1, 2. Kasano nga impakita ni David ti kinamatalekna iti Dios? (Kitaen ti ladawan iti rugi ti artikulo.)

ITI tengnga ti rabii, nagar-arudok da David ken Abisai a napan iti kampo ti 3,000 a matmaturog a soldado. Iti tengnga ti kampo, nasarakanda ni Ari Saul a naimas ti turogna. Nagdaliasat iti let-ang ti Juda tapno biroken ken papatayenna ni David. Inyarasaas ni Abisai: “Bay-annak, . . . a tugkelak [ni Saul] a sumalpot agingga iti daga babaen ti pika iti maminsan laeng, ket saankonto a piduaen nga aramiden dayta kenkuana.” Ngem nakaskasdaaw ti sungbat ni David! “Dika dadaelen, ta siasino ti nangyunnat iti imana maibusor iti pinulotan ni Jehova ket nagtalinaed nga awanan basol? . . . Narigat a pagarupen, iti biangko, manipud panangmatmat ni Jehova, nga iyunnatko ti imak maibusor iti pinulotan ni Jehova!”—1 Sam. 26:8-12.

² Ammo ni David no ania ti ramanen ti kinamatalek iti Dios. Saanna a kayat a dangran ni Saul. Apay? Gapu ta ni Saul ti pinulotan ti Dios nga ari ti Israel. Raemen dagiti matalek nga adipen ni Jehova dagiti dinutokanna. Kinapudnona, kayat ni Jehova nga ipateg ti amin nga adipenna ti kinamatalek.—Basaen ti Proverbio 12:22b.

3. Kasano nga impakita ni Abisai ti kinamatalekna ken David?

 ³ Impakita ni Abisai ti panagraem ken David. Kas pagarigan: Tapno makaluban ni David ti pannakikamalalana ken Bat-seba, imbagana ken Joab a kabsat ni Abisai nga iyurnosna a matay iti paggugubatan ti asawa ni Bat-seba a ni Urias. (2 Sam. 11:2-4, 14, 15; 1 Cron. 2:16) Mabalin nga ammo ni Abisai ti maipapan iti dayta, ngem rinaemna latta ni David kas ti ari a pinulotan ti Dios. Kasta met, saan a pulos nga inusar ni Abisai ti pannakabalinna kas pangulo ti buyot tapno agawenna ti trono ti Israel. Imbes ketdi, sinalaknibanna ni David kadagiti kabusorna ken kadagiti nangtraidor kenkuana.—2 Sam. 10:10; 20:6; 21:15-17.

4. (a) Kasano a ni David ket ulidan ti kinamatalek iti Dios? (b) Ania ti dadduma pay a pagarigan nga usigentayo?

⁴ Ti saan a panangdangran ni David ken Ari Saul ipakitana nga isu ket maysa a matalek nga adipen ni Jehova. Idi agtutubo pay, natignay ni David a mangsango iti higante a Filisteo a ni Goliat a saan a nagbuteng a ‘nangrurod iti linia ti bakal ti sibibiag a Dios.’ (1 Sam. 17:23, 26, 48-51) Idi nagbalin nga ari ni David ken nakaaramid kadagiti nadagsen a basol kas iti pannakikamalala ken panangpapatay, inawatna ti pannubngar ni propeta Natan ken nagbabawi. (2 Sam. 12:1-5, 13) Idi lakayen, intultuloy nga impakita ni David ti kinamatalekna iti Dios. Kas pagarigan, sipaparabur a nangipaay kadagiti kontribusion iti pannakaibangon ti templo ni Jehova. (1 Cron. 29:1-5) Wen, nakaaramid ni David kadagiti nadagsen a basol, ngem nagmatalek iti Dios. (Sal. 51:4, 10; 86:2) Bayat nga usigentayo ti dadduma a salaysay maipapan ken David ken kadagiti kapanawenanna, kitaentayo ti sungbat dagitoy a saludsod: Asino ti nangnangruna a pangipaayantayo iti kinamatalek? Tapno agbalintayo a matalek, ania dagiti kababalin a masapul nga ipakitatayo?

5. Ania ti maadaltayo iti kamali ni Abisai?

⁵ Idi napan ni Abisai iti kampo ni Saul, saanna a nabigbig no asino ti nangnangruna a pangipakitaanna iti kinamatalek. Gapu iti kinamatalekna ken David, magagaran ni Abisai a mangpatay ken Ari Saul, ngem linapdan ni David ta ammona a saan nga umiso a dangranna ti “pinulotan ni Jehova.” (1 Sam. 26:8-11) Iti dayta a pasamak, adda maadaltayo a napateg a leksion: Nupay no adu ti pangipakitaantayo iti kinamatalek, masapul nga ammotayo no asino ti nangnangruna a pangipakitaantayo iti kinamatalek babaen iti panangyaplikartayo kadagiti prinsipio ti Biblia.

6. Nupay normal laeng nga agmatalektayo iti pamilia ken gagayyemtayo, apay a masapul nga agannadtayo?

⁶ Agtaud iti puso ti kinamatalek, ngem manangallilaw ti puso ti tao. (Jer. 17:9) Gapuna, nalaka laeng a marikna ti maysa a matalek iti Dios a masapul nga ipaayna ti kinamatalekna iti nasinged a gayyem wenno kabagianna uray no agar-aramid iti dakes. Ngem masapul a laglagipentayo a ni Jehova ti kanayon a pangipakitaantayo iti kangrunaan a kinamatalektayo nangruna no ti maysa a nasinged kadatayo tallikudanna ti kinapudno.—Basaen ti Mateo 22:37.

7. Kasano nga impakita ti maysa a kabsat ti kinamatalekna iti Dios idi naipasango iti narigat a situasion?

⁷ Mabalin a masubok ti kinamatalektayo no adda nailaksid nga asideg a kabagiantayo. Kas pagarigan, maysa a kabsat nga agnagan iti Anne  ^[1] ti tinawagan ti nailaksid nga inana. Kayat ni nanangna a bisitaen isuna gapu ta mailiw iti pamiliana. Mariribukan ni Anne iti kiddaw ni nanangna ket inkarina nga agsurat. Sakbay a nagsurat, nagsukimat kadagiti prinsipio ti Biblia. (1 Cor. 5:11; 2 Juan 9-11) Sidadayaw nga impalagip ni Anne iti suratna nga insina ni nanangna ti bagina iti pamiliada  gapu iti dakes nga inaramidna ken ti saanna a panagbabawi. Kinuna ni Anne: “Agbalinka laeng a naragsak manen no agsublika ken Jehova.”—Sant. 4:8.

8. Ania dagiti kababalin a makatulong kadatayo nga agbalin a matalek iti Dios?

⁸ Ti kinamatalek dagiti kapanawenan ni David itampokda ti tallo a kababalin a makatulong kadatayo a mangipakita iti kinamatalek iti Dios. Dagitoy a kababalin ket ti kinapakumbaba, kinamanangngaasi, ken kinatured. Saggaysaentayo nga usigen dagitoy.

9. Apay a ginandat ni Abner a patayen ni David?

⁹ Idi nakisarita ni David ken Ari Saul nga awitna ti ulo ni Goliat, adda dua a lallaki a nakakita iti dayta. Ti maysa ket ti anak ni Saul a ni Jonatan, a nakitulag a makigayyem ken David. Ti sabali ket ni Abner a pangulo ti buyot. (1 Sam. 17:57–18:3) Idi agangay, sinuportaran ni Abner ti plano ni Saul a mangpatay ken David. Insurat ni David, ‘dagiti manangikuspil sapsapulenda ti kararuak.’ (Sal. 54:3; 1 Sam. 26:1-5) Apay a naiduma ti rikna ni Jonatan iti reaksion ni Abner ken David? Kas ken Jonatan, ammo ni Abner a pinili ti Dios ni David nga agbalin nga ari ti Israel. Kalpasan ti ipapatay ni Saul, impakita koma ni Abner ti kinapakumbaba ken pinaneknekanna a matalek iti Dios babaen ti panangsuportana ken David, saan nga iti anak ni Saul a ni Is-boset. Idi agangay, idi nakidenna ni Abner iti kamalala ni Ari Saul, mabalin a tinarigagayannan ti agari.—2 Sam. 2:8-10; 3:6-11.

10. Apay a saan a matalek ni Absalom iti Dios?

¹⁰ Gapu iti kinatangsit, saan nga impakita ni Absalom nga anak ni David ti kinamatalekna iti Dios. “Nagpaaramid ni Absalom iti karuahe nga agpaay kenkuana, nga addaan kabkabalio ken addaan limapulo a lallaki nga agtaray iti sangona.” (2 Sam. 15:1) Inagawna pay ti kinamatalek dagiti tattao. Kas ken Abner, kayatna met a patayen ni David uray ammona a ni David ti pinulotan ni Jehova kas ari ti Israel.—2 Sam. 15:13, 14; 17:1-4.

11. Ania ti maadaltayo iti salaysay ti Biblia maipapan kada Abner, Absalom, ken Baruc?

¹¹ Nalawag a ti pagarigan da Abner ken Absalom ipakitada a gapu iti napalalo nga ambision nalaka laeng a saan nga agmatalek ti maysa iti Dios. Siempre, saan nga agaramid ti matalek nga adipen ni Jehova iti inaagum ken dakes nga aramid. Ngem ti tarigagay a bumaknang wenno agbalin a nalatak iti daytoy  a lubong ket makadadael met iti espiritualidad ti maysa a Kristiano. Mabalin a saantayo nga ammo no apay a temporario a napukaw ni Baruc, a sekretario ni propeta Jeremias, ti pokusna. Kastoy ti imbaga ni Jehova ken Baruc: “Adtoy! Ti binangonko rebbaek, ket ti immulak parutek, uray pay ti mismo nga intero a daga. Ngem no maipapan kenka, agtultuloy nga isapsapulam ta bagim iti naindaklan a bambanag. Dika itultuloy ti agsapul.” (Jer. 45:4, 5) Impangag ni Baruc ti pannubngar. Nagsayaat met a laglagipentayo dagitoy a sasao ti Dios bayat nga ur-urayentayo ti panungpalan daytoy dakes a lubong!

12. Ilawlawagmo no apay a saantayo a matalek iti Dios no ti laeng kayattayo ti aramidentayo.

¹² Masapul nga agpili ni Daniel, maysa a kabsat a taga-Mexico, no agbalin a matalek iti Dios wenno ti laeng kayatna ti aramidenna. Kayatna nga ikasar ti babai a saan a manamati. Kinuna ni Daniel: “Intultuloyko ti nagsurat kenkuana uray idi payunirakon. Ngem idi agangay, nagpakumbabaak ket imbagak iti aduan kapadasan a panglakayen a mariribukanak no asino ti pangipakitaak iti kinamatalek. Tinulongannak tapno maawatak a masapul nga isardengkon ti agsurat tapno maipakitak a matalekak iti Dios. Babaen ti adu a kararag ken lulua, inaramidko dayta. Di nagbayag, naragragsakakon iti ministerio.” Idi agangay, nangasawa ni Daniel iti nagsayaat a Kristiano a babai ket agserserbi itan kas manangaywan iti sirkito.

13. Idi nagbasol ni David, kasano a nagmatalek ni Natan iti Dios ken kasta met ken ni David?

¹³ Ti kinamatalek ken Jehova mabalin nga apektaranna no dadduma ti kinamatalektayo iti tao. Nagtalinaed a matalek ni propeta Natan iti Dios ken matalek met ken David. Naammuan ni Natan a nakikamalala ni David ken implanona pay ti pannakapapatay ti asawa ti babai iti paggugubatan. Uray no matalek ni Natan ken David, nagtulnog ken nagtignay a situtured ti propeta idi imbaon ni Jehova a mangtubngar ken David. Nainsiriban ken naasi a tinubngar ni Natan ni David. Tapno matulonganna ni David a mangbigbig iti kinadagsen dagiti basolna, nangusar iti ilustrasion maipapan iti maysa a baknang a nangala iti kakaisuna a karnero ti napanglaw a lalaki. Idi nakapungtot ni David iti inaramid ti baknang a lalaki, kinuna ni Natan: “Sika a mismo ti lalaki!” Nabigbig ni David ti basolna!—2 Sam. 12:1-7, 13.

14. Kasano a maipakitam a matalekka ken Jehova ken kasta met iti gayyemmo wenno kabagiam?

 ¹⁴ Makatulong kenka ti kinamanangngaasi no maipasangoka iti agduma a pangipakitaan iti kinamatalek. Kas pagarigan, ammom nga adda nadagsen a basol nga inaramid ti maysa a kapammatiam. Mabalin a kayatmo ti agmatalek kenkuana, nangruna no nasinged a gayyemmo wenno kabagiam. Ngem no kalubam ti dakes nga aramidna, saanka a matalek iti Dios. Siempre, masapul nga ipangpangrunam ti kinamatalekmo ken Jehova. Gapuna, kas ken Natan, agbalinka a naasi ngem natibker. Paregtaem ti gayyemmo wenno kabagiam nga agpatulong kadagiti panglakayen. No saanna nga aramiden dayta iti kabiitan a panawen, ti kinamatalek iti Dios ti mangtignay kenka a mangibaga iti dayta kadagiti panglakayen. No aramidem dayta, ipakpakitam ti kinamatalekmo ken Jehova ken asim iti gayyemmo wenno kabagiam, ta ikagumaan dagiti Kristiano a panglakayen a siaalumamay a tulongan dayta nga indibidual.—Basaen ti Levitico 5:1; Galacia 6:1.

15, 16. Apay a kasapulan ni Husai ti tured tapno maipakitana a matalek iti Dios?

¹⁵ Kasapulan ni Husai ti tured tapno maipakitana ti kinamatalek iti Dios. Ni Husai ket matalek a gayyem ni Ari David. Ngem nasubok ti kinamatalekna idi inagaw ni Absalom nga anak ni David ti puso dagiti tattao ket kayatna nga agawen ti Jerusalem ken ti kinaari. (2 Sam. 15:13; 16:15) Pimmanaw ni David iti siudad, ngem ania ti aramidenen ni Husai? Ni ngata Absalom ti pangipakitaanna iti kinamatalekna, wenno sumurot iti lakayen nga ari a mangisalsalakan iti biagna? Gapu ta kayatna ti agmatalek iti pinulotan ti Dios nga ari, sinabet ni Husai ni David iti Bantay dagiti Olibo.—2 Sam. 15:30, 32.

¹⁶ Kiniddaw ni David nga agsubli ni Husai idiay Jerusalem ket agpammarang a gayyem ni Absalom tapno saan nga agballigi ti balakad ni Ahitofel. Uray napeggad, inrisgo ni Husai ti biagna ket pinaneknekanna a matalek ken Jehova ken inaramidna ti kiniddaw ni David. Kas iti inkararag ni David, saan a nagballigi ti balakad ni Ahitofel gapu iti balakad ti natured a ni Husai.—2 Sam. 15:31; 17:14.

17. Apay a kasapulantayo ti tured tapno maipakitatayo ti kinamatalek?

¹⁷ Kasapulantayo ti tured tapno agbalintayo a matalek ken Jehova. Adu kadatayo ti situtured a nangsango kadagiti pakasuotan manipud iti pamilia, katrabahuan, wenno kadagiti agtuturay tapno maipakitatayo a matalektayo iti Dios. Kas pagarigan, inkaubingan ni Taro a taga-Japan ti agbalin a matalek ken natulnog kadagiti nagannakna. Ar-aramidenna dayta saan a gapu ta obligasionna no di ket kayatna a paragsaken dagiti nagannakna. Gapuna, idi pinaritanda a makikadua kadagiti Saksi ni Jehova, naladingitan ken marigatan a mangibaga nga inkeddengna ti agatender kadagiti Nakristianuan a gimong. Kinuna ni Taro: “Napalalo ti ungetda ket adu a tawen a pinaritandak a bumisita kadakuada. Inkararagko nga agbalinak a natured tapno matakderak ti desisionko. Ita, nagbalbaliwdan ket mabalinko idan a kanayon a bisitaen.”—Basaen ti Proverbio 29:25.

18. Ania ti naadalmo iti daytoy nga artikulo?

¹⁸ Kas kada David, Jonatan, Natan, ken Husai, mariknatayo koma ti napalalo a pannakapnek iti panangipakita a matalektayo ken Jehova. Kasta met, makasursurotayo koma iti saan a kinamatalek da Abner ken Absalom. Sigurado a kayattayo ti agmatalek ken Jehova a kas iti inaramid ni David. Gapu ta imperpektotayo, makaaramidtayo latta iti kamali. Ngem maipakitatayo a ti kinamatalek ken Jehova ti kangrunaan kadatayo.