1. Apay a mabalin a marigatan ti dadduma nga agadal?

IKAGKAGUMAAN ita dagiti tattao ti agtrabaho tapno adda pagbiagda. Adu kadagiti kakabsattayo ti agtrabaho iti adu nga oras tapno maipaayda ti kasapulan ti pamiliada. Adda dagiti agbiahe iti adu nga oras iti inaldaw a mapan agtrabaho sa agawidda iti balayda. Adu met ti agtrabaho iti nadagsen tapno masuportaranda ti pamiliada. Isu a nabambannogton dagitoy a nagagaget a kakabsat inton agawidda ket awanton ti pigsada nga agadal.

2. Kaano nga iwaywayaam ti agadal?

² Ngem ti agpayso, masapul nga iwayaantayo ti agadal​—agadal a naimbag—​iti Sao ti Dios ken kadagiti Nakristianuan a publikasiontayo. Nakadepende iti dayta ti relasiontayo ken Jehova ken ti panagbiagtayo nga agnanayon! (1 Tim. 4:15) Adda dagiti inaldaw a masapa nga agriing tapno agadal bayat a naulimek pay laeng ti balayda ken presko pay laeng ti panunotda. Dadduma met ti mangiwaya iti sumagmamano a minuto iti rabii bayat a naulimeken ti aglawlaw tapno agadal ken agutobda.

3-4. Ania dagiti naaramid a panagbalbaliw iti kaadu ti maipapaay a publikasion, ken apay?

³ Sigurado nga umanamongka nga importante nga iwayaantayo ti agadal. Ngem ania ti adalentayo? Mabalin a kunatayo, ‘Nagadu ti publikasiontayo, diak kaya a basaen amin.’ Dadduma a kakabsat ti makabasa ken makabuya iti amin a maaw-awattayo a naespirituan a probision ngem adu ti marigatan a mangiwaya iti dayta. Ammo dayta ti Bagi a Manarawidwid. Isu nga iti nabiit pay, inyurnosda a maksayan dagiti digital ken nayimprenta a publikasion.

 ⁴ Kas pagarigan, saantayon nga ipabpablaak ti Tinawen a Libro Dagiti Saksi ni Jehova ta adun dagiti makaparegta a kapadasan iti jw.org^® ken iti binulan a programa ti JW Broadcasting^®. Mamitlo laengen iti kada tawen a maipablaak ti publiko nga edision ti magasin a Pagwanawanan ken Agriingkayo! Ngem ti panggep dagitoy a panagbalbaliw ket saan a tapno ad-adu ti tiempotayo iti sabali nga aktibidad no di ket tapno makapagpokustayo iti “napatpateg a bambanag.” (Fil. 1:10) Usigentayo no kasano a mayun-unatayo ti napatpateg a bambanag ken no kasano a naan-anay a mabenepisiarantayo iti personal a panagadal iti Biblia.

5-6. Ania dagiti publikasion a masapul nga adalentayo a naimbag?

⁵ Ania dagiti iyun-unatayo nga adalen? Masapul nga inaldaw a basaentayo ti Sao ti Dios. Naksayan dagiti nayeskediul a mabasa iti linawas a panagbasa iti Biblia iti kongregasion tapno ad-adu ti tiempotayo nga agutob ken agsukimat wenno ag-research. Ti koma panggeptayo ket saan laeng a basta maileppas ti nayeskediul a mabasa no di ket maipapusotayo ti mensahe ti Biblia ken sumingedtayo ken Jehova.​—Sal. 19:14.

⁶ Ania pay ti masapul nga adalentayo a naimbag? Siempre, kayattayo nga isagana dagiti maadal iti Panagadal iti Pagwanawanan, Panagadal ti Kongregasion iti Biblia, ken ti dadduma pay a maadal iti gimong iti tengnga ti lawas. Kayattayo met a basaen ti tunggal ruar Ti Pagwanawanan ken Agriingkayo!

7. Apay a ditay maupay no ditay mabasa wenno mabuya ti amin nga adda iti website-tayo wenno iti JW Broadcasting?

⁷ Baka maibagam, ‘OK, ngem kasano ngay ti amin nga artikulo ken video iti website-tayo a jw.org, ken iti JW Broadcasting? Nakaad-adu!’ Panunotem daytoy nga ilustrasion: Iti eat-all-you-can a restawran, nagadu ti naimas a makan. Saan a maramanan dagiti kostumer ti amin a makan isu a mangpilida laeng iti sumagmamano. Umasping iti dayta, no saanmo a kabaelan a basaen ken buyaen ti amin nga adda iti jw.org ken JW Broadcasting, dika maupay. Basaem ken buyaem laeng ti kayam. Usigentayo ita no ania ti ramanen ti panagadal ken no kasano a naan-anay a magunggonaantayo iti dayta.

8. Ania dagiti mabalintayo nga aramiden no agadaltayo iti Pagwanawanan, ken kasano a magunggonaanka iti dayta?

⁸ Ti panagadal ket panagpokus iti basbasaem tapno makasursuroka. Saan laeng a basta panagbasa ken pananguged dayta iti sungbat. Kas pagarigan, no agsagsaganaka para iti Panagadal iti Pagwanawanan, basaem nga umuna ti paset nga “Iti Daytoy a Panagadal” iti rugi ti artikulo. Sumaruno, usigem ti tema ti artikulo kasta met dagiti subtitulona ken dagiti pangrepaso a saludsod. Kalpasanna, basaem a naimbag ti artikulo. Siputam ti sentensia a mangipakita iti kangrunaan a punto ti parapo, a kaaduanna a ti umuna a sentensia ti tunggal parapo. Masansan a makatulong dayta tapno maammuam ti mailawlawag iti parapo. Bayat a basbasaem ti artikulo, panunotem no kasano a konektado ti tunggal parapo iti subtitulo ken iti pannakatema ti artikulo. Ilistam ti aniaman a saan a pamiliar kenka a sasao ken punto a kayatmo nga i-research.

9. (a) Apay ken kasano nga ikkam iti nangnangruna nga atension dagiti teksto no adalentayo Ti Pagwanawanan? (b) Kas kuna ti Josue 1:​8, ania pay ti aramidentayo malaksid iti panangbasa kadagiti teksto?

⁹ Ti Panagadal iti Pagwanawanan ket panagadal iti Biblia. Nangnangruna ngarud  nga ikkam iti atension dagiti teksto, aglalo dagiti mabasa inton mausig ti material iti kongregasion. Siputam no kasano a dagiti napateg a sasao wenno grupo ti sasao kadagiti teksto suportaranda ti kangrunaan a punto ti parapo. Kanayonanna, utobem dagiti teksto a basaem, ken panunotem a naimbag no kasano a mayaplikarmo dagita.​—Basaen ti Josue 1:8.

10. Maitunos iti Hebreo 5:​14, apay a masapul nga usaren dagiti nagannak ti panagdaydayaw ti pamilia a mangisuro kadagiti annakda no kasano ti agadal ken ag-research?

¹⁰ Natural laeng a kayat dagiti nagannak a makaparagsak kadagiti annakda ti linawas a Panagdaydayaw ti Pamilia. Uray masapul a kanayon nga agplano dagiti nagannak para iti panagdaydayaw ti pamilia, saanda koma a panunoten a masapul a mangyurnosda kadagiti espesial wenno makapagagar nga aktibidad iti kada lawas. Mabalin a ti Panagdaydayaw ti Pamilia ket panagbuya iti binulan a programa ti JW Broadcasting wenno espesial a proyekto kas iti panangaramid iti bassit a daong ni Noe. Ngem napateg met nga isuroda dagiti annakda no kasano ti agadal. Kas pagarigan, masapul a masursuroda ti agsagana para iti gimong ken ag-research maipapan iti isyu wenno problema a nakaipasanguanda idiay eskuelaan. (Basaen ti Hebreo 5:14.) No nasanayda nga agadal iti Biblia iti pagtaengan, nalaklakada a makapagpokus iti mailawlawag kadagiti gimong, asamblea, ken kombension, a saan a kanayon nga adda video-na. Siempre, ti kaatiddog ti tunggal panagadal ket agdepende iti edad ken personalidad ti ubing.

11. Apay nga importante nga isurotayo dagiti iyad-adalantayo iti Biblia no kasano ti agadal a naimbag a bukbukodda?

¹¹ Kasapulan met a masursuro dagiti iyad-adalantayo iti Biblia no kasano ti agadal. Idi damoda ti agadal, maragsakantayo a makakita a naugedanda dagiti sungbat kas panagsaganada iti panagadal iti Biblia wenno kadagiti gimong. Ngem masapul met nga isurotayo ida nga ag-research ken agadal a naimbag a bukbukkodda. Iti kasta, no adda problemada, imbes nga agpatulongda a dagus kadagiti kakabsat iti kongregasion, ammodan ti ag-research kadagiti makatulong nga impormasion manipud kadagiti publikasiontayo.

12. Ania dagiti mabalin a kalattayo iti panagadal?

¹² No saanka a managadal, baka ipapanmo nga imposible a matagiragsakmo ti agadal. Ngem kabaelam dayta. Mabalinmo nga irugi  iti ababa a panagadal, sa in-inut nga iyat-atiddogmo ti orasmo nga agadal. Panunotem no apay nga agad-adalka. Siempre, ti kangrunaan a kalattayo ket tapno agtultuloy a sumingedtayo ken Jehova. Ti maysa a simple a kalat ket ti panangsungbat iti naisaludsod kadatayo wenno panag-research maipapan iti problema a sangsanguentayo.

13. (a) Ilawlawag dagiti aramiden ti maysa nga agtutubo tapno maidepensana idiay eskuelaan dagiti patpatienna. (b) Kasanom a mayaplikar ti balakad iti Colosas 4:6?

¹³ Kas pagarigan, maysaka kadi nga agtutubo nga ages-eskuela? Mabalin a patien ti amin a kaklasem ti teoria ti ebolusion. Kayatmo nga idepensa ti isursuro ti Biblia, ngem kasla saanmo a kaya. Isu a dayta ti pagbalinem a proyekto iti panagadalmo! Dua ti mabalin a kalatmo: (1) tapno mapabileg ti pammatim a ti Dios ti nangparsua iti amin ken (2) tapno mapasayaat ti abilidadmo a mangidepensa iti kinapudno. (Roma 1:20; 1 Ped. 3:15) Mabalin a panunotem nga umuna, ‘Apay nga ibagbaga dagiti kaklasek a mamatida iti ebolusion?’ Kalpasanna, ag-research-ka a naimbag kadagiti publikasiontayo. Makitamto a saan met gayam a narigat nga idepensa dagiti patpatiem. Patien ti kaaduan ti ebolusion gapu ta patien dayta ti tao a resrespetuenda. No adda masarakam a maysa wenno dua a punto a mairanudmo, mabalin a matulongam ti maysa nga agbirbirok iti kinapudno.​—Basaen ti Colosas 4:6.

14-16. (a) Ania ti aramidem tapno maammuam ti ad-adu pay iti libro ti Biblia a saan unay a pamiliar kenka? (b) Babaen kadagiti naisitar a teksto, ilawlawagmo no kasanom a maawatan a naimbag ti libro nga Amos. (Kitaen met ti kahon a “ Biagem Dagiti Salaysay iti Biblia!”)

¹⁴ Ipapantayon nga iti sumaruno a gimong ti kongregasion, nayeskediul a mausig ti maysa a libro nga insurat ti maysa kadagiti maaw-awagan iti segundario a propeta, ket baka saanka a pamiliar kenkuana. Ti umuna a mabalinmo nga aramiden ket ti panangpatanormo iti interes iti insurat dayta a propeta. Kasano?

¹⁵ Umuna, isaludsodmo iti bagim: ‘Ania ti ammok maipapan iti nangisurat iti libro? Asino, tagaano, ken ania ti trabahona?’ No maammuam ti nalikudan ti mannurat, posible a nalaklakam a maawatan ti rason iti panangusarna kadagiti sasao wenno ilustrasion. Bayat a basbasaem ti Biblia, kitaem dagiti grupo ti sasao a mangipakita iti personalidad ti mannurat.

¹⁶ Sumaruno, makatulong no ammom no kaano a naisurat ti libro. Makitam dayta iti “Listaan Dagiti Libro ti Biblia” iti makinlikud a paset ti Baro a Lubong a Patarus ti Nasantuan a Kasuratan. Kanayonanna, mabalin a repasuem ti tsart dagiti propeta ken ari iti Apendise A6. No ti libro ti Biblia nga ad-adalem ket maipapan iti padto, nasayaat no ammuem dagiti kasasaad idi panawen a naisurat dayta a libro. Ania dagiti dakes a kababalin wenno aramid dagiti tattao a ninamnama ti propeta a mailinteg? Siasino dagiti kapanawenanna? Tapno mas maawatam ti kasasaad, mabalin nga agkonsultaka iti dadduma pay a libro ti Biblia. Kas pagarigan, tapno maawatam a naimbag ti kasasaad ti panawen a nagbiagan ni propeta Amos, basaem dagiti nainaig a bersikulo iti 2 Ar-ari ken 2 Cronicas, a nailista iti marhinal a reperensia ti Amos 1:1. Kanayonanna, mabalin a repasuem dagiti insurat ni Oseas, a nalabit kapanawenan ni Amos. Amin dagitoy a reperensia ket makatulong tapno maawatam ti kasasaad ti panawen a nagbiagan ni Amos.​—2 Ar. 14:​25-28; 2 Cron. 26:​1-15; Os. 1:​1-11; Amos 1:1.

17-18. Usarem dagiti pagarigan iti parapo wenno ti bukodmo a na-research a mangipakita no kasano a ti panangsiput iti kasla babassit a detalye pagbalinenna a naragsak ti panagadal iti Biblia.

¹⁷ No agbasaka iti Biblia, nasayaat no adda tarigagaymo a mangammo iti ad-adu pay. Ipapantayon a basbasaem ti maika-12 a kapitulo ti padto ni Zacarias, a nangipadto iti ipapatay ti Mesias. (Zac. 12:10) Inton madanonmo ti bersikulo 12, mabasam a ti “pamilia iti sangakabbalayan ni Natan” ket agladingitto unay iti ipapatay ti Mesias. Imbes a palabsem laeng dayta a detalye, mabalin a sumardengka biit ket panunotem: ‘Ania ti koneksion ti sangakabbalayan ni Natan iti Mesias? Adda pay kadi sabali a pamay-an a maammuak ti ad-adu nga impormasion?’ Agimbestigarka. Ti umuna a marhinal a reperensia iturongnaka iti 2 Samuel 5:​13, 14, a pakaammuam a ni Natan ket maysa kadagiti annak ni Ari David. Ti maikadua a marhinal a reperensia a Lucas 3:​23, 31 ibagana a direkta a kaputotan ni Natan ni Jesus babaen ken Maria. (Kitaen ti “Joseph, son of Heli,” study note iti Lucas 3:​23, nwtsty.) Biglaka a naginteres! Ammom a naipadto nga agtaud ni Jesus iti pamilia ni David. (Mat. 22:42) Ngem nasurok a 20 ti annak ni David. Saan kadi a nakaskasdaaw a direkta a tinukoy ni Zacarias a ti sangakabbalayan ni Natan ket agladingitto iti ipapatay ni Jesus?

¹⁸ Usigem ti sabali pay a pagarigan. Iti umuna a kapitulo ti Lucas, mabasatayo a binisita ni anghel Gabriel ni Maria sa imbagana maipapan iti anak nga ipasngayna: “Agbalinto a natan-ok, ken maawaganto iti Anak ti Kangatuan, ket itedto kenkuana ni Jehova a Dios ti trono ni David nga amana, ken agnanayonto nga agturay kas Ari iti sangakabbalayan ni Jacob.” (Luc. 1:​32, 33) Baka agpokustayo laeng  iti umuna a paset ti mensahe ni Gabriel, a maawaganto ni Jesus nga “Anak ti Kangatuan.” Ngem impadto met ni Gabriel a ni Jesus ket “agturay kas Ari.” Isu a mabalin a panunotentayo no ania ngata ti kaipapanan dagiti sasao ni Gabriel ken ni Maria. Napanunot ngata ni Maria a sukatan ni Jesus ni Ari Herodes, wenno maysa kadagiti kaputotanna, kas agturay iti Israel? No agbalin nga ari ni Jesus, ni Maria ti agbalin nga ina a reyna, ket agyan ti pamiliana iti palasio ti ari. Ngem awan ti mabasatayo a dinakamat ni Maria ken Gabriel ti kasta a posibilidad, wenno kiniddaw ni Maria ti nangato a posision iti Pagarian, kas inaramid ti dua nga adalan ni Jesus. (Mat. 20:​20-23) Dagitoy a detalye ti ad-adda pay a mangkombinsir kadatayo a talaga a nakapakpakumbaba a babai ni Maria!

19-20. Kas nadeskribir iti Santiago 1:​22-25 ken 4:​8, ania dagiti kalattayo no agadaltayo?

¹⁹ Laglagipentayo a ti kangrunaan a kalattayo iti panagadal iti Sao ti Dios ken kadagiti publikasiontayo ket tapno sumingedtayo ken Jehova. Kayattayo met a nalawlawag a makita ti ‘langatayo’ ken dagiti masapul a balbaliwantayo tapno maay-ayo ti Dios. (Basaen ti Santiago 1:​22-25; 4:8.) Isu nga iti rugi ti tunggal panagadal, masapul a dawatentayo ken Jehova ti nasantuan nga espirituna. Ipakaasitayo a tulongannatayo a naan-anay a magunggonaan iti panagadaltayo ken makitatayo dagiti masapul a balbaliwantayo.

²⁰ Sapay koma ta agbalintayo a kas iti adipen ti Dios a dineskribir ti salmista: “Pagragsakanna ti linteg ni Jehova, ken basbasaenna dayta iti nakapsut a timek iti aldaw ken rabii. . . . Agballigi ti amin nga aramidenna.”​—Sal. 1:​2, 3.