1. Ania ti mabalin nga epekto ti pannakailaksid ti maysa nga ipatpategtayo?

ADDA kadin ipatpategmo a nailaksid iti kongregasion? Nagsakit la ketdi dayta! “Idi natay ti matalek nga asawak kalpasan ti 41 a tawen a panagasawami,” imbaga ti kabsat nga agnagan Hilda, “impagarupko no daydin ti kasaeman a mapadasak. * Ngem nakarkaro pay gayam idi pinanawan ti anakko ti kongregasion, ni baketna, ken ti annakda.”

2-3. Sigun iti Salmo 78:40, 41, ania ti marikna ni Jehova no panawan isuna dagiti adipenna?

² Panunotem laengen no kasano kaladingit ni Jehova idi timmallikud kenkuana ti dadduma nga anghel a miembro ti pamiliana! (Jud. 6) Ken panunotem ti saem a nariknana idi nakitana a maulit-ulit a nagrebelde kenkuana ti dungdungnguenna nga ili, dagiti Israelita. (Basaen ti Salmo 78:40, 41.) Masiguradom a masaktan met ti naayat a nailangitan nga Amatayo no panawan isuna ti maysa nga ipatpategmo. Maawatanna ti ladingit a marikriknam. Siaasi nga ipaaynanto ti pammaregta ken suporta a kasapulam.

³ Iti daytoy nga artikulo, pagsasaritaantayo no ania ti aramidentayo tapno maawattayo ti tulong ni Jehova bayat a dadaerantayo ti kasta a nasaem a pasamak. Usigentayo met no kasano a matulongantayo dagiti kakabsat iti kongregasion a makapaspasar iti kasta a situasion. Ngem usigentayo nga umuna no ania dagiti negatibo a panagpampanunot a masapul a liklikantayo.

4. Ania ti marikna ti adu a nagannak no ti anakda panawanna ni Jehova?

⁴ No ti maysa a maipatpateg nga anak panawanna ni Jehova, natural laeng a panunoten dagiti nagannak no ania pay koma ti inaramidda tapno matulonganda ti anakda nga agtalinaed iti kinapudno. Kastoy ti inamin ti kabsat a ni Luke idi nailaksid ti barona:  “Pinabasolko ti bagik. Namin-adu a natagtagainepko dayta. Agsangitak no dadduma ken nagsaem ti marikriknak.” Masansan a pinampanunot ti kabsat a ni Elizabeth a naipasango iti kasta met la a situasion: “Ania ti nagkurangak kas maysa nga ina? Pinanunotko a napaayak la ketdi a mangitukit iti kinapudno iti puso ti anakko.”

5. Asino ti makimbasol no panawan ti maysa ni Jehova?

⁵ Laglagipentayo nga inikkan ni Jehova ti tunggal maysa kadatayo iti sagut a wayawaya nga agpili. Kaipapanan dayta a mabalintayo a pilien ti agtulnog kenkuana wenno saan. Adda dagiti agtutubo a saan a napadakkel iti kinapudno a nangpili nga agserbi ken Jehova ket nagballigida iti panagserbida. Nupay inkagumaan dagiti nagannak a padakkelen dagiti annakda sigun kadagiti prinsipio ti Biblia, dadduma nga annak ti timmallikud iti kinapudno idi dadakkeldan. Masapul ngarud a personal nga agdesisiontayo no agserbitayo ken Jehova. (Jos. 24:15) Isu a dakayo nga agladladingit a nagannak, labananyo ti tendensia a mangpanunot a basolyo ti dakes a napasamak iti anakyo!

6. Ania ti mabalin nga epekto iti annak no panawan ti maysa a nagannakda ti Dios?

⁶ No dadduma, panawan ti maysa a nagannak ti kinapudno ken uray ti pamiliana. (Sal. 27:10) Mabalin a narigat daytoy para kadagiti annak a mangibilbilang iti dayta a nagannak kas pagtuladan. Imbaga ni Esther, a nailaksid ti tatangna: “Masansan idi nga agsangitak ta ammok a saan laeng nga in-inut nga umad-adayo ni Tatang iti kinapudno, no di ket igaggagarana a panawan ni Jehova. Ay-ayatek ni Tatang isu nga idi nailaksid, kanayon a maseknanak iti kasasaadna nga uray la madanaganak unay.”

7. Ania ti marikna ni Jehova iti maysa nga ubing wenno agtutubo a nailaksid ti maysa a nagannakna?

⁷ Dakayo nga ubbing wenno agtutubo, no nailaksid ti maysa kadagiti nagannakyo, makipagladingitkami kadakayo! Masiguradoyo a maawatan met ni Jehova ti nasaem a marikriknayo. Dungdungnguennakayo ken apresiarenna ti kinamatalekyo, ken kasta met ti marikriknami​—dakami a kakabsatyo. Laglagipenyo met a saanyo a basol dagiti desision nga inaramid ti nagannakyo. Kas nadakamaten, inikkan ni Jehova ti tunggal tao iti wayawaya nga agpili. Tunggal dedikado ken bautisado nga indibidual masapul nga “ibaklay[na] ti bukodna a responsabilidad.”​—Gal. 6:5, ftn.

8. Ania ti mabalin nga aramiden dagiti matalek a miembro ti pamilia bayat nga ur-urayenda nga agsubli ken Jehova ti patpatgenda? (Kitaen met ti kahon nga “ Agsublika ken Jehova.”)

⁸ No adda ipatpategmo a nangpanaw ken Jehova, natural laeng a namnamaem nga addanto aldaw nga agsubli Kenkuana. Ngem bayat nga ur-urayem dayta, ania ti mabalinmo nga aramiden? Ikagumaam a patibkeren ti espiritualidadmo. Iti kasta, agbalinka nga ulidan kadagiti kapamiliam ken uray iti nailaksid. Addaankanto met iti bileg a mangibtur iti nasaem a marikriknam. Pagsasaritaantayo ti dadduma a praktikal a pamay-an a mabalinmo nga aramiden.

9. Ania dagiti pamay-an a mapabilegnaka ni Jehova? (Kitaem met ti kahon a “ Dagiti Makaliwliwa a Teksto no Adda Patpatgem a Nangpanaw ken Jehova.”)

⁹ Itultuloymo ti nasayaat a naespirituan a rutinam. Napateg nga itultuloymo a patibkeren ti  bagim ken ti dadduma a kapamiliam. Kasano? Mapabilegnaka ni Jehova no inaldaw a basaem ti Sao ti Dios ken utobem dayta ken regular a makigimongka. Imbaga ni Joanna, a nailaksid ti tatang ken manangna: “Agkalma ti riknak no basaek ti maipapan kadagiti karakter ti Biblia a kas kada Abigail, Ester, Job, Jose, ken Jesus. Maparparegtaak iti ulidanda ken makatulong dayta kaniak nga agbalin a mas positibo. Makaparegta met unay kaniak dagiti orihinal a kantatayo.”

10. Ania ti ibaga ti Salmo 32:6-8 a makatulong tapno madaeram ti ladingit a marikriknam?

¹⁰ Ibagam ken Jehova ti amin a pakadanagam. No nalidayka, itultuloymo ti agkararag kenkuana. Ipakaasim iti nadungngo a Diostayo a tulongannaka a mangtulad iti panagpampanunotna ken ‘ikkannaka iti pannakaawat ken isuronaka iti dalan a rebbeng a papanam.’ (Basaen ti Salmo 32:6-8.) Siempre, mabalin a marigatanka a mangibaga ken Jehova iti talaga a marikriknam. Ngem naan-anay a maawatan ni Jehova ti nasaem a marikriknam. Ay-ayatennaka unay ken iparparegtana nga iyebkasmo kenkuana dagiti linaon ti pusom.​—Ex. 34:6; Sal. 62:7, 8.

11. Sigun iti Hebreo 12:11, apay a masapul nga agtalektayo iti naayat a disiplina ni Jehova? (Kitaen met ti kahon a “ Panangilaksid​—Nadungngo a Panangdisiplina ni Jehova.”)

¹¹ Suportaram ti desision. Ti panangilaksid ket paset ti urnos ni Jehova. Ti nadungngo a panangilintegna ket pagsayaatan ti tunggal maysa, a pakairamanan ti nakabasol. (Basaen ti Hebreo 12:11.) Mabalin nga ibaga ti dadduma iti kongregasion a saan nga umiso ti desision dagiti panglakayen a panangdisiplina iti maysa. Ngem laglagipem a dagita a tattao masansan a dida kayat a dakamaten dagiti negatibo a banag maipapan iti tao a nakabasol. Ditay ammo ti amin a napasamak. Nainsiriban ngarud nga agtalektayo a dagiti panglakayen a  nangtaming iti kaso sinurotda dagiti prinsipio ti Biblia ken nangukomda “para ken Jehova.”​—2 Cron. 19:6.

12. Ania dagiti nasayaat a resulta a napadasan ti dadduma gapu ta sinuportaranda ti urnos ni Jehova a panangdisiplina?

¹² No suportaram ti desision dagiti panglakayen a panangilaksid iti maysa a patpatgem, tultulongam isuna nga agsubli ken Jehova. “Nakarigrigat a liklikan ti aniaman a pannakilangen iti nailaksid nga adulton nga anakmi,” inamin ni Elizabeth, a nadakamat itay. “Ngem idi nakasublin ken Jehova, inaminna a rumbeng laeng a mailaksid. Idi agangay, inyebkasna ti panagyamanna kadagiti nasayaat a nasursurona. Nabigbigko ti kinapateg ti disiplina ni Jehova,” kinunana. Imbaga met ni Mark a lakayna: “Idi agangay, imbaga ti anakmi a ti maysa a rason a kayatna ti agsubli ket inaramidmi ti rumbeng nga aramidenmi. Nakaragragsakak ta tinulongannakami ni Jehova nga agtulnog.”

13. Ania ti makatulong kenka a mangibtur iti nasaem a marikriknam?

¹³ Makisaritaka kadagiti gagayyem a makaawat iti marikriknam. Makilangenka kadagiti nataengan iti naespirituan a makatulong tapno agtalinaedka a positibo. (Prov. 12:25; 17:17) Imbaga ni Joanna a nadakamat itay: “Panagriknak ket agmaymaysaak. Ngem idi nakisaritaak kadagiti mapangnamnamaan a gagayyem, natulonganak nga agibtur.” Ngem kasanon no makaibaga ti dadduma a kakabsat iti kongregasion iti bambanag a mangpakaro iti saem a marikriknam?

14. Apay a masapul nga ‘itultuloytayo ti agiinnanus ken situtulok nga agpipinnakawan’?

¹⁴ An-anusam dagiti kapammatiam. Kinapudnona, ditay manamnama a magustuantayo ti amin nga ibagada. (Sant. 3:2) Imperpektotayo amin, isu a dika koma masdaaw no di ammo ti dadduma ti ibagada wenno makaibagada iti pakasaktam a dida met igaggagara. Laglagipem ti balakad ni apostol Pablo: “Itultuloyyo ti agiinnanus ken situtulok nga agpipinnakawan uray no adda pangibatayan ti maysa nga agreklamo maibusor iti sabali.” (Col. 3:13) Imbaga ti maysa a kabsat nga adda kabagianna a nailaksid: “Tinulongannak ni Jehova a mangpakawan kadagiti kakabsat a nangikagumaan a mangparegta kaniak ngem nasaktanda ti riknak.” Ania ti maaramidan ti kongregasion tapno matulonganda dagiti matalek a kapamilia ti nailaksid?

15. Ania ti makatulong kadagiti miembro ti pamilia a nabiit pay a nailaksid ti maysa a kapamiliada?

¹⁵ Agbalinka a naasi ken mannakigayyem kadagiti matalek a kapamilia ti nailaksid. Inamin ti maysa a kabsat nga agnagan Miriam a medio madanagan a makigimong idi nailaksid ti adingna. “Maamakak iti mabalin nga ibaga dagiti kakabsat. Ngem adu a nagsayaat a gagayyem ti nakipagladingit kaniak ken awan ti aniaman a negatibo nga imbagada maipapan iti nailaksid a kabsatko. Gapu kadakuada, diak narikna nga agmaymaysaak nga agladladingit.” Imbaga ti sabali pay a kabsat: “Idi nailaksid ti  anakmi, liniwliwadakami dagiti nadungngo a gagayyem. Inamin ti dadduma a dida ammo ti ibagada. Nakipagsangitda kaniak ken sinuratandak. Nagdakkel ti naitulongda kaniak!”

16. Kasano a maitultuloy ti kongregasion ti mangipaay iti suporta?

¹⁶ Itultuloymo a suportaran dagiti matalek a kapamilia ti nailaksid. Ad-adda a kasapulanda ita ti ayat ken pammaregtam. (Heb. 10:24, 25) Adda dagiti gundaway a narikna dagiti kapamilia ti maysa a nailaksid a maipupuerada iti kongregasion. Ditay ipalubos a mapasamak dayta! Dagiti agtutubo a pinanawan dagiti nagannakda ti kinapudno ti nangnangruna nga agkasapulan iti komendasion ken pammaregta. Imbaga ni Maria, a nailaksid ni lakayna ken pinanawanna ida nga agiina: “Immay ti dadduma a gagayyemko iti balaymi, inlutuandakami, ken tinulongandak a mangyadal kadagiti annakko. Nakipagrikna ken nakipagsangitda kaniak. Indepensadak idi adda nagwaras a di agpaypayso a damag maipapan kaniak. Talaga a naparegtadak!”​—Roma 12:13, 15.

17. Kasano a makaipaay dagiti panglakayen iti liwliwa ken suporta?

¹⁷ Dakayo a panglakayen, ikagumaanyo a paregtaen dagiti matalek a kapamilia ti nailaksid. Adda naisangsangayan a responsabilidadyo a mangliwliwa kadagiti kapammatianyo a timmallikud ken Jehova ti patpatgenda. (1 Tes. 5:14) Dakayo ti mangyun-una a mangparegta kadakuada sakbay ken kalpasan dagiti gimong. Sarungkaranyo ida ken ikararaganyo ida. Kaduaenyo ida iti ministerio, wenno sagpaminsan nga imbitaranyo ida iti panagdaydayaw ti pamiliayo. Masapul nga ipakita dagiti naespirituan a pastor kadagiti agladladingit a karnero ni Jehova ti pannakipagrikna, ayat, ken atension a kasapulanda.​—1 Tes. 2:7, 8.

18. Sigun iti 2 Pedro 3:9, ania ti kayat ti Dios nga aramiden dagiti nakabasol?

¹⁸ Ni Jehova “saanna a kayat a madadael ti asinoman no di ket kayatna nga agbabawi ti amin.” (Basaen ti 2 Pedro 3:9.) Nupay makaaramid ti maysa a tao iti nadagsen a basol, napateg latta ti biagna iti Dios. Panunotem ti nagdakkel a gatad nga imbayad ni Jehova​—ti pangsubbot a daton ti dungdungnguenna nga Anak​—para iti biag dagiti managbasol. Gapu iti  asi ni Jehova, kayatna ida a tulongan nga agsubli kenkuana. Namnamaenna a kasta ti aramidenda, kas makitatayo iti ilustrasion ni Jesus maipapan iti napukaw nga anak. (Luc. 15:11-32) Adu a nangpanaw iti kinapudno ti nagsubli idi agangay iti nadungngo a nailangitan nga Amada. Ken siraragsak nga inabrasa ida ti kongregasion. Ni Elizabeth, a nadakamat itay, ket naragsakan idi naisubli ti anakna. Imbagana maipapan iti kapadasanna, “Apresiarek unay dagiti nangparegta kadakami a saan a sumuko.”

19. Apay a kanayon a makapagtalektayo ken Jehova?

¹⁹ Kanayon a makapagtalektayo ken Jehova. Saan a pulos a mangted iti bilin a pagdaksantayo. Isu ket naparabur ken mannakipagrikna nga Ama a nauneg ti panagayatna iti amin a mangay-ayat ken agdaydayaw kenkuana. Masiguradom a dinaka baybay-an ni Jehova iti tiempo a maladladingitanka. (Heb. 13:5, 6) “Dinakami pulos binaybay-an ni Jehova,” imbaga ni Mark, a nadakamat itay. “Kanayon a tultulongannatayo kadagiti pakarigatantayo.” Itultuloy ni Jehova ti mangipaay kenka iti “bileg a nalablabes ngem iti gagangay.” (2 Cor. 4:7) Wen, kabaelam ti agtalinaed a matalek ken mangnamnama uray no ti maysa a patpatgem pinanawanna ni Jehova.