1, 2. (a) Apay a makaparegta ti ulidan dagiti matalek a mangaskasaba kadagiti teritoria a di mangipangpangag? (Kitaen ti ladawan iti rugi ti artikulo.) (b) Ania ti kinuna ni Jesus maipapan iti panangasaba iti mismo nga ilina? (Kitaen ti footnote.)

DA Sergio ken Olinda ket agassawa a payunir idiay United States ken nasuroken a 80 ti tawenda. Iti di pay unay nabayag, naut-oten dagiti sakada ket marigatandan a magna. Ngem kas ar-aramidenda iti adun a dekada, magnada a mapan iti plasa nga adu ti aglabas, ket makadanonda iti 7:00 ti bigat. Agpuestoda iti asideg ti pagsardengan ti bus ken tukonanda dagiti aglabas kadagiti naibatay iti Biblia a publikasiontayo. Saan ida nga ikankano ti kaaduan, ngem addada latta iti puestoda a nakaisem. Inton aldawen, agin-inayadda nga agawid. Kasta manen ti aramidenda kabigatanna. Kinapudnona, innem a bigat iti makalawas iti intero a tawen nga okupado dagitoy a matalek nga agassawa a mangikasaba iti mensahe ti Pagarian.

² Kas kada Sergio ken Olinda, adu a matalek a kakabsattayo iti intero a lubong ti adun a dekada a mangaskasaba kadagiti  teritoria nga awan ti mangipangpangag. No maysaka kadakuada, naimpusuan a komendarandaka iti panagibturmo. * Ti matalek a panagserbim ken Jehova ket makaparegta iti adu​—uray kadagiti eksperiensiado a kapammatiam. Inkomento ti dadduma a manangaywan iti sirkito: “No kaduak iti ministerio dagitoy a matalek a kakabsat, mapabpabilegak iti ulidanda.” “Ti kinamatalekda ti mangparparegta kaniak nga agibtur ken agbalin a natured iti ministeriok.” “Matukay ti riknak iti ulidanda.”

3. Ania ti tallo a saludsod nga usigentayo, ken apay?

³ Tapno bumileg ti determinasiontayo a mangileppas iti panangasaba nga impaannong ni Jesus, usigentayo ti sungbat dagitoy: Apay a posible a maupaytayo no dadduma? Kasano a makapagbungatayo? Ania ti makatulong tapno agtultuloytayo nga agbunga buyogen ti panagibtur?

4. (a) Ania ti epekto ken Pablo ti negatibo a reaksion ti kaaduan a Judio? (b) Apay a narikna dayta ni Pablo?

⁴ No naupayka gapu iti di panangipangag dagiti tattao iti teritoriam, maawatam ti narikna ni apostol Pablo. Bayat ti agarup 30 a tawen a ministeriona, adu ti natulonganna nga agbalin nga adalan ni Kristo. (Ara. 14:21; 2 Cor. 3:2, 3) Nupay kasta, manmano a Judio ti natulonganna nga agbalin a Kristiano. Imbes ketdi, adu kadakuada ti nangkontra ken Pablo ken indadanesda pay. (Ara. 14:19; 17:1, 4, 5, 13) Ania ti epekto dayta ken Pablo? Inaminna: “Ibagbagak ti kinapudno iti Kristo . . . nga addaanak iti dakkel a ladingit ken di agressat nga ut-ot iti pusok.” (Roma 9:1-3) Apay a narikna dayta ni Pablo? Ipatpategna unay ti panangasaba. Kinasabaanna dagiti Judio gapu ta maseknan unay kadakuada, isu a nasaktan iti dida panangawat iti asi ti Dios.

5. (a) Ania ti pakatignayantayo a mangasaba? (b) Apay a normal a maupaytayo no dadduma?

⁵ Kas ken Pablo, mangasabatayo ta talaga a maseknantayo kadagiti tattao. (Mat. 22:39; 1 Cor. 11:1) Apay? Ammotayo ngamin nga adu a bendision ti ipaay ni Jehova kadagiti agdesision nga agserbi kenkuana. No panunotentayo dagiti tattao iti teritoriatayo, maibagatayo, ‘No la koma matulongantayo ida a mangbigbig iti pakaikapkapisanda!’ Itultuloytayo ngarud a paregtaen ida a mangammo iti kinapudno maipapan ken Jehova ken iti panggepna iti sangatauan. Kasla ibagbagatayo kadagiti kasabaantayo: ‘Adda nagpintas a regalomi kadakayo. Pangngaasiyo ta awatenyo.’ Isu a no saanda nga awaten dayta, normal laeng nga adda ‘ut-ot iti pusotayo.’ Saan nga ipakita dayta a rikna a kurang ti pammatitayo, no di ket ipatpategtayo ti panangasaba. Agibturtayo koma ngarud uray no maupaytayo no dadduma. Marikna ti adu kadatayo ti kuna ni Elena, a nasurok a 25 a tawenen a payunir: “Narigat ti trabaho a panangasaba. Ngem awanen ti sabali a trabaho a kayatko nga aramiden.”

6. Ania a saludsod ti usigentayo, ket kasano nga aramidentayo dayta?

⁶ Kasano a masiguradotayo a nabunga latta ti ministeriotayo sadinoman ti pangasabaantayo? Tapno masungbatan dayta a nagpateg a saludsod, usigentayo ti dua nga ilustrasion ni Jesus a nangdakamatanna a kasapulantayo ti “agbunga.” (Mat. 13:23) Ti umuna ket maipapan iti puon ti ubas.

7. (a) Asino ti irepresentar ti “agtaltalon,” “puon ti ubas,” ken ‘sangsanga’? (b) Ania a saludsod ti sungbatantayo?

⁷ Basaen ti Juan 15:1-5, 8. Siputanyo ta kinuna ni Jesus kadagiti apostolna:  “Ni Amak maipadayag iti daytoy, nga agtultuloykayo a mangpataud iti adu a bunga ken paneknekanyo ti bagbagiyo nga ad-adalak.” Iti ilustrasion, nailadawan a ni Jehova ti “agtaltalon,” ni Jesus ti “pudno a puon ti ubas,” ken dagiti adalanna ti ‘sangsanga.’ * Ania ngarud a bunga ti masapul a patauden dagiti pasurot ni Kristo? Iti daytoy nga ilustrasion, dinakamat ni Jesus ti napateg a detalye a makatulong tapno maammuantayo ti sungbat.

8. (a) Iti ilustrasion, apay a saan a dagiti baro nga adalan ti tuktukoyen ti bunga? (b) Ania ti makunatayo kadagiti ipapaaramid ni Jehova?

⁸ Kinuna ni Jesus maipapan ken Amana: “Tunggal sanga nga adda kaniak a saan a mangpatpataud iti bunga ikkatenna.” Kayatna a sawen, ibilangnatayo laeng ni Jehova nga adipenna no agbungatayo. (Mat. 13:23; 21:43) Gapuna, iti daytoy nga ilustrasion, ti bunga a masapul a patauden ti tunggal Kristiano ket saan a dagiti mapagbalintayo a baro nga adalan. (Mat. 28:19) Ta no kasta, dagiti matalek a Saksi nga awan ti mapagbalinda nga adalan gapu ta awan ti mangipangpangag iti teritoriada ket kasladan kadagiti sanga a di agbungbunga iti ilustrasion ni Jesus. Ngem saan a mabalin a kasta! Apay? Saantayo ngamin a mapilit dagiti tattao nga agbalin nga adalan. Maikontra iti kinamanagayat ni Jehova no ikkatenna dagiti adipenna a saan a makaaramid iti banag a dida kabaelan. Kabaelantayo ti aniaman nga ipaaramid ni Jehova.​—Deut. 30:11-14.

9. (a) Ania a trabaho ti aramidentayo tapno agbungatayo? (b) Ania nga ilustrasion ti usigentayo, ken apay?

⁹ Ania ngarud ti bunga a masapul a pataudentayo? Nalawag a dayta ket trabaho a kabaelan nga aramiden ti tunggal maysa kadatayo. Ania dayta a trabaho? Ti panangikasaba iti naimbag a damag ti Pagarian ti Dios. * (Mat. 24:14) Patalgedan dayta ti ilustrasion ni Jesus maipapan iti maysa a managmula. Usigentayo daytoy maikadua nga ilustrasion.

10. (a) Iti daytoy nga ilustrasion, ania ti irepresentar ti bin-i ken ti daga? (b) Ania ti patauden ti ungkay ti trigo?

¹⁰ Basaen ti Lucas 8:5-8, 11-15. Iti ilustrasion maipapan iti managmula, ti bin-i isu ti “sao ti Dios,” wenno ti mensahe ti Pagarian. Ti daga irepresentarna ti piguratibo a puso ti tao. Ti bin-i, nga ipapantayon a trigo, a naitinnag iti naimbag a daga ket nagramut, nagtubo, ken dimmakkel. Kalpasanna, “nangpataud iti bunga a sagsangagasut.” Ngem ania a bunga ti patauden ti ungkay ti trigo? Agpataud kadi iti babassit nga ungkay? Saan, no di ket agpataud kadagiti baro a bin-i, nga inton agangay, agbalinto a mula a trigo. Iti daytoy nga ilustrasion, ti maysa a bin-i ket nakapataud iti 100 a bukel. Kasano nga agaplikar dayta nga ilustrasion iti ministeriotayo?

11. (a) Kasano nga agaplikar iti ministeriotayo ti ilustrasion maipapan iti managmula? (b) Kasano a makapataudtayo iti baro a bin-i ti Pagarian?

¹¹ Ipapantayo nga adun a tawen ti napalabas, insuro kadatayo ti dadduma a Saksi wenno dagiti Kristiano a nagannaktayo ti kinapudno maipapan iti Pagarian. Maragsakanda ta napaliiwda a naimula iti pusotayo ti arig bin-i a mensahe ti Pagarian. Kas iti pannakaimula ti bin-i iti naimbag a daga iti ilustrasion ni Jesus, inawattayo ti mensahe ken sinalimetmetantayo dayta. Kas resultana, nagramut ti arig bin-i a mensahe ti Pagarian  ken dimmakkel a nagbalin a mula a trigo a mabalinen nga agbunga. No kasano a ti ungkay agpataud iti baro a bukel, imbes a baro nga ungkay, agpatpataudtayo met iti bunga, ti bin-i ti Pagarian, imbes a baro nga ad-adalan. * Kasano a makapataudtayo iti baro a bin-i ti Pagarian? Tunggal ipakaammotayo ti mensahe ti Pagarian, arigna mangpatpataud wenno iwarwarastayo ti bin-i a naimula iti pusotayo. (Luc. 6:45; 8:1) Masursurotayo ngarud iti daytoy nga ilustrasion a no itultuloytayo nga ipakaammo ti mensahe ti Pagarian, ‘agbungbungatayo buyogen ti panagibtur.’

12. (a) Ania ti masursurotayo kadagiti ilustrasion ni Jesus maipapan iti puon ti ubas ken iti managmula? (b) Ania ti epekto dayta kenka?

¹² Ania ti masursurotayo kadagiti ilustrasion ni Jesus maipapan iti puon ti ubas ken iti managmula? Ti panagbungatayo ket saan a nakadepende iti reaksion dagiti tattao iti teritoriatayo. Imbes ketdi, nakadepende dayta iti kinamatalektayo. Dinakamat met dayta ni Pablo idi kinunana: “Tunggal maysa a tao awatennanto ti bukodna a gunggona sigun iti bukodna a panagbannog.” (1 Cor. 3:8) Magunggonaantayo gapu iti panagtrabahotayo, saan a gapu iti resulta dayta. Kuna ni Matilda, a 20 a tawenen a payunir: “Maragsakanak ta ammok a gunggonaan ni Jehova dagiti panagbannogtayo.”

13, 14. Sigun iti Roma 10:1, 2, ania dagiti rason a saan a simmuko ni Pablo uray no negatibo ti reaksion dagiti tattao iti mensahe ti Pagarian?

¹³ Ania ti makatulong tapno agtultuloytayo nga agbunga buyogen ti panagibtur? Kas naadaltayon, naupay ni Pablo kadagiti negatibo a reaksion dagiti Judio iti mensahe ti Pagarian. Ngem saan a simmuko. Kastoy ti innayonna iti suratna kadagiti Kristiano idiay Roma maipapan iti riknana kadagiti Judio: “Ti naimbag a tarigagay ti pusok ken ti ararawko iti Dios maipaay kadakuada ket, kinapudnona, maipaay iti pannakaisalakanda. Ta saksiak ida nga adda regtada iti Dios;  ngem saan a maitunos iti umiso a pannakaammo.” (Roma 10:1, 2) Ania dagiti rason nga imbaga ni Pablo no apay nga intultuloyna ti ministeriona?

¹⁴ Umuna, dinakamat ni Pablo no apay nga intultuloyna a kinasabaan dagiti Judio. Tinignay ti ‘naimbag a tarigagay ti pusona.’ Tartarigagayan ti pusona a maisalakan dagiti Judio. (Roma 11:13, 14) Maikadua, dinakamat ni Pablo ti ‘ararawna iti Dios maipaay kadakuada.’ Impakaasina iti Dios a tulonganna ti tunggal Judio a mangawat iti mensahe ti Pagarian. Maikatlo, innayon ni Pablo: “Adda regtada iti Dios.” Nakitana a posible nga agserbida iti Dios. No umiso ti pakausaran ti regta ti napudno nga indibidual, agbalin a naregta nga adalan ni Kristo, kas iti kapadasan ni Pablo.

15. Kasano a matuladtayo ni Pablo? Mangted kadagiti pagarigan.

¹⁵ Kasano a matuladtayo ni Pablo? Umuna, ikagumaantayo a pagtalinaeden ti naimpusuan a tarigagaytayo a mangsapul kadagiti posible a “siuumiso nga agannayas iti agnanayon a biag.” Maikadua, ipakaasitayo ken Jehova a luktanna ti puso dagiti napudno a tattao. (Ara. 13:48; 16:14) Kuna ni Silvana, a dandani 30 a tawenen a payunir: “Sakbay a mapanak iti maysa a balay iti teritoriak, ikararagko ken Jehova a pagbalinennak koma a positibo.” Ikararagtayo met iti Dios nga iturongdatayo koma dagiti anghel kadagiti nasingpet a tattao. (Mat. 10:11-13; Apoc. 14:6) Kuna ni Robert, a nasurok a 30 a tawenen a payunir: “Makapagagar ti makipagtrabaho kadagiti anghel ta ammoda ti mapaspasamak kadagiti kasabaantayo.” Maikatlo, ikagumaantayo a kitaen a dagiti tattao ket posible nga agserbida iti Dios. Kuna ni Carl, a panglakayen ken nabautisaran nasurok a 50 a tawenen ti napalabas, “Mangbirokak iti uray bassit a pagilasinan a mangipakita a napudno ti maysa a tao, nalabit ti isemna, nasingpet a langana, wenno naimpusuan a panagsaludsodna.” Wen, kas ken Pablo, makapagtultuloytayo nga agbunga.

16, 17. (a) Ania ti masursurotayo iti instruksion iti Eclesiastes 11:6? (b) Iyilustrar ti epekto ti panagmulatayo kadagiti makapaliiw kadatayo.

¹⁶ Uray no kasla di dumandanon iti puso dagiti tattao ti ikaskasabatayo a mensahe ti Pagarian, ditay koma tagtagibassiten ti epekto ti panagmulatayo. (Basaen ti Eclesiastes 11:6.) Pudno nga adu ti saan a dumngeg ngem palpaliiwendatayo. Madlawda ti nadalus a panagbadbado, nadayaw a kababalin, ken naimpusuan nga isemtayo. Inton agangay, mabalin a makita ti dadduma a kamali gayam dagiti negatibo a panangmatmatda kadatayo. Nakita da Sergio ken Olinda, a nadakamat itay, dayta a panagbalbaliw.

¹⁷ Kuna ni Sergio: “Nagsakitkami isu a saankami a nakap-apan iti plasa. Idi nakapankami manen, dinamag dagiti aglabas, ‘Ania ti napasamak? Naikawakami iti kaawanyo.’” Nakaisem nga innayon ni Olinda: “Pinayapayandakami dagiti drayber ti bus sa impukkaw ti dadduma kadakuada, ‘Nagsayaat ti ar-aramidenyo!’ Dimmawatda pay ketdi kadagiti magasintayo.” Ken nasdaaw ti agassawa ta adda lalaki a dimmagas iti cart-da sa nangted iti sabsabong, ken nagyaman iti trabaho nga ar-aramidenda.

18. Apay a determinadotayo koma nga ‘agbunga buyogen ti panagibtur’?

¹⁸ Wen, no ‘saantayo a paginanaen ti imatayo’ nga agmula iti bin-i ti Pagarian, maaddaantayo iti nagpateg a paset iti ‘panangsaksi iti amin a nasion.’ (Mat. 24:14) Kangrunaanna, makariknatayo iti pudpudno a ragsak ta ammotayo a maragsakan ni Jehova kadatayo, ta ay-ayatenna ti amin nga ‘agbunga buyogen ti panagibtur’!