NABAYAGEN a napateg a paset ti pudno a panagdaydayaw ti panagdaton. Nagidaton idi dagiti Israelita kadagiti animal, ken pagaammo dagiti Kristiano gapu iti datonda a “sakripisio ti panagdaydayaw.” Ngem adda pay sabali a daton a talaga a mangparagsak iti Dios. (Heb. 13:15, 16) Mangyeg dagita iti ragsak ken bendision, kas makita kadagiti sumaganad a pagarigan.

Saan idi a maaddaan iti anak ti matalek nga adipen ti Dios idi panawen ti Biblia a ni Anna nupay kayatna unay koma. Iti kararagna, inkarina ken Jehova a no maaddaan iti anak, ‘ipaaynanto ken Jehova iti amin nga al-aldaw ti panagbiagna.’ (1 Sam. 1:10, 11) Idi agangay, nagsikog ni Anna, ket inyanakna ti maysa a lalaki a napanaganan iti Samuel. Idi napusot ni Samuel, impan ni Anna iti tabernakulo, kas iti inkarina. Binendisionan ni Jehova ni Anna gapu iti kinamanagsakripisiona. Naaddaan pay iti lima nga annak, ken nagbalin ni Samuel a propeta ken mannurat ti Biblia.—1 Sam. 2:21.

Kas kada Anna ken Samuel, adda gundaway dagiti Kristiano ita a mangusar iti biagda nga agserbi iti Namarsua. Inkari met ni Jesus a sibabaknang a mabendisionan ti aniaman a sakripisiotayo a pangidaydayaw ken Jehova.—Mar. 10:28-30.

Idi umuna a siglo, pagaammo ti Kristiano a ni Dorcas gapu iti “naimbag nga ar-aramid ken sagsagut ti asi” nga impakitana—dagiti sakripisio nga inaramidna a tumulong iti dadduma. Ngem makapaliday ta “nagsakit ket natay” ni Dorcas, a namagladingit iti intero a kongregasion. Idi naammuan dagiti adalan nga adda ni Pedro iti lugarda, nagpakaasida a bisitaenna ida. Panunotenyo ti ragsakda idi bimmisita ni Pedro ken pinagungarna ni Dorcas—ti kaunaan a nairekord a pinagungar ti maysa nga apostol! (Ara. 9:36-41) Saan a linipat ti Dios dagiti sakripisio ni Dorcas. (Heb. 6:10) Naisurat iti Sao ti Dios ti maipapan iti kinaparaburna, a nagsayaat a tuladentayo.

Nagsayaat nga ulidan ni Pablo no maipapan iti naparabur a panangipaay iti tiempo ken oras. Idi nagsurat kadagiti kapammatianna idiay Corinto, kinunana: “Iti biangko siraragsakakto unay a mangbusbos ken naan-anay a mabusbos maipaay kadagiti kararuayo.” (2 Cor. 12:15) Nasursuro ni Pablo iti kapadasanna a saan la a mangparagsak ti panagsakripisio para iti dadduma, no di ket napatpateg pay, agresulta iti pamendision ken pabor ni Jehova.—Ara. 20:24, 35.

Nalawag a maragsakan ni Jehova no usarentayo ti tiempo ken pigsatayo para iti Pagarian ken tumulong kadagiti kakabsat. Ngem adda kadi sabali pay a pamay-an a masuportarantayo ti trabaho a panangasaba? Adda! Malaksid iti panagtrabahotayo gapu iti ayat, maidaydayawtayo ti Dios babaen kadagiti boluntario a donasiontayo. Mausar dagita a pangsuportar iti sangalubongan a trabaho a panangasaba, a pakairamanan ti panangsuportar kadagiti misionero ken dadduma nga special full-time servants. Maus-urar pay dagiti donasiontayo para iti pannakaisagana ken pannakaipatarus dagiti publikasion ken video-tayo, panangsaranay kadagiti biktima ti kalamidad, ken panagibangon kadagiti baro a Kingdom Hall. Masiguradotayo a ‘mabendisionan’ dagiti naparabur. Kasta met, maidaydayawtayo ni Jehova no ipaaytayo dagiti napateg a bambanagtayo kenkuana.—Prov. 3:9; 22:9.