1, 2. (a) Apay a mapabilegtayo iti ulidan da Noe, Daniel, ken Job? (b) Ania ti kasasaad idi insurat ni Ezequiel ti sasao iti Ezequiel 14:14?

MAIPASPASANGOKA kadi iti pakasuotan a kas iti sakit, problema iti pinansial, wenno pannakaidadanes? Marigatanka kadi no dadduma a mangtaginayon iti ragsakmo nga agserbi ken Jehova? No wen, mapabilegka la ketdi iti ulidan da Noe, Daniel, ken Job. Imperpektoda, ken naipasangoda iti adu a pakasuotan a kas iti mapaspasarantayo, a dadduma kadagita ti namagpeggad iti biagda. Ngem nagtalinaedda a matalek isu nga ibilang ti Dios ida a pagwadan iti pammati ken kinatulnog.—Basaen ti Ezequiel 14:12-14.

² Insurat ni Ezequiel ti pannakatema a tekstotayo idiay Babilonia idi 612 B.C.E. * (Ezeq. 1:1; 8:1) Dandani idin ti naipadto a pannakadadael ti apostata a Jerusalem, a napasamak idi 607 B.C.E.  Manmano laeng idi ti addaan kadagiti kababalin a kas iti impakita da Noe, Daniel, ken Job a marka ti pannakaisalakan. (Ezeq. 9:1-5) Karaman kadakuada da Jeremias, Baruc, Ebed-melec, ken dagiti Recabita.

3. Ania ti usigentayo iti daytoy nga artikulo?

³ Kasta met ita, dagidiay laeng ibilang ni Jehova a nalinteg a kas kada Noe, Daniel, ken Job ti mamarkaanto a maisalakan inton agpatingga daytoy a sistema ti bambanag. (Apoc. 7:9, 14) Usigentayo ngarud no apay nga inusar ni Jehova dagitoy a lallaki kas pagwadan ti kinalinteg. Bayat a saggaysa a pagsasaritaantayo ida, agpokustayo iti (1) no ania dagiti nakasuotanda ken (2) no kasano a matuladtayo ti pammati ken kinatulnogda.

4, 5. Ania dagiti nakasuotan ni Noe, ken apay a naisangsangayan ti panagibturna?

⁴ Dagiti nakasuotan ni Noe. Nakadakdakes idin dagiti tattao idi panawen ni Enoc a lolo ni Noe iti tumeng. Agsasaoda pay ketdi kadagiti “makapakigtot a bambanag” maibusor ken Jehova. (Jud. 14, 15) Kumarkaro idi ti kinaranggas. Kinapudnona, idi tiempo ni Noe, ‘napno ti daga iti kinaranggas.’ Naglasag dagiti dakes nga anghel kas tao, nangasawada, ken naaddaanda kadagiti naranggas nga annak. (Gen. 6:2-4, 11, 12) Ngem naiduma ni Noe. ‘Nakasarak ni Noe iti pabor kadagiti mata ni Jehova. Pinaneknekanna nga awan pagkuranganna iti tengnga dagiti kapatadanna. Nakipagna ni Noe iti pudno a Dios.’—Gen. 6:8, 9.

⁵ Usigentayo ti ipakita dagita maipapan iti daytoy nalinteg a tao. Iti daydi nadangkes a lubong, saan laeng a nakipagna ni Noe iti Dios iti 70 wenno 80 a tawen, a kas iti kaatiddog ti biag ti adu a tao ita. Nagbiag iti daydi a lubong iti dandani 600 a tawen! (Gen. 7:11) Ken saan a kas kadatayo ita, awan idi ti kongregasion ken nalabit uray kakabsatna a pakapabilganna iti naespirituan. *

6. Kasano nga impakita ni Noe ti naidumduma a kinatured?

⁶ Saan a kontento ni Noe a basta nagbalin a naimbag a tao. Nagbalin met a natured a “manangaskasaba iti kinalinteg,” nga impakaammona ti pammatina ken Jehova kadagiti tattao. (2 Ped. 2:5) Insurat ni apostol Pablo: “Babaen itoy a pammati kinondenarna ti lubong.” (Heb. 11:7) Dayta ti makagapu a nauy-uyaw ken naipasango ni Noe iti ibubusor, nalabit napangtaan pay a madangran. Ngem saan a ‘nagpigerger [wenno, nagbuteng] iti tattao.’ (Prov. 29:25) Imbes ketdi, naaddaan iti tured nga ipapaay ni Jehova kadagiti matalek nga adipenna.

7. Ania dagiti pakarigatan a nakaipasanguan ni Noe idi nagibangon iti daong?

⁷ Kalpasan ti nasurok a 500 a tawen a nakipagna ni Noe iti Dios, binilin ni Jehova nga agaramid iti daong a pakaisalakanan ti tao ken animal. (Gen. 5:32; 6:14) Nagrigat la ketdi dayta! Sigurado nga ammo met ni Noe nga agresulta dayta iti ad-adda a pannakauy-uyaw ken ibubusor. Ngem nagtulnog gapu iti pammatina. “Inaramidna ti kasta met laeng.”—Gen. 6:22.

8. Kasano a nagtalek ni Noe nga ipaay ni Jehova ti kasapulan ti pamiliana?

⁸ Ti sabali pay a narigat a nakaipasanguan ni Noe ket ti panangipaayna iti material a kasapulan ti pamiliana. Sakbay ti Layus, masapul nga igaed dagiti tattao ti agtrabaho tapno adda apitenda. Kasta met ni Noe. (Gen. 5:28, 29) Ngem nagpokus iti Dios, saan nga iti material a bambanag. Uray idi agibangbangon iti daong, a mabalin a nagpaut iti  40 wenno 50 a tawen, nagpokus latta ni Noe iti naespirituan ken nagtultuloy a kasta iti 350 pay a tawen kalpasan ti Layus. (Gen. 9:28) Anian a nagsayaat a pagwadan iti pammati ken kinatulnog!

9, 10. (a) Kasano a matuladtayo ti pammati ken kinatulnog ni Noe? (b) Ania ti panangmatmat ni Jehova iti amin a mangsursurot iti lintegna?

⁹ No kasano a matuladtayo ti pammati ken kinatulnog ni Noe. Maaramidtayo dayta no suportarantayo ti kinalinteg ti Dios, iyun-unatay dagiti interes ti Pagarian, ken saantay nga agbalin a paset ti lubong ni Satanas. (Mat. 6:33; Juan 15:19) Sigurado a kagura ti lubong dayta a wagas ti panagbiagtayo. Kinapudnona, uray ita, nagbalin a negatibo ti panangmatmat dagiti tattao kadatayo iti dadduma a lugar gapu iti panangsurottayo iti linteg ti Dios, kas kadagiti mainaig iti panagasawa ken seksual a moralidad. (Basaen ti Malakias 3:17, 18.) Ngem kas ken Noe, ni Jehova ti pagbutngantayo, saan a tattao. Ammotayo a ni laeng Jehova ti makaited iti agnanayon a biag.—Luc. 12:4, 5.

¹⁰ Sika ngay? Agtultuloyka kadi a ‘makipagna iti Dios,’ uray no uyawendaka wenno kritikarendaka wenno no masubok ti pammatim iti Manangipaay iti kasapulam no tumaud dagiti problema iti pinansial? No tuladem ti pammati ken kinatulnog ni Noe, masiguradom nga aywanannaka ni Jehova.—Fil. 4:6, 7.

11. Ania dagiti dakkel a nakasuotan ni Daniel ken ti tallo a kakaduana idiay Babilonia? (Kitaen ti ladawan iti rugi ti artikulo.)

¹¹ Dagiti nakasuotan ni Daniel. Kautibo idi ni Daniel iti siudad ti Babilonia a napno iti idolatria ken espiritismo. Nababa met ti panangkita dagiti taga-Babilonia kadagiti Judio, nga uy-uyawenda ida ken ti Diosda a ni Jehova. (Sal. 137:1, 3) Nasaktan la ketdi iti dayta dagiti matalek a Judio a kas ken Daniel! Ken nakaturong ti mata ti amin kenkuana ken iti tallo a kakaduana a da Ananias, Misael, ken Azarias gapu ta masansanayda nga agserbi iti ari. Maisagsaganaanda pay ketdi iti taraon. Ngem nagbalin a problema dayta ta di kayat ni Daniel a “rugitan ti bagina iti naimas a makmakan ti ari.”—Dan. 1:5-8, 14-17.

12. (a) Ania dagiti nasayaat a kualidad ni Daniel? (b) Ania ti panangmatmat ni Jehova ken Daniel?

¹² Dagiti naidumduma nga abilidad ni Daniel, a rason a naaddaan kadagiti espesial a pribilehio, ti mabalin a karaman kadagiti saan a direkta a nakasuotanna. (Dan. 1:19, 20) Ngem imbes nga agbalin a napangas ken napangato, nagtalinaed a napakumbaba ken naemma, ken kanayon nga inturongna ti dayaw ken Jehova. (Dan. 2:30) Kinapudnona, agtutubo pay laeng ni Daniel idi imbilang ni Jehova a pagwadan ti kinalinteg kas kada Noe ken Job. Maitutop kadi dayta a panagtalek ti Dios ken Daniel? Wen! Nagtalinaed a matalek ken natulnog ni Daniel agingga a nagpatingga ti biagna. Mabalin a dandani idin agtawen iti 100 ni Daniel idi sidudungngo nga imbaga ti anghel ti Dios: “O Daniel, sika a makaay-ayo unay a lalaki.”—Dan. 10:11.

13. Kasano a mabalin a maysa a bendision ni Daniel kadagiti padana a Judio?

¹³ Gapu iti anamong ti Dios, nagbalin ni Daniel a nangato nga opisial bayat ti panagturay ti Babilonia ken ti Medo-Persia. (Dan. 1:21; 6:1, 2) Mabalin nga immaniobra ni Jehova dayta tapno agbalin ni Daniel a bendision kadagiti kailianna, a kas idi ken Jose idiay Egipto ken da Ester ken Mardokeo idiay Persia. * (Dan. 2:48) Panunotenyo ti pannakaliwliwa dagiti kautibo a Judio, kas ken Ezequiel, a makakita iti kasta a panangtulong ni Jehova!

14, 15. (a) Ania dagiti pagpadaan ti kasasaadtayo iti kasasaad ni Daniel? (b) Ania ti masursuro dagiti nagannak ita kadagiti nagannak ni Daniel?

 ¹⁴ No kasano a matuladtayo ti pammati ken kinatulnog ni Daniel. Agnanaedtayo met ita kas ganggannaet iti lubong a nakarugrugit iti moral ken naespirituan gapu iti Babilonia a Dakkel, ti sangalubongan nga imperio ti palso a relihion, a “pagnaedan dagiti sairo.” (Apoc. 18:2) Gapuna, maibilangtayo met a naiduma, nga uray la agbalintayo a puntiria ti pannakalalais. (Mar. 13:13) Ngarud, kas ken Daniel, umasidegtayo ken Jehova a Diostayo. No natulnog ken sipapakumbaba nga agtalektayo kenkuana, ibilangnatayo met a napateg.—Hag. 2:7.

¹⁵ Makasursuro dagiti nagannak ita kadagiti nagannak ni Daniel. Kasano? Uray nakadakdakes ti Juda idi ubing ni Daniel, dimmakkel a managayat iti Dios. Siempre, saan a basta napasamak lattan dayta. Ipakita dayta ti nasayaat a panangsanay dagiti nagannakna. (Prov. 22:6) Ipakita pay ketdi ti nagan ni Daniel, a kaipapananna “Ti Ukomko Isu ti Dios,” a managbuteng iti Dios dagiti nagannakna. (Dan. 1:6, ftn., nwt-E) Isu a dakayo a nagannak, dikay sumuksuko, no di ket an-anusanyo nga isuro dagiti annakyo. (Efe. 6:4) Agkararagkayo met a kaduada ken ikararaganyo ida. No ikagumaanyo nga imula iti pusoda ti kinapudno iti Biblia, adu a bendision ni Jehova ti maawatyo.—Sal. 37:5.

16, 17. Ania dagiti nakasuotan ni Job idi (a) nabaknang ken mararaem? (b) agsagsagaba?

¹⁶ Dagiti nakasuotan ni Job. Naipasango ni Job kadagiti dakkel a panagbalbaliw. Sakbay a direkta a nasuot, isu idi ti “kadakkelan kadagiti amin a taga Daya.” (Job 1:3) Nabaknang, nalatak, ken mararaem unay ni Job. (Job 29:7-16) Ngem saan a nagbalin a nangato ti panangkitana iti bagina wenno nariknana a dina kasapulan ti Dios. Kinapudnona, inawagan ni Jehova kas ti “adipenko,” sa innayonna: “Lalaki nga awan pakababalawanna ken nalinteg, agbuteng iti Dios ken sumiasi iti dakes.”—Job 1:8.

¹⁷ Iti apagdarikmat, naan-anay a nagbaliw ti biag ni Job. Nagbalin a nakapangpanglaw ken nakakaasi. Ammotayo a ti makagapu ket ti manangpardaya a ni Satanas, a siuulbod a nangibaga nga agserserbi laeng ni Job iti Dios para iti pagimbaganna. (Basaen ti Job 1:9, 10.) Saan a tinagilag-an ni Jehova dayta a dakes nga akusasion. Imbes  ketdi, inikkanna ni Job iti gundaway a mangpaneknek iti kinatarnawna, a mangipakita a nadalus ken naimpusuan ti panagdayawna.

18. (a) Ania ti magustuam iti kinatarnaw ni Job? (b) Ania ti maadaltayo maipapan ken Jehova iti panangtratona ken Job?

¹⁸ Nangyeg ni Satanas iti agsasaruno a brutal a pakasuotan ken Job, ket pinanunotna a ti Dios ti makagapu kadagita. (Job 1:13-21) Kalpasanna, dimteng ti tallo nga ulbod a manangliwliwa ket ininsultoda ni Job, nga ibagbagada a dusdusaen ti Dios gapu kadagiti inaramidna! (Job 2:11; 22:1, 5-10) Ngem nagtalinaed a natarnaw ni Job. Nupay adda dagiti tiempo a nadarasudos ti panagsaona, naawatan ni Jehova ti saem a nariknana. (Job 6:1-3) Nakita ti Dios a nakaro ti ladingitna ngem nagmatalek latta Kenkuana uray arigna imbaltog ni Satanas sa binatobatona kadagiti makapainsulto a kinaulbod. Idi nalpas ti pakasuotan ni Job, dinoble ni Jehova dagiti dati nga adda kenkuana, ken ninayonanna pay ti biagna iti 140 a tawen. (Sant. 5:11) Nagtultuloy a ni laeng Jehova ti nagdaydayawanna. Kasano a masiguradotayo a kasta? Ginasut a tawenen a natay ni Job idi insurat ni Ezequiel ti pannakatema a tekstotayo.

19, 20. (a) Kasano a matuladtayo ti pammati ken kinatulnog ni Job? (b) Kasano a maipakitatayo ti asi ti Dios iti panangtratotayo iti sabsabali?

¹⁹ No kasano a matuladtayo ti pammati ken kinatulnog ni Job. Aniaman ti kasasaadtayo, nakasentro latta koma ti biagtayo ken Jehova, a naan-anay nga agtalek ken agtulnogtayo kenkuana buyogen ti intero a puso. Wen, ad-adu ti rasontayo ngem ni Job a mangaramid iti dayta! Panunotentayo: Adu ti ammotayo maipapan ken Satanas ken kadagiti taktikana. (2 Cor. 2:11) Adda naitulong ti libro a Job tapno maawatantayo no apay nga ipalpalubos ti Dios ti panagsagaba. Babaen iti padto ni Daniel, maawatantayo a ti Pagarian ti Dios ket pudno a gobierno nga iturturayan ni Kristo Jesus. (Dan. 7:13, 14) Ammotayo met a dandanin permanente a pagpatinggaen daytoy a Pagarian ti amin a panagsagaba.

²⁰ Itampok met ti kapadasan ni Job a masapul nga ipakitaantayo iti asi dagiti kapammatiantayo a maipaspasango iti pakarigatan. Kas ken Job, adda dagiti mabalin a nadarasudos ti panagsasaoda no dadduma. (Ecl. 7:7) Ngem imbes nga ukomentayo ida, tarusan ken kaasiantayo ida. No kasta ti aramidentayo, tultuladentayo ti naayat ken naasi nga Amatayo a ni Jehova.—Sal. 103:8.

21. Kasano nga ipakita ti 1 Pedro 5:10 ti napasamak kada Noe, Daniel, ken Job?

²¹ Nupay nagbiag iti nagduduma a panawen ken kasasaad da Noe, Daniel, ken Job, inibturanda dagiti nakasuotanda. Ipalagip kadatayo dagiti kapadasanda dagitoy a sasao ni apostol Pedro: “Kalpasan ti panagsagabayo iti apagbiit, ti Dios ti isuamin a di kaikarian a kinamanangngaasi . . . turposennanto a mismo ti panagsanayyo, patibkerennakayto, papigsaennakayto.”—1 Ped. 5:10.

22. Ania ti adalentayo iti sumaruno nga artikulo?

²² Iti naipaltiing a sasao ni Pedro, impasigurado ni Jehova kadatayo a patibkeren ken papigsaenna dagiti adipenna. Agaplikar met dagita a sasao kadatayo ita. Kayattayo amin a papigsaennatayo ni Jehova ken agtultuloytayo a natibker iti panagdaydayawtayo. Gapuna, kayattayo a tuladen ti pammati ken kinatulnog da Noe, Daniel, ken Job! Kas maadaltayto iti sumaruno nga artikulo, nagtalinaedda a matalek gapu ta talaga nga am-ammoda ni Jehova. Kinapudnona, ‘naawatanda ti amin’ a kayat ni Jehova nga aramidenda. (Prov. 28:5) Kasta met laeng kadatayo.