1, 2. Ania ti nakita ti maysa a kabsat a kurang iti espiritualidadna, ken ania ti inaramidna?

TIN-EDYER ni Robert idi nabautisaran, ngem saanna unay a sinerioso ti kinapudno. Kunana: “Diak met idi agar-aramid iti dakes, ngem gapu laeng ta isu ti manamnama kaniak. Ti panagkitada, nabilegak iti naespirituan ta kanayonak a makigimong ken sagpaminsan nga ag-auxiliary pioneer-ak iti kada tawen. Ngem adda idi kurang.”

² Nakita laeng ni Robert ti kurang kenkuana idi nagasawan. Adda dagiti gundaway nga agay-ayamda ken baketna ket agsinsinnaludsodda maipapan iti Biblia. Ni baketna a maysa a naespirituan a tao ket nagalisto a makasungbat ngem mababain ni Robert ta dina masungbatan ti kaaduan a saludsod. Kunana: “Kasla awan a pulos ti ammok. Kinunak iti bagik, ‘No kayatko ti agbalin a naespirituan nga ulo ni baketko, masapul nga agtignayak.’” Kasta ti inaramidna. Kunana: “Maulit-ulit a siaanep nga inadalko ti Biblia ket in-inut a napagtutunosko ti linaonna. Immuneg ti pannakaawatko ken kapatgan iti amin, simminged ti relasionko ken Jehova.”

3. (a) Ania ti masursurotayo iti kapadasan ni Robert? (b) Ania dagiti napateg a punto a pagsasaritaantayo ita?

³ Adu ti napateg a masursurotayo iti kapadasan ni Robert. Mabalin nga adda pannakaammotayo iti Biblia ken regular a  makigimgimongtayo ken mangaskasaba, ngem saan la a dagita ti kasapulan tapno agbalintayo a naespirituan a tao. Wenno mabalin nga adda rimmang-ayantayon, ngem no sukimatentayo ti bagitayo, makitatayo nga adda pay dagiti masapul a parang-ayentayo iti naespirituan. (Fil. 3:16) Tapno agtultuloy ti panagrang-aytayo, makatulong ti sungbat ti tallo a napateg a saludsod iti daytoy nga artikulo: (1) Ania ti makatulong tapno masukimattayo ti pudno a kasasaad ti espiritualidadtayo? (2) Kasano a mapatanortayo ti nabileg nga espiritualidad ken agtultuloy a rumang-ay kas naespirituan a tao? (3) Kasano a makatulong ti nabileg nga espiritualidad iti inaldaw a panagbiagtayo?

4. Siasino ti pagaplikaran ti Efeso 4:23, 24?

⁴ Idi nagserbitayon iti Dios, nangaramidtayo kadagiti panagbalbaliw. Inapektaran dayta ti amin nga aspeto ti biagtayo. Ken saan a nagpatingga dayta idi nagbautisartayo. Naibaga kadatayo a ‘mapabarotayo koma iti puersa a mangtigtignay iti panunottayo.’ (Efe. 4:23, 24) Ti Griego a sao a naipatarus a “mapabarokayo” ipasimudaagna ti agtultuloy a proseso isu a masapul nga agtultuloy a pabaruentayo ti puersa a mangtigtignay iti panunottayo. Gapu ta imperpektotayo, masapul nga itultuloytayo ti agaramid iti panagbalbaliw. Uray dagiti nabayagen nga adipen ti Dios, masapul a taginayonenda a nabileg ti espiritualidadda.—Fil. 3:12, 13.

5. Ania dagiti saludsod a makatulong tapno masukimattayo ti bagitayo?

⁵ Tapno rumang-ay ken mataginayontayo ti espiritualidadtayo, masapul a napudno a sukimatentayo ti bagitayo. Nataengantayo man wenno ubing, isaludsodtayo iti bagitayo: ‘Adda kadi nadlawko a nagrang-ayak a mangipakita a naespirituan ti panagpampanunotko? Makita kadi iti personalidadko a tultuladek ni Kristo? Ania ti ipakita ti kababalinko kadagiti gimong maipapan iti espiritualidadko? Ania ti ipakita ti pannakisarsaritak maipapan kadagiti tarigagayko? Ania ti ipakitana maipapan kaniak ti kababalinko nga agadal, ti panagbadbado ken panaglanglangak, wenno ti reaksionko iti balakad? Ania ti reaksionko no maipasangoak iti sulisog? Nataenganak kadin iti naespirituan kas Kristiano?’ (Efe. 4:13) No pampanunotentayo ti sungbat dagita, marukodtayo ti rimmang-ayantayo iti naespirituan.

6. Ania pay ti mabalin a kasapulantayo tapno masukimattayo ti kasasaad ti espiritualidadtayo?

⁶ Tapno masukimattayo ti kasasaad ti espiritualidadtayo, mabalin a kasapulantayo ti tulong ti sabsabali no dadduma. Inlawlawag ni apostol Pablo a di madlaw ti nainlasagan a tao a di umiso ti takderna iti imatang ti Dios. Ngem maawatan ti naespirituan a tao ti panangmatmat ti Dios, agraman ti di umiso a pamay-an ti panagbiag ti nainlasagan a tao. (1 Cor. 2:14-16; 3:1-3) Dagiti panglakayen nga addaan iti panunot ni Kristo masansan a madlawda dagiti damo a seniales ti nainlasagan a panagpampanunot. No palagipandatayo maipapan kadagita, awaten ken iyaplikartayo kadi ti balakadda? No aramidentayo dayta, ipakpakitatayo a kayattayo ti rumang-ay iti naespirituan.—Ecl. 7:5, 9.

7. Apay a saan laeng a ti pannakaammo iti Biblia ti kasapulan tapno agbalintayo a naespirituan a tao?

⁷ Laglagipentayo a saan laeng a ti kaadda ti pannakaammo iti Biblia ti kasapulan tapno agbalintayo a naespirituan a tao. Adu ti pannakaammo ti nagkauna nga ari a ni Solomon maipapan iti daldalan ni Jehova. Nagbalin pay a paset ti Biblia dagiti sasaona. Ngem saan a nagtalinaed a matalek ken Jehova kas naespirituan a tao. (1 Ar. 4:29, 30; 11:4-6) Ania pay ngarud ti kasapulan? Masapul nga agtultuloytayo a rumang-ay iti naespirituan. (Col. 2:6, 7) Ngem kasano?

8, 9. (a) Ania ti makatulong tapno bumileg ti espiritualidadtayo? (b) Ania ti panggeptayo no agadal ken agutobtayo? (Kitaen ti ladawan iti rugi ti artikulo.)

 ⁸ Pinaregta ni Pablo dagiti nagkauna a Kristiano nga ‘agreggetda a rumang-ay iti kinanataengan.’ (Heb. 6:1) Ania ti masapul nga aramidentayo tapno mayaplikartayo dayta ita? Napateg ti panangadaltayo iti libro nga Agtalinaedka iti Ayat ti Dios. No naadalmon dayta, makitam no kasanom nga iyaplikar dagiti prinsipio ti Biblia. No nalpasmon dayta, mabalin nga adalem ti dadduma a publikasion a makatulong kenka a mangpatibker iti pammatim. (Col. 1:23) Ut-utoben ken ikarkaragmo kadi no kasanom nga iyaplikar dagiti maad-adalmo?

⁹ Laglagipentayo a no agadal ken agutobtayo, ti koma panggeptayo ket patanoren iti pusotayo ti tarigagay a mangparagsak ken Jehova ken agtulnog kadagiti lintegna. (Sal. 40:8; 119:97) Ikagumaantayo met nga iwaksi dagiti manglapped iti naespirituan nga irarang-aytayo.—Tito 2:11, 12.

10. Ania ti mabalin nga aramiden dagiti agtutubo tapno bumileg ti espiritualidadda?

¹⁰ No agtutuboka, adda kadi dagiti naespirituan a kalatmo? Tunggal umatender iti asamblea sirkito ti maysa a brother a Bethelite, ugalina ti makisarita kadagiti kandidato iti bautismo sakbay ti programa. Adu kadakuada ti agtutubo. Damdamagenna dagiti naespirituan a kalatda. Ipakita ti sungbat ti adu a nalawag kadakuada ti kayatda nga aramiden iti panagserbida ken Jehova—nalabit ti panagserbi iti amin-tiempo wenno ti panagserbi iti lugar a dakkel ti panagkasapulanna. Ngem awan sungbat ti dadduma. Mabalin ngata a pakakitaan dayta nga awan pay ti nalawag a naespirituan a kalatda? Kas agtutubo, isaludsodmo iti bagim: ‘Makiramramanak kadi kadagiti naespirituan nga aktibidad gapu laeng ta namnamaen dayta dagiti nagannakko? Sumingsingedak kadi iti Dios gapu ta ay-aywanak ti personal a relasionko kenkuana?’ Siempre, saan laeng a para kadagiti agtutubo ti balakad a maaddaan kadagiti naespirituan a kalat. Makatulong dagita a kalat kadatayo amin nga adipen ni Jehova tapno bumileg ti espiritualidadtayo.—Ecl. 12:1, 13.

11. (a) Ania ti masapul nga aramidentayo tapno talaga a rumang-aytayo iti naespirituan? (b) Ania nga ulidan iti Biblia ti mabalin a tuladentayo?

¹¹ No naammuantayon no ania ti masapul a parang-ayentayo, masapul a mangaramidtayo kadagiti addang a makatulong tapno rumang-aytayo. Nagpateg ti panagbalin a naespirituan a tao ta biag ti nakataya iti dayta. (Roma 8:6-8) Ngem dina kayat a sawen a masapul nga agbalintayo a perpekto. Tulongannatayo ti espiritu ni Jehova a mangaramid kadagiti kasapulan a panagbalbaliw. Ngem masapul latta nga agreggettayo. Maipapan iti Lucas 13:24, naikomento idi ni John Barr a dati a kameng ti Bagi a Manarawidwid, “Adu ti saan a rumang-ay gapu ta dida ikagumaan a pabilgen ti espiritualidadda.” Masapul a tuladentayo ni Jacob a di simmardeng a nakigabbo iti anghel agingga a nabendisionan. (Gen. 32:26-28) Nupay makaparagsak ti panagadal iti Biblia, ditay namnamaen a kasla nobela dayta a naisurat tapno laeng mangparagsak. Masapul nga ikagumaantayo ti agbirok kadagiti naespirituan a gameng a makatulong kadatayo.

12, 13. (a) Ania ti makatulong tapno mayaplikartayo ti Roma 15:5? (b) Kasano a matulongannatayo ti ulidan ken balakad ni apostol Pedro? (c) Kasanom a mapabileg ti espiritualidadmo? (Kitaen ti kahon a “ Dagiti Makatulong Tapno Rumang-ayka iti Naespirituan.”)

¹² Bayat a pabpabilgentayo ti espiritualidadtayo, ikkannatayo ti nasantuan nga espiritu iti bileg a mangbalbaliw iti panunottayo. Iti tulong ti espiritu, in-inut a matuladtayo ti panagpampanunot ni Kristo. (Roma 15:5) Tulongannatayo met dayta a mangparut iti nainlasagan a tarigagay ken mangpatanor kadagiti kababalin a makaay-ayo iti Dios. (Gal. 5:16, 22, 23) No madlawtayo a maiturongen ti pampanunot ken tarigagaytayo kadagiti material  wenno nainlasagan a bambanag, ditay koma sumuksuko. Itultuloytayo a dawaten ti espiritu ket tulongannatayo ni Jehova nga agpokus manen kadagiti umiso a bambanag. (Luc. 11:13) Laglagipentayo ni apostol Pedro. Namin-adu a di nagtignay kas naespirituan a tao. (Mat. 16:22, 23; Luc. 22:34, 54-62; Gal. 2:11-14) Ngem saan a simmuksuko. Iti tulong ni Jehova, in-inut a natuladna ti panagpampanunot ni Kristo. Kabaelantayo met dayta.

¹³ Idi agangay, dinakamat ni Pedro dagiti kababalin a patanorentayo. (Basaen ti 2 Pedro 1:5-8.) Tapno agtultuloy a rumang-aytayo kas naespirituan a tao, makatulong no ‘sipapasnek a pagreggetantayo’ a patanoren dagiti kababalin a kas iti panagteppel, panagibtur, ken nainkabsatan a panagayat. Iti tunggal aldaw, nasayaat no isaludsodmo iti bagim, ‘Ania ti ikagumaak a patanoren ita tapno rumang-ayak iti naespirituan?’

14. Ania ti epektona iti biagtayo no naespirituan ti panagpampanunottayo?

¹⁴ Ti panagpampanunottayo a kas ken Kristo apektaranna ti panagsasaotayo, ti kababalintayo iti trabaho wenno iti eskuelaan, ken dagiti desisiontayo iti inaldaw. Ipakita dagita a desision nga ikagkagumaantayo a tuladen ni Kristo. Kas naespirituan a tao, ditay kayat nga adda mangdadael iti relasiontayo iti nailangitan nga Amatayo. No maipasangotayo kadagiti sulisog, ti kas ken Kristo a kababalin ti tumulong tapno malabanantayo dagita. Sakbay nga agdesisiontayo, panunotentayo dagitoy: ‘Ania dagiti prinsipio ti Biblia a makatulong kaniak nga agdesision? Ania ti aramiden ni Kristo no adda iti daytoy a situasion? Ania a desision ti mangparagsak ken Jehova?’ Tapno masanaytayo nga agpanunot iti kasta a pamay-an, usigentayo ti dadduma a posible a situasion. Iti tunggal situasion, kitaentayo no ania a prinsipio ti Biblia ti makatulong tapno nainsiriban ti desisiontayo.

15, 16. Mangted kadagiti pagarigan no kasano a makatulong ti panangtulad iti panagpampanunot ni Kristo no agdesisiontayo maipapan iti (a) panagpili iti agbalin nga asawa. (b) panagpili iti pakikadkaduaan.

¹⁵ Panagpili iti agbalin nga asawa. Makita ti Nainkasuratan a prinsipio iti 2 Corinto 6:14, 15. (Basaen.) Nalawag nga ipakita ti sasao ni Pablo a naan-anay nga agduma ti naespirituan a tao ken ti pisikal a tao. Kasano a mayaplikar dayta iti panagpili iti agbalin nga asawa?

¹⁶ Pakikadkaduaan. Siputanyo ti Nainkasuratan a prinsipio iti 1 Corinto 15:33. (Basaen.) Saan a makikadua ti naespirituan a tao kadagiti mamagpeggad iti espiritualidadna. Ania dagiti saludsod a makatulong tapno mayaplikarmo dayta? Kas pagarigan, kasano nga agaplikar daytoy iti social networking? Wenno ania ti masapul nga aramidem no adda dimo am-ammo a nangawis kenka a makiay-ayam iti online game?

17-19. Kasano a makatulong ti naespirituan a panagpampanunot iti (a) panangliklik kadagiti awan serserbina nga aktibidad? (b) panangaramid kadagiti kalat iti biag? (c) panangsolbar kadagiti di panagkikinnaawatan?

¹⁷ Aktibidad a manglapped iti naespirituan a panagrang-ay. Mamakdaar ti sasao ni Pablo kadagiti padana a Kristiano. (Basaen ti Hebreo 6:1.) Ania dagiti “natay nga aramid” a  masapul a liklikantayo? Aniaman nga awan serserbina nga aktibidad a di makapabileg iti naespirituan. Makatulong dayta a prinsipio tapno masungbatantayo dagiti saludsod a kas iti: ‘Maibilang kadi a nainlasagan nga aramid daytoy nga aktibidad? Masapul kadi nga awatek daytoy nga iyaw-awisda a panguartaan? Apay a di rumbeng a makiramanak kadagiti grupo a nairanta a mangreporma iti sistema ti lubong?’

¹⁸ Naespirituan a kalat. Iti Sermon ni Jesus iti Bantay, nalawag ti balakadna maipapan iti panangaramid iti kalat. (Mat. 6:33) Dagiti naespirituan a kalat ti ragpaten ti naespirituan a tao. Makatulong ti panangpanunottayo iti dayta a prinsipio tapno masungbatantayo dagitoy: ‘Masapul kadi a mangalaak iti nangatngato nga edukasion? Masapul kadi nga awatek daytoy a trabaho?’

¹⁹ Di panagkikinnaawatan. Kasano a makatulong ti balakad ni Pablo iti kongregasion ti Roma tapno masolbartayo ti di panagkikinnaawatan? (Roma 12:18) Kas panangtulad ken Jesus, ikagumaantayo ti ‘makikappia iti amin a tattao.’ No adda di panagkikinnaawatan, ania ti reaksiontayo? Marigatantayo kadi nga agpakumbaba, wenno pagaammodatayo nga “agar-aramid ti talna” wenno mannakikappia?—Sant. 3:18.

20. Apay a kayatmo ti rumang-ay iti naespirituan?

²⁰ Sumagmamano laeng dagita a pagarigan a mangipakita no kasano a makatulong ti panangutob kadagiti prinsipio ti Biblia tapno makaaramidtayo kadagiti desision a manamnama iti naespirituan a tao. Makatulong ti naespirituan a panagpampanunot tapno inaldaw a naragragsak ken ad-adda a makapnek ti biagtayo. Kastoy ti kuna ni Robert a nadakamat iti rugi: “Idi naaddaanakon iti pudpudno a relasion ken Jehova, nasaysayaatakon nga asawa ken ama. Kontento ken naragsakakon.” Kasta met laeng dagiti bendision a masagraptayo no pagbalinentayo a prioridad ti panangparang-ay iti espiritualidadtayo. Kas naespirituan a tattao, matagiragsaktayo ti ad-adda a makapnek a biag ita ken ti “pudpudno a biag” iti masanguanan.—1 Tim. 6:19.