1, 2. (a) Ania ti kuna ti dadduma maipapan iti kapanunotan nga adda organisasion ti Dios? (b) Ania ti usigentayo iti daytoy nga artikulo?

ADDA kadi organisasion ti Dios? “Saanmo a kasapulan ti organisasion a mangiwanwan kenka,” kuna ti dadduma. “Kasapulam laeng ti personal a relasion iti Dios.” Umiso kadi dayta? Ania a talaga ti agpayso?

² Iti daytoy nga artikulo, usigentayo dagiti ebidensia a ni Jehova, ti Dios ti urnos, ket awan kapadana nga Organisador. Usigentayo met no kasano koma nga agtignaytayo maitunos iti panangiwanwan a maaw-awattayo iti organisasion ni Jehova. (1 Cor. 14:33, 40) Idi umuna a siglo C.E. ken iti kaaldawantayo, nakatulong ti Kasuratan iti naindagaan a paset ti organisasion ni Jehova tapno nasaknap a maikasaba ti naimbag a damag. Gapu ta sursurotentayo ti Biblia ken tungtungpalentayo dagiti instruksion ti organisasion, itantandudotayo ti kinadalus, talna, ken panagkaykaysa iti intero a kongregasion.

3. Apay a kombinsidoka a ni Jehova ket awan kapadana nga Organisador?

³ Paneknekan ti panamarsua a ti Dios ket awan kapadana nga Organisador. Kuna ti Biblia: “Buyogen ti sirib, ni met laeng  Jehova imbangonna ti daga. Buyogen ti panangilasin impasdekna a sititibker ti langlangit.” (Prov. 3:19) Dagiti laeng ‘pingir ti daldalan’ ti Dios ti ammotayo, ken ti laeng “arasaas ti maysa a banag ti nangngegan kenkuana.” (Job 26:14) Nupay bassit laeng ti ammotayo maipapan kadagiti planeta, bituen, ken galaksi, bigbigentayo a nakaur-urnos dagitoy. (Sal. 8:3, 4) Naglaon dagiti galaksi iti minilion a bituen, ket nakaur-urnos ti panaggaraw dagitoy iti law-ang. Dagiti planeta iti solar system rikrikusenda ti init a kasla sipapakumbaba nga agtultulnogda iti linteg ti trapiko. Talaga a ti makapaamanga a kinaurnos ti uniberso ti makatulong kadatayo a mangbigbig a ni Jehova, daydiay sisisigo a “nangaramid iti langlangit” ken daga, ti maikari iti pammadayaw, kinasungdo, ken maikari a pagserbiantayo.—Sal. 136:1, 5-9.

4. Apay a nagadu a saludsod ti saan a masungbatan ti siensia?

⁴ Adun ti impalgak ti siensia maipapan iti uniberso ken iti daga a pagtataengantayo, ket adu ti naitulong dagita iti panagbiagtayo. Ngem adu a saludsod ti saan a masungbatan ti siensia. Kas pagarigan, saan a masigurado dagiti astronomo no kasano a timmaud ti uniberso wenno no apay nga addatayo iti planeta a Daga nga addaan iti nakaad-adu a biag. Saan met a masungbatan ti kaaduan no apay a tartarigagayan unay ti tao ti agbiag nga agnanayon. (Ecl. 3:11) Apay a nagadu dagiti nagpapateg a saludsod a saan a masungbatan? Maysa a rason ket gapu ta adu a tattao ken sientista ti saan a mamati nga adda Dios ken iparparegtada ti teoria ti ebolusion. Ngem iti Libro ni Jehova, sungbatanna dagiti saludsod a mangburburibor kadagiti tattao.

5. Ania dagiti mangipakita a nakadependetayo kadagiti linteg ti nakaparsuaan?

⁵ Agpampannuraytayo kadagiti saan nga agbalbaliw ken mapagtalkan a linteg nga insaad ni Jehova iti nakaparsuaan. Dagiti elektrisian, tubero, inheniero, piloto, doktor—agdependeda amin kadagiti linteg ti nakaparsuaan tapno maaramidda ti trabahoda. Kas pagarigan, ammo dagiti doktor nga agpapada ti ayan dagiti paset ti bagi ti tao. Gapuna, saanen a masapul a sapulen ti maysa a doktor no sadino ti ayan ti puso ti pasientena. Ken amintayo, tungtungpalentayo dagiti linteg ti nakaparsuaan. Mabalin a pakatayantayo pay ketdi no kontraentayo ti linteg ti grabidad!

6. Apay a namnamaentayo nga organisado dagiti agdaydayaw ken Jehova?

⁶ Talaga a makapaamanga ti kinaurnos ti uniberso. Gapuna, namnamaentayo ngarud a kayat ni Jehova nga organisado dagiti agdaydayaw kenkuana. Kinapudnona, impaay ti Dios ti Biblia a mangiwanwan kadatayo. No saantayo nga agpaiwanwan iti organisasion ti Dios ken kadagiti paglinteganna, saan a naragsak ti biagtayo ken adu ti parikuttayo.

7. Ania ti mangipakita nga organisado a libro ti Biblia?

⁷ Ti Biblia ket saan a koleksion dagiti di agtutunos a literatura dagiti Judio ken Kristiano. Imbes ketdi, organisado a libro dayta—maysa nga obra maestra nga impaisurat ti Dios. Agkokonektar dagiti libro ti Biblia. Manipud Genesis agingga iti Apocalipsis, maymaysa ti tema ti Biblia—ti pannakaalangon ti kinasoberano ni Jehova ken ti pannakatungpal ti panggepna iti daga babaen ti Pagarianna nga iturayan ni Kristo, ti naikari a ‘bin-i.’—Basaen ti Genesis 3:15; Mateo 6:10; Apocalipsis 11:15.

8. Apay a maibagatayo nga organisado dagiti Israelita?

⁸ Ti ili ti nagkauna nga Israel ket maysa a pagarigan iti kinaorganisado. Kas pagarigan, iti Mosaiko a Linteg, adda idi babbai a naorganisar nga agserbi iti pagserkan ti tolda ti gimong. (Ex. 38:8) Organisado met ti panagakar  dagiti Israelita ken ti pannakayakar ti tabernakulo. Idi agangay, inorganisar met ni Ari David ti annongen dagiti Levita ken dagiti papadi. (1 Cron. 23:1-6; 24:1-3) No agtulnog idi dagiti Israelita ken Jehova, ipaayna kadakuada ti kinaurnos, talna, ken panagkaykaysa.—Deut. 11:26, 27; 28:1-14.

9. Ania ti mangipakita nga organisado ti kongregasion Kristiano idi umuna a siglo?

⁹ Organisado ti kongregasion Kristiano idi umuna a siglo, ken nagunggonaanda iti panangiwanwan ti bagi a manarawidwid, a buklen dagiti apostol idi damo. (Ara. 6:1-6) Idi agangay, dadduma a kakabsat a lallaki ti nainayon iti dayta a bagi a manarawidwid. (Ara. 15:6) Naipaay dagiti balakad ken instruksion babaen iti naipaltiing a sursurat nga insurat dagiti miembro wenno nasinged a katrabahuan ti bagi a manarawidwid idi umuna a siglo. (1 Tim. 3:1-13; Tito 1:5-9) Kasano a nagunggonaan dagiti kongregasion iti panagtulnogda iti panangiwanwan ti bagi a manarawidwid?

10. Ania ti resulta ti panagtulnog dagiti nagkauna a kongregasion kadagiti bilin nga impaay ti bagi a manarawidwid? (Kitaen ti ladawan iti rugi ti artikulo.)

¹⁰ Basaen ti Aramid 16:4, 5. Dagiti agdaldaliasat a kakabsat nga imbaon ti bagi a manarawidwid inranudda “dagiti bilin a napagtitinongan dagiti apostol ken lallakay nga adda idiay Jerusalem.” Gapu ta tungtungpalen dagiti kongregasion dagita a bilin, ‘nagtultuloy a mapatibker ti pammatida ken umadu ti bilangda iti inaldaw-aldaw.’ Adda kadi masursurotayo iti daytoy a salaysay ti Biblia a mayaplikartayo iti organisasion ti Dios ita?

11. Ania koma ti aramiden dagiti nadutokan a lallaki no makaawatda iti instruksion manipud iti organisasion ti Dios?

¹¹ Ania koma ti aramiden dagiti miembro ti Komite ti Sangay wenno Komite ti Pagilian (Country Committee), dagiti manangaywan iti sirkito, ken dagiti panglakayen iti kongregasion no adda maawatda nga instruksion manipud iti organisasion ti Dios ita? Ibaga kadatayo ti Libro ni Jehova nga agbalintayo koma a natulnog ken managpasakup. (Deut. 30:16; Heb. 13:7, 17) Saan a mabalin ti managreklamo wenno rebelioso nga ugali iti organisasion ti Dios, ta dagita ti mangdadael iti ayat, talna, ken panagkaykaysa ti kongregasion. Siempre, awan ti matalek a Kristiano a mayat a mangtulad ken Diotrefes, nga awan panagraemna ken saan a nasungdo. (Basaen ti 3 Juan 9, 10.) Isaludsodtayo iti bagitayo: ‘Mapabpabilegko kadi ti espiritualidad dagiti adda iti aglawlawko? Situtulokak kadi a mangawat ken mangsuporta kadagiti instruksion nga ipapaay dagiti mangidadaulo?’

12. Ania a panagbalbaliw ti naaramid iti pannakadutok dagiti panglakayen ken ministerial nga adipen?

¹² Usigentayo ti maysa a desision a nabiit pay nga inaramid ti Bagi a Manarawidwid. Iti artikulo a “Salsaludsod Dagiti Agbasbasa” iti ruar ti Pagwanawanan a Nobiembre 15, 2014, nadakamat dagiti panagbalbaliw no kasano a madutokan dagiti panglakayen ken ministerial nga adipen. Dinakamat ti artikulo nga inanamongan ti bagi a manarawidwid idi umuna a siglo a dagiti agdaldaliasat a manangaywan ti mangdutok kadagiti agserbi a lallaki. Maitunos iti dayta nga urnos, manipud idi Septiembre 1, 2014, dagiti manangaywan iti sirkito ti mangdutoken kadagiti agbalin a panglakayen ken ministerial nga adipen. Am-ammuen ti manangaywan iti sirkito dagiti nairekomenda ken makikadua kadakuada iti ministerio no posible. Paliiwenna met ti pamilia ti kabsat a nairekomenda. (1 Tim. 3:4, 5) Siaannad nga usigen ti bagi dagiti panglakayen ken ti manangaywan iti sirkito dagiti Nainkasuratan a kualipikasion dagiti agbalin a ministerial nga adipen ken panglakayen.—1 Tim. 3:1-10, 12, 13; 1 Ped. 5:1-3.

13. Kasano a maipakitatayo nga agtultulnogtayo kadagiti instruksion nga ipapaay dagiti panglakayen?

 ¹³ Masapul a surotentayo dagiti instruksion a naibatay iti Biblia manipud kadagiti panglakayen. Dagitoy a nasungdo a pastor iti organisasion ti Dios agpapaiturongda kadagiti “makapasalun-at,” wenno makagunggona, nga instruksion a masarakan iti Libro ti Dios. (1 Tim. 6:3) Lagipentayo ti balakad ni Pablo maipapan kadagiti nagulo iti kongregasion. Dadduma ti ‘saan a pulos nga agtrabaho no di ket makibibiangda iti saanda a pakaseknan.’ Nalawag a binagbagaan ida dagiti panglakayen ngem saanda a nangipangag. Ania idi ti inaramid ti kongregasion kadagiti kasta a tattao? Imbaga ni Pablo: “Pagtalinaedenyo a namarkaan daytoy a tao, isardengyo ti makitimpuyog kenkuana.” Balanse dayta a balakad ta saan met a maibilang kas kabusor dagiti kasta a tattao. (2 Tes. 3:11-15) Ita, mabalin a mangted dagiti panglakayen iti mangpakdaar a palawag maipapan iti maysa nga agtultuloy nga agaramid iti saan a nasayaat ti epektona iti kongregasion, kas iti pannakiinnarem iti saan a Saksi. (1 Cor. 7:39) Ania ti reaksionmo no kasapulan a mangipaay dagiti panglakayen iti kasta a palawag? No am-ammom no asino ti karaman iti situasion a nadakamat iti palawag, agannadka kadi iti pannakilangenmo kenkuana? Ti naayat a pannakaseknanmo ken ti natibker a takdermo ti mangtignay iti namarkaan tapno agbalbaliw. ^[1]

14. Kasano a makatulongtayo iti kinadalus ti kongregasion?

¹⁴ Makatulongtayo iti naespirituan a kinadalus ti kongregasion babaen ti panangsurottayo iti bilin a masarakan iti Sao ti Dios. Usigentayo ti napasamak iti nagkauna a Corinto. Inkagumaan ni Pablo ti nangasaba iti dayta a siudad, ken impatpategna dagiti padana a “sasanto” sadiay. (1 Cor. 1:1, 2) Ngem naburiboran la ketdi idi asikasuenna ti problema a mainaig iti seksual nga immoralidad a mapalpalubosan iti dayta a kongregasion! Imbilin ni Pablo kadagiti panglakayen a mayawat ken Satanas ti immoral a tao—kayatna a sawen, mailaksid. Tapno agtalinaed a nadalus ti kongregasion, masapul nga ikkaten dagiti panglakayen ti “lebadura.” (1 Cor. 5:1, 5-7, 12) No suportarantayo ti desision dagiti panglakayen a mangilaksid iti maysa a nakabasol a saan nga agbabbabawi, makatulongtayo a mangtaginayon iti kinadalus ti kongregasion. Mabalin a makatulong met dayta tapno matignay ti nakabasol nga agbabawi ken agpakawan ken Jehova.

15. Kasano a mataginayontayo ti talna iti kongregasion?

¹⁵ Adda pay sabali a problema a masapul a marisut idi idiay Corinto. Idardarum ti dadduma a kakabsat sadiay dagiti kapammatianda. Nagpateg ti insaludsod ni Pablo kadakuada: “Apay a dikay koma lattan baybay-an a maranggasankayo?” (1 Cor. 6:1-8) Adda met dagiti kasta a problema ita. No dadduma, madadael ti talna iti nagbabaetan dagiti kakabsat gapu iti pannakalugi iti negosio ken mabalin a gapu iti akusasion a panangsaur. Indarum ti dadduma dagiti kakabsatda, ngem makatulong kadatayo ti Libro ti Dios a mangbigbig a nasaysayaat ti malugi ngem ti mangibabain iti nagan ti Dios wenno mangdadael iti talna iti kongregasion. ^[2] Tapno marisut dagiti nadagsen a problema ken di panagkikinnaawatan, iyaplikartayo koma ngarud ti balakad ni Jesus. (Basaen ti Mateo 5:23, 24; 18:15-17.) No kasta ti aramidentayo, makatulongtayo iti panagkaykaysa ti organisasion ni Jehova.

16. Apay a namnamaentayo nga agkaykaysa dagiti adipen ti Dios?

¹⁶ Ipakita ti Libro ni Jehova no apay a namnamaentayo nga agkaykaysa dagiti adipenna. Inkanta ti salmista: “Adtoy! Anian a  nagimbag ken anian a makaay-ayo a dagiti agkakabsat agnaedda a sangsangkamaysa buyogen ti panagtutunos!” (Sal. 133:1) No agtulnog idi ken Jehova dagiti Israelita, naurnos ken agkaykaysada. Impadto ti Dios ti masanguanan dagiti adipenna. Kinunana: “Sangsangkatunos nga isaadkonto ida, kas maysa nga arban iti kulongan.” (Mik. 2:12) Kasta met, impakpakauna ni Jehova babaen ken propeta Sofonias: “Itdekto kadagiti ili ti panagbalbaliw nga agturong iti nasin-aw a pagsasao [ti Nainkasuratan a kinapudno], tapno isuda amin umawagda iti nagan ni Jehova, tapno agserbida kenkuana iti abagan-abaga [wenno, sangsangkamaysa nga agdayawda kenkuana].” (Sof. 3:9) Anian a yamantayo ta addaantayo iti pribilehio nga agkaykaysa nga agdayaw ken Jehova!

17. Tapno mataginayon ti panagkaykaysa ken kinadalus iti kongregasion, kasano koma a tamingen dagiti panglakayen dagiti nadagsen a basol?

¹⁷ Tapno mataginayon ti panagkaykaysa ken kinadalus iti kongregasion, masapul nga asikasuen a dagus dagiti panglakayen dagiti hudisial a bambanag iti naayat a pamay-an. Ammo ni Pablo a ti panagayat ni Jehova ket saan a naibatay iti emosion ken saanna a konsintiren ti dakes nga aramid. (Prov. 15:3) Gapuna, insurat ni Pablo ti Umuna a Corinto, maysa a prangka ngem naayat a surat. Sumagmamano a bulan kalpasanna, insuratna ti Maikadua a Corinto. Ipakita dayta ti panagrang-ay ti kongregasion ti Corinto gapu ta inyaplikar dagiti panglakayen ti balakad ni Pablo. No makaaramid iti kamali ti maysa a Kristiano ngem saanna a napupuotan, ikagumaan dagiti panglakayen a siaalumamay nga aturen.—Gal. 6:1.

18. (a) Ania ti naitulong ti balakad nga adda iti Sao ti Dios kadagiti kongregasion idi umuna a siglo? (b) Ania ti mailawlawag iti sumaruno nga artikulo?

¹⁸ Nalawag a ti naipaltiing a balakad iti Libro ti Dios ket nakatulong kadagiti Kristiano idi umuna a siglo idiay Corinto ken iti dadduma pay a kongregasion tapno mataginayon ti kinadalus, talna, ken panagkaykaysa kadagiti kongregasionda. (1 Cor. 1:10; Efe. 4:11-13; 1 Ped. 3:8) Kas resultana, dakkel ti naaramidan dagiti kakabsattayo iti ministerioda idi a tiempo. Kinaagpaysuanna, maibaga ni Pablo a ti naimbag a damag “naikaskasaba iti isuamin a parsua nga adda iti baba ti langit.” (Col. 1:23) Maisaksaknap ita iti intero a lubong ti pannakaammo maipapan kadagiti nagsasayaat a panggep ti Dios. Resulta dayta ti panagregget dagiti manangaskasaba a miembro ti nagkaykaysa nga organisasion. Ipakita ti sumaruno nga artikulo ti dadduma pay nga ebidensia a dagitoy a manangaskasaba ket talaga nga ipatpategda ti Biblia ken desididoda a mangidaydayaw iti Soberano nga Apo Jehova.—Sal. 71:15, 16.