay ipigsatayo ti kararagtayo? Mabutengtayo kadi amangan no mangngeg dayta ti Diablo wenno dagiti demonio ket kontraenda dayta? Saan. Apay? Saantayo a mabuteng nga agaramid iti naimbag iti panagserbi ken Jehova gapu laeng ta mabalin a makitanatayo ti Diablo. Kasta met, ditay koma mabuteng a mangipigsa iti kararagtayo gapu laeng ta mabalin a mangngegnatayo ti Diablo. Kinapudnona, adu ti mabasatayo iti Biblia nga adipen ti Dios a sipipigsa a nagkararag, ket ditay makita a nagbutengda a mangngeg ida ti Diablo. (1 Ar. 8:22, 23; Juan 11:41, 42; Ara. 4:23, 24) No aramidentayo ti amin a kabaelantayo nga agsao ken agtignay maitunos iti pagayatan ti Dios, makapagtalektayo a saan nga ipalubos ni Jehova a mangaramid ti Diablo iti agnanayon a pakadangrantayo.​—Basaen ti Salmo 34:7.

¹⁷ Masapul nga am-ammuentayo ti kabusortayo, ngem saan a masapul a pagbutngantayo. Babaen ti tulong ni Jehova, kabaelan uray dagiti imperpekto a tao nga abaken ni Satanas. (1 Juan 2:14) No busorentayo ti Diablo, panawannatayo. (Sant. 4:7; 1 Ped. 5:9) Agparang a dagiti agtutubo ti nangnangruna a puntiria ni Satanas. Kasano ngarud a malabananda ti panangatakar ti Diablo? Mausig dayta iti sumaruno nga artikulo.