1. Kasanotayo nga ammo a mapagtalkantayo ti maysa a tao?

 IKAGUMAAN ti mapagtalkan a tao a tungpalen dagiti karina ken agpayso dagiti ibagbagana. (Sal. 15:4) Ammo dagiti tattao a mapangnamnamaanda isuna. Kayattayo a kasta ti marikna dagiti kakabsat kadatayo. Ania dagiti aramidentayo tapno pagtalkandatayo?

2. Kasanotayo a mapaneknekan a datayo ket mapagtalkan?

² Ditay mapilit ti dadduma nga agtalek kadatayo. Ti panagtalek ket masapul a mategged. Ibagbagada a ti panagtalek ket kas iti kuarta. Kasapulan ti panagregget tapno maalam dayta. Narigat nga urnongen; ngem nalaka a gastuen. Sigurado a naala ni Jehova ti panagtalektayo. Saan a pulos a mangaramid iti aniaman a mangpukaw iti panagtalektayo kenkuana ta “mapagtalkan ti amin nga aramidna.” (Sal. 33:4) Ken namnamaenna a tuladentayo isuna. (Efe. 5:1) Usigentayo ti ulidan ti dadduma nga adipen ni Jehova a nangtulad iti nailangitan nga Amada ken nangpaneknek a mapagtalkanda. Ammuentayo met ti lima a kualidad a makatulong tapno agbalintayo a mapagtalkan.

3-4. Kasano a pinaneknekan ni propeta Daniel a mapagtalkan isuna, ken ania dagiti masapul nga isaludsodtayo iti bagitayo?

³ Nagsayaat ti inyulidan ni propeta Daniel maipapan iti kinamapagtalkan. Di nagbayag kalpasan nga impanaw dagiti Babilonio, naaddaan iti reputasion kas mapagtalkan. Iti tulong ni Jehova, nagminar ti reputasionna idi inlawlawagna dagiti tagtagainep ni Ari Nabucodonosor ti Babilonia. Naminsan, masapul nga ibaga ni Daniel iti ari nga adda dagiti kagura ni Jehova kenkuana. Saan a kayat ti ari a denggen ti kasta a mensahe. Masapul ngarud a natured ni Daniel ta nalaka nga agburek ti  dara ni Nabucodonosor! (Dan. 2:12; 4:20-22, 25) Adu a tawen kalpasanna, pinaneknekan manen ni Daniel ti kinamapagtalkanna idi siuumiso nga inlawlawagna ti misterioso a mensahe a nagparang iti diding ti palasio idiay Babilonia. (Dan. 5:5, 25-29) Idi agangay, nadlaw met ni Dario a Medo ken dagiti inapointaranna nga opisial a ni Daniel ket “naisangsangayan ti siribna.” Binigbigda a ni Daniel ket “mapagtalkan ken awan ti mabaybay-anna wenno awan ti dakes nga ar-aramidenna.” (Dan. 6:3, 4) Wen, uray dagiti pagano nga agtuturay binigbigda a mapagtalkan daytoy nga agdaydayaw ken Jehova!

⁴ Bayat a pampanunotentayo ti ulidan ni Daniel, nasayaat no isaludsodtayo iti bagitayo: ‘Ania ti reputasionko kadagiti saan a Saksi ni Jehova? Pagaammodak kadi kas responsable ken mapagtalkan?’ Apay a masapul nga isaludsodtayo dagita iti bagitayo? Gapu ta maidaydayawtayo ni Jehova no mapagtalkantayo.

5. Apay a ni Hananias ket pagaammo kas mapagtalkan?

⁵ Idi 455 B.C.E., kalpasan a naibangon manen ni Gobernador Nehemias dagiti pader ti Jerusalem, nangbirok kadagiti mapangnamnamaan a lallaki a mangaywan a naimbag iti siudad. Ti maysa kadagiti pinili ni Nehemias ket ti panguluen iti Torre a ni Hananias. Sigun iti Biblia, ni Hananias ket “managbuteng iti pudno a Dios ken awan kapadana no iti kinamapagtalkan.” (Neh. 7:2) Gapu ta ay-ayaten ni Hananias ni Jehova ken dina kayat a mapagura, sineriosona ti aniaman nga asaynment a naited kenkuana. Dagita a kualidad ti makatulong met kadatayo nga agbalin a mapangnamnamaan iti panagserbitayo iti Dios.

6. Kasano a pinaneknekan ni Tiquico nga isu ket mapagtalkan a gayyem ni apostol Pablo?

 ⁶ Kitaentayo ti ulidan ni Tiquico, a mapagtalkan a kadua ni apostol Pablo. Idi naibalud ni Pablo iti balay, nagpannuray ken Tiquico, nga inladawanna kas “matalek a ministro.” (Efe. 6:21, 22) Nagtalek ni Pablo kenkuana, saan laeng a tapno mangitulod kadagiti surat para iti kakabsat idiay Efeso ken Colosas, no di ket tapno paregtaen ken liwliwaenna ida. Ti ulidan ni Tiquico ti mangipalagip kadatayo kadagiti matalek ken mapangnamnamaan a lallaki a mangas-asikaso kadagiti naespirituan a kasapulantayo ita.​—Col. 4:7-9.

7. Ania ti masursurom maipapan iti kinamapagtalkan dagiti panglakayen ken ministerial nga adipen iti kongregasionyo?

⁷ Apresiarentayo unay dagiti mapagtalkan a panglakayen ken ministerial nga adipen ita. Kas kada Daniel, Hananias, ken Tiquico, serioso nga itungtungpalda dagiti responsabilidadda. Kas pagarigan, no makigimongtayo iti tengnga ti lawas, masiguradotayo nga adda mangiparang iti amin a paset ti programa. Apresiaren dagiti panglakayen no dagidiay naikkan iti paset ket agsagana a naimbag ken iparangda dagita! Ditay agdanag a mangawis kadagiti iyad-adalantayo iti Biblia iti gimong iti ngudo ti lawas ta sigurado nga adda nayurnos a palawag publiko. Agtalektayo met nga adda nga adda dagiti publikasion a kasapulantayo iti ministerio. Nagsayaat ti panangaywan kadatayo dagitoy a matalek a kakabsat, ket agyamantayo ken Jehova gapu kadakuada! Ngem ania pay dagiti pamay-an a mapaneknekantayo a mapagtalkantayo?

8. Kasano nga agbalintayo a balanse no mangipakpakitatayo iti interes iti sabsabali? (Proverbio 11:13)

⁸ Ay-ayatentayo dagiti kakabsat, ken interesadotayo iti pagsayaatanda. Ngem masapul a balansetayo ken raementayo ti privacy-da wenno ti pribado a biagda. Dadduma iti kongregasion Kristiano idi umuna a siglo ket “tsismosa ken mannakibiangda pay iti biag ti sabsabali, nga isarsaritada ti bambanag a saan a rumbeng.” (1 Tim. 5:13) Sigurado a ditay kayat ti agbalin a kas kadakuada. Ngem kasanon no adda nangibaga kadatayo iti personal a banag ket kiniddawna a ditay ibagbaga dayta iti sabsabali? Kas pagarigan, baka ibaga kadatayo ti maysa a sister nga adda sakitna wenno sabali pay a suot a mapaspasaranna, ket kiddawenna a pagtalinaedentayo a kompidensial dayta. Masapul a patgantayo ti kiddawna. * (Basaen ti Proverbio 11:13.) Usigentayo ti dadduma pay a situasion a napateg nga agbalintayo a mapagtalkan kadagiti kompidensial a banag.

9. Kasano a mapaneknekan dagiti miembro ti pamilia a mapagtalkanda?

⁹ Iti pamilia. Responsabilidad ti tunggal miembro ti pamilia a pagtalinaeden a pribado dagiti sensitibo a banag maipapan iti pamilia. Kas pagarigan, mabalin nga adda ugali ti maysa a Kristiano a babai a nakakatkatawa para ken lakayna. Iyestoria kadi dayta ni lakayna iti sabsabali a mabalin a pakaibabainan ni baketna? Siempre saan! Ay-ayatenna ni baketna ken dina kayat ti mangaramid iti aniaman a pakasaktanna. (Efe. 5:33) Kayat dagiti tin-edyer ti marespeto. Masapul a laglagipen dayta dagiti nagannak. Saanda nga ibabain dagiti annakda babaen ti panangyestoriada kadagiti kamalida. (Col. 3:21) Masapul a sursuruen dagiti annak ti agbalin a masirib a saanda nga ibaga iti sabsabali ti maysa nga impormasion maipapan iti pamiliada, a mabalin a pakaibabainan ti dadduma a kapamiliada. (Deut. 5:16) No aramiden ti tunggal miembro ti pamilia ti pasetna tapno agtalinaed  a pribado dagiti personal nga impormasion maipapan iti pamilia, sumingedda iti maysa ken maysa.

10. Ania ti karaman iti panagbalin a pudno a gayyem? (Proverbio 17:17)

¹⁰ Iti gagayyem. Adda dagiti tiempo a kayat ti kaaduan kadatayo nga ibaga iti nasinged a gayyemtayo dagiti marikriknatayo. No dadduma, mabalin a narigat dayta. Siguro, saantay la ngamin a naruam a mangibaga iti sekretotayo iti uray asino latta ditan, ken baka masaktan unay ti riknatayo no naammuantayo nga inyestoria gayam ti gayyemtayo iti sabsabali dagiti imbagatayo. Nupay kasta, apresiarentayo unay ti maysa a mapagtalkan kadagiti kompidensial a banag! Talaga nga isu ket “pudno a gayyem.”​—Basaen ti Proverbio 17:17.

11. (a) Kasano nga ipakpakita dagiti panglakayen ken ti assawada a mapangnamnamaantayo ida? (b) Ania ti masursurotayo iti maysa a panglakayen a nangtaming iti kompidensial a banag iti kongregasion ken idi agangay, dina imbagbaga dayta iti pamiliana? (Kitaen ti ladawan.)

¹¹ Iti kongregasion. Dagiti panglakayen a mapagtalkan kadagiti kompidensial a banag ket ‘paglemmengan no agangin ken pagkamangan’ dagiti kakabsat. (Isa. 32:2) Ammotayo a mabalintayo nga ibaga kadakuada ti aniaman, ta siguradotayo a pagtalinaedenda a kompidensial dagiti imbagatayo. Saantayo met ida a piliten nga ibaga kadatayo dagiti banag a pribado. Apresiarentayo met ti assawa dagiti panglakayen ta dida man la padasen nga ammuen kadagiti assawada dagiti kompidensial a banag. Talaga a pagsayaatan ti asawa ti maysa a panglakayen no saan a maibaga kenkuana dagiti impormasion maipapan kadagiti kakabsat. Imbaga ti asawa ti maysa a panglakayen: “Agyamanak ta saan nga ibagbaga kaniak ni lakayko dagiti kompidensial a banag maipapan kadagiti isep-shepherding-na wenno kadagidiay agkasapulan iti naespirituan a tulong. Dina pay ketdi ibagbaga uray laeng ti naganda. Apresiarek ta saanak a maburiboran kadagiti problema nga awan met ti maitulongko. Gapu iti dayta, komportableak a makisarita iti amin a kakongregasionko. Agtalekak met a no ibagak ken lakayko dagiti marikriknak wenno problemak,  agtalinaed dayta a kompidensial.” Siempre, kayattayo amin ti maaddaan iti reputasion kas mapagtalkan. Ania dagiti kualidad a makatulong tapno agbalintayo a kasta? Kitaentayo ti lima kadagita.

12. Apay a maibagatayo a ti ayat ti pundasion ti panagtalek? Mangted iti pagarigan.

¹² Ayat ti pundasion ti panagtalek. Imbaga ni Jesus a ti dua a kangrunaan a bilin ket ayatentayo ni Jehova ken ti kaarrubatayo. (Mat. 22:37-39) Ay-ayatentayo ni Jehova isu a kayattayo a tuladen ti perpekto a kinamapagtalkanna. Kas pagarigan, gapu ta ay-ayatentayo dagiti kakabsat, ditay pakibiangan ti personal ken pribado a biagda. Ditay pulos mangibaga iti aniaman a mangdadael iti reputasionda, mangibabain kadakuada, wenno mangsair iti riknada.​—Juan 15:12.

13. Kasano a makatulong ti kinapakumbaba tapno agbalintayo a mapagtalkan?

¹³ Makatulong ti kinapakumbaba tapno agbalintayo a mapagtalkan. No napakumbaba ti maysa a Kristiano, dina kayat nga isu ti makauna a mangibaga iti maysa a banag tapno mapabilibna ti dadduma. (Fil. 2:3) Dina pagparangen nga adda dagiti banag nga ammona ngem dina met ngarud kayat nga ibaga, tapno laeng ipakitana nga importante isuna. No met napakumbabatayo, ditay agiwaras iti bukodtayo nga opinion maipapan kadagiti banag a saan met a nailawlawag iti Biblia wenno kadagiti publikasiontayo a naibatay iti Biblia.

14. Kasano a makatulong ti pannakatarus tapno agbalintayo a mapagtalkan?

¹⁴ No adda pannakatarus ti maysa a Kristiano, ammona ti “tiempo ti panagulimek ken tiempo ti panagsao.” (Ecl. 3:7) Iti dadduma a kultura, ibagbagada a “ti panagsao mayarig iti pirak, ken ti panagulimek mayarig iti balitok.” Iti sabali a pannao, adda dagiti tiempo a nasaysayaat ti agulimek ngem ti agsao. Kasta ti ibagbaga ti Proverbio 11:12: “Agulimek laeng ti tao nga umiso ti pannakatarusna.” Kitaentayo ti maysa a pagarigan. Masansan a makiddaw iti maysa nga eksperiensiado a panglakayen a tumulong a mangtaming kadagiti nadagsen a problema ti dadduma a kongregasion. Imbaga ti padana a panglakayen maipapan kenkuana: “Nakaan-annad tapno saan a pulos a maigalis ti dilana a mangibaga iti kompidensial nga impormasion maipapan iti dadduma a kongregasion.” Gapu iti pannakatarus daytoy a panglakayen, raraemen dagiti padana a panglakayen iti kongregasionda. Siguradoda a dina ibaga iti dadduma ti kompidensial a bambanag maipapan iti kongregasionda.

15. Mangted iti pagarigan a mangipakita a makatulong ti panagbalin a napudno tapno pagtalkandatayo.

¹⁵ Makatulong met ti panagbalin a napudno tapno pagtalkandatayo. Makapagtalektayo iti napudno a tao ta ammotayo a kanayon nga ibagana ti agpayso. (Efe. 4:25; Heb. 13:18) Kas pagarigan, kayatmo a pasayaaten ti abilidadmo a mangisuro, isu a kiddawem iti maysa a kabsat a denggenna ti palawag wenno pasetmo ken mangted kadagiti makatulong a suhestion tapno ammom dagiti masapul a parang-ayem. Makimbalakad ti pagtalkam? Daydiay kadi mangibagbaga iti kayatmo a denggen wenno daydiay mangibagbaga iti agpayso iti nasingpet a pamay-an? Ammomon ti sungbat. Kuna ti Biblia: “Nasaysayaat ti prangka a pannubngar ngem ti nailemmeng nga ayat. Mangtubngar ti matalek a gayyem uray no kasla nasakit.” (Prov. 27:5, 6) Iti damo, baka narigat nga akseptaren ti agpayso nga ibaga ti gayyemtayo, ngem ammotayo a makatulong dayta kadatayo.

16. Kasano nga ipakita ti Proverbio 10:19 a kasapulantayo ti panagteppel?

¹⁶ Nakapatpateg ti panagteppel tapno pagtalkandatayo. Dayta a kualidad ti makatulong tapno  agulimektayo no masulisogtayo a mangipakaammo iti kompidensial a banag a naibaga kadatayo. (Basaen ti Proverbio 10:19.) Baka masubok ti panagteppeltayo no agus-usartayo iti social media. No ditay agannad, baka mailaw-antayo nga agi-post kadagiti kompidensial a banag a makita ti adu a tattao. Ket no nagwaras daytan iti social media, saantayon a kontrolado no kasano nga usaren dayta ti dadduma wenno no kasano kakaro ti dakes nga epektona. Makatulong met ti panagteppel tapno agulimektayo no padasendatayo nga allilawen dagiti bumusbusor tapno ibagatayo dagiti impormasion a mamagpeggad kadagiti kakabsat. Mabalin a mapasamak dayta no pagsaludsodandatayo dagiti polis iti maysa a nasion a maiparit wenno malimlimitaran ti trabahotayo. Kadagita ken iti dadduma pay a situasion, mabalintayo nga iyaplikar ti prinsipio nga ‘apputentayo ti ngiwattayo.’ (Sal. 39:1) Masapul nga ipakitatayo a mapagtalkandatayo dagiti kapamilia, gagayyem, ken kakabsat, wenno ti asinoman. Tapno maaramidtayo dayta, kasapulantayo ti panagteppel.

17. Ania ti maitulongtayo tapno kanayon nga agtalek dagiti kakabsat iti maysa ken maysa?

¹⁷ Anian a yamantayo ta inyasidegnatayo ni Jehova iti naespirituan a pamilia a nadungngo ken mapagtalkan! Responsabilidadtayo amin a gun-oden wenno teggeden ti panagtalek dagiti kakabsat. Bayat nga ikagkagumaan ti tunggal maysa kadatayo nga ipakita ti ayat, kinapakumbaba, pannakatarus, panagbalin a napudno, ken panagteppel, tumultulongtayo tapno kanayon nga agtalek dagiti kakabsat iti maysa ken maysa. Masapul nga itultuloytayo ti agporsegi tapno pagtalkandatayo. Tuladentayo koma ti Diostayo a ni Jehova ken itultuloytayo a paneknekan a mapagtalkantayo.