1. Ania dagiti makapagagar a pasamak nga agur-uray kadatayo bayat ti Sangaribu a Tawen a Turay?

 NAKARAGRAGSAK la ketdi ti aldaw inton mangrugi ti panagungar ditoy daga bayat ti Sangaribu a Tawen a Panagturay ni Kristo! Mailiwtayo unayen a makita manen dagiti ipatpategtayo iti biag. Kasta met laeng ti marikrikna ni Jehova. (Job 14:15) Imadyinem dagiti mapasamakto a nakaragragsak a panagre-reunion iti intero a daga. Kas iti naammuantayo iti napalabas nga artikulo, “dagiti nalinteg,” a naisuraten ti naganda iti libro ti biag ket “mapagungarda tapno agbiag.” (Ara. 24:15; Juan 5:29) Posible nga adu kadagiti ay-ayatentayo ti karaman kadagiti umuna a mapagungar ditoy daga. * Kasta met, “dagiti nakillo,” kas kadagidiay saan a naaddaan iti umdas a gundaway a mangam-ammo ken Jehova wenno kas kadagidiay saan a naaddaan iti gundaway nga agserbi kenkuana sakbay a natayda, ket “mapagungarda tapno maukom.”

2-3. (a) Sigun iti Isaias 11:9, 10, anianto dagiti maisuro iti kasaknapan a programa ti panangisuro iti intero a pakasaritaan ti tao, ken apay? (b) Ania ti usigentayo iti daytoy nga artikulo?

² Masapul a masursuruan ti amin a mapagungar. (Isa. 26:9;  61:11) Masapul ngarud a maaramid ti kasaknapan a programa ti panangisuro iti intero a pakasaritaan ti tao. (Basaen ti Isaias 11:9, 10.) Apay? Ti maysa a rason ket masapul a maisuro kadagiti nakillo a mapagungar ti maipapan ken Jesu-Kristo, ti Pagarian, ti subbot, ken ti sapasap nga isyu maipapan iti nagan ni Jehova ken iti kalinteganna nga agturay. Masapul a maisuro uray kadagiti nalinteg dagiti in-inut nga ipakpakaammo ni Jehova iti ilina maipapan iti panggepna para iti daga. Ti dadduma kadagita a matalek ket nabayagen a natay sakbay a nakompleto ti Biblia. Adu pay ti masapul a sursuruen dagiti nakillo ken dagiti nalinteg.

³ Iti daytoy nga artikulo, sungbatantayo dagitoy a saludsod: Kasano a maaramid daytoy nasaknap a programa ti panangisuro? Apay a napategto ti reaksion dagiti tattao iti dayta a programa tapno permanente a maisurat ti naganda iti libro ti biag wenno saan? Napateg kadatayo ita ti sungbat dagita a saludsod. Kas makitatayto, makatulong ti dadduma a nakaskasdaaw a padto iti libro a Daniel ken Apocalipsis tapno malawlawagan ti pannakaawattayo kadagiti mapasamak inton panagungar. Usigentayo nga umuna dagiti makapagagar a pasamak a naipadto iti Daniel 12:1, 2.

4-5. Ania ti ipalgak ti Daniel 12:1 maipapan iti tiempo ti panungpalan?

⁴ Basaen ti Daniel 12:1. Ipalgak ti libro a Daniel dagiti agsasaruno a makapagagar a pasamak bayat ti tiempo ti panungpalan. Kas pagarigan, kuna ti Daniel 12:1 a ni Miguel, wenno ni Jesu-Kristo, ket “agtaktakder para iti pagsayaatan” ti ili ti Dios. Nangrugi a natungpal dayta a paset ti padto idi 1914, ti tawen a nadutokan ni Jesus kas Ari ti nailangitan a Pagarian ti Dios.

⁵ Nupay kasta, naibaga met ken Daniel a ni Jesus ket “agtakderto” bayat ti “tiempo ti rigat a di pay pulos napasamak manipud adda nabukel a nasion agingga iti dayta a tiempo.” Daytoy a “tiempo ti rigat” ket ti “dakkel a rigat” a dinakamat ti Mateo 24:21. Agtakder ni Jesus, wenno agtignay tapno idepensana ti ili ti Dios, iti panungpalan ti tiempo ti rigat, kayatna a sawen, inton Armagedon. Tinukoy ida ti libro nga Apocalipsis kas ti “dakkel a bunggoy” a “nakalasat iti dakkel a rigat.”​—Apoc. 7:9, 14.

6. Ania ti mapasamak kalpasan a makalasat ti dakkel a bunggoy iti dakkel a rigat? Ilawlawag. (Kitaen met iti daytoy a ruar ti “Salsaludsod Dagiti Agbasbasa” maipapan iti panagungar ditoy daga.)

⁶ Basaen ti Daniel 12:2. Ania ti mapasamak kalpasan a makalasat ti dakkel a bunggoy iti daytoy tiempo ti rigat? Dayta a padto ket saan a tumukoy iti simboliko a panagungar​—ti naespirituan a pannakapabiag dagiti adipen ti Dios a mapaspasamak bayat ti maudi nga al-aldaw​—kas iti dati a pannakaawattayo. * Imbes ketdi, dagita a sasao ket tumukoy iti panagungar dagiti natay a mapasamak idiay baro a lubong. Apay a kasta ti konklusiontayo? Ti sasao nga “uneg ti daga” a nausar iti Daniel 12:2 ti kaipapanan met laeng ti sasao nga “iti tapok” a nausar iti Job 17:16 a kaibatogan ti termino a “ti Tanem.” Ipakita dayta a ti tuktukoyen ti Daniel 12:2 ket ti literal a panagungar kalpasan nga agpatingga ti maudi nga al-aldaw ken kalpasan ti gubat ti Armagedon.

7. (a) Ania ti kayat a sawen ti panagungar ti dadduma tapno “agbiag nga agnanayon”? (b) Kasano a “nasaysayaat a panagungar” dayta?

 ⁷ Ngem ania ti kayat a sawen ti ibagbaga ti Daniel 12:2 a ti dadduma ket mapagungar tapno “agbiag nga agnanayon”? Kayatna a sawen a dagidiay mapagungar ken mangammo, wenno agtultuloy a mangammo, ken agtulnog kada Jehova ken Jesus bayat ti 1,000 a tawen ti maaddaanto iti biag nga agnanayon. (Juan 17:3) Dayta ket “nasaysayaat a panagungar” ngem iti panagungar ti dadduma a tattao idi un-unana. (Heb. 11:35) Apay? Ngamin, dagidi nga imperpekto a napagungar ket natay met laeng idi agangay.

8. Kasano a ti dadduma ket mapagungar tapno “maibabain ken agnanayon a maum-umsi”?

⁸ Ngem saanto nga akseptaren ti amin a mapagungar ti programa a panangisuro ni Jehova. Impadto ni Daniel a ti dadduma a mapagungar ket “maibabain ken agnanayon a maum-umsi.” Gapu ta agrebeldeda, saanto a maisurat ti naganda iti libro ti biag ken saanda nga umawat iti biag nga agnanayon. Imbes ketdi, “agnanayon a maum-umsi” wenno madadaeldanto. Ti ngarud tuktukoyen ti Daniel 12:2 ket ti maudi a pagbanagan ti amin a mapagungar maibatay kadagiti aramidenda kalpasan ti panagungarda. * (Apoc. 20:12) Ti dadduma ket agbiagto nga agnanayon; ti dadduma ket saan.

9-10. Anianto ti mapasamak kalpasan ti dakkel a rigat, ken siasino dagiti ‘agraniagto a kas iti kalawag ti langit’?

⁹ Basaen ti Daniel 12:3. Anianto pay ti mapasamak kalpasan ti “tiempo ti rigat”? Malaksid iti Daniel 12:2, ibaga ti bersikulo 3 ti mapasamak kalpasan ti dakkel a rigat.

¹⁰ Siasino dagiti ‘agraniagto a kas iti kalawag ti langit’? Tapno maammuantayo ti sungbat, makatulong ti imbaga ni Jesus iti Mateo 13:43: “Iti dayta a tiempo, agraniagto dagiti nalinteg a kas iti init iti Pagarian ni Amada.” Iti konteksto dagita a sasao ni Jesus, dakdakamatenna “dagiti annak ti Pagarian,” dagiti kakabsatna a dinutokan ti espiritu, a kakaduana nga agturay iti nailangitan a Pagarian. (Mat. 13:38) Ti ngarud tuktukoyen ti Daniel 12:3 ket dagiti dinutokan ti espiritu ken ti trabahoda bayat ti Sangaribu a Tawen a Turay.

11-12. Ania ti trabaho ti 144,000 bayat ti 1,000 a tawen?

¹¹ Kasano a dagiti dinutokan ti espiritu ket “tumultulong iti adu nga agbalin a nalinteg”? Dagiti dinutokan ti espiritu ket makitinnulongto ken Jesu-Kristo a mangiwanwan iti programa a panangisuro kadagiti tattao ditoy daga bayat ti 1,000 a tawen. Saan la nga agturay kas ar-ari ti 144,000 no di ket agserbida met kas papadi. (Apoc. 1:6; 5:10; 20:6) No kasta, tumulongdanto iti ‘panangagas kadagiti nasion,’ kayatna a sawen, tulonganda dagiti tattao nga in-inut nga agbalin a perpekto. (Apoc. 22:1, 2; Ezek. 47:12) Makaparagsakto la ketdi dayta para kadagiti dinutokan ti espiritu!

¹² Siasinonto dagiti karaman iti “adu” a matulongan nga agbalin a nalinteg? Dagiti mapagungar, dagiti makalasat iti Armagedon, ken dagiti mabalin a mayanak iti baro a lubong. Inton agpatinggan ti 1,000 a tawen, perpektonton ti amin a tattao ditoy daga. Kaano ngarud a dagiti nagan nga arigna naisurat iti lapis ket maisuraten iti arig bolpen tapno permanenten dagita iti libro ti biag?

13-14. Anianto ti masapul a paneknekan ti amin a perpekto a tattao ditoy daga sakbay nga umawatda iti biag nga agnanayon?

¹³ Masapul a laglagipentayo a ti panagbalin a perpekto dina kayat a sawen nga automatiko nga agbiagen nga agnanayon ti maysa a tao. Panunotem da Adan ken Eva. Perpektoda idi, ngem masapul a paneknekanda a natulnogda ken Jehova a Dios sakbay a maipaayanda iti biag nga agnanayon. Ngem nakalkaldaang ta saanda a nagtulnog.​—Roma 5:12.

¹⁴ Anianto ti kasasaad dagiti tattao ditoy daga kalpasan ti 1,000 a tawen? Perpektodanto aminen. Naan-anay ken agnanayonto ngata a suportaran ti amin a perpekto a tattao ti turay ni Jehova? Wenno dadduma ti agbalinto a kas kada Adan ken Eva​—a nupay perpektoda idi, saanda a nagtalinaed a matalek? Masapul a masungbatan dagita a saludsod. Ngem kasano?

15-16. (a) Kaano a maaddaan ti amin a tattao iti gundaway a mangipakita a matalekda ken Jehova? (b) Anianto ti maudi a resulta daytoy a pannubok?

¹⁵ Maipupokto ni Satanas iti 1,000 a tawen. Bayat dayta a tiempo, awanto ti maallilawna. Ngem kalpasan ti 1,000 a tawen, mawayawayaanto ni Satanas. Padasennanto nga allilawen dagiti perpekto a tattao. Bayat dayta a pannubok, addanto gundaway ti amin a perpekto a tattao ditoy daga a nalawag  nga ipakitada a raraemenda ti nagan ti Dios ken supsuportaranda ti turayna. (Apoc. 20:7-10) Ti reaksion ti tunggal maysa kadagiti panagregget ni Satanas a mangdadael iti kinamatalekda ti mangikeddeng no ti naganda ket permanenten a maisurat iti libro ti biag.

¹⁶ Ibaga ti Biblia nga addanto dagiti saan nga agmatalek a kas kada Adan ken Eva, ken laksidenda ti turay ni Jehova. Anianto ti mapasamak kadakuada? Ibaga kadatayo ti Apocalipsis 20:15: ‘Maitapuak met iti danaw nga apuy ti asinoman a saan a nasarakan a naisurat iti libro ti biag.’ Wen, dagita a rebelde ket madadaelton iti agnanayon. Ngem ti kaaduan a perpekto a tattao ket makapasa iti dayta a maudi a pannubok. Kalpasanna, permanententon a maisurat ti naganda iti libro ti biag.

17. Ania ti naipakaammo ken Daniel a mapasamak iti kaaldawantayo? (Daniel 12:4, 8-10)

¹⁷ Talaga a makapagagar dagiti mapasamak iti masanguanan! Ngem adda pay dadduma a napateg nga impormasion nga impakaammo ti maysa nga anghel ken Daniel maipapan iti tiempotayo, ti “tiempo ti panungpalan.” (Basaen ti Daniel 12:4, 8-10; 2 Tim. 3:1-5) Imbaga ti anghel ken Daniel: “Umadunto ti pudno a pannakaammo.” Wen, dagiti padto iti librona ket naan-anayton a maawatan ti ili  ti Dios. Imbaga pay ti anghel a bayat dayta a tiempo, “agtignayto a sidadakes dagiti managdakdakes, ket saandanto a maawatan dagitoy.”

18. Ania ti asidegen a mapasamak kadagiti managdakdakes?

¹⁸ Ita, kasla saan a madusdusa dagiti managdakdakes kadagiti dakes nga ar-aramidenda. (Mal. 3:14, 15) Ngem asidegen nga ukomen ni Jesus dagiti arig kalding ken isinana ida manipud kadagiti arig karnero a tattao. (Mat. 25:31-33) Saanto a makalasat dagita a managdakdakes iti dakkel a rigat ken saandanto met a mapagungar tapno agbiag iti baro a lubong. Saanto a maisurat ti naganda iti “libro a pakalaglagipan” a nadakamat iti Malakias 3:16.

19. Ania ti masapul nga aramidentayo itan, ken apay? (Malakias 3:16-18)

¹⁹ Masapul a paneknekantayo itan a saantayo a karaman kadagiti managdakdakes. (Basaen ti Malakias 3:16-18.) Ur-urnongenen ni Jehova dagidiay ibilangna kas “espesial a sanikua” wenno dagiti napateg kenkuana. Sigurado a kayattayo ti agbalin a maysa kadakuada.

20. Ania ti maudi a naikari ken Daniel, ken apay a segseggaam ti kaitungpalan dayta a kari?

²⁰ Talaga nga agbibiagtayon iti makapagagar a tiempo. Ngem nagadu pay ti nakaskasdaaw a banag nga asidegen a mapasamak. Asidegen a makitatayo ti pannakadadael ti amin a managdakdakes. Kalpasan dayta, makitatayton ti kaitungpalan ti kari ni Jehova ken Daniel: “Bumangonkanto tapno awatem ti bingaymo inton panungpalan dagiti aldaw.” (Dan. 12:13) Segseggaam kadi ti aldaw inton ‘bumangon’ manen ni Daniel ken dagiti ay-ayatem? No wen, ikagumaam itan ti agbalin a matalek, ket masiguradom a permanententon a maisurat ti naganmo iti libro ti biag a kukua ni Jehova.