1. Ania a pakarigatan ti pakaipaspasanguan ti adu kadatayo?

 ADDA kadin inaramidmo a naespirituan a kalat ngem marigatanka a mangragpat iti dayta? b No wen, saan la a sika ti kasta. Kas pagarigan, kayat ni Philip a pasayaaten ti kalidad ken kasansan dagiti kararagna, ngem marigatan a mangiwaya iti tiempo nga agkararag. Kalat ni Erika ti agbalin a managsapsapa kadagiti taripnong sakbay ti panangasaba; ngem masansan a maladaw latta. Namin-adu nga inkagumaan ni Tomáš a basaen ti intero a Biblia. Imbagana: “Saanko idi a ma-enjoy ti agbasa iti Biblia. Namitlo a pinadasko, ngem kada makadanonak iti Levitico, agsardengakon.”

2. Apay a ditay koma maupay no adda naespirituan a kalat a ditay pay naragpat?

² No adda kalatmo ita ngem dimo pay naragpat, dika koma maupay. Masansan a tiempo ken panagporsegi ti kasapulan tapno maragpat uray ti simple a kalat. Kayatmo a maragpat latta dayta a kalat, ket dayta ti mangipakita nga ipatpategmo ti relasionmo ken Jehova ken kayatmo nga ited kenkuana ti kasayaatam. Ap-apresiaren ni Jehova ti panagporsegim. Siempre, dina ekspektaren ti ad-adu ngem iti kayam nga ited. (Sal. 103:14; Mik. 6:8) Isu a rasonable koma ti kalatmo, depende iti ipalubos ti kasasaadmo. No addan kalatmo, ania ti mabalinmo nga aramiden tapno maragpatmo dayta? Pagsasaritaantayo ti dadduma a suhestion.

3. Apay a napateg ti determinasion?

³ Dakkel ti maitulong ti determinasion iti panangragpat kadagiti naespirituan a kalat. No determinado ti maysa a tao, napigsa  ti tarigagayna a mangragpat iti kalatna. Ti ngarud determinasion ket kayarigan ti angin a mangiduron iti sailboat wenno bangka nga addaan iti layag tapno makadanon iti destinasionna. No agtultuloy a napigsa ti angin, ti aglaylayag ket posible a makadanon iti destinasionna. Babaen ti napigsa nga angin, baka nasapsapanto pay a makadanon iti papananna. Umasping iti dayta, no nabilbileg ti determinasiontayo, dakdakkel ti posibilidad a maragpattayo dagiti kalattayo. “No determinadoka, lalo a porsegidoka,” imbaga ti brother a ni David a taga-El Salvador. “Dimo ipalubos nga adda aniaman a manglapped kenka a mangragpat iti kalatmo.” Ania ngarud ti mabalinmo nga aramiden tapno nabilbileg ti determinasionmo?

4. Ania ti mabalintayo nga ikararag? (Filipos 2:13) (Kitaen met ti ladawan.)

⁴ Ikararagmo a bumileg ti determinasionmo. Ipaay ni Jehova ti espirituna tapno determinadoka a mangragpat iti kalatmo. (Basaen ti Filipos 2:13.) No dadduma, mangaramidtayo iti kalat ta ammotayo a masapul a dayta ti aramidentayo. Nasayaat met ketdi dayta. Ngem baka saantayo a talaga a determinado a mangragpat iti dayta. Kasta ti kapadasan ti sister a ni Norina a taga-Uganda. Kalatna ti mangyadal iti Biblia, ngem saan a nabileg ti determinasionna. Ngamin, panagriknana, saan a nalaing a mangisuro. Ania ti nakatulong kenkuana? Inyestoriana: “Inaldaw nga inkararagko ken Jehova a papigsaenna ti tarigagayko a mangyadal iti Biblia. Inaramidko dagiti inkararagko, isu nga inasak ti abilidadko a mangisuro. Kalpasan ti sumagmamano a bulan, nadlawko a pimmigsa ti tarigagayko. Iti dayta met la a tawen, nakairugiak iti dua a panangyadal iti Biblia.”

5. Ania ti utobentayo tapno bumileg ti determinasiontayo?

⁵ Utobem dagiti ar-aramiden ni Jehova para kenka. (Sal. 143:5) Inutob ni apostol Pablo ti nagpaiduma a kinaimbag ni Jehova kenkuana. Dayta ti nangpabileg iti determinasionna nga aggaggaget para ken Jehova. (1 Cor. 15:9, 10; 1 Tim. 1:12-14) No ad-adda met nga utobem dagiti ar-aramiden ni Jehova para kenka, mas determinadoka a mangragpat iti kalatmo. (Sal. 116:12) Usigentayo ti nakatulong iti sister a taga-Honduras tapno maragpatna ti kalatna nga agbalin a regular pioneer. Imbagana: “Pinampanunotko nga ay-ayatennak unay ni Jehova. Inyasidegnak iti ilina, ay-aywanan, ken protprotektarannak. Gapu ta dagita ti ut-utobek, umun-uneg ti panagayatko kenkuana ken bumilbileg ti determinasionko.”

6. Ania pay ti makatulong tapno bumileg ti determinasiontayo?

⁶ Agpokuska kadagiti bendision iti panangragpat iti kalatmo. Kitaentayo ti nakatulong iti nadakamaten a ni Erika maipapan iti kalatna nga agbalin a managsapsapa. Imbagana: “Naamirisko idi a nagadu ti pakaikapkapisak gapu ta managladladawak iti ministerio. Ngem no nasapsapaak a sumangpet, makomustak dagiti kakabsat ken makainnestoriak ida. Mangngegko met dagiti praktikal a suhestion a makatulong  tapno ma-enjoy ken mapasayaatko ti ministeriok.” Nagpokus ni Erika kadagiti bendision ti kinamanagsapsapa, ket naragpatna ti kalatna. Ania dagiti bendision a mabalin a pagpokusam? No ti kalatmo ket adda koneksionna iti panagbasa iti Biblia wenno panagkararag, panunotem no kasano a dayta ti mangpasinged iti pannakigayyemmo ken Jehova. (Sal. 145:18, 19) No kalatmo a pasayaaten ti maysa a Nakristianuan a kualidad, panunotem no kasano a makatulong dayta tapno sumayaat ti relasionmo iti sabsabali. (Col. 3:14) Mangaramidka ngarud iti listaan ti amin a rason a kayatmo a ragpaten ti kalatmo. Kanayon a kitaem dayta a listaan. Imbaga ti nadakamaten a ni Tomáš: “No ad-adu ti rason a masapul a ragpatek ti kalatko, lalo a porsegidoak a mangragpat iti dayta.”

7. Ania ti nakatulong ken Julio ken ni baketna a mangragpat iti kalatda?

⁷ Makikaduaka kadagidiay mangparegta kenka. (Prov. 13:20) Kitaentayo ti nakatulong ken Julio ken ni baketna a mangragpat iti kalatda a palawaen ti ministerioda. Imbaga ni Julio: “Ti pinilimi a gagayyem ket dagiti nangsuporta iti kalatmi, isu a maibagami kadakuada ti kalatmi. Adu kadakuada ti nakaragpaten iti kas kadagiti kalatmi, isu a makaitedda kadagiti makatulong a suhestion. Komkomustaen met dagiti gagayyemmi dagiti planomi, ken pinaregtadakami idi kasapulanmi dayta.”

8. Ania ti mapasamak no satay la ragpaten ti maysa a kalat no determinadotayo? (Kitaen met ti ladawan.)

⁸ Ngem gagangay laeng nga adda dagiti aldaw a mariknatayo a saantayo a determinado. Kayat kadi a sawen dayta a saantayon a maragpat ti kalattayo? Saan. Kas panangyilustrar: Ti angin ket napigsa a puersa a mangiduron iti bangka nga addaan iti layag tapno makadanon iti destinasionna. Ngem agduduma ti kapigsa ti angin, ken adda dagiti aldaw a mabalin nga awan ti pul-oy ti angin. Kaipapananna kadi a saanen a makaabante ti aglaylayag? Saan met ketdi. Kas pagarigan, de motor ti dadduma a bangka nga adda layagna; adda met paggaud ti dadduma. Mabalin nga usaren dagita ti aglaylayag tapno makadanon iti destinasionna. Ti determinasiontayo ket mabalin a mayarig iti angin. Mabalin nga agduduma ti kapigsa ti determinasiontayo. Ken adda dagiti aldaw a mariknatayo a saantayo a determinado a mangragpat iti kalattayo. Isu a no ragpatentayo laeng ti kalattayo no mariknatayo a determinadotayo, baka saantay a pulos a maragpat dayta. Ngem kas iti aglaylayag a mangpanunot kadagiti pamay-an tapno makadanon iti destinasionna, mabalintayo latta a ragpaten ti kalattayo uray no saantayo a determinado. Uray no agkasapulan dayta iti disiplina iti bagi, sulit dagiti resultana. Sakbay a pagsasaritaantayo dagiti mabalintayo nga aramiden, sungbatantayo nga umuna ti saludsod a mabalin a tumaud.

9. Masapul kadi nga itultuloytayo a ragpaten ti maysa a kalat uray no saantayo a determinado a mangragpat iti dayta? Ilawlawag.

⁹ Kayat ni Jehova a naragsak ken situtuloktayo nga agserbi kenkuana. (Sal. 100:2; 2 Cor.  9:7) Masapul kadi ngarud nga itultuloytayo a ragpaten ti maysa a naespirituan a kalat uray no saantayo a determinado a mangragpat iti dayta? Kitaentayo ti ulidan ni apostol Pablo. Imbagana: “Siiistrikto a disdisiplinaek ti bagik ken ad-adipenek.” (1 Cor. 9:25-27, study note iti bersikulo 27, nwtsty) Pinilit ni Pablo ti bagina a mangaramid iti umiso uray no nariknana a sabali ti pagannayasanna. Naragsakan kadi ni Jehova iti panagserbi ni Pablo? Wen! Ken ginunggonaan ni Jehova gapu kadagiti panagreggetna.—2 Tim. 4:7, 8.

10. Ania dagiti pagsayaatan ti panangragpat iti kalat uray no saantayo a determinado?

¹⁰ Kasta met, maragsakan ni Jehova no makitana nga ikagkagumaantayo a ragpaten ti kalattayo uray no saantayo a marikna a determinadotayo a mangaramid iti dayta. Naragsak ta ammona nga uray no saantayo a kanayon a magusgustuan nga aramiden ti maysa nga aktibidad, ar-aramidentayo dayta gapu ta ay-ayatentayo isuna. No kasano a binendisionan ni Jehova ni Pablo, bendisionanna met dagiti panagreggettayo. (Sal. 126:5) Ken no mariknatayo ti pamendision ni Jehova, mabalin a mangrugi pay ketdin a mariknatayo nga inspiradotayo. Imbaga ti sister a ni Lucyna a taga-Poland: “No dadduma, diak kayat ti rummuar a mangasaba aglalo no nabambannogak. Ngem no napanak latta nangasaba, nakaragragsakak inton makaawidak.” Pagsasaritaantayo ngarud itan dagiti mabalintayo nga aramiden no saantayo nga inspirado.

11. Kasanonatayo a matulongan ni Jehova tapno ad-adda a makapagteppeltayo?

¹¹ Ikararagmo a makapagteppelka. Ti panagteppel ket abilidad ti maysa a tao a mangkontrol iti rikna ken aramidna. Dayta a sao ket masansan a tumukoy iti pananglapped iti bagitayo a mangaramid iti dakes. Ngem kasapulan met ti panagteppel tapno makaaramidtayo iti naimbag, nangruna no narigat ti maysa a trabaho wenno saantayo a determinado a mangaramid iti dayta. Laglagipem, ti panagteppel ket paset ti bunga ti espiritu. Kiddawem ngarud ken Jehova ti nasantuan nga espirituna tapno ad-adda ken kanayon a makapagteppelka. (Luc. 11:13; Gal. 5:22, 23) Inlawlawag ni David a nadakamaten no kasano a nakatulong kenkuana ti panagkararag. Kayatna a mas regular ti personal a panagadalna. Imbagana: “Inkararagko ken Jehova a tulongannak tapno kanayon a makapagteppelak. Iti tulongna, narugiak ti nasayaat nga eskediul ti panagadal ken kanayon a sursurotekon dayta.”

12. Kasano a makatulong ti prinsipio ti Eclesiastes 11:4 tapno maragpattayo dagiti naespirituan a kalattayo?

¹² Dimo urayen dagiti perpekto a kasasaad. Iti daytoy a lubong, awan a pulos dagiti perpekto a kasasaad ita. No urayentayo dagita, baka ditay pulos maragpat ti kalattayo. (Basaen ti Eclesiastes 11:4.) Imbaga ti brother a ni Dayniel: “Awan dagiti perpekto a kasasaad. Datayo ti mangaramid kadagiti kasayaatan a kasasaad no la ket ta irugitayo dayta.” Dinakamat ti brother a ni Paul a taga-Uganda ti maysa pay a rason a masapul a ditay agitantan: “No mangrugitayo iti laksid dagiti narigat a kasasaad, ik-ikkantayo ni Jehova iti rason tapno bendisionannatayo.”—Mal. 3:10.

13. Ania dagiti pagsayaatan ti panangirugi kadagiti babassit a kalat?

¹³ Mangrugika iti babassit. Mabalin a saantayo a determinado ta kasla narigat a ragpaten ti kalattayo. No kasta ti situasionmo, mabalin kadi a rugiam a ragpaten ti kalatmo iti babassit a pamay-an? No kalatmo a pasayaaten ti maysa a kualidad, rugiam nga ipakita dayta iti babassit a pamay-an. No met kalatmo a basaen ti intero a Biblia, mabalin nga irugim nga iyeskediul iti ab-ababa a tiempo ti panagbasam. Ni Tomáš a nadakamat iti rugi ket marigatan idi a mangragpat iti kalatna a mangbasa iti intero a Biblia iti makatawen. Imbagana: “Naamirisko a sobra gayam ti kaadu ti inyeskediulko a basaek ngem iti kayak. Isu a pinadasko manen. Ngem ita,  inyeskediulko nga agbasaak iti sumagmamano a bersikulo kada aldaw sa utobek dagita. Idi inaramidko dayta, na-enjoy-kon ti agbasa.” Idi mas agen-enjoy-en ni Tomáš’, napapaut metten ti tiempo a panagbasana. Idi agangay, nabasana ti intero a Biblia. c

14. Ania dagiti mabalin a manglapped kadatayo?

¹⁴ Nakalkaldaang ta uray no determinado wenno disiplinadotayo, mabalin nga adda latta dagiti makalapped. Kas pagarigan, mabalin nga agawen dagiti “di ninamnama a pasamak” ti tiempo a kasapulan tapno maragpattayo ti kalattayo. (Ecl. 9:11) Mabalin a maipasangotayo iti pakarigatan a mangupay ken mangpakapuy kadatayo. (Prov. 24:10) Gapu ta imperpektotayo, mabalin nga agkamalitayo isu a marigatantayo a mangragpat iti kalattayo. (Roma 7:23) Wenno baka nabambannogtayo laeng. (Mat. 26:43) Ania ti makatulong tapno mapagballigiantayo ti maysa a lapped wenno di nasayaat a kasasaad?

15. No adda lapped, kaipapananna kadi a saantayon a maragpat ti kalattayo? Ilawlawag. (Salmo 145:14)

¹⁵ Laglagipem a no adda lapped, dina kayat a sawen a saanmon a maragpat ti kalatmo. Ibaga ti Biblia a mabalin a maulit-ulit a mapasarantayo dagiti problema wenno pakarigatan. Ngem nalawag met nga ipakitana a mabalintay manen a ragpaten dagiti kalattayo, nangruna iti tulong ni Jehova. (Basaen ti Salmo 145:14.) Maipapan iti balligi, imbaga ti nadakamaten a brother a ni Philip: “Ti balligik ket saan a nakadepende iti kaadu ti tiempo a saanko a naragpat ti kalatko, no di ket no kasanon kaadu ti tiempo a rinugiak manen a ragpaten ti kalatko.” Imbaga met ti nadakamaten a ni David: “Para kaniak, dagiti lapped ken di nasayaat a kasasaad ket saan a problema no di ket gundaway tapno maipakitak nga ay-ayatek unay ni Jehova.” Wen, no itultuloymo a ragpaten ti kalatmo uray adda lapped, pampaneknekam ken Jehova a kayatmo a paragsaken  isuna. Sigurado a maragragsakan ni Jehova no makitkitana nga itultuloymo nga ikagumaan a ragpaten ti kalatmo!

16. No adda lapped, ania ti masursurotayo?

¹⁶ No adda lapped, panunotem ti masursurom iti dayta. Panunotem ti napasamak, ken isaludsodmo iti bagim, ‘Ania ti mabalinko nga aramiden tapno saanen a maulit dayta?’ (Prov. 27:12) Ngem no dadduma, dagiti lapped ti mabalin a mangipakita a saan a realistiko ti maysa a kalat a kas iti impagaruptayo. No mariknam a mabalin a kasta ti situasionmo, usigem manen ti kalatmo tapno maammuam no rasonable latta dayta para kenka. d Saannaka nga ibilang ni Jehova a palpak no saanmo a naragpat ti kalat a saan a posible a maragpatmo.—2 Cor. 8:12.

17. Apay a masapul a laglagipentayo dagiti nagapuanantayon?

¹⁷ Laglagipem dagiti nagapuanamon. Ibaga ti Biblia a ‘saan a nakillo ti Dios tapno lipatenna ti aramidmo.’ (Heb. 6:10) Kastaka met koma. Panunotem dagiti nagapuanamon—kas iti panagbalinmon a nasinged a gayyem ni Jehova, panangibagamon iti dadduma maipapan kenkuana, wenno panagpabautisarmo. No kasano a rimmang-ayka idi ken naragpatmo dagiti naespirituan a kalatmo, maitultuloymo met ti rumang-ay agingga a maragpatmonto ti agdama a kalatmo.—Fil. 3:16.

18. Ania ti masapul a tantandaanantayo bayat a ragragpatentayo ti kalattayo? (Kitaen met ti ladawan.)

¹⁸ Iti tulong ni Jehova, kayam a ragpaten ti kalatmo, kas iti aglaylayag a naragsak a makadanon iti destinasionna. Ngem laglagipem, agen-enjoy met ti adu nga aglaylayag iti panagbiaheda. Iti umasping a pamay-an, kanayon nga ikagumaam a kitaen no kasano a tultulongannaka ni Jehova. Dayta ti makatulong tapno naragsakka bayat a ragragpatem dagiti kalatmo. (2 Cor. 4:7) No saanka a sumuko, ad-adunto pay a bendision ti maawatmo.—Gal. 6:9.