PANUNOTEM ti karagsakan nga aldaw iti biagmo. Idi kadi nagkasarka wenno idi nayanak ti inauna nga anakmo? Wenno idi kadi insimbolom ti dedikasionmo ken Jehova babaen ti bautismo? Mabalin nga ibilangmo dayta a kapatgan ken karagsakan nga aldaw iti biagmo. Ken maragsakan met dagiti kapammatiam idi nakitada nga impakitam iti publiko ti panagayatmo iti Dios iti intero a puso, kararua, panunot, ken pigsam!—Mar. 12:30.

Manipud nagbautisarka, nalabit nariknamon ti ragsak ti panagserbi ken Jehova. Ngem napukaw ti dadduma a manangaskasaba iti Pagarian ti ragsak nga adda kadakuada idi damo. Apay a napukaw ti ragsakda? Ania dagiti makagapu nga agtultuloytayo a siraragsak nga agserbi ken Jehova?

Sigurado a mangparagsak kadatayo ti mensahe ti Pagarian, karaman ti kari a dandanin dadaelen ni Jehova ti agdama a dakes a sistema ken iturongnatayo iti baro a lubongna. Kasta met, ipasigurado kadatayo ti Sofonias 1:14: ‘Ti dakkel nga aldaw ni Jehova asidegen. Asidegen dayta, ket agdardaras iti kasta unay.’ Nupay kasta, no nabaybayag ti panaguraytayo ngem iti ninamnamatayo, mabalin a mapukaw ti ragsaktayo ket maksayan ti regtatayo nga agserbi iti Dios.—Prov. 13:12.

Ti makapabileg a pannakilangentayo kadagiti adipen ti Dios ket makatulong kadatayo nga agtultuloy a naragsak nga agserbi ken Jehova. Kinapudnona, ti nasayaat a kababalin dagiti adipen ni Jehova ti mabalin a nangtignay kadatayo iti pudno a panagdayaw ken nakatulong kadatayo a siraragsak nga agserbi iti Dios. (1 Ped. 2:12) Ngem kasano no madisiplina ti maysa a padatayo a Kristiano gapu ta nagsukir kadagiti bilin ti Dios? Kadagita a kasasaad, mabalin a maupay ken mapukaw ti ragsak ti dadduma a nagbalin a Kristiano a natignay iti nasayaat a kababalin dagiti adipen ni Jehova.

Mabalin met a mangpukaw iti ragsaktayo dagiti bambanag nga iparparegta ti dakes a sistema ni Satanas. Us-usaren ti Diablo ti lubongna tapno patientayo a kasapulantayo dagiti bambanag a saan met a napateg. Nupay kasta, nagsayaat a laglagipentayo ti imbaga ni Jesus: “Awan ti makabalin nga agpaadipen iti dua nga appo; ta mabalin a guraenna ti maysa ket ayatenna ti sabali, wenno agtalinaed iti maysa ket umsienna ti sabali. Saanyo a mabalin ti agpaadipen iti Dios ken iti Kinabaknang.” (Mat. 6:24) Saantayo a makapagserbi a naragsak ken  Jehova no gun-odentayo ti amin a kayattayo iti lubong.

No ay-ayatentayo ni Jehova, saan a makapadagsen ti agserbi kenkuana. (1 Juan 5:3) Laglagipentayo a kinuna ni Jesus: “Umaykayo kaniak, dakayo amin a mabambannogan ken madagdagsenan, ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo. Ta ti sangolko nalanay ken ti awitko nalag-an.” (Mat. 11:28-30) Makapabang-ar ken makaparagsak ti agbalin nga adalan ni Kristo. Kasta met, adda rasontayo a naragsak nga agserbi ken Jehova. Usigentayo ita ti tallo a napateg a rason no apay a mabalintayo ti ‘agrag-o iti Dios ti pannakaisalakan.’—Hab. 3:18.

Agserserbitayo iti Nangted-Biag kadatayo, ti naragsak a Dios. (Ara. 17:28; 1 Tim. 1:11) Bigbigentayo nga utangtayo ti biagtayo iti Namarsua kadatayo. Itultuloytayo ngarud ti siraragsak nga agserbi kenkuana uray adu a tawen ti napalabasen manipud nagbautisartayo.

Usigentayo ti kapadasan ni Héctor, nga 40 a tawen a nagserbi kas agdaldaliasat a manangaywan. Naragsak latta uray lakayen. (Sal. 92:12-14) Gapu iti panagsakit ni baketna, naksayan ti panawenna nga agserbi iti Dios. Ngem saan a bimmaaw ti rag-ona. Kinunana: “Nupay maladingitanak a makakita a kumapkapuy ni baketko ken marigatanak a mangaywan kenkuana, diak impalubos a daytoy ti mangpukaw iti rag-ok nga agserbi iti pudno a Dios. Ammok nga utangko ti biagko ken Jehova, ti Dios a nangparsua iti tao nga addaan panggep, isu a kasta unay ti panangayatko kenkuana ken naimpusuan a pagserbiak. Ikagkagumaak ti kanayon a mangasaba, ken pampanunotek a kanayon ti namnama ti Pagarian tapno saan a mapukaw ti rag-ok.”

Impaay ni Jehova ti daton a subbot tapno posible a maaddaantayo iti naragsak a biag. Pudno a “ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Wen, mapakawan dagiti basoltayo ken maaddaantayo iti biag nga agnanayon no ipakitatayo ti pammati iti naayat a sagut ti Dios, ti daton a subbot ni Jesus. Saan kadi a nagsayaat a pagyamanantayo dayta? Ken gapu iti panagyamantayo iti subbot, saan kadi a matignaytayo a siraragsak nga agserbi ken Jehova?

Kinuna ti kabsat nga agnagan Jesús a taga-Mexico: “Inadipennak ti trabahok, no dadduma, agtrabahoak iti lima nga agsasaruno nga eskediul ti trabaho uray no saanak met nga obligado a mangaramid iti dayta. Inaramidko dayta tapno adu ti masapulak.  Idi agangay, naammuak ti maipapan ken Jehova ken no kasano nga intedna iti lubong ti dungdungnguenna nga Anak. Naaddaanak iti kasta unay a tarigagay nga agserbi kenkuana. Gapuna, indedikarko ti biagko ken Jehova ket immikkatak iti kompania a nagtrabahuak iti 28 a tawen. Kalpasanna, nagserbiak iti amin-tiempo a ministerio.” Manipud idin, adu a tawenen a siraragsak nga agserserbi ken Jehova.

Saan a ladingit no di ket kasta unay a rag-o ti resulta ti panagserbitayo. Malagipmo kadi ti kasasaad ti biagmo idi saanmo pay a naam-ammo ni Jehova? Impalagip ni apostol Pablo kadagiti Kristiano idiay Roma nga isuda idi ket ‘ad-adipen ti basol’ ngem nagbalindan nga “ad-adipen iti kinalinteg.” Mangpatpatauddan iti bunga a “maipaay iti kinasanto” nga agresulta iti biag nga agnanayon. (Roma 6:17-22) Sursurotentayo met ti panagbiag a nasantuan, a saan nga agresulta iti panagladingit gapu iti immoral wenno naranggas a kababalin. Talaga a mangyeg dayta iti ragsak!

Usigentayo ti kasasaad ni Jaime. Saan idi a mamati iti Dios, maysa nga ebolusionista ken boksingero. Nangrugi a makigimong ni Jaime ket nagustuanna ti ayat a naipakita sadiay. Tapno mabaliwanna ti dati a kabibiagna, nagpatulong ni Jaime ken Jehova a maaddaan iti pammati Kenkuana. “In-inut a naammuak nga adda naayat nga Ama ken naasi a Dios,” kinuna ni Jaime. “Nagbalin a proteksionko ti panangsurot kadagiti nalinteg a pagalagadan ni Jehova. No saanak koma a nagbalbaliw, mabalin a natayakon a kas iti dadduma a dati a gagayyemko a boksingero. Ti kararagsakan a tawtawen ti biagko ket dagiti tawen nga inusarko nga agserbi ken Jehova.”

Ania koma ti mariknatayo bayat nga ur-urayentayo ti panungpalan daytoy dakes a sistema ti bambanag? Laglagipentayo nga ‘agimulmulatayo a maipaay iti espiritu’ ket ‘apitentayo ti agnanayon a biag.’ Ngarud, “ditay koma sumuko nga agaramid iti nasayaat, ta iti naikeddeng a panawen agapittayto no ditay mabannog.” (Gal. 6:8, 9) Babaen iti tulong ni Jehova, agibturtayo koma, ikagumaantayo a patanoren dagiti kababalin a kasapulantayo tapno makalasattayo iti “dakkel a rigat,” ken agtultuloytayo a siraragsak nga agserbi ken Jehova, uray maipasangotayo kadagiti pakarigatan.—Apoc. 7:9, 13, 14; Sant. 1:2-4.

Agtalektayo a magunggonaanto ti panagibturtayo, ta ammo ti Dios ti panagbannogtayo ken ti ayattayo kenkuana ken iti naganna. No agtultuloytayo a siraragsak nga agserbi ken Jehova, agbalintayo a kas ken salmista David, a nagkuna: “Insaadko ni Jehova iti sanguanak a patinayon. Agsipud ta isu adda iti makannawanko, saanakto a mapagdiwengdiweng. Gapuna ti pusok agragsak, ket ti dayagko agannayas nga agrag-o. Kasta met, ti bukodko a lasag agtaengto iti kinatalged.”—Sal. 16:8, 9.