1-2. Ania ti mabalin a mapanunottayo maipapan kadagiti kararagtayo?

 NAPAMPANUNOTMO kadin no talaga met laeng a sungsungbatan ni Jehova dagiti kararagmo? No wen, saan la a sika ti kasta. Naisaludsod daytan ti adu a kakabsat, aglalo no mapaspasaranda ti narigat a situasion. No agsagsagabatayo, mabalin a mas marigatantayo met a mangilasin no kasano a sungsungbatan ni Jehova dagiti kararagtayo.

² Repasuentayo no apay a makapagtalektayo a sungsungbatan ni Jehova dagiti kararag dagiti agdaydayaw kenkuana. (1 Juan 5:15) Sungbatantayo met dagitoy a saludsod: Apay nga adda dagiti tiempo a kasla saan a sungsungbatan ni Jehova dagiti kararagtayo? Kadagiti ania a pamay-an a sungsungbatan ni Jehova dagiti kararagtayo ita?

3. Apay a kayat ni Jehova nga agkararagtayo kenkuana?

³ Ipaspasigurado ti Biblia nga ay-ayatennatayo unay ni Jehova ken napategtayo kenkuana. (Hag. 2:7; 1 Juan 4:10) Dayta ti rason nga aw-awisennatayo nga agpatulong kenkuana babaen ti kararag. (1 Ped. 5:6, 7) Kayatnatayo a tulongan nga agtalinaed a nasinged kenkuana ken kayatna a mapagballigiantayo dagiti problematayo.

4. Kasanotayo nga ammo a sungsungbatan ni Jehova dagiti kararag dagiti agdaydayaw kenkuana? (Kitaen met ti ladawan.)

⁴ Iti Biblia, masansan nga adda mabasatayo a sinungbatan ni Jehova dagiti kararag dagiti agdaydayaw kenkuana. Adda kadi mapanunotmo a pagarigan? Ni ngay Ari David? Iti intero a panagbiagna, naipasango iti adu a naranggas a kabusor, ken masansan a nagpatulong ken Jehova iti kararag. Naminsan,  impakaasina: “O Jehova, denggem ti kararagko; imdengam ti panagpakaasik iti tulongmo. Sungbatannak gapu iti kinamatalek ken kinalintegmo.” (Sal. 143:1) Sinungbatan ni Jehova dagiti kararag ni David a maisalakan isuna. (1 Sam. 19:10, 18-20; 2 Sam. 5:17-25) Sikokompiansa a naibaga ni David: “Asideg ni Jehova iti amin nga umaw-awag kenkuana.” Makapagtalektayo met iti dayta.—Sal. 145:18.

5. Kanayon kadi a sinungbatan ni Jehova dagiti kararag dagiti agdaydayaw kenkuana idi un-unana iti pamay-an nga ekspektarenda? Mangted iti pagarigan. (Kitaen met ti ladawan.)

⁵ Mabalin a saan a sungbatan ni Jehova dagiti kararagtayo iti pamay-an nga ekspektarentayo. Kasta ti napasamak ken apostol Pablo. Kiniddawna iti Dios a maikkat ti maysa a “siit ti lasag.” Namitlo nga espesipiko nga inkararagna dayta a narigat a problema. Sinungbatan kadi ni Jehova dagita a kararag? Wen, ngem saan nga iti pamay-an a ninamnama ni Pablo. Imbes nga ikkaten ni Jehova ti problema, inikkanna iti bileg a kasapulanna tapno maitultuloyna ti matalek a panagserbina Kenkuana.—2 Cor. 12:7-10.

6. No dadduma, apay a kasla saan a sungsungbatan ni Jehova dagiti kararagtayo?

⁶ No dadduma, mabalin a masungbatan dagiti kararagtayo iti pamay-an a naiduma iti ekspektarentayo. Masiguradotayo nga ammo ni Jehova ti eksakto a kasayaatan a pamay-an tapno matulongannatayo. Kabaelanna pay ketdi ti “mangaramid iti ad-adu pay ngem iti aglaplapusanan unay, nga agsobsobra pay iti amin a banag a kiddawen wenno mapanunottayo.” (Efe. 3:20) Dayta ti rason a sungbatanna dagiti kararagtayo iti tiempo wenno iti pamay-an a saantayo nga ekspektaren.

7. Apay a mabalin a masapul a baliwantayo ti ikarkararagtayo? Mangted iti pagarigan.

⁷ Mabalin a masapul a baliwantayo ti ikarkararagtayo bayat a lumawlawag ti pannakaawattayo iti pagayatan ni Jehova. Usigentayo ti kapadasan ni Brother Martin Poetzinger. Naibalud iti kampo konsentrasion dagiti Nazi di nagbayag kalpasan a nagkasar. Idi damo, inkararagna ken Jehova a mawayawayaan iti kampo konsentrasion tapno maipaayna dagiti kasapulan ni baketna ken maitultuloyna ti trabaho a panangasaba. Ngem kalpasan ti dua a lawas, awan ti nakitana a pagilasinan a patgan dayta ni Jehova. Isu nga inkararagna: “Apo Jehova, pangngaasim ta ipakitam kaniak ti kayatmo nga aramidek.” Kalpasanna, pinanunotna ti mapaspasaran ti dadduma a kakabsat a lallaki iti kampo. Adu kadakuada ti madandanagan unay iti asawa ken annakda. Isu nga inkararag ni Brother Poetzinger: “Apo Jehova, pagyamanan  iti baro nga asaynmentko. Tulongannak a mangpabileg ken mangparegta kadagiti kakabsat.” Kasta ti eksakto nga inaramidna iti siam a tawen a kaaddana kadagiti kampo!

8. Ania ti napateg a banag a masapul a laglagipentayo no agkarkararagtayo?

⁸ Masapul a laglagipentayo nga adda panggep ni Jehova, ket tungpalennanto dayta iti tiempo nga inkeddengna. Karaman iti dayta a panggep ti naan-anay ken permanente a panangikkatna iti amin a problema a pakaigapuan ti nakaro a panagsagabatayo ita—kas kadagiti natural a didigra, sakit, ken ipapatay. Usarento ni Jehova ti Pagarianna a mangitungpal iti panggepna. (Dan. 2:44; Apoc. 21:3, 4) Ngem bayat a saan pay a napasamak dayta, ipalpalubos pay la ni Jehova nga iturayan ni Satanas ti lubong. b (Juan 12:31; Apoc. 12:9) No ngamin solbaren itan ni Jehova dagiti problema ti tattao, agparang no kuan a nasayaat ti panangituray ni Satanas. Isu nga uray no masapul nga urayentayo a tungpalen ni Jehova dagiti karina, dina kayat a sawen a baybay-annatayon. Usigentayo ti dadduma a pamay-an a tultulongannatayo ni Jehova.

9. Kasanonatayo a tultulongan ni Jehova no masapul nga agdesisiontayo? Iyilustrar.

⁹ Ipapaayannatayo iti sirib. Ikarkari ni Jehova nga ipaayannatayo iti sirib no kasapulantayo ti mangaramid kadagiti nasayaat a desision. Nangnangruna a kasapulantayo ti sirib ti Dios no mangaramidtayo kadagiti desision a mangapektar iti intero a panagbiagtayo, kas no agtalinaedtayo a single wenno makiasawatayo. (Sant. 1:5) Kitaentayo ti kapadasan ti balasang a ni Maria. c Naragsak nga agserserbi kas regular pioneer idi naam-ammona ti maysa a brother. Imbagana: “Bayat a sumingsinged ti panaggayyemmi, matmatnag met idin ti riknami iti maysa ken maysa. Ammok a masapul nga agdesisionak. Namin-adu ken sipapasnek nga inkararagko dayta. Kasapulak ti panangiwanwan ni Jehova, ngem ammok met a saan a ni Jehova ti agdesision para kaniak.” Nariknana a sinungbatan ni Jehova dagiti kararagna a panagkiddawna iti sirib. Kasano? Bayat nga agres-research kadagiti publikasiontayo, nakakita kadagiti espesipiko nga artikulo a nangsungbat kadagiti saludsodna. Impapusona met ti nainsiriban a balakad ti matalek a nanangna. Dayta a balakad ti nakatulong ken Maria a mangammo no ania a talaga ti marikriknana, isu a nakaaramid iti nainsiriban a desision.

10. Sigun iti Filipos 4:13, ania ti aramiden ni Jehova tapno tulonganna dagiti agdaydayaw kenkuana? Mangted iti pagarigan. (Kitaen met ti ladawan.)

¹⁰ Ipapaayannatayo iti bileg nga agibtur. Kas iti inaramid ni Jehova ken apostol Pablo, ipaayannatayo met iti bileg a kasapulantayo tapno maibturantayo dagiti suot. (Basaen ti Filipos  4:13.) Usigentayo no kasano a tinulongan ni Jehova ti brother a ni Benjamin tapno maibturanna dagiti narigat a kasasaad. Bayat ti kinaagtutubona, nagyanda a sangapamiliaan kadagiti refugee camp iti Africa. Imbaga ni Benjamin: “Kanayon a nagkararagak ken Jehova. Kidkiddawek a pabilgennak tapno maaramidko dagiti banag a mangparagsak kenkuana. Sinungbatan ni Jehova dagiti kararagko. Impaayannak iti talna ti panunot, tured tapno agtultuloyak a mangasaba, ken kadagiti publikasion tapno agtalinaedak a nasinged kenkuana.” Innayonna: “Basbasaek dagiti kapadasan dagiti kapammatiak isu a naammuak no kasano a tinulongan ida ni Jehova nga agibtur. Dayta ti nangpabileg iti determinasionko nga agtalinaed a matalek.”

11-12. Kasano a mabalin nga usaren ni Jehova ti naespirituan a pamiliatayo a mangsungbat kadagiti kararagtayo? (Kitaen met ti ladawan.)

¹¹ Us-usarenna ti naespirituan a pamiliatayo. Iti rabii sakbay nga insakripisio ni Jesus ti biagna, sipapasnek a nagkararag. Impakaasina ken Jehova a maliklikanna ti maibabain a resulta ti pannakaibilangna kas managtabbaaw wenno agsasao maibusor iti Dios. Imbes a patgan dayta ni Jehova, nangibaon iti maysa kadagiti anghel a kabsat ni Jesus tapno mangpabileg kenkuana. (Luc. 22:42, 43) Mabalin met nga usaren ni Jehova dagiti kakabsat tapno tulongannatayo. Mabalin a tawagan wenno bisitaendatayo tapno pabilgendatayo. Makapanunottayo amin kadagiti gundaway tapno makaipaaytayo “iti naimbag a sao” kadagiti kapammatiantayo.—Prov. 12:25.

¹² Kitaentayo ti kapadasan ti sister a ni Miriam. Sumagmamano a lawas kalpasan a natay ni lakayna, maymaysanan idiay balayna, isu a madepdepres ken nariknana a kakaasi isuna. Sangit a sangit ken kayatna nga adda koma ti makasaritana. Imbagana: “Awan ti pigsak a tumawag iti asinoman, isu a nagkararagak ken Jehova. Bayat nga agsangsangit ken agkarkararagak, timmawag ti maysa a panglakayen a nasinged a gayyemmi.” Dayta a panglakayen ken ni baketna ti nangliwliwa ken Miriam. Kombinsido ni Miriam a ni Jehova ti nangtignay iti dayta a kabsat tapno tumawag.

13. Mangted iti pagarigan no kasano a mabalin nga usaren ni Jehova dagiti saan nga agdaydayaw kenkuana tapno masungbatan dagiti kararagtayo.

¹³ Mabalin nga usaren ni Jehova dagiti saan nga agdaydayaw kenkuana. (Prov. 21:1) No  dadduma, us-usaren ni Jehova dagiti saan nga agdaydayaw kenkuana tapno tumulong kadagiti adipenna kas sungbat dagiti kararagda. Kas pagarigan, tinignayna ni Ari Artaxerxes a mangaprobar iti kiddaw ni Nehemias nga agsubli idiay Jerusalem tapno tumulong a mangibangon manen iti siudad. (Neh. 2:3-6) Ita, mabalin met a tignayen ni Jehova uray dagiti saan nga agdaydayaw kenkuana a tumulong kadatayo no kasapulan.

14. Ania ti maapresiarmo iti kapadasan ni Soo Hing? (Kitaen met ti ladawan.)

¹⁴ Narikna ti sister a ni Soo Hing nga inusar ni Jehova ti doktorda a tumulong kadakuada. Adda sumagmamano a sakit ti isip ti anakda. Kalpasan ti nakaro a pannakaaksidentena, nag-resign da Soo Hing ken ni lakayna iti trabahoda tapno maaywananda. Gapu iti dayta, nagproblemada iti pinansial. Imbaga ni Soo Hing a panagriknana, isu ket kas iti lastiko a nabennat a dandanin mapugsat. Imbukbokna ti linaon ti pusona ken Jehova ken nagpatulong. Nangaramid ti doktorda iti pamuspusan tapno matulonganna ida. Gapu iti dayta, inikkan ida ti gobierno iti tulong ken pagyanan a kayada nga abangan. Kalpasanna, imbaga ni Soo Hing: “Nakitami ti ima ni Jehova iti biagmi. Talaga nga isu ti ‘Managdengngeg iti kararag.’”—Sal. 65:2.

15. Ania ti nakatulong iti maysa a sister tapno maamirisna a sungsungbatan gayamen ni Jehova dagiti kararagna?

¹⁵ Saan a kanayon a masungbatan dagiti kararagtayo iti nakaskasdaaw a pamay-an. Ngem dagiti sungbat a maawattayo ket ti eksakto a kasapulantayo tapno agtalinaedtayo a matalek iti nailangitan nga Amatayo. Isu a kanayon nga alertoka koma a mangsiput no kasano a sungsungbatan ni Jehova dagiti kararagmo. Narikna idi ti sister a ni Yoko a saan a sungsungbatan ni Jehova dagiti kararagna. Ngem idi agangay, inlistana dagiti kidkiddawenna ken Jehova. Kalpasan ti sumagmamano a tiempo, kinitana manen dagiti inlistana iti notebook-na. Nabigbigna a sinungbatan gayamen ni Jehova ti kaaduan a kararagna, uray ti dadduma a nalipatanna payen. Masapul met ngarud a sagpaminsan nga isardengtayo ti ar-aramidentayo ket panunotentayo no kasano a sungsungbatan ni Jehova dagiti kararagtayo.—Sal. 66:19, 20.

16. Kasanotayo a maipakita ti pammati kadagiti kararagtayo? (Hebreo 11:6)

¹⁶ Malaksid iti panagkararag ken Jehova, maipakitatayo met ti pammatitayo no akseptarentayo ti aniaman a sungbatna kadagiti kararagtayo. (Basaen ti Hebreo 11:6.) Kitaentayo ti  kapadasan da Mike ken ti asawana a ni Chrissy. Kalatda ti agserbi iti Bethel. “Adu a tawen a nagaplaykami ken kanayon nga inkararagmi dayta ken Jehova,” imbaga ni Mike, “ngem saankami a pulos a naawis.” Nagtalek latta da Mike ken Chrissy nga ammo ni Jehova ti kasayaatan a pangusaranna kadakuada. Inaramidda ti amin a kabaelanda, ken nagtultuloyda a nagserbi kas regular pioneer kadagiti lugar nga addaan iti dakdakkel a panagkasapulan. Nagboluntarioda met kadagiti proyekto ti organisasion a panagibangon. Ita, agserserbin ni Mike a manangaywan iti sirkito a kadua ni baketna. “Saan a kanayon a sungsungbatan ni Jehova dagiti kararagmi iti pamay-an nga ekspektarenmi,” imbaga ni Mike, “ngem sinungbatanna dagita kadagiti pamay-an a nasaysayaat nga amang ngem iti ninamnamami.”

17-18. Sigun iti Salmo 86:6, 7, ania ti masiguradotayo?

¹⁷ Basaen ti Salmo 86:6, 7. Sigurado idi ni salmista David a nangngeg ken sinungbatan ni Jehova dagiti kararagna. Masiguradom met dayta. Dagiti kapadasan iti daytoy nga artikulo impanamnamada kadatayo a maipaayannatayo ni Jehova iti sirib ken bileg a kasapulantayo nga agibtur. Mabalinna nga usaren ti naespirituan a pamiliatayo wenno uray dagiti saan nga agdaydayaw kenkuana ita tapno tulongandatayo.

¹⁸ Uray no mabalin a saan a kanayon a sungbatan ni Jehova dagiti kararagtayo iti pamay-an nga ekspektarentayo, ammotayo a sungbatannanto dagita. Ipaayna ti talaga a kasapulantayo ken iti eksakto a tiempo a kasapulantayo dayta. Itultuloymo ngarud ti agkararag nga addaan pammati, ken agtalekka nga aywanannaka ni Jehova ita ken ‘pennekennanto ti tarigagay ti tunggal sibibiag a banag’ iti asidegen a baro a lubong.—Sal. 145:16.