1. Ania ti mangipakita a nagpateg ken Jesus ti Kasuratan?

 PANUNOTEM a maysaka idi a dumdumngeg iti panangisuro ni Jesus. Masansan a nagkotar iti Nasantuan a Kasuratan ken kabesadona dayta! Kinapudnona, iti umuna a nairekord a sasaona kalpasan ti bautismona ken iti dadduma a maudi nga imbagana sakbay a natay, nagkotar ni Jesus iti Kasuratan. b (Deut. 8:3; Sal. 31:5; Luc. 4:4; 23:46) Ken bayat ti tallo ket kagudua a tawen iti nagbaetan dagita a dua a pasamak, masansan a nagbasa ni Jesus iti publiko ken nagkotar iti Kasuratan sa inlawlawagna dagita.​—Mat. 5:17, 18, 21, 22, 27, 28; Luc. 4:16-20.

2. Bayat a dumakdakkel ni Jesus, ania ti nakatulong kenkuana tapno agbalin a pamiliar iti Kasuratan? (Kitaen ti ladawan iti akkub.)

² Adu a tawen sakbay nga inrugi ni Jesus ti ministeriona, namin-adun a nabasa ken nangngegna ti Sao ti Dios. Idiay balayda, sigurado a nangngegna da Maria ken Jose a nagkotar iti Kasuratan bayat ti inaldaw a panagtutungtongda kas pamilia. c (Deut. 6:6, 7) Masiguradotayo a kada Sabbath, mapmapan ni Jesus ken ti pamiliana iti sinagoga. (Luc. 4:16) Bayat ti kaaddana sadiay, dimngeg la ketdi a naimbag bayat a maibasbasa ti Kasuratan. Idi agangay, nasursuron ni Jesus a basaen dagita a Sagrado a Sursurat. Kas resultana, nagbalin a pamiliar ni Jesus iti Kasuratan. Impateg ken impalubosna met a dayta ti mangimpluensia kadagiti ar-aramidenna. Kas pagarigan, subliantayo ti napasamak iti templo idi 12 pay laeng ti tawen ni Jesus. Dagiti mannursuro nga  eksperto iti Mosaiko a Linteg ket “masmasdaaw kadagiti sungbat [ni Jesus] ken iti kaadu ti ammona.”​—Luc. 2:46, 47, 52.

3. Ania ti usigentayo iti daytoy nga artikulo?

³ Maammuan ken maipategtayo met ti Sao ti Dios no regular a basaentayo ti Kasuratan. Ngem kasano nga ad-adu ti masursurotayo iti basbasaentayo? Makasursurotayo iti imbaga ni Jesus kadagidiay pamiliar iti Linteg, a pakairamanan dagiti eskriba, Fariseo, ken Saduceo. Dagita a lider ti relihion masansan a basbasaenda ti Kasuratan, ngem saanda a nagunggonaan iti basbasaenda. Impaganetget ni Jesus ti tallo nga inaramid koma dagita a lallaki tapno ad-adu koma ti masursuroda iti Kasuratan. Makatulong ti imbagana kadakuada tapno mapasayaattayo ti abilidadtayo nga (1) mangtarus iti basbasaentayo, (2) mangbirok kadagiti naespirituan a gameng, ken (3) agpamolde iti Sao ti Dios.

4. Ania ti isuro kadatayo ti Lucas 10:25-29 maipapan iti panagbasa iti Sao ti Dios?

⁴ Kayattayo a tarusan ti kaipapanan ti basbasaentayo iti Sao ti Dios. Ta no saan, saantayo unay a magunggonaan iti basbasaentayo. Kas pagarigan, kitaentayo ti pannakisarita ni Jesus iti “lalaki nga eksperto iti Linteg.” (Basaen ti Lucas 10:25-29.) Idi dinamag ti lalaki ti masapul nga aramidenna tapno agbiag nga agnanayon, tinulongan ni Jesus a mangbirok iti sungbat iti Sao ti Dios. Insaludsod ni Jesus: “Ania ti naisurat iti Linteg? Ania ti pannakaawatmo iti dayta?” Husto ti sungbat ti lalaki ta kinotarna ti ibagbaga dagiti teksto nga ayatenna ti Dios ken ayatenna ti kaarrubana. (Lev. 19:18; Deut. 6:5) Ngem siputanyo ti simmaruno nga imbagana: “Asino a talaga ti kaarrubak?” Ipakita dayta a saan a naawatan ti lalaki ti talaga a kaipapanan ti nabasana iti Kasuratan. Gapu iti dayta, dina ammo no kasanona a siuumiso a mayaplikar dagita a teksto iti biagna.

5. Kasano a makatulong ti kararag ken saan nga agdardaras a panagbasa tapno lalo a maawatantayo ti basbasaentayo?

⁵ Ad-adda a maawatantayo ti Sao ti Dios no iyugalitayo ti nasayaat a panagbasa. Dagitoy ti sumagmamano a singasing a makatulong kenka. Agkararagka sakbay nga agbasaka. Kasapulantayo ti tulong ni Jehova tapno maawatantayo ti Kasuratan, isu a kiddawentayo ti nasantuan nga espirituna tapno makapagpokustayo iti basbasaentayo. Kalpasanna, saanka nga agdardaras nga agbasa. Makatulong dayta tapno maawatam ti basbasaem. Baka makitam a nasaysayaat no agbasaka iti napigsa wenno pasurotam ti audio recording ti Biblia. No ad-adu a sentidom ti usarem, ad-adda a malagipmo ken maipapusom ti Sao ti Dios. (Jos. 1:8) No nalpaskan nga agbasa, agkararagka manen tapno agyamanka ken Jehova iti sagutna a Saona ken kiddawem a tulongannaka tapno mayaplikarmo dagiti nabasam.

6. Bayat nga agbasbasaka, apay a makatulong no saludsodam ti bagim ken agsuratka iti ababa? (Kitaen met ti ladawan.)

⁶ Dagitoy ti dua pay a singasing tapno lalo a mapaunegmo ti pannakaawatmo iti Biblia. Saludsodam ti bagim bayat nga agbasbasaka. No basbasaem ti maysa a salaysay, sungbatam dagitoy: ‘Siasino dagiti kangrunaan a karakter? Asino ti agsasao? Asino ti kasarsaritana, ken apay? Sadino ken kaano a napasamak ti salaysay?’ Makatulong dagita a saludsod tapno mapanunotmo ken masurotam dagiti kangrunaan nga ideya ti basbasaem. Bayat met nga agbasbasaka, agsuratka iti ababa. No  aramidem dayta, mapuersa ti isipmo nga ad-adda a mangpanunot iti nabasam, isu a mas maawatam dayta. Makatulong met ti panagsurat tapno malagipmo ti nabasam. Mabalinmo nga isurat dagiti saludsod, na-research-mo, sumario dagiti kangrunaan a punto, kasano nga usarem ti nabasam, wenno uray ti nariknam iti nabasam. Makatulong ti panangisuratmo kadagita tapno mariknam a ti Sao ti Dios ket personal a mensahe ni Jehova para kenka.

7. Ania a kualidad ti kasapulantayo no agbasbasatayo, ken apay? (Mateo 24:15)

⁷ Imbaga ni Jesus ti napateg a kualidad a kasapulantayo​—ti pannakatarus​—tapno maawatantayo ti basbasaentayo iti Sao ti Dios. (Basaen ti Mateo 24:15.) Ania ti pannakatarus? Ti abilidad a mangilasin no kasano a ti maysa nga ideya ket konektado iti sabali nga ideya ken no kasano nga agdumada, ken mangawat iti kaipapanan ti banag a saan a dagus a nalawag. Kas impakita met ni Jesus, kasapulantayo ti pannakatarus tapno mailasintayo dagiti pasamak a kaitungpalan dagiti padto ti Biblia. Kasapulantayo met dayta a kualidad tapno naan-anay a magunggonaantayo iti amin a mabasbasatayo iti Biblia.

8. Kasanotayo a tarusan ti basbasaentayo?

⁸ Ik-ikkan ni Jehova iti pannakatarus dagiti agdaydayaw kenkuana. Isu nga agkararagka kenkuana, ken kiddawem a tulongannaka a maaddaan iti dayta a kualidad. (Prov. 2:6) Kasanom nga aramiden ti inkararagmo? Panunotem a naimbag ti basbasaem, ken kitaem no kasano a konektado dayta kadagiti banag nga ammomon. Makatulong no usarem dagiti katulongan iti panagadal iti Biblia kas iti Giya iti Panagsukimat Para Kadagiti Saksi ni Jehova. Makatulong dagita tapno maawatam ti kaipapanan ti maysa a teksto ti Biblia ken makitam dagiti pamay-an no kasanom a mayaplikar dayta iti biagmo. (Heb. 5:14) No tarusam ti  basbasaem, umuneg ti pannakaawatmo iti Kasuratan.

9. Ania a napateg a kinapudno iti Kasuratan ti saan nga inakseptar dagiti Saduceo?

⁹ Pamiliar unay dagiti Saduceo iti umuna a lima a libro ti Hebreo a Kasuratan. Ngem saanda nga inakseptar dagiti nagpateg a kinapudno a linaon dagita a libro nga impaisurat ti Dios. Kas pagarigan, kitaentayo no kasano a sinungbatan ni Jesus dagiti Saduceo idi sinubokda maipapan iti panagungar. Insaludsodna kadakuada: “Saanyo kadi a nabasa iti libro ni Moises, maipapan iti siitan a bassit a kayo, nga imbaga ti Dios kenkuana: ‘Siak ti Dios ni Abraham ken Dios ni Isaac ken Dios ni Jacob’?” (Mar. 12:18, 26) Sigurado a namin-adun a nabasa dagiti Saduceo dayta a teksto. Ngem ipakita ti saludsod ni Jesus a dida inakseptar ti panagungar​—ti nagpateg a kinapudno nga isursuro ti Kasuratan.​—Mar. 12:27; Luc. 20:38. d

10. Ania ti masapul a siputantayo bayat nga agbasbasatayo?

¹⁰ Ania ti masursurotayo? No agbasbasatayo, kayattayo a siputan ti amin nga isuro kadatayo ti maysa a bersikulo wenno salaysay ti Biblia. Saan la a dagiti kangrunaan a sursuro ti tarusantayo no di ket uray dagiti naun-uneg a kinapudno ken prinsipio a saan a dagus a makita.

11. Kasanom nga usaren ti 2 Timoteo 3:16, 17 tapno mabirokam dagiti gameng iti Biblia?

¹¹ Kasanom a mabirokan dagiti naespirituan a gameng bayat nga agbasbasaka iti Biblia? Usigem ti kuna ti 2 Timoteo 3:16, 17. (Basaen.) Kunana a ti “intero a Kasuratan [ket] makagunggona” iti (1) panangisuro, (2) panangtubngar, (3) panangilinteg iti bambanag, ken (4) panangdisiplina. Magunggonaanka kadagita nga uppat a banag uray kadagiti libro ti Biblia a saanmo a kanayon nga us-usaren. Analisarem ti salaysay tapno maawatam ti isursurona kenka maipapan ken Jehova, maipapan iti panggepna, wenno maipapan kadagiti nadiosan a prinsipio. Usigem no kasano a makatulong dayta iti panangtubngar. Maaramidmo dayta no panunotem no kasano a makatulong dagiti bersikulo tapno mailasin ken maikkatmo dagiti dakes a tendensia wenno kababalin, ken tapno makapagtalinaedka a matalek ken Jehova. Ammuem no kasano a mausar ti maysa a teksto iti panangilinteg, wenno panangkorehir, iti kamali a kapanunotan a mabalin nga imbaga ti maysa a nakasaritam iti ministerio. Birokem met kadagiti teksto ti aniaman a panangdisiplina a makatulong tapno masanaymo ti bagim a mangtulad iti panagpampanunot ni Jehova. No laglagipem dagita nga uppat a makagunggona a banag, mabirokam dagiti naespirituan a gameng a mangpauneg iti pannakaawatmo kadagiti mabasam iti Biblia.

12. Apay nga insaludsod ni Jesus kadagiti Fariseo ti “Diyo kadi nabasa?”

¹² Insaludsod met ni Jesus ti “Diyo kadi nabasa?” tapno ipakitana a saan a husto ti kapanunotan dagiti Fariseo iti Kasuratan. (Mat. 12:1-7) e Iti dayta a gundaway, dagiti Fariseo inakusaranda dagiti adalan ni Jesus a saanda kano a sinurot ti Sabbath. Kas sungbat, dinakamat ni Jesus ti dua a pagarigan iti Kasuratan ken nangkotar iti bersikulo iti Oseas tapno ipakitana a saan a naawatan dagiti Fariseo ti kaipapanan ti linteg ti Sabbath isu a saanda a naipakita ti asi. Apay a saan a nagpamolde dagita a lallaki iti Sao ti Dios a basbasaenda? No ngamin basaenda dayta, manangkritikar ken napannakkelda. Gapu iti kababalinda, saanda a natarusan ti basbasaenda.​—Mat. 23:23; Juan 5:39, 40.

13. Ania ti masapul a kababalintayo no basbasaentayo ti Biblia, ken apay?

¹³ Masursurotayo iti imbaga ni Jesus a masapul nga umiso ti kababalintayo no basbasaentayo ti Biblia. Saan a kas kadagiti Fariseo, masapul a napakumbaba ken nalakatayo a maisuro. Masapul a ‘sipapakumbaba nga awatentayo ti pannakaimula kadatayo ti sao.’ (Sant. 1:21) No napakumbabatayo, ipalubostayo nga agramut iti pusotayo ti Sao ti Dios. Satay laeng agbalin a naasi, mannakipagrikna, ken naayat a kas iti isursuro ti Biblia no liklikantayo ti agbalin a manangkritikar wenno napannakkel.

14. Kasanotayo nga ammo no agpampamoldetayo iti Biblia? (Kitaen met dagiti ladawan.)

¹⁴ Ti panangtratotayo iti sabsabali mabalin nga ipakitana no agpampamoldetayo iti Sao ti Dios. Saan nga impalubos dagiti Fariseo  a danonen ti Sao ti Dios ti pusoda. Kas resultana, “inukom[da] dagiti awanan basol.” (Mat. 12:7) Iti umasping a pamay-an, ti panangmatmat ken panangtratotayo iti sabsabali ipakitana no agpampamoldetayo iti Sao ti Dios. Kas pagarigan, kanayon kadi nga ibagatayo dagiti nasayaat a makitkitatayo iti sabsabali, wenno alistotayo a mangibaga kadagiti pagkamkamalianda? Naasi ken nalakatayo kadi a mangpakawan, wenno manangkritikar ken agipempempentayo iti sakit ti nakem? Ti sungbattayo kadagita a saludsod ipakitana no ipalpalubostayo a dagiti basbasaentayo ti mangsukog iti panagpampanunot, rikrikna, ken ar-aramidtayo.​—1 Tim. 4:12, 15; Heb. 4:12.

15. Ania ti narikna ni Jesus maipapan iti Nasantuan a Kasuratan?

¹⁵ Impatpateg ni Jesus ti Nasantuan a Kasuratan, ket kastoy ti impadto ti Salmo 40:8 a mariknana maipapan iti Sao ti Dios: “Pagragsakak ti panangaramid iti pagayatam, O Diosko, ken adda iti kaunggak ti lintegmo.” Gapu iti dayta, naragsak ken naballigi iti panagserbina ken Jehova. Naragsak ken naballigitayo met no agreggettayo a mangipapuso iti Sao ti Dios.​—Sal. 1:1-3.

16. Ania dagiti aramidem tapno ad-adu ti masursurom iti panagbasam iti Sao ti Dios? (Kitaen ti kahon a “ Matulongannaka Dagiti Imbaga ni Jesus Tapno Maawatam ti Basbasaem.”)

¹⁶ Maitunos kadagiti imbaga ken inyulidan ni Jesus, maasatayo dagiti abilidadtayo iti panagbasa iti Biblia. Lallalo a maawatantayo dagiti basbasaentayo iti Biblia no agkararagtayo, ditay agdardaras nga agbasa, saludsodantayo ti bagitayo, ken agsurattayo iti ababa. Mausartayo ti pannakatarus no analisarentayo a naimbag dagiti basbasaentayo iti tulong dagiti publikasiontayo a naibatay iti Biblia. Masursurotayo nga usaren a naimbag ti Biblia, uray dagiti teksto a saan unay a pamiliar kadatayo, no birokentayo dagiti naespirituan a gameng kadagita a salaysay. Agpampamoldetayo met iti Sao ti Dios no kanayon nga umiso ti kababalintayo bayat nga agbasbasatayo. No ikagumaantayo nga aramiden dagita, ad-adu ti masursurotayo iti panagbasatayo iti Biblia ken ad-adda nga umasidegtayo ken Jehova.​—Sal. 119:17, 18; Sant. 4:8.