NAYANAKAK idi 1926 idiay Crooksville, Ohio, United States. Saan a relihioso da Tatang ken Nanang, ngem imbagada kadakami a walo nga annakda a mapankami makimisa. Nakimismisaak idi iti Methodist Church. Idi agtawenak iti 14, inikkannak ti ministro iti premio ta makatawen a saanak a naglangan kadagiti misa iti Domingo.

Iti dayta met la a tiempo, adda kaarrubami a Saksi ni Jehova nga agnagan Margaret Walker a mangbisbisita ken nanangko ken isarsaritana kenkuana ti maipapan iti Biblia. Maysa nga aldaw, kayatko met ti dumngeg. Pinaruarnak ni Nanang iti balaymi ta impagarupna a makaisturboak iti panagadalda. Ngem dimngegak latta iti pagsarsaritaanda. Kalpasan ti sumagmamano nga ibibisita ni Margaret, dinamagna kaniak, “Ammom kadi ti nagan ti Dios?” Insungbatko, “Ammo dayta ti amin—Dios.” Kinunana, “Alaem ti Bibliam ket basaem ti Salmo 83:18.” Inaramidko dayta, ket naammuak a Jehova ti nagan ti Dios. Napanak kadagiti gagayyemko ket imbagak kadakuada, “Inton makaawidkayo no rabii, kitaenyonto ti Salmo 83:18 iti Bibliayo ket mabasayo ti nagan ti Dios.” Mabalin a maikunam a nangasabaakon a dagus.

 Nagadalak iti Biblia ket nagbautisarak idi 1941. Di nagbayag, nadutokanak a mangikondukta iti panagadal iti libro ti kongregasion. Pinaregtak ni Nanang ken dagiti kakabsatko nga umayda, ket nangrugida amin a tumabuno iti panagadal iti libro nga ikonkonduktak. Ngem saan nga interesado ni Tatang.

Naikkanak iti ad-adu pay a rebbengen iti kongregasion, ken nangaramidak iti libraria a nangipanak kadagiti publikasion. Maysa nga aldaw, intudo ni Tatang dagiti librok ket kinunana: “Makitam dagita? Iruarmo iti balay, ket mabalinmon ti pumanaw.” Pimmanawak ket nangabangak iti maysa a kuarto iti Zanesville, Ohio, ngem nagsublisubliak tapno paregtaek ti pamiliak.

Linapdan ni Tatang ni Nanang a makigimong. No dadduma, bayat a magmagna ni Nanang, kamakamenna sa iguyodna iti balaymi. Ngem tumaray ni Nanang a rummuar iti sabali a ruangan tapno mapan makigimong. Imbagak ken Nanang: “Saankayo nga agdanag. Maumanto met laeng a mangkamkamat kadakayo.” Idi agangay, saanen a laplapdan ni Tatang ni Nanang isu a nawayan a makigimong.

Idi 1943, maang-angayen iti kongregasionmi ti Teokratiko nga Eskuelaan ti Panagministro ket nangrugiakon nga agpaset. Gapu kadagiti balakad a naawatko tunggal agpasetak iti eskuelaan, nagbalinak a nalaing nga agpalawag.

Madama idin ti Gubat Sangalubongan II. Idi 1944, naayabanak tapno agsoldado. Nagreportak idiay Fort Hayes iti Columbus, Ohio, ineksamendak dagiti doktor, ken sinuratak dagiti papeles. Imbagak met kadagiti opisial a saanko a kayat ti agsoldado isu a pinalubosandak. Kalpasan ti sumagmamano nga aldaw, adda opisial nga immay iti pagnanaedak sa kinunana: “Corwin Robison, adda pammalubos kaniak a mangaresto kenka.”

Iti korte, kalpasan ti dua a lawas, kinuna ti hues: “No siak la ti masurot, tungpal-biag a paibaludka. Adda kadi makunam?” Insungbatko: “Apo, naibilangak koma kas ministro. Ti ruangan dagiti tattao ti pagpalpalawagak, ken inkaskasabak ti naimbag a damag ti Pagarian iti adu a tattao.” Kinuna ti hues iti hurado, wenno grupo ti tattao a mangikeddeng iti dusa: “Addakayo ditoy saan a tapno ikeddengyo no ministro wenno saan daytoy a baro. Addakayo ditoy tapno desisionanyo no kinayatna wenno nagkedked nga agsoldado.” Awan pay kagudua nga oras, dinesisionanen ti hurado a nakabasolak. Sinentensiaannak ti hues a maibalud iti lima a tawen idiay Ashland, Kentucky.

Dua a lawasko iti pagbaludan iti Columbus, Ohio, ket addaak laeng iti seldak iti umuna nga aldaw. Inkararagko ken Jehova: “Saanko a kabaelan ti agnaed iti selda iti lima a tawen. Diak ammo ti aramidek.”

Iti sumaganad nga aldaw, pinaruardak dagiti guardia. Immasidegak iti maysa a natayag ken nabaneg a balud, ken tantan-awanmi ti ruar. Dinamagnak, “Apay a naibaludka, Pandek?” Insungbatko, “Maysaak a Saksi ni Jehova.” Kinunana, “Agpayso? Apay ngarud nga addaka  ditoy?” Kinunak, “Saan ngamin a makigubat ken pumatay dagiti Saksi ni Jehova.” Insungbatna, “Imbaluddaka gapu ta saanmo a kayat ti pumatay. Imbaludda ti dadduma gapu ta pumatpatayda. Umiso kadi met dayta?” Kinunak, “Saan.”

Idi kuan kinunana, “Naibaludak idi iti 15 a tawen iti sabali a pagbaludan, ket nabasak sadiay ti dadduma a pagbasaanyo.” Inkararagko, “Apo Jehova, tulongannak koma a manggayyem iti daytoy a tao.” Iti dayta met la a tiempo, kinuna ni Paul—ti nagan ti lalaki: “No sagidendaka dagitoy, agpukkawka laeng. Siak ti makaammo kadakuada.” Nagbanaganna, awan nagbalin a problemak kadagiti 50 a balud iti nakaibaludanmi.

Idi inyakardak dagiti opisial iti pagbaludan idiay Ashland, naammuak nga adu gayam a natataengan a kakabsat ti naibalud idiay Ashland. Ti pannakilangenda ti nakatulong kaniak ken ti dadduma nga agtalinaed a nabileg iti naespirituan. Inikkandakami iti paset iti linawas a panagbasa iti Biblia, ken nagisaganakami kadagiti saludsod ken sungbat para iti gimong a naawagan Bible Bees. Adda met natudingan a mangasikaso iti teritoria. Nagnaedkami iti dakkel a selda nga addaan kadagiti pagiddaan iti didingna. Imbaga ti mangas-asikaso iti teritoria kaniak: “Robison, sika ti mangasaba iti pagiddaan a kastoy ken kasta. Asinoman a naituding iti dayta a pagiddaan ket teritoriam. Siguraduem a makasabaam sakbay a pumanaw.” Kasta idi ti organisado a panangasabami.

Nagpatingga ti Gubat Sangalubongan II idi 1945, ngem nakabaludak latta. Madanaganak iti pamiliak gapu ta imbaga idi kaniak ni Tatang, “No mapapanawka, makontrolkon ti dadduma.” Idi nawayawayaanak, nasdaawak. Uray bumusbusor ni Tatang, pito a miembro ti pamiliak ti makigimgimong ken maysa a kabsatko a babai ti nabautisaranen.

Idi nangrugi ti Korean War idi 1950, naayabanak manen nga agsoldado ket nagreportak idiay Fort Hayes. Kalpasan ti maysa nga eksaminasion, kinuna kaniak ti maysa nga opisial, “Maysaka kadagiti kangatuan ti naalana iti grupoyo.” Insungbatko, “Nasayaat, ngem saanak nga agsoldado.” Imbagak ti linaon ti 2 Timoteo 2:3 ket kinunak, “Maysaakon a soldado ni Kristo.” Saan a nagtagtagari, kalpasanna kinunana, “Mabalinmon ti pumanaw.”

Kalpasanna, immatenderak iti miting dagiti mayat nga agboluntario iti Bethel iti maysa a kombension idiay Cincinnati, Ohio. Imbaga  kadakami ni Brother Milton Henschel a no kayat ti maysa a kabsat ti agsakripisio para iti Pagarian, mabalin nga usaren ti organisasion nga agserbi iti Bethel. Nagaplayak nga agserbi iti Bethel, ket naayabanak nga agreport idiay Brooklyn Bethel idi Agosto 1954. Manipud idin, agserserbiakon iti Bethel.

Saanak a naibusan iti trabaho iti Bethel. Iti adu a tawen, siak ti nangasikaso kadagiti boiler iti pagimprentaan ken kadagiti opisina, nagbalinak a mekaniko, ken nagtarimaanak kadagiti kandado. Nagtrabahoak met kadagiti Assembly Hall idiay New York City.

Nagustuak ti naespirituan a rutina iti Bethel, a pakairamanan ti panagatenderko iti morning worship ken Panagadal ti pamilia iti Pagwanawanan, kasta met ti pannakiramanko iti panangasaba ti kongregasion. No panunotem, kabaelan ken masapul koma nga aramiden met dayta ti tunggal pamilia a Saksi ni Jehova. No inaldaw nga agteksto ti pamilia, addaanda iti regular a Panagdaydayaw ti Pamilia, ken makipasetda iti gimong ken naregtada iti panangikasaba iti naimbag a damag, amin a miembro ti pamilia ket agbalin a nasalun-at iti naespirituan.

Adu ti nagbalin a gagayyemko iti Bethel ken iti kongregasion. Dadduma ti napulotan ken inawatdan ti nailangitan a gunggonada. Dadduma ti addaan iti naindagaan a namnama. Ngem imperpekto ti amin nga adipen ni Jehova, agraman dagiti Bethelite. No adda saanmi a pagkinnaawatan iti maysa a kabsat, kanayon nga ikagumaak ti makikappia. Panunotek ti Mateo 5:23, 24 ken no kasanomi a risuten ti saanmi a pagkinnaawatan. Saan a nalaka ti agpakawan, ngem manmano a makitak nga agtultuloy ti problema kalpasan a nagpadispensarakon.

Gapu iti edadko, marigatanakon nga agbalaybalay, ngem intultuloyko ti nangasaba. Nakasursuroak iti sumagmamano a Mandarin Chinese ket maragragsakanak a makisarsarita kadagiti Chinese nga adda iti kalsada. Adda dagiti agsapa a makaipaimaak iti 30 wenno 40 a magasin kadagiti interesado.

 Nakapagsarungkarak pay ketdi idiay China! Maysa nga aldaw, inisemannak ti maysa a balasitang bayat nga agiwarwaras kadagiti pagbasaan a mangyam-ammo iti maysa a paglakuan iti prutas. Inisemak ken inikkak iti Chinese a Pagwanawanan ken Agriingkayo! Inawatna ken imbagana a Katie ti naganna. Tunggal makitanak, makisarita kaniak. Insurok kenkuana ti nagan dagiti prutas ken nateng iti Ingles, ken tuladenna kalpasan a maibagak. Inlawlawagko met dagiti teksto ti Biblia kenkuana, ket inawatna ti libro nga Isursuro ti Biblia. Kalpasan ti mano a lawas, diakon nakitkita.

Kalpasan ti sumagmamano a bulan, adda manen balasitang nga agiwarwaras iti pagbasaan a nangawat kadagiti magasin nga intedko. Iti sumaruno a lawas, inyawatna kaniak ti selponna ket kinunana, “Makisaritaka idiay China.” Kinunak, “Awan ti am-ammok idiay China.” Ngem impapilitna isu nga innalak ti selpon ket simmungbatak, “Hello, ni Robison daytoy.” Simmungbat ti adda iti sabali a linia, “Robby, ni Katie daytoy. Addaakon ditoy China.” Kinunak, “China?” Simmungbat ni Katie, “Wen, Robby. Ammom, kabsatko dayta balasitang a nangyawat iti selpon kenka. Adu a naimbag a bambanag ti insurom kaniak. Isurom koma met kenkuana dagiti insurom kaniak.” Kinunak, “Katie, aramidek ti amin a kabaelak. Pagyamanan ta imbagam no sadino ti ayanmo.” Idi agangay, saankon a nakasarita pay ti kabsat ni Katie. Sadinoman ti ayan dagitoy a babbalasitang, namnamaek nga ad-adu pay ti maammuanda maipapan ken Jehova.

Adda 73 a tawenen nga agserserbiak ken Jehova. Maragsakanak ta tinulongannak nga agtalinaed a neutral ken agbalin a matalek iti uneg ti pagbaludan. Imbaga met dagiti kakabsatko a timmuredda idi sinangok ti panangbusor ni Tatang a saanak a simmuko. Idi agangay, nabautisaran ni Nanang ken ti innem kadagiti kakabsatko. Simmingpet met ni Tatang ken nakigimgimong pay ketdi sakbay a natay.

No pagayatan ti Dios, agbiagto iti baro a lubong dagiti miembro ti pamiliak ken gagayyemko a pimmusayen. Nagragsak la ketdin ti agdayaw ken Jehova iti amin a tiempo a kadua dagiti ay-ayatentayo! *