1. Ania ti imbaga ni Jesus kadagiti adalanna maipapan iti tiempo ti panungpalan, ken ania ti impakdaarna kadakuada?

 SUMAGMAMANO nga aldaw sakbay ti ipapatay ni Jesus, dinamag ti uppat nga adalanna: “Anianto ti pagilasinan . . . ti panungpalan daytoy a sistema ti bambanag?” (Mat. 24:3) Mabalin a pampanunoten dagita nga adalan no kasano a maammuanda no kaano nga agpatingga ti Judio a sistema ti bambanag. Iti sungbat ni Jesus, saan la a ti panungpalan ti Judio a sistema ti dinakamatna no di pay ket “ti panungpalan daytoy a sistema ti bambanag” a pagbibiagantayo. Maipapan iti tiempo ti panungpalan, imbaga ni Jesus: “No maipapan iti dayta nga aldaw wenno oras, awan ti makaammo, uray dagiti anghel idiay langit wenno ti Anak, no di laeng ti Ama.” Kalpasanna, pinakdaaranna ti amin nga adalanna nga ‘agtultuloyda a siririing’ ken ‘itultuloyda ti agbantay.’​—Mar. 13:32-37.

2. Apay a masapul nga agtultuloy nga agbantay dagiti Kristiano nga agbibiag bayat ti Judio a sistema ti bambanag?

² Masapul nga agtultuloy nga agbantay dagiti Judio a Kristiano idi umuna a siglo ta nakadepende iti dayta ti biagda. Imbaga ni Jesus kadagiti pasurotna ti siputanda tapno maammuanda no kaano ti panagpatingga ti Judio a sistema ti bambanag. Imbagana: “Inton makitayo a ti Jerusalem ket palikmutan dagiti armada, ammuenyo nga asidegen ti pannakadadaelna.” Iti dayta a tiempo, masapul a tungpalenda ti pakdaar ni Jesus ken “agkamangda koman iti kabambantayan.” (Luc. 21:20, 21) Dagidiay dimngeg iti dayta a pakdaar ket nakalasat idi dinadael dagiti Romano ti Jerusalem.

3. Ania ti usigentayo iti daytoy nga artikulo?

 ³ Agbibiagtayon iti tiempo ti panungpalan daytoy dakes a sistema ti bambanag. Masapul met ngarud nga usarentayo ti abilidadtayo nga agpanunot ken itultuloytayo ti agbantay. Iti daytoy nga artikulo, pagsasaritaantayo no kasanotayo nga agbalin a balanse bayat a sipsiputantayo a naimbag dagiti pasamak iti lubong, no kasanotayo nga agannad, ken no kasanotayo nga usaren ti nabatbati a tiempo iti kasayaatan a pamay-an.

4. Apay nga interesadotayo no kasano a dagiti pasamak ita iti lubong ipakitada a matungtungpalen dagiti padto ti Biblia?

⁴ Adda dagiti nasayaat a rason nga interesadotayo no kasano a dagiti pasamak ita iti lubong ipakitada a matungtungpalen dagiti padto ti Biblia. Kas pagarigan, nangted ni Jesus kadagiti espesipiko a pasamak tapno mailasintayo nga asidegen ti panungpalan ti sistema ni Satanas. (Mat. 24:3-14) Imparegta ni apostol Pedro a siputantayo ti kaitungpalan dagiti padto tapno agtalinaed a natibker ti pammatitayo. (2 Ped. 1:19-21) Mangrugi ti maudi a libro ti Biblia kadagitoy a sasao: “Daytoy ket apocalipsis ni Jesu-Kristo, nga inted kenkuana ti Dios, tapno ipakitana kadagiti adipenna . . . dagiti masapul a mapasamak iti mabiit.” (Apoc. 1:1) Isu nga interesadotayo unay kadagiti agdama a pasamak iti lubong ken no kasano a mabalin nga ipakita dagita a matungtungpalen dagiti padto ti Biblia. Baka magagarantay pay ketdi a pagsasaritaan dagita.

5. Ania ti masapul a liklikantayo, ngem ania ti masapul nga aramidentayo? (Kitaen met dagiti ladawan.)

⁵ Nupay kasta, no pagsasaritaantayo dagiti padto ti Biblia, masapul a liklikantayo a pugtuan dagiti sumaruno a mapasamak. Apay? Gapu ta saantayo a kayat ti mangibaga iti aniaman a mabalin a mamagsisina iti kongregasion. Kas pagarigan, mabalin a madamagtayo a pagsasaritaan dagiti lider ti lubong no kasanoda a masolbar ti maysa a problema ken ipaay ti talna ken talged. Imbes a dagus nga ipapantayo a dayta ti kaitungpalan ti padto iti 1 Tesalonica 5:3, ammuentayo ketdi dagiti naipablaak a kabaruan nga impormasion. No ibataytayo ti pagsasaritaantayo kadagiti impablaak ti organisasion ni Jehova, tultulongantayo ti kongregasion nga agtalinaed nga ‘agkaykaysa iti panunot ken opinion.’​—1 Cor. 1:10; 4:6.

6. Ania dagiti masursurotayo iti 2 Pedro 3:11-13?

⁶ Basaen ti 2 Pedro 3:11-13. Tulongannatayo ni apostol Pedro tapno agtultuloy a balanse ti panangmatmattayo no us-usigentayo dagiti padto ti Biblia. Imparegtana a ‘laglagipentayo ti kaadda ti aldaw ni Jehova.’ Apay? Saan a gapu ta kayattayo a maammuan no kaano ti “aldaw ken oras” nga iyeg ni Jehova ti Armagedon, no di ket kayattayo nga usaren ti nabatbati a tiempo tapno maaddaantayo iti ‘nasantuan a kababalin ken aramid a mangipakita iti debosiontayo iti Dios.’ (Mat. 24:36; Luc. 12:40) Iti sabali a pannao, kayattayo nga agtalinaed a nasayaat ti kababalintayo ken siguraduen nga amin nga ar-aramidentayo para ken Jehova ket gapu iti nauneg nga ayattayo kenkuana. Tapno agtultuloy a maaramidtayo dayta, masapul nga agannadtayo.

7. Kasanotayo nga ipakita nga agan-annadtayo? (Lucas 21:34)

⁷ Imbaga ni Jesus kadagiti adalanna a siputanda saan la a dagiti pasamak iti lubong no di pay ket ti bagida. Nalawag dayta a pakdaarna a naisurat iti Lucas 21:34. (Basaen.) Imbaga ni Jesus: “Agannadkayo.” Ti naannad a tao ket alerto iti aniaman a peggad a mabalin a mangdadael  iti relasionna ken Jehova, ken adda dagiti aramidenna tapno maliklikanna dagita. Iti kasta, makapagtalinaed iti ayat ti Dios.​—Prov. 22:3; Jud. 20, 21.

8. Ania ti imparegta ni apostol Pablo kadagiti Kristiano?

⁸ Imparegta ni apostol Pablo kadagiti Kristiano nga agannadda. Kas pagarigan, imbagana kadagiti Kristiano iti Efeso: “Itultuloyyo ti agannad a naimbag a ti pannagnayo ket saan a kas kadagiti maag no di ket kas kadagiti masirib.” (Efe. 5:15, 16) Kanayon a padpadasen ni Satanas a dadaelen ti espiritualidadtayo, isu a balbalakadannatayo ti Biblia nga ‘itultuloytayo a tarusan ti pagayatan ni Jehova’ tapno ammotayo a sanguen ti aniaman a kita ti peggad.​—Efe. 5:17.

9. Kasanotayo a matarusan ti pagayatan ni Jehova para kadatayo?

⁹ Saan nga ibaga ti Biblia ti amin a peggad a mabalin a mangdadael iti pannakigayyemtayo ken Jehova. Masansan a masapul nga agdesisiontayo kadagiti banag a saan a direkta a dinakamat ti Kasuratan. Tapno makaaramidtayo kadagiti nainsiriban a desision, masapul a tarusan wenno ammuentayo ti “pagayatan ni Jehova.” Maaramidtayo dayta no regular nga adalen ken utobentayo ti Sao ti Dios. No ad-adda a maawatantayo ti pagayatan ni Jehova ken tuladentayo ti “panunot ni Kristo,” ad-adda la ketdi nga agbalin a “kas kadagiti masirib” ti pannagnatayo, uray no awan dagiti espesipiko a linteg a mangibaga kadagiti aramidentayo. (1 Cor. 2:14-16) Nalaka laeng a mailasin ti dadduma a peggad. Ngem narigrigat a mailasin ti dadduma.

10. Ania ti dadduma a peggad a masapul a liklikantayo?

¹⁰ Dadduma a peggad a masapul a liklikantayo ket ti panagalembong wenno panag-flirt, panagbarbartek, sobra a pannangan, nasakit a panagsasao, agraman dagiti naranggas a pabuya, pornograpia, ken dagiti umasping kadagita. (Sal. 101:3) Ti kabusortayo, ti Diablo, ket kanayon nga agbirbirok kadagiti gundaway tapno madadaelna ti pannakigayyemtayo ken Jehova. (1 Ped. 5:8) No saantayo nga agbantay, mabalin nga imula ni Satanas iti isip ken pusotayo dagiti bukel ti apal, kinaulbod, kinaagum, gura, kinapannakkel, ken panagipempen iti sakit ti nakem. (Gal. 5:19-21) Iti damo, baka mariknatayo a saan unay a napeggad dagita. Ngem no ditay paruten a dagus, dumakkelda kas iti makasabidong a mula ken mangpataudda iti problema.​—Sant. 1:14, 15.

11. Ania ti di madmadlaw a peggad a masapul a liklikantayo, ken apay?

¹¹ Ti maysa a di madmadlaw a peggad ket ti dakes a kakadua. Kitaentayo daytoy a situasion. Adda katrabahuam a saan a Saksi ni Jehova. Kayatmo a nasayaat ti impresion ti katrabahuam kadagiti Saksi ni Jehova isu a nasingpetka kenkuana ken tultulongam. Mabalin a sagpaminsan a makikaduaka pay ketdi kenkuana iti pangngaldaw. Din agbayag, kanayonen. No dadduma, immoral dagiti estoriana, ket mabalin a saanmo a pinampansin dagita idi damo. Idi kuan, naruamkan a makangngeg kadagiti kasta nga estoria ket okey laengen dagita kenka. Maysa nga aldaw, inawisnaka nga aginumkayo kalpasan ti trabahoyo ket nagwenka. Din agbayag, matultuladmon ti panagpampanunot ti katrabahuam. Panagkunam, kasano pay kabayag sakbay a matuladmo ti ar-aramidenna? Siempre, masapul a nasingpet ken narespetotayo iti amin. Ngem laglagipentayo a napigsa ti impluensia kadatayo dagiti pakikadkaduaantayo. (1 Cor. 15:33) No agannadtayo, kas imparegta ni Jesus, liklikantayo ti di kasapulan a pannakikadua kadagidiay saan a sumursurot kadagiti pagalagadan ni Jehova. (2 Cor. 6:15) Makitatayo ti peggad ket liklikantayo dayta.

12. Ania idi ti masapul nga aramiden dagiti adalan ni Jesus bayat nga ur-urayenda ti panungpalan ti sistema ti bambanag?

¹² Kayat ni Jesus nga adu ti aramiden dagiti adalanna bayat nga ur-urayenda ti panungpalan ti sistema ti bambanag, isu nga inikkanna ida iti trabaho. Imbilinna nga ikasabada ti naimbag a damag “idiay Jerusalem, iti intero a Judea ken Samaria, ken agingga iti kaadaywan a paset ti daga.” (Ara. 1:6-8) Nagdakkel a trabaho dayta dagiti pasurot ni Jesus! Gapu ta inaramidda ti amin a kabaelanda a mangasaba, nausarda ti tiempoda iti kasayaatan a pamay-an.

13. Apay a masapul nga usarentayo ti tiempotayo iti kasayaatan a pamay-an? (Colosas 4:5)

¹³ Basaen ti Colosas 4:5. Tapno maipakitatayo a naannadtayo, masapul nga usigentayo no kasanotayo nga us-usaren ti tiempotayo. Maapektaran ti tunggal maysa kadatayo kadagiti “di ninamnama a pasamak.” (Ecl. 9:11) Iti aniaman nga oras, mabalin a bigla a mataytayo.

14-15. Kasanotayo a mausar ti tiempotayo iti kasayaatan a pamay-an? (Hebreo 6:11, 12) (Kitaen met ti ladawan.)

¹⁴ Mausartayo ti tiempotayo iti kasayaatan a pamay-an no aramidentayo ti pagayatan ni Jehova ken patibkerentayo ti pannakigayyemtayo kenkuana. (Juan 14:21) Masapul nga  ‘agbalintayo a natibker ken di magaraw, a kanayon nga adu ti aramidentayo iti trabaho ti Apo.’ (1 Cor. 15:58) Ket inton dandani man manungpal ti biagtayo wenno inton umayen ti panungpalan daytoy dakes a sistema, awan ti pagbabawyantayo.​—Mat. 24:13; Roma 14:8.

¹⁵ Ita, agtultuloy nga iwanwanwan ni Jesus dagiti adalanna bayat nga ikaskasabada ti maipapan iti Pagarian ti Dios iti intero a daga. Naaramidnan ti pasetna. Babaen ti organisasion ni Jehova, sansanayennatayo ni Jesus no kasano ti mangasaba ken ipapaayna dagiti alikamen a kasapulantayo tapno maikasabatayo ti naimbag a damag. (Mat. 28:18-20) Ar-aramidentayo ti pasettayo no nagagettayo a mangasaba ken mangisuro ken no agtultuloytayo nga agbantay bayat nga ur-urayentayo a pagpatinggaen ni Jehova daytoy sistema ti bambanag. No iyaplikartayo ti balakad ti Hebreo 6:11, 12, siiirut a mapetpetantayo ti namnamatayo “agingga iti panungpalan.”​—Basaen.

16. Ania ti determinasiontayo?

¹⁶ Inkeddengen ni Jehova ti aldaw ken oras a pagpatinggaenna ti sistema ni Satanas. Inton dumtengen dayta nga aldaw, siguraduen ni Jehova a matungpalen ti amin a padto maipapan iti baro a lubong nga impaisuratna iti Saona. No dadduma, baka kasla nataktak ti panagpatingga daytoy a sistema. Nupay kasta, ti aldaw ni Jehova ket “saanto a maladaw!” (Hab. 2:3) Determinadotayo koma ngarud nga ‘itultuloy a padaanan ni Jehova,’ nga ipakitatayo ti ‘panaguraytayo iti Diostayo a mangisalakan kadatayo.’​—Mik. 7:7.