“MADANAGANAK idi umakarak ditoy,” kuna ni Allen. * “Saanko nga ammo no awatendak wenno adda magayyemko.” Makibagbagay ni Allen iti baro a kongregasion a nasurok a 1,400 a kilometro ti kaadayona iti balayda.

No immakarka iti sabali a kongregasion, mabalin nga agamakka. Ania ti makatulong kenka a makibagay? Ania ti aramidem no mas marigatanka a makibagay ngem iti ninamnamam? No saanka met nga immakar, ania ti aramidem tapno saan a marigatan dagiti nabiit pay nga immakar iti kongregasionyo?

Panunotem daytoy: No mayakar dagiti kayo, makapasarda iti stress. No maikkat ti kayo iti daga, masansan a maputed ti kaaduan a ramutna tapno nalaklaka a mayakar. Ket no nayakaren, masapul nga agpatubo a dagus kadagiti baro a ramut. Kasta met, mabalin a nakapasarka iti stress idi immakarka iti kongregasion. Iti sigud a kongregasionmo, “nakaramutka” idin ta adu dagiti gagayyemmo ken nasayaaten ti naespirituan a rutinam. Ita, masapul nga agpataudka manen iti ramut tapno rumang-ayka iti baro a kongregasionmo. Ania ti makatulong kenka? Ti panangyaplikar kadagiti Nainkasuratan a prinsipio. Usigentayo ti dadduma.

Daydiay regular nga agbasa iti Sao ti Dios, mayarig iti “kayo a naimula iti igid dagiti pagayusan ti danum, a mangipaay iti bukodna a bunga iti panawenna ket dagiti bulongna saan a malaylay, ket ti isuamin nga aramidenna agballiginto.”—Sal. 1:1-3.

Kas iti kayo a masapul nga agsusop iti danum tapno kanayon a nalasbang, masapul met a kanayon nga agtaraon ti Kristiano manipud iti Sao ti Dios tapno agtalinaed a nabileg iti naespirituan. Gapuna, itultuloymo nga inaldaw a basaen ti Biblia ken kanayon a tumabuno kadagiti gimong. Taginayonem ti eskediulmo para iti panagdaydayaw ti pamilia ken personal a panagadal iti Biblia. Dagiti kasapulam iti dati a kongregasionmo, kasapulam met iti baro a kongregasionmo.

“Daydiay sibubulos a mangsibug iti sabsabali isu sibubulos a masibuganto met.”—Prov. 11:25.

Sumarantaka ken nalaklaka a makibagayka no naan-anay a makiramanka iti ministerio. “Ti panagaplaymi kas auxiliary pioneer idi kasangsangpetmi iti baro a kongregasionmi ti kangrunaan a nakatulong kadakami nga agassawa,” kuna ti panglakayen a ni Kevin. “Naam-ammomi a dagus dagiti kakabsat, dagiti payunir, ken naammuanmi ti teritoria.” Kuna met ni Roger, nga immakar iti nasurok a 1,600 a kilometro: “Ti kanayon a pannakiramanmo iti panangasaba ti kasayaatan nga aramidem tapno mairuamka iti baro a kongregasion. Kasta met, ipakaammom kadagiti panglakayen a nakasaganaka a tumulong iti aniaman a pamay-an, nalabit babaen ti panagdalus iti Kingdom Hall, mangisandi iti paset iti gimong, wenno panangilugan kadagiti kakabsat a mapan iti gimong. No nabiitka pay nga immakar, ket makita dagiti kakabsat a managsakripisioka, awatendaka.”

“Lumawakayo.”—2 Cor. 6:13.

Ad-adda pay nga ipariknam nga ipatpategmo dagiti kakabsat. Idi immakar iti kongregasion ni Melissa ken ti pamiliana, impamaysada ti nakigayyem. Kunana: “Nakilangenkami kadagiti kakabsat iti Kingdom Hall sakbay ken kalpasan dagiti gimong  tapno makisarita ken saan la a basta mangkablaaw.” Nakatulong met dayta kadakuada tapno nabibiit a maammuanda dagiti nagan. Kasta met, impakitada ti panangipategda babaen ti panagpadagusda, a nakatulong tapno bumileg ti panaggagayyemda. “Nagiinnalakami iti numero ti telepono,” innayonna, “tapno maawagandakami ket mairamankami kadagiti naespirituan ken dadduma nga aktibidad.”

No saanka a nairuam a makiam-ammo iti sabsabali, mabalin mangrugika kadagiti simple a pamay-an. Kas pagarigan, agisemka uray no kasla saanmo a kayat iti damo. Makatulong ti isem tapno umasideg kenka ti dadduma. Ngamin, “ti kinaraniag dagiti mata pagrag-oenna ti puso.” (Prov. 15:30) “Sigud a managbabainak,” kuna ni Rachel nga immakar manipud iti adayo a lugar a dimmakkelanna. “No dadduma, pilitek ti bagik a makisarita kadagiti kakabsat iti baro a kongregasionko. Iti Kingdom Hall, agsapulak iti agmaymaysa a nakatugaw nga awan kasarsaritana. Mabalin a managbabain met isuna kas kaniak.” Apay a saanmo nga aramiden a kalat ti makisarita iti maysa a kabbaro sakbay wenno kalpasan ti gimong?

Iti sabali a bangir, mabalin a magagaranka a makiam-ammo iti dadduma iti sumagmamano a lawas manipud immakarka. Ngem mabalin nga in-inut a mapukaw ti gagarmo a makiam-ammo kadagiti “kabbaro.” No kasta ti situasion, mabalin a masapul nga agreggetka nga agtultuloy a makigayyem.

Dadduma a kayo ti agkasapulan iti napapaut a panawen tapno makaramutda iti nakayakaranda. Kasta met, agduduma ti kapaut ti panawen sakbay a mairuam ti maysa iti baro a kongregasionna. No medio nabayagkan nga immakar ngem marigatanka latta a makibagay, makatulong no iyaplikarmo dagitoy a prinsipio ti Biblia:

“Ditay koma sumuko nga agaramid iti nasayaat, ta iti naikeddeng a panawen agapittayto no ditay mabannog.”—Gal. 6:9.

Palabsem ti ad-adu pay a tiempo a makibagay ngem ti dati a ninamnamam. Kas pagarigan, adu a misionero a nagadal iti Gilead ti agnaed iti sumagmamano a tawen iti destinoda sakbay nga agbakasionda iti pagilianda. Makatulong dayta tapno makalangenda dagiti kakabsat iti destinoda ken mairuamda iti sabali a kultura.

Ni Alejandro, a namin-adun nga immakar, ammona a saan a masapul nga apuraen ti pannakibagay. Kunana: “Iti naudi nga iyaakarmi, kinuna ni baketko, ‘Adda iti dati a kongregasionta ti amin a gagayyemko!’” Impalagipna a naibaga idin dayta ni baketna dua a tawen ti napalabasen—idi naudi nga immakarda. Ngem bayat daydi dua a tawen, nakigayyem ni baketna iti sabsabali ken nagbalin a nasinged a gagayyemna dagiti saanna nga am-ammo.

“Saanmo a kunaen: ‘Apay a napasamak a dagiti immun-una nga aldaw nasaysayaatda ngem kadagitoy?’ ta saan a gapu iti kinasirib a nagimtuodka maipapan itoy.”—Ecl. 7:10.

Saanmo a pagdiligen ti baro ken ti dati a kongregasionmo. Kas pagarigan, mabalin a managbabain wenno nalalaing a makisarita dagiti kakabsat iti baro a kongregasionmo ngem iti dati nga ayanmo. Dagiti positibo a kababalinda ti kitaem, a kas iti kayatmo a kitaenda kenka. Dadduma nga immakar ti nangbigbig a nasdaawda ta idi immakarda, mapilitanda a mangisaludsod iti bagida, ‘Talaga kadi nga  ay-ayatek ti “intero a timpuyog dagiti kakabsat”?’—1 Ped. 2:17.

“Itultuloyyo ti agdawat, ket maitedto dayta kadakayo.”—Luc. 11:9.

Itultuloymo ti agpatulong babaen ti kararag. “Saanmo a bukbukodan ti agibtur,” kuna ti panglakayen a ni David. “Adu a banag ti maaramidantayo laeng babaen ti tulong ni Jehova. Ikararagmo dayta!” Umanamong iti dayta ni Rachel a nadakamat itay. “No mariknami nga agassawa a kasla saankami a paset ti kongregasion,” kunana, “espesipiko nga ikararagmi ken Jehova, ‘Pangngaasiyo ta isuroyo no apay a marigatan nga umasideg kadakami ti dadduma.’ Kalpasanna, ikagumaanmi a nayonan ti tiempomi a makilangen kadagiti kakabsat.”

Dakayo a nagannak, no marigatan dagiti annakyo a makibagay, iwayaanyo nga ikararag daytoy a kaduayo ida. Tulonganyo ida a maaddaan iti kabbaro a gagayyem babaen ti panangyurnosyo kadagiti makapabileg a panaglalangen.

Ania ti mabalinmo nga aramiden tapno matulongam dagiti kabbaro nga immakar iti kongregasionyo? Ikagumaam ti agbalin a pudno a gayyem. Tapno maaramidmo dayta, panunotem dagiti magustuam no sika koma ti immakar, sa aramidem dagita. (Mat. 7:12) Mabalin kadi nga iramanyo ti kabbaro iti panagdaydayaw ti pamiliayo wenno iti panagbuya iti binulan a programa iti JW Broadcasting? Mabalin kadi nga awisem ida a kaduaendaka iti ministerio? No awisem ida a mangan, malaglagipdanto ti kinamanagpadagusmo. Ania pay dagiti mabalin a maitulongmo kadagiti kabbaro?

“Idi simmangpetkami iti baro a kongregasionmi,” kuna ni Carlos, “insuronak ti maysa a sister no sadino ti paggatangak iti nalaka a magatang. Dakkel ti naitulong dayta.” Kadagiti aggapu iti lugar a naiduma ti klimana, mabalin nga agyamanda no isurom dagiti maitutop a pagbadoda no napudot, nalamiis, wenno matutudo. Matulongam pay ida nga agbalin a mas epektibo iti ministerio no ibagam ti pakasaritaan ti komunidadyo wenno ilawlawagmo ti patpatien dagiti umili.

Ni Allen a nadakamat itay, nasurok a makatawennan iti baro a kongregasionna. Malagipna: “Idi damo, medio marigatanak a mangam-ammo kadagiti kakabsat. Ngem itan, kaslakami pamilia, ket nakaragragsakak.” Naammuan ni Allen nga awan ti napukawna a gayyem gapu iti iyaakarna. Imbes ketdi, nanayonan kadagiti kabbaro, a mabalin nga agbalin a tungpal-biag a gagayyemna.