1. Ania ti iyaw-awis ni Jehova nga aramiden dagiti agdaydayaw kenkuana? (Kitaen met ti ladawan.)

 ASINO ti mabalintayo nga asitgan no kasapulantayo ti liwliwa ken panangiwanwan? Ammotayo ti sungbat iti dayta a saludsod. Mabalintayo ti agkararag ken Jehova a Dios. Aw-awisennatayo ni Jehova a mangaramid iti dayta. Ibagbaga kadatayo ti Biblia nga ‘itultuloytayo ti agkararag,’ isu nga ammotayo a kayatna a masansan nga agkararagtayo kenkuana. (1 Tes. 5:17) Siwayawayatayo a makapagkararag kenkuana ken agpaiwanwan iti amin nga aspeto ti biagtayo. (Prov. 3:5, 6) Nakaparparabur a Dios ni Jehova, isu a makapagkararagtayo kenkuana uray mamin-ano a daras.

2. Ania ti usigentayo iti daytoy nga artikulo?

² Ipatpategtayo ti regalo a panagkararag. Ngem gapu ta nakaad-adu ti ar-aramidentayo, baka marigatantayo a mangiwaya iti tiempo nga agkararag. Mabalin a mariknatayo met a kasapulan a pasayaatentayo ti kalidad dagiti kararagtayo. Imbag laengen ta iti Biblia, makakitatayo iti adu a pammaregta ken panangiwanwan. Iti daytoy nga artikulo, usigentayo no kasano a matuladtayo ti ulidan ni Jesus iti panangiwayana iti tiempo nga agkararag. Usigentayo met no kasano a mapasayaattayo ti kalidad dagiti kararagtayo babaen ti panangiraman iti lima a napateg a banag.

3. Ania ti naamiris ni Jesus maipapan iti kararag?

³ Naamiris ni Jesus nga ipatpateg ni Jehova dagiti kararag. Mabayag pay sakbay nga immay ditoy daga, nakitana a sinungbatan ni Amana dagiti kararag dagiti matalek a lallaki ken babbai. Kas pagarigan, adda ni Jesus iti abay ni Amana idi sinungbatanna dagiti napasnek a kararag da Hanna, David, Elias, ken dadduma pay. (1 Sam. 1:10, 11, 20; 1 Ar. 19:4-6; Sal.  32:5) Isu met la gayam nga insuro ni Jesus kadagiti adalanna a kanayon nga agkararagda ken agtalekda a denggen ida ni Amana!—Mat. 7:7-11.

4. Ania ti masursurotayo kadagiti kararag ni Jesus?

⁴ Dagiti mismo a kararag ni Jesus ken Jehova ket pagtuladan dagiti adalanna. Iti intero a ministerio ni Jesus, masansan a nagkararag. Masapul idi a mangiwaya iti tiempo nga agkararag ta masansan a nagadu ti ar-aramidenna ken adu a tattao ti umay kenkuana. (Mar. 6:31, 45, 46) Nasapa idi a bumangon iti bigat tapno agkararag nga is-isuna. (Mar. 1:35) Naminsan, nagpatpatnag a nagkararag sakbay a nangaramid iti napateg a desision. (Luc. 6:12, 13) Ken iti rabii sakbay a natay ni Jesus, namin-adu a nagkararag tapno maisentrona ti panunotna iti panangitungpalna iti karirigatan a paset ti nakaibaonanna ditoy daga.—Mat. 26:39, 42, 44.

5. Kasanotayo a matulad ni Jesus no agkararagtayo?

⁵ Isuro kadatayo ti ulidan ni Jesus nga uray no kasano kaadu ti ar-aramidentayo, masapul a mangiwayatayo iti tiempo nga agkararag. Kas ken Jesus, baka kasapulan a mangyeskediultayo iti oras nga agkararag—nasapatayo a bumangon iti bigat wenno mangiwayatayo iti tiempo iti rabii sakbay a maturogtayo. No aramidentayo dayta, ipakpakitatayo ken Jehova nga ap-apresiarentayo daytoy a naisangsangayan a sagut. Malagip ti sister a ni Lynne a kasta unay ti yamanna idi damo a naammuanna ti pribilehio nga agkararag. Kunana: “Idi naammuak a mabalinak a makisarita ken Jehova iti aniaman nga oras, imbilangko isunan kas nasinged a Gayyemko, isu a kayatko a pasayaaten dagiti kararagko.” Sigurado a kasta met ti marikrikna ti adu kadatayo. Usigentayo itan ti lima a napateg a banag a mabalin nga iramantayo kadagiti kararagtayo.

6. Sigun iti Apocalipsis 4:10, 11, maikari ni Jehova nga umawat kadagiti ania?

⁶ Idaydayawmo ni Jehova. Iti nakaskasdaaw a sirmata, nakita ni apostol Juan ti 24 a panglakayen idiay langit nga agdaydayaw ken Jehova. Idaydayawda ti Dios ken bigbigenda a maikari isuna nga umawat iti “dayag ken dayaw ken pannakabalin.” (Basaen ti Apocalipsis 4:10, 11.) Adu met ti rason dagiti matalek nga anghel a mangidaydayaw  ken Jehova. Addada idiay langit a kaduana ken am-ammoda unay isuna. Makitkitada kadagiti ar-aramidenna dagiti kualidadna. Bayat a makitkitada no kasano nga agtigtignay ni Jehova, matignayda a mangidaydayaw kenkuana.—Job 38:4-7.

7. Ania dagiti rason nga idaydayawtayo ni Jehova?

⁷ Kadagiti kararagtayo, kayattayo met nga iraman ti panangidaydayaw ken Jehova. Ibagatayo kenkuana dagiti ipatpateg ken ap-apresiarentayo maipapan kenkuana. Bayat a basbasaem ken ad-adalem ti Biblia, ikagumaam a kitaen dagiti magustuam unay a kualidad nga ipakpakita ni Jehova. (Job 37:23; Roma 11:33) Kalpasanna, ibagam ken Jehova no kasano ti panagriknam kadagita a kualidadna. Mabalintayo met nga idaydayaw ni Jehova gapu ta tultulongannatayo ken ti intero a naespirituan a pamiliatayo. Kanayon nga ay-aywanan ken protprotektarannatayo.—1 Sam. 1:27; 2:1, 2.

8. Ania ti dadduma a rason nga agyamantayo ken Jehova? (1 Tesalonica 5:18)

⁸ Agyamanka ken Jehova. Adu ti rason nga agyamantayo ken Jehova iti kararag. (Basaen ti 1 Tesalonica 5:18.) Agyamantayo kenkuana iti aniaman a nasayaat a banag nga adda kadatayo. Ngamin, naggapu kenkuana ti amin a nasayaat a sagut. (Sant. 1:17) Kas pagarigan, mabalintayo nga ibaga nga ap-apresiarentayo ti kinapintas ti daga ken dagiti nakaskasdaaw a parsuana. Mabalintayo met nga ibaga nga agyamyamantayo gapu iti impaayna a biag, pamilia, gagayyem, ken namnamatayo. Ken agyamantayo ken Jehova ta impalubosna nga agbalintayo a nasinged a gagayyemna.

9. Apay a masapul nga itultuloytayo a kultibaren ti panangapresiar ken Jehova?

⁹ Mabalin a masapul nga ikagumaantayo a panunoten dagiti rason nga agyamantayo ken Jehova. Agbibiagtayo iti saan a managyaman a lubong. Masansan a ti laeng pampanunoten dagiti tattao ket no kasanoda a maala ti kayatda imbes nga apresiarenda ti addan kadakuada. No maaringantayo iti dayta a kababalinda, puro dawat no kuan ti linaon dagiti kararagtayo. Tapno maliklikantayo dayta, masapul nga itultuloytayo a kultibaren ken iyebkas ti apresasiontayo iti amin nga ar-aramiden ni Jehova para kadatayo.—Luc. 6:45.

10. Kasano a nakatulong iti maysa a sister ti kinamanagyaman tapno makapagibtur? (Kitaen met ti ladawan.)

¹⁰ Makatulong kadatayo ti kinamanagyaman tapno maibturantayo dagiti pakarigatan. Kitaentayo ti kapadasan ni Kyung-sook a mabasa iti Enero 15, 2015 a ruar Ti Pagwanawanan. Nadayagnos nga adda nakaro a kanserna iti bara. “Grabe ti epekto kaniak ti sakitko ta nariknak a kasla napukawkon ti amin ken madandanaganak unay,” inaminna. Ania ti nakatulong kenkuana nga agibtur? Imbagana a tunggal rabii sakbay a maturog, mapan iti rooftop ti balayna ket ikararagna iti  napigsa ti lima a banag a pagyamyamananna iti dayta nga aldaw. Gapu iti dayta, lumag-an ti riknana ket matignay a mangyebkas iti ayatna ken Jehova. Nariknana a tartarabayen ni Jehova dagiti matalek nga adipenna no adda dagiti suot a mapaspasaranda ken nabigbigna nga ad-adu nga amang dagiti bendisiontayo ngem kadagiti suot. Kas ken Kyung-sook, adu ti rason nga agyamantayo ken Jehova, uray no maipaspasangotayo iti suot. Ti panangyebkastayo iti panagyaman kenkuana iti kararag ti makatulong kadatayo nga agibtur ken agtalinaed a naragsak.

11. Apay a kasapulan dagiti adalan ni Jesus ti tured kalpasan a nagsubli ni Jesus idiay langit?

¹¹ Kiddawem ken Jehova a paturedennaka iti ministerio. Sakbay unay a nagsubli ni Jesus idiay langit, impalagipna kadagiti adalanna ti aramidenda a mangsaksi kenkuana “idiay Jerusalem, iti intero a Judea ken Samaria, ken agingga iti kaadaywan a paset ti daga.” (Ara. 1:8; Luc. 24:46-48) Di nagbayag, dagiti Judio a lider tiniliwda da apostol Pedro ken Juan ken impanda ida iti Sanhedrin. Binilinda dagitoy a matalek a lallaki nga isardengda ti mangasaba ken pinangtaanda pay ketdi ida. (Ara. 4:18, 21) Ania ti reaksion da Pedro ken Juan?

12. Sigun iti Aramid 4:29, 31, ania idi ti inaramid dagiti adalan?

¹² Kas sungbat kadagiti pangta dagiti Judio a lider ti relihion, imbaga da Pedro ken Juan: “No ipagarupyo a nalinteg iti imatang ti Dios nga agtulnogkami kadakayo imbes nga iti Dios, dakayo ti agdesision. Ngem no dakami, saan a mabalin nga isardengmi nga ibaga ti bambanag a nakita ken nangngegmi.” (Ara. 4:19, 20) Idi nawayawayaanen da Pedro ken Juan, dagiti adalan nagkararagda iti napigsa ken Jehova maipapan iti panangaramidda iti pagayatanna. Inkararagda: “Paturedem dagiti adipenmo tapno maitultuloyda nga ibaga ti saom.” Sinungbatan ni Jehova dayta a napasnek a kararag.—Basaen ti Aramid 4:29, 31.

13. Ania ti masursurotayo iti ulidan ni Jin-hyuk?

¹³ Matuladtayo dagiti adalan no itultuloytayo ti mangasaba uray no paritandatayo dagiti autoridad. Kitaentayo ti ulidan ti brother a ni Jin-hyuk a naibalud gapu iti neutralidadna. Iti pagbaludan, naibaon nga asikasuenna ti dadduma a balud a nakabartolina. Ngem naparitan a makisarita maipapan kadagiti awan koneksionna iti asaynmentna, ken uray maipapan iti Biblia. Isu nga inkararagna nga agbalin a natured ken nataktika a mangasaba iti tunggal gundaway. (Ara. 5:29) Imbagana: “Sinungbatan ni Jehova dagiti kararagko isu a nagbalinak a natured ken masirib tapno makairugiak iti adu a saglilima a minuto a panangyadal iti Biblia iti mismo a ridaw dagiti selda. Iti rabii, agaramidak kadagiti surat nga itedko kadagiti balud kabigatanna.” Makapagtalektayo met a tulongannatayo ni Jehova a mangitungpal iti ministeriotayo. Kas ken Jin-hyuk, mabalintayo nga ikararag nga agbalintayo a natured ken masirib.

14. Ania ti makatulong kadatayo no adda dagiti problematayo? (Salmo 37:3, 5)

¹⁴ Kiddawem ken Jehova a tulongannaka a mangibtur kadagiti problemam. Adu kadatayo ti makapaspasar kadagiti pisikal wenno emosional a problema. Adda met dagiti natayan iti ipatpateg iti biag, narigat ti situasion ti pamiliada, maidaddadanes, wenno dadduma pay. Rimmigat pay ketdi nga ibturan dagita gapu kadagiti problema a kas iti pandemia ken gubat. Ibukbokmo ken Jehova ti amin a linaon ti pusom. Ibagam kenkuana ti  situasionmo a kas iti panangibagam iti nasinged a gayyem. Agtalekka a “tulongannakanto” ni Jehova.—Basaen ti Salmo 37:3, 5.

15. Kasanonatayo a matulongan ti kararag nga ‘agibtur iti rigat’? Mangted iti pagarigan.

¹⁵ Ti agtultuloy a panagkararag ti tumulong kadatayo nga ‘agibtur iti rigat.’ (Roma 12:12) Ammo ni Jehova ti ib-ibturan dagiti agdaydayaw kenkuana—“dengdenggenna ti panagpatulongda.” (Sal. 145:18, 19) Napaneknekan dayta ti 29 ti tawenna a payunir a ni Kristie. Bigla a naaddaan kadagiti grabe a sakit isu a nadepres unay. Idi agangay, naammuanna a nadayagnos ni nanangna iti sakit a mabalin a pakatayanna. Imbaga ni Kristie: “Inkararagko a sipapasnek ken Jehova nga inaldaw a pabilgennak. Inkagumaak a suroten ti nasayaat a naespirituan a rutinak babaen ti pannakigimong ken personal a panagadal.” Innayonna: “Ti panagkararag ti nakatulong kaniak bayat dagiti narigat a kanito iti biagko. Ammok a kanayon a nakasagana ni Jehova a tumulong, ken ti panangpanunotko iti dayta ti talaga a nangliwliwa kaniak. Uray no saan a dagus nga immimbag dagiti sakitko, sinungbatan ni Jehova dagiti kararagko ta inikkannak iti natalna a panunot ken kalmado a puso.” Kanayontayo koma a laglagipen nga “ammo ni Jehova no kasano nga isalakan iti pannubok dagiti tattao a mangipakpakita iti debosion kenkuana.”—2 Ped. 2:9.

16. Apay a kasapulantayo ti tulong ni Jehova tapno malabanantayo ti sulisog?

¹⁶ Agpatulongka ken Jehova tapno malabanam ti sulisog. Kas imperpekto, masapul a kanayon a labanantayo ti pannakasulisog nga agaramid iti dakes. Ar-aramiden ni Satanas ti amin a kabaelanna tapno lalo pay a marigatantayo a mangaramid iti dayta. Ti maysa a pamay-anna ket sabidonganna ti isiptayo babaen kadagiti dakes a paglinglingayan. Dagita ti mangpunno iti isiptayo iti narugit a panagpampanunot. Kas resultana, agbalintayo a narugit iti imatang ni Jehova ken posible a  makaaramidtayo iti nadagsen a basol.—Mar. 7:21-23; Sant. 1:14, 15.

17. Kalpasan a nagkararagtayo, ania ti masapul nga aramidentayo tapno maliklikantayo ti sulisog? (Kitaen met ti ladawan.)

¹⁷ Kasapulantayo ti tulong ni Jehova tapno malabanantayo ti sulisog nga agaramid iti dakes. Inraman ni Jesus daytoy a kiddaw iti pagtuladan a kararag: “Dinakami iyeg iti sulisog, ken isalakannakami iti daydiay managdakdakes.” (Mat. 6:13) Kayatnatayo a tulongan ni Jehova. Ngem masapul nga agpatulongtayo kenkuana. Masapul met nga aramidentayo dagiti inkararagtayo. Adda dagiti praktikal a pamay-an tapno maliklikantayo dagiti dakes a panagpampanunot ken ideya ti kaaduan a tattao iti sistema ni Satanas. (Sal. 97:10) Punnuentayo ti isiptayo kadagiti nasayaat a banag. Kasano? Basaen ken adalentayo ti Biblia. Maprotektarantayo met ti isiptayo no umatendertayo kadagiti gimong ken makiramantayo iti ministerio. No aramidentayo dagita, pumudno kadatayo ti kari ni Jehova a saannatayo nga ipalubos a masulisog iti ditay kabaelan nga ibturan.—1 Cor. 10:12, 13.

18. No maipapan iti panagkararag, ania ti masapul nga aramidentayo amin?

¹⁸ Masapul nga ad-adda pay nga agkararag ti tunggal maysa kadatayo tapno agtalinaedtayo a matalek ken Jehova bayat dagitoy narigat a maudi nga al-aldaw. Kada aldaw, mangiwayaka iti tiempo nga agkararag a naimpusuan. Kayat ni Jehova nga agkararagtayo tapno ‘iyebkastayo kenkuana dagiti linaon ti pusotayo.’ (Sal. 62:8) Idaydayawmo ni Jehova ken agyamanka gapu iti amin nga ar-aramidenna. Kiddawem a paturedennaka iti ministerio. Ipakaasim a tulongannaka a mangibtur iti aniaman a problema ken manglaban iti aniaman a sulisog a mabalin a pakaipasanguam. Dimo ipalubos nga adda aniaman wenno asinoman a mangpasardeng kenka a regular nga agkararag ken Jehova. Ngem kasano a sungsungbatan ni Jehova dagiti kararagtayo? Masungbatan dayta a napateg a saludsod iti sumaruno nga artikulo.