1. Apay a masiguradotayo nga adda bileg ti Sao ti Dios? (Kitaen ti ladawan iti rugi ti artikulo.)

KAS ili ti Dios, masiguradotayo a ti Sao ti Dios, wenno ti mensahena kadatayo, ket “nabiag ken adda bilegna.” (Heb. 4:12) Adu kadatayo ti makapaneknek a kabaelan ti Biblia a balbaliwan ti biag. Dadduma kadagiti kakabsattayo ti dati a mannanakaw, adikto iti droga, wenno immoral ti panagbiagda. Adda met dagiti naballigi ti panagbiagda iti daytoy a sistema ti bambanag ngem saanda a naragsak. (Ecl. 2:3-11) Dagiti tattao a kasla awanen ti namnamana masansan a masarakanda ti dalan nga agturong iti biag babaen ti tulong ti Biblia. Mabalin nga adun ti nabasam ken nagustuam a kapadasan a naipablaak iti serye Ti Pagwanawanan a “Ti Biblia Balbaliwanna ti Biag.” Ken nakitam a rumangrang-ay latta iti naespirituan dagiti Kristiano babaen ti tulong ti Kasuratan uray no naammuandan ti kinapudno.

2. Ania ti pammaneknek a nakatulong ti bileg ti Sao ti Dios idi umuna a siglo?

² Masdaawtayo kadi a makaammo nga adu a tattao ita ti dakkel ti nagbalbaliwanna gapu iti panagadalda iti Biblia? Saan a pulos! Dagita a kapadasan ipalagipna kadatayo dagiti kakabsattayo idi umuna a siglo nga addaan iti nailangitan a namnama. (Basaen ti 1 Corinto 6:9-11.) Kalpasan nga inlista ni apostol Pablo dagiti kita ti tattao a saan nga agtawid iti Pagarian ti Dios,  innayonna: “Kasta idi ti sumagmamano kadakayo.” Ngem nakapagbalbaliwda gapu iti tulong ti Kasuratan ken ti nasantuan nga espiritu ti Dios. Uray idi inawaten ti dadduma ti kinapudno, naipasango latta ti dadduma iti nakaro a problema iti naespirituan. Dakamaten ti Biblia ti maysa a nailaksid a napulotan a Kristiano idi umuna a siglo, sa naisubli idi agangay. (1 Cor. 5:1-5; 2 Cor. 2:5-8) Saan kadi a makaparegta a panunoten a nagadu a problema dagiti kakabsattayo ti napagballigianda gapu iti tulong ti Sao ti Dios?

3. Ania ti adalentayo iti daytoy nga artikulo?

³ Nakabilbileg ti Sao ti Dios ken mabalintayo nga usaren dayta. Sigurado ngarud a kayattayo nga usaren dayta iti kasayaatan a pamay-an. (2 Tim. 2:15) Isu nga iti daytoy nga artikulo, pagsasaritaantayo no kasano nga ad-adda a mausartayo ti bileg ti Sao ti Dios (1) iti biagtayo, (2) iti ministeriotayo, ken (3) iti panagisuro iti plataporma. Makatulong dagitoy a palagip tapno maipakitatayo ti ayat ken panagyamantayo iti naayat a nailangitan nga Amatayo, daydiay mangisursuro kadatayo iti pagsayaatantayo.—Isa. 48:17.

4. (a) Ania ti kasapulan tapno mariknatayo ti epekto ti Sao ti Dios? (b) Ania ti ar-aramidem tapno maiwayaam ti agbasa iti Biblia?

⁴ Tapno mariknatayo ti epekto ti Sao ti Dios, masapul a kanayon a basaentayo dayta—inaldaw no posible. (Jos. 1:8) Siempre, okupado ti kaaduan kadatayo. Nupay kasta, saantayo nga ipalubos nga adda aniaman—uray dagiti responsabilidadtayo—a manglapped iti rutinatayo nga agbasa iti Biblia. (Basaen ti Efeso 5:15, 16.) Nagduduma nga oras ti inyeskediul ti adu nga adipen ni Jehova para iti inaldaw a panagbasada iti Biblia. Adda dagiti agbasa iti agsapa, iti aldaw, wenno iti rabii. Marikriknada ti kas iti narikna ti salmista, a nangisurat: “Anian a panagayatko iti lintegmo! Iti intero nga agmalem isu dayta ti pakaseknak.”—Sal. 119:97.

5, 6. (a) Apay a napateg ti panagutob? (b) Kasano nga agbalin nga epektibo ti panagutobtayo? (c) Ania ti naitulong kenka ti panagbasa iti Biblia ken panangutob iti nabasam?

⁵ Malaksid iti panagbasa iti Biblia, napateg met ti panangutob iti mabasatayo. (Sal. 1:1-3) Iti kasta, mayaplikartayo iti biagtayo ti di agkupas a sirib a nabasatayo. Agbasbasatayo man iti nayimprenta wenno elektroniko a porma ti Sao ti Dios, ipapusotayo koma dagiti basbasaentayo.

⁶ Kasano nga agbalin nga epektibo ti panagutobtayo? Adu ti nakapadas a makatulong ti panagsardeng kalpasan a makabasada iti sumagmamano a bersikulo sa panunotenda dagitoy: ‘Ania ti isuro kaniak daytoy maipapan ken Jehova? Mayap-aplikarko  ngatan iti biagko dagiti prinsipio daytoy basbasaek a paset ti Sao ti Dios? Ania ngata pay dagiti mabalinko a pasayaaten?’ No agkararag ken utobentayo ti Sao ti Dios, ad-adda a matignaytayo a mangsurot a naimbag iti balakadna. No kasta, ad-adda a mariknatayo ti bileg ti Sao ti Dios iti biagtayo.—2 Cor. 10:4, 5.

7. Kasano a mausartayo a naimbag ti Sao ti Dios iti ministerio?

⁷ Ania ti makatulong tapno mausartayo a naimbag ti Sao ti Dios iti ministeriotayo? Umuna, kanayontayo nga usaren dayta no mangasaba ken mangisurotayo. Kuna ti maysa a kabsat, “No kaduam ni Jehova a mangasaba iti binalaybalay, sika kadi lattan ti agsao wenno palubosam met nga agsao?” Kastoy ti puntona: No direkta nga ibasatayo ti Sao ti Dios no mangasabatayo, palpalubosantayo a ni Jehova ti makisarita iti bumalay. Adayo a nabilbileg ti napili a naimbag a teksto ngem ti aniaman a mabalin nga ibagatayo. (1 Tes. 2:13) Isaludsodmo iti bagim, ‘Ikagkagumaak kadi ti mangibasa iti paset ti Sao ti Dios kadagiti pangikaskasabaak iti naimbag a damag?’

8. Apay a saantayo la a basta mangibasa iti teksto iti kaskasabaantayo?

⁸ Siempre, saantayo la a basta ibasa ti teksto iti kasarsaritayo. Ngamin, adu ti bassit laeng wenno awan pay ketdi ti ammona maipapan iti Biblia. Kasta ti kasasaad idi umuna a siglo ken uray ita. (Roma 10:2) Isu a ditay koma ipagarup a maawatanda ti punto ti teksto gapu laeng ta imbasatayo. Kitaentayo dagiti napapateg a paset ti teksto—mabalin a babaen ti panangbasa manen kadagiti napapateg a sasao—ken ilawlawagtayo ti kaipapananda. Makatulong dayta tapno dumanon ti mensahe ti Sao ti Dios iti panunot ken puso dagiti kasarsaritatayo.—Basaen ti Lucas 24:32.

9. No mangibasatayo iti teksto, kasano a matignaytayo dagiti kasarsaritatayo a mangrespeto iti Biblia? Mangted iti pagarigan.

 ⁹ Nagsayaat met no iruangantayo dagiti teksto iti pamay-an a mangtignay iti kasarsaritatayo a mangraem iti Biblia. Kas pagarigan, mabalin nga ibagatayo, “Kitaenta no ania ti kuna ti Namarsua maipapan iti pagsarsaritaanta.” No makisarsaritatayo met iti saan a Kristiano, mabalin nga ibagatayo, “Kitaenta ti ibaga kadatayo ti Nasantuan a Sursurat.” Wenno no saan a relihioso ti kaskasabaantayo, mabalin a kunatayo, “Nangnangngegmo kadin daytoy a nabayagen a pagsasao?” Wen, ikabilangantayo ti tunggal indibidual ket ibagaytayo ti pamay-antayo depende iti kasasaadda.—1 Cor. 9:22, 23.

10. (a) Iyestoria ti kapadasan ti maysa a kabsat. (b) Kasano a napaneknekam ti bileg ti Sao ti Dios iti ministeriom?

¹⁰ Adun ti nakapaneknek a dakkel ti epektona kadagiti makasabaanda ti panangusar iti Sao ti Dios iti ministerio. Kas pagarigan, sinarungkaran ti maysa a kabsat ti maysa a lakay a nabayagen nga agbasbasa kadagiti magasintayo. Imbes nga ipaima lattan ti kabsat ti kabaruan a Pagwanawanan, nangibasa iti teksto a masarakan iti dayta. Imbasana ti 2 Corinto 1:3, 4, a kunana: “Ti Ama dagiti nadungngo nga asi ken ti Dios ti amin a liwliwa, a mangliwliwa kadakami iti amin a rigatmi.” Nagustuan ti lakay dagita a sasao isu nga imbagana a basaen manen dayta ti kabsat. Imbaga ti lakay a kasapulanda unay nga agassawa ti liwliwa. Kas resultana, naginteres ti lakay iti mensahe ti Biblia. Saan kadi a talaga nga adda bileg ti Sao ti Dios iti ministeriotayo?—Ara. 19:20.

11. Ania ti responsabilidad dagiti kakabsat a nadutokan a mangisuro iti plataporma?

¹¹ Maragsakantayo amin nga umatender kadagiti gimong, asamblea, ken kombension. Ti panangidaydayaw ken Jehova ti kangrunaan a rason nga ar-aramidentayo dayta. Dakkel met ti magunggonatayo kadagiti naespirituan nga instruksion a maaw-awattayo. Ibilang dagiti kakabsat a lallaki a dakkel a pribilehio ti tumakder iti plataporma kadagita nga okasion. Ngem masapul met a bigbigenda nga addaanda iti nadagsen a responsabilidad. (Sant. 3:1) Masapul a kanayon a siguraduenda a naibatay iti Biblia ti isursuroda. No nadutokanka a mangisuro iti plataporma, kasanom a mausar a naimbag ti bileg ti Sao ti Dios iti pasetmo?

12. Kasano a masigurado ti agpalpalawag a naibasar iti Kasuratan ti palawagna?

¹² Siguraduem a ti Kasuratan ti nakaibasaran ti palawagmo. (Juan 7:16) Ania ti ramanen dayta? Umuna, agannadka koma nga awan ti aniaman—kapadasan, ilustrasion, wenno ti pamay-an ti panagpalawagmo—ti ad-adda nga agminar wenno mangyadayo iti atension dagiti dumdumngeg iti teksto nga usarem. Kasta met, laglagipem a saan a maibilang a panangisuro ti basta panangbasa laeng kadagiti teksto iti Biblia. Kinapudnona, mabalin nga awan ti mabati iti panunot dagiti dumdumngeg no adu unay a teksto ti usarem. Gapuna, piliem koma a naimbag dagiti kangrunaan a teksto nga usarem, iwayaam a basaen, ilawlawag, iyilustrar, ken iyaplikarmo a naimbag dagita. (Neh. 8:8) No naibasar ti palawag iti balabala nga inaramid ti organisasion, adalem a naimbag dayta ken dagiti teksto a nausar. Ikagumaam a tarusan ti koneksion dagiti sasao iti balabala ken dagiti nausar a teksto. Kalpasanna, usarem dagiti napili a teksto a mangisuro kadagiti punto iti balabala. (Makatulong kenka dagiti praktikal a singasing iti adalen 21-23 iti Magunggonaan iti  Edukasion nga Ipaay ti Teokratiko nga Eskuelaan ti Panagministro.) Kangrunaan ti amin, ikararagmo a tulongannaka ni Jehova a mangyallatiw kadagiti napapateg a sursuro a linaon ti Saona.—Basaen ti Esdras 7:10; Proverbio 3:13, 14.

13. (a) Kasano a nakatulong iti maysa a kabsat ti pannakausar dagiti teksto iti gimong? (b) Kasano a nakatulong kenka dagiti Nainkasuratan a pannursuro a naadalmo kadagiti gimongtayo?

¹³ Dakkel ti naitulongna iti maysa a sister idiay Australia dagiti teksto a nabasa iti gimong. Saan a nasayaat ti pannakapadakkelna, ngem inyaplikarna ti mensahe ti Biblia ket indedikarna ti biagna ken Jehova. Nupay kasta, narigat a patienna nga isu ket ay-ayaten ni Jehova. Ngem idi agangay, naawatna met laeng nga isu ket ay-ayaten ti Dios. Ania ti nakatulong kenkuana a mangbalbaliw iti kapanunotanna? Nakatulong ti panangutobna iti maysa a teksto a nausar iti gimong ken inkonektarna dayta iti dadduma a teksto iti Biblia. * Adda kadi met kapadasam a mangipakita nga adda epektona kenka ti pannakausar ti Sao ti Dios kadagiti gimong, asamblea, ken kombension?—Neh. 8:12.

14. Kasanotayo a maipakita nga ipatpategtayo ti Sao ni Jehova?

¹⁴ Saantayo kadi nga agyaman ken Apo Jehova gapu iti naisurat a Saona, ti Biblia? Siaayat nga intedna dayta saan la a maigapu iti tao, no di ket tinungpalna ti karina nga agtalinaed dayta. (1 Ped. 1:24, 25) Sigurado a nagsayaat a kanayon a basaentayo ti Sao ti Dios, iyaplikartayo iti biagtayo, ken usarentayo dayta a tumulong iti dadduma. No kasta, maipakitatayo ti ayat ken panangipategtayo, saan la nga iti daytoy a kinabaknang manipud iti Dios, no di ket kangrunaanna, iti Autorna, ni Apo Dios a Jehova.