1-3. Kasano a mabalin a timmaud ti problema iti nagbaetan da Euodia ken Sintique, ken kasano a maliklikan dagita a parikut? (Kitaen ti ladawan iti rugi ti artikulo.)

NAKAPATPATEG kadagiti adipen ni Jehova ti nasantuan a libro ti Dios, ti Biblia. Gapu ta imperpektotayo, mabalakadantayo no dadduma maibatay iti Kasuratan. Ania ti reaksiontayo no mabalakadantayo? Usigentayo ti maipapan kadagiti Kristiano idi umuna a siglo a da Euodia ken Sintique. Adda nakaro a problema dagitoy a napulotan a babbai. Ania a problema? Saan nga ibaga ti Biblia. Ngem tapno mailadawantayo, usigentayo ti posible a napasamak.

² Ipapantayo nga inawis ni Euodia ti dadduma a kakabsat tapno mangan ken aglalangenda iti pagtaenganna. Saan a naawis ni Sintique, ngem naammuanna dayta. Mabalin a naikunana: ‘Diak maawat a dinak inawis ni Euodia! Kunak man no nasingedkami nga aggayyem.’ Gapu ta impagarup ni Sintique a kasla naipuera, pinagduaduaan ken pinagsuspetsaannan ni Euodia. Gapuna, inawisna met dagidiay a kakabsat—malaksid ken Euodia! Ti problema da Euodia ken Sintique ti mabalin koma a nangdadael iti talna  ti kongregasionda. Saan nga ibaga ti Biblia ti nagbanaganna, ngem mabalin nga impangag dagitoy a kakabsat a babbai ti naayat a balakad ni apostol Pablo.—Fil. 4:2, 3.

³ Tumaud met no dadduma dagiti kasta a parikut iti kongregasion dagiti adipen ni Jehova ita. Ngem masolbar wenno maliklikan pay ketdi dagita no iyaplikartayo dagiti balakad ti Sao ti Dios, ti Biblia. Kasta met, no ipatpategtayo unay ti Libro ni Jehova, makapagbiagtayo a maitunos kadagiti bilinna.—Sal. 27:11.

4, 5. Ania ti ibalakad ti Sao ti Dios maipapan iti panangkontrol iti emosiontayo?

⁴ Narigat a kontrolen ti emosiontayo aglalo no mariknatayo a di umiso ti pannakatratotayo wenno nainsultotayo. Mabalin a masaktantayo no di umiso ti pannakatratotayo gapu iti puli, kolor ti kudil, wenno dadduma pay a pisikal a nakaidumaantayo. Ngem nasaksakit no kapammatiantayo ti mangaramid iti dayta. Adda kadi balakad ti Sao ti Dios a makatulong kadatayo a mangsango iti naalas nga ugali ti tao?

⁵ Manipud pay idi un-unana, palpaliiwenen ni Jehova ti pannakilangen ti tao. Ammona ti emosion ken tigtignaytayo. Dagiti pampanunot ken rikriknatayo ket mabalin nga agresulta iti panagsao ken aramid a mabalin a pagbabawyantayo inton agangay. Nagsayaat a talaga no iyaplikartayo ti balakad ti Biblia a kontrolentayo ti pungtottayo ken saantayo koma a nalaka nga agrurod! (Basaen ti Proverbio 16:32; Eclesiastes 7:9.) Masapul nga ikagumaantayo ti agbalin a manangpakawan ken saan nga arsagid. Ibilang ni Jehova ken ni Jesus a serioso a banag ti panangpakawan. (Mat. 6:14, 15) Masapul kadi nga agbalinka nga al-alisto a mangpakawan wenno ikagumaam pay a kontrolen ti emosionmo?

6. Apay a masapul nga agannadtayo iti panagpungtot?

⁶ Masansan nga agpungtot dagiti tattao a marigatan a mangkontrol iti emosionda isu nga awan ti mayat a makikadua kadakuada. Kabaelanda nga impluensiaan ti kongregasion. Mailemmengda ti pungtotda wenno ti gurada, ngem “maipanayagto iti kongregasion” dagiti negatibo a bambanag iti pusoda. (Prov. 26:24-26) Mabalin a tulongan dagiti panglakayen dagiti kasta a tattao tapno ipaawatda a saan a maipalubos iti organisasion ti Dios ti kinamanagpungpungtot, gura, ken panagimula iti sakit ti nakem. Nakalawlawag dayta iti awan kaaspingna a Libro ni Jehova. (Lev. 19:17, 18; Roma 3:11-18) Umanamongka kadi?

7, 8. (a) Kasano nga iwanwanwan ni Jehova ti naindagaan a paset ti organisasionna? (b) Ania ti dadduma a bilin a masarakan iti Sao ti Dios, ken apay a masapul a pagtulnogantayo dagita?

⁷ Iwanwanwan ken tartaraonan ni Jehova ti naindagaan a paset ti organisasionna babaen ti “matalek ken masirib nga adipen,” nga idadauluan ni Kristo, “ti ulo ti kongregasion.” (Mat. 24:45-47; Efe. 5:23) Kas iti bagi a manarawidwid idi umuna a siglo, awaten daytoy nga adipen ti naipaltiing a sao wenno mensahe ti Dios, ken ipatpategna unay dayta. (Basaen ti 1 Tesalonica 2:13.) Ania ti dadduma a bilin wenno instruksion a masarakan iti Biblia a pagimbagantayo?

⁸ Ibilin kadatayo ti Biblia a regular a makigimongtayo. (Heb. 10:24, 25) Dayta ti makatulong tapno agpapada ti patpatientayo. (1 Cor. 1:10) Ibaga kadatayo ti Sao ti Dios nga iyun-unatayo ti Pagarian. (Mat. 6:33) Ipaganetget met ti Kasuratan ti responsabilidad ken pribilehiotayo a mangasaba iti binalaybalay, iti publiko, ken iti di pormal.  (Mat. 28:19, 20; Ara. 5:42; 17:17; 20:20) Ibilin ti Libro ti Dios kadagiti Kristiano a panglakayen a pagtalinaedenda a nadalus ti organisasionna. (1 Cor. 5:1-5, 13; 1 Tim. 5:19-21) Kasta met, ibilin ni Jehova a masapul a nadalus iti naespirituan ken iti pisikal dagiti adda iti organisasionna.—2 Cor. 7:1.

9. Ania ti kakaisuna nga instrumento nga us-usaren ni Jesus tapno maawatantayo ti Sao ti Dios?

⁹ Ipagarup ti dadduma a kabaelanda nga ilawlawag ti Biblia a bukodda. Ngem dinutokan ni Jesus ti ‘matalek nga adipen’ kas ti kakaisuna nga instrumento tapno mataraonantayo iti naespirituan. Manipud idi 1919, us-usarenen ni Jesu-Kristo dayta nga adipen tapno tulonganna dagiti pasurotna a mangtarus iti Libro ti Dios ken agtulnogda iti panangiwanwan dayta. Babaen ti panagtulnogtayo kadagiti instruksion a masarakan iti Biblia, makatulongtayo tapno agtultuloy ti kinadalus, talna, ken panagkaykaysa iti kongregasion. Nasayaat no isaludsod ti tunggal maysa kadatayo, ‘Tungtungpalek kadi ti amin nga instruksion nga ipapaay ti instrumento nga us-usaren ni Jesus ita?’

10. Kasano a nailadawan ti nailangitan a paset ti organisasion ni Jehova iti libro nga Ezequiel?

¹⁰ Ipakaammo kadatayo ti naisurat a Sao ni Jehova ti maipapan iti nailangitan a paset ti organisasionna. Kas pagarigan, nasirmata ni Ezequiel a ti nailangitan a paset ti organisasion ti Dios ket ireprepresentar ti nailangitan a karuahe. (Ezeq. 1:4-28) Nakasakay ni Jehova iti daytoy a karuahe, ket agturong dayta iti sadinoman a pangiturongan ti espirituna. Gapuna, maiwanwan ti nailangitan a paset ti organisasionna ti naindagaan a pasetna. Manipud pay idi, umab-abanten ti karuahe! Panunotem ti adu a panagbalbaliw iti organisasion iti napalabas a dekada—ken laglagipem a ni Jehova ti nangaramid kadagita. Dandanin dadaelen ni Kristo ken dagiti nasantuan nga anghel daytoy dakes a lubong. Ipakita dayta a nagpartak ti panagabante ti karuahe ni Jehova tapno maalangon ti kinasoberanona ken masantipikar ti nasantuan a naganna!

11, 12. Ania dagiti naaramidanen ti organisasion ni Jehova?

¹¹ Panunotem ti maar-aramidan ti naindagaan a paset ti organisasion ti Dios kadagitoy maudi nga al-aldaw. Panagibangon. Ginasut a boluntario ti tumultulong iti panagibangon iti baro a hedkuarter dagiti Saksi ni Jehova idiay Warwick, New York, U.S.A. Babaen ti panangiwanwan ti Worldwide Design/Construction Department, rinibu a boluntario iti intero a lubong ti agsaksakripisio nga agibangon kadagiti Kingdom Hall ken mangpalawa kadagiti pasilidad dagiti sanga nga opisina. Makaparagsak a talaga ta adu dagiti nagaget a boluntario a tumultulong kadagitoy a proyekto! Laglagipem a bembendisionan ni Jehova dagiti agibumbunannag iti Pagarian iti intero a lubong a sipapakumbaba ken kanayon a mangmangted iti pinansial a tulong kadagitoy a proyekto.—Luc. 21:1-4.

 ¹² Edukasion. Usigentayo dagiti nagduduma nga eskuelaan a mangitandudo iti nadiosan nga edukasion. (Isa. 2:2, 3) Addaantayo iti Pioneer Service School, School for Kingdom Evangelizers, Gilead School, Bethel Entrants’ School, School for Circuit Overseers and Their Wives, School for Congregation Elders, Kingdom Ministry School, ken School for Branch Committee Members and Their Wives. Talaga a kayat ni Jehova nga isuro dagiti adipenna! Maiparparegta met ti panagadal iti Biblia iti website-tayo a jw.org. Masarakan iti dayta dagiti literaturatayo a magun-odan iti ginasut a lengguahe. Makita met iti dayta dagiti espesial a seksion para kadagiti ubbing ken pamilia ken seksion dagiti damdamag. Inusarmo kadin ti jw.org iti ministeriom ken iti panagdaydayaw ti pamiliayo?

13. Ania ti responsabilidadtayo kas nasungdo nga agdaydayaw ken Jehova?

¹³ Nagdakkel a pribilehio ti agbalin a paset ti organisasion ni Jehova! Gapu ta ammotayo dagiti pagalagadan ti Dios ken dagiti kalikagumanna, responsabilidadtayo nga aramiden ti umiso ken itandudo ti kinasoberanona. Bayat a dumakdakes daytoy a lubong, masapul a ‘guraentayo ti dakes,’ a kas ken Jehova. (Sal. 97:10) Saantayo a kayat a tuladen dagiti mangibagbaga: “Ti naimbag ket dakes ken ti dakes ket naimbag.” (Isa. 5:20) Kayattayo nga ay-aywen ti Dios isu nga ikagkagumaantayo ti agbalin a nadalus iti pisikal, moral, ken iti naespirituan. (1 Cor. 6:9-11) Ay-ayatentayo ni Jehova ken agtalektayo kenkuana; ipakpakitatayo a nasungdotayo kenkuana no agbiagtayo a maitunos kadagiti pagalagadan a naisurat iti nakapatpateg a Librona. Ikagumaantayo met a suroten dagiti pagalagadanna iti pagtaengan, iti kongregasion, iti pagtrabahuan, iti eskuelaan—iti sadinoman. (Prov. 15:3) Panunotentayo pay ti dadduma a pamay-an a maipakitatayo a nasungdotayo iti Dios.

14. Kasano a maipakita dagiti nagannak ti kinasungdoda iti Dios?

¹⁴ Panangpadakkel iti anak. Maipakita dagiti nagannak ti kinasungdoda ken Jehova no sanayenda dagiti annakda maitunos iti Saona. Saan koma nga agpaimpluensia dagiti managbuteng iti Dios a nagannak kadagiti kaugalian iti lugarda maipapan iti panangpadakkel iti anak. Saan a mabalin nga adda impluensia ti lubong iti pagtaengan dagiti Kristiano. (Efe. 2:2) Saan a panunoten ti bautisado a Kristiano nga ama, ‘Idiay ayanmi, babbai ti agisuro kadagiti annak.’ Nalawag ti ibaga ti Biblia maipapan iti dayta: “Dakayo, nga amma, . . . itultuloyyo a padakkelen [dagiti annakyo] iti disiplina ken panangiturong-panunot [instruksion; panangidalan] ni Jehova.” (Efe. 6:4) Kayat dagiti managbuteng iti Dios a nagannak nga agbalin dagiti annakda a kas ken Samuel, ta naay-ayo ni Jehova kenkuana bayat ti panagdakkelna.—1 Sam. 3:19.

15. Kasano a maipakitatayo ti kinasungdotayo ken Jehova no adda dadakkel a banag a desisionantayo?

¹⁵ Panagdesision. No adda dadakkel a desision nga aramidentayo, makita ti kinasungdotayo iti Dios no agpaiwanwantayo iti Saona ken iti organisasionna. Tapno mailadawantayo ti kinapateg dayta, usigentayo ti maysa a serioso a banag a mangapektar iti adu a nagannak. Ugali ti dadduma a nagabrod nga ipaaywan dagiti kayyanak nga annakda kadagiti kabagianda tapno maitultuloy dagiti nagannak ti agtrabaho iti pagilian nga ayanda. Personal a desision met ketdi dayta, ngem laglagipentayo koma a sungsungbatantayo iti Dios dagiti desisiontayo. (Basaen ti Roma 14:12.) No adda dagiti napateg a desisionantayo maipapan iti pamilia ken trabahotayo, nasayaat ngata no  saantayo nga ammuen nga umuna ti ibaga ti Biblia? Siempre, saan! Kasapulantayo ti tulong ti nailangitan nga Amatayo gapu ta saantayo a maiturong dagiti addangtayo.—Jer. 10:23.

16. Ania a desision ti masapul nga aramiden ti maysa nga ina idi nayanak ti anakna, ket ania ti nakatulong kenkuana nga agdesision iti umiso?

¹⁶ Maysa a babai ti naganak bayat ti kaaddana iti abrod. Pampanunotenna nga iyawid ti anakna iti pagilianda tapno aywanan dagiti nagannakna. Idi naganak, adda Saksi ni Jehova a nangyadal iti Biblia kenkuana. Rimmang-ay ken naammuanna nga inted ti Dios ti responsabilidadna a mangpadakkel iti anakna nga agdayaw ken Jehova. (Sal. 127:3; Prov. 22:6) Impeksana ken Jehova ti linaon ti pusona, kas iti ibaga ti Kasuratan nga aramidentayo. (Sal. 62:7, 8) Imbagana met ti rikriknana iti mangyad-adal kenkuana ken iti dadduma iti kongregasion. Nupay pilpiliten dagiti kabagian ken gagayyemna nga ipaaywanna ti anakna kadagiti nagannakna, ammona a di umiso dayta. Naragsakan ni lakayna iti panangtulong ti kongregasion ken baketna ken iti anakda. Gapuna, nakipagadal iti Biblia ken nangrugi a makigimong a kadua ni baketna ken ti anakda. Panagkunam, ammo ngata daytoy nga ina a sinungbatan ni Jehova ti naimpusuan a kararagna? Sigurado a kasta ti nariknana.

17. Ania nga instruksion ti naawattayo mainaig kadagiti iyad-adalantayo iti Biblia?

¹⁷ Panangsurot iti instruksion. Maysa a nagpateg a pamay-an a maipakitatayo ti kinasungdotayo iti Dios ket ti panangsurot kadagiti instruksion manipud iti organisasionna. Kas pagarigan, panunotentayo dagiti singasing mainaig kadagiti iyad-adalantayo iti Biblia. Naisingasing a no regular nga iyad-adaltayon ti libro nga Ania a Talaga ti Isursuro ti Biblia?, mangipaaytayo iti sumagmamano a minuto kalpasan ti panagadal a mangyam-ammo iti organisasion iti iyad-adalantayo. Maaramidtayo dayta babaen ti panangusar iti video nga Ania ti Maar-aramid iti Kingdom Hall? ken ti broshur a Siasino Ita Dagiti Mangar-aramid iti Pagayatan ni Jehova? Naisingasing a no nayadaltayon ti libro nga Isursuro ti Biblia iti iyad-adalantayo, iyadaltayo kenkuana ti libro nga Agtalinaedka iti Ayat ti Dios, uray no nabautisaranen. Impaay ti organisasion daytoy nga instruksion tapno ‘mapatibker ti pammati’ dagiti kabbaro nga adalan. (Col. 2:7) Sursurotem kadi dagitoy a singasing ti organisasion ni Jehova?

18, 19. Ania dagiti panggapuantayo nga agyaman ken Jehova?

¹⁸ Nagadu ti panggapuantayo nga agyaman ken Jehova! Utangtayo kenkuana ti biagtayo, ta no awan ti Dios, saantayo a makagunay wenno awantayo pay ketdi. (Ara. 17:27, 28) Inikkannatayo iti nakapatpateg a sagut—ti librona, ti Biblia. Kas kadagiti Kristiano idiay Tesalonica, siraragsak nga awatentayo dayta kas mensahe ti Dios.—1 Tes. 2:13.

¹⁹ Gapu ta adda kadatayo ti naisurat a Sao ti Dios, simmingedtayo ken Jehova ken simminged met kadatayo. (Sant. 4:8) Impaay kadatayo ti nailangitan nga Amatayo ti nagsayaat a pribilehio nga agbalin a paset ti organisasionna. Talaga nga ap-apresiarentayo dagita a bendision! Inkanta ti salmista ti apresasionna: “Agyamankayo ken Jehova ta isu naimbag: ta ti naayat a kinamanangngaasina ket agingga iti tiempo a di nakedngan.” (Sal. 136:1) Namin-26 a nadakamat iti Salmo 136 ti sasao a “ti naayat a kinamanangngaasina [wenno, nasungdo nga ayatna] ket agingga iti tiempo a di nakedngan.” No nasungdotayo ken Jehova ken iti organisasionna, mapaneknekantayto a pudno dagita a makatignay a sasao gapu ta agbiagtayto iti agnanayon!