1-2. Apay a pagsayaatantayo ti panangadal iti salaysay maipapan ken Samson?

 ANIA ti mapanunotmo no mangngegmo ti nagan a Samson? Mabalin a malagipmo ti maysa a lalaki a naisangsangayan ti pigsana. Hustoka. Ngem nakaaramid ni Samson iti kamali a desision a nagdakes dagiti resultana. Nupay kasta, nagpokus ni Jehova iti amin nga inaramid ni Samson a mangipakita iti kinamatalekna, ket impaisuratna dagita iti Biblia a pakagunggonaantayo.

² Inusar ni Jehova ni Samson a mangaramid kadagiti nakaskasdaaw a banag tapno matulonganna ti Israel, ti ili a pinilina. Adu a siglo kalpasan a natay ni Samson, inwanwan ni Jehova ni apostol Pablo a mangiraman iti nagan ni Samson iti listaan dagiti tattao a naisangsangayan ti pammatida. (Heb. 11:​32-34) Maparegtatayo iti ulidan ni Samson. Nagtalek ken Jehova, uray kadagiti narigat a situasion. Kitaentayo no kasanotayo a maparegta ken makasursuro iti ulidanna.

3. Ania nga annongen ti naawat ni Samson?

³ Idi nayanak ni Samson, dagiti Filisteo ti mangiturturay ken mangirurrurumen iti nasion ti Israel. (Uk. 13:1) Gapu iti naulpit a panangiturayda, nakaro ti panagrigat dagiti Israelita. Pinili ni Jehova ni Samson tapno ‘idauluanna ti pannakaisalakan ti Israel iti ima dagiti Filisteo.’ (Uk. 13:5) Nagrigat la ketdi dayta! Tapno matungpal ni Samson dayta a nagrigat nga annongen, masapul nga agtalek ken Jehova.

4. Kasano a tinulongan ni Jehova ni Samson tapno mawayawayaan kadagiti Filisteo? (Uk-ukom 15:​14-16)

⁴ Kitaentayo ti maysa a pagarigan a nagtalek ni Samson ken Jehova ken nagpannuray iti tulongna. Naminsan, immay ti  puersa militar dagiti Filisteo tapno tiliwenda ni Samson idiay Lehi, a mabalin nga iti teritoria ti Juda. Mabutbuteng idi dagiti lallaki ti Juda, isu nga inkeddengda nga iyawat ni Samson kadagiti kabusor. Dagiti mismo a kailian ni Samson ti siiirut a nangigalut kenkuana iti dua a baro a tali sada inyawat kadagiti Filisteo. (Uk. 15:​9-13) Nupay kasta, “nagtignay [ken Samson] ti espiritu ni Jehova” ket winayawayaanna ti bagina kadagiti naitali kenkuana. Kalpasanna, “nakakita ni Samson iti panga ti kalakian nga asno a nabiit pay a natay,” pinidutna sana inusar a nangpapatay iti 1,000 a Filisteo a lallaki!—Basaen ti Uk-ukom 15:​14-16.

5. Kasano a ti panangusar ni Samson iti panga ti asno ti pakakitaan a nagtalek ken Jehova?

⁵ Apay a panga ti asno ti inusar ni Samson idinto ta saan a gagangay a maus-usar dayta kas armas? Sigurado nga ammo ni Samson nga agpannuray ken Jehova ti panagballigina, saan nga iti aniaman nga armas nga usarenna. Wen, inusar daytoy a matalek a lalaki ti nakitana a makatulong kenkuana a mangitungpal iti pagayatan ni Jehova. Nalawag a nagballigi unay ni Samson gapu ta nagtalek ken Jehova.

6. Ania ti masursurotayo ken Samson no itungtungpaltayo dagiti nateokratikuan nga annongentayo?

⁶ Mapabilegnatayo met ni Jehova a mangitungpal kadagiti nateokratikuan nga annongentayo uray kadagiti kasla saantayo a kaya. Aramiden dayta ti Dios iti pamay-an a mabalin a saantayo nga ekspektaren. No kasano a pinabileg ni Jehova ni Samson, agtalekka a tulongannaka met a mangaramid iti pagayatanna no la ket ta agpannurayka iti tulongna.—Prov. 16:3.

7. Ania a pagarigan ti mangipakita iti kinapateg ti panagpaiwanwan ken Jehova?

⁷ Adu a kakabsat a tumultulong kadagiti proyekto a panagibangon ti organisasion ti mangipakpakita nga agtaltalekda ken Jehova. Idi un-unana, dagiti kakabsat ti gagangay a mangdisenio ken mangibangon iti kaaduan a Kingdom Hall ken iti dadduma a pasdek. Ngem idi agangay, masapul ti panagbalbaliw ta umad-adu ti umap-apon iti organisasion  ni Jehova. Nagpaiwanwan ken Jehova dagiti kakabsat a mangidadaulo ket pinadasda dagiti baro a pamay-an, kas iti pananggatang kadagiti pasilidad ken panang-renovate kadagita. Ni Robert ket nakipagtrabaho iti adu a proyektotayo iti intero a lubong kadagiti kallabes a tawen. Imbagana: “Idi damo, narigatan ti dadduma a mangakseptar iti baro a pamay-an.” Intuloyna: “Naiduma unay dayta iti nakairuamanmi iti adu a tawen. Ngem situtulok dagiti kakabsat a makibagay. Nalawag a makitkitami a bembendisionan ni Jehova dagitoy a panagbalbaliw.” Maysa laeng daytoy a pagarigan no kasano nga iwanwanwan ni Jehova ti ilina a mangitungpal iti pagayatanna. Nasayaat ngarud no pasaray isaludsodtayo iti bagitayo, ‘Agpapaiwanwanak kadi ken Jehova ken situtulokak a makibagay tapno makapagserbiak kenkuana iti kasayaatan a pamay-an?’

8. Idi naminsan a nawaw unay ni Samson, ania ti inaramidna?

⁸ Mabalin a nabasamon ti dadduma a nakaskasdaaw nga inaramid ni Samson. Maymaysana a nangpatay iti maysa a leon. Idi agangay, pinatayna ti 30 a lallaki idiay Askelon a siudad dagiti Filisteo. (Uk. 14:​5, 6, 19) Ammo ni Samson a saanna a pulos a maaramid dagita no awan ti tulong ni Jehova. Nalawag dayta idi naminsan a nawaw unay kalpasan a pinatayna ti 1,000 a Filisteo. Ania ti inaramidna? Imbes nga agdepende iti bagina tapno agbirok iti inumenna, immawag ketdi ken Jehova tapno agpatulong.—Uk. 15:18.

9. Ania ti inaramid ni Jehova idi nagpatulong ni Samson? (Uk-ukom 15:19)

⁹ Sinungbatan ni Jehova ti panagpatulong ni Samson. Simimilagro a pinagrengngatna ti maysa a likkaong, ket nagubbog iti danum. Idi imminum iti dayta ni Samson, “pimmigsa ken nakaungar.” (Basaen ti Uk-ukom 15:19.) Posible nga adda pay laeng dayta nga ubbog kalpasan ti adu a tawen idi inwanwan ti Dios ni propeta Samuel a mangisurat iti libro nga Uk-ukom. Mabalin a naipalagip kadagiti Israelita a nakakita iti dayta nga ubbog a makapagtalekda a tulongan ni Jehova dagiti matalek nga agdaydayaw kenkuana iti tiempo a kasapulanda dayta.

10. Ania ti masapul nga aramidentayo tapno maawattayo ti tulong ni Jehova? (Kitaen met ti ladawan.)

¹⁰ Masapul met nga agpatulongtayo ken Jehova aniaman ti talento, abilidad, wenno nagapuanantayo iti panagserbitayo kenkuana. Masapul a naemmatayo ken bigbigentayo nga agballigitayo laeng no agtalektayo ken Jehova. Pimmigsa ni Samson idi ininumna ti danum nga impaay ni Jehova. Pumigsa met ti espiritualidadtayo no aprobetsarentayo ti amin a probision nga ipapaay ni Jehova kadatayo.—Mat. 11:28.

11. Kasanotayo nga aprobetsaren ti amin a tulong nga ipapaay ni Jehova? Mangted iti pagarigan.

¹¹ Usigentayo ti ulidan ni Aleksey a maysa kadagiti kakabsattayo idiay Russia a mangib-ibtur iti nakaro a pannakaidadanes. Ania ti tumultulong kenkuana nga agtalinaed a nabileg iti laksid dagiti nakarigrigat a kasasaad? Adda regular a rutinada ken baketna a mangpabileg iti espiritualidadda. Imbagana: “Ikagkagumaak a regular ti personal a panagadalko ken inaldaw a mabasak ti Biblia. Kada agsapa, agkaduakami ken baketko nga agteksto ken agkararag ken Jehova.” Ania ti masursurotayo? Imbes nga agtalektayo iti bagitayo, masapul nga agtalektayo ken Jehova. Kasano? Pabilgentayo ti pammatitayo babaen ti regular a personal a panagadal iti Biblia, panagkararag, pannakigimong, ken panangasaba. Iti kasta, adu a bendision ti ipaay ni Jehova gapu  iti panangikagumaantayo nga agserbi kenkuana. Pinabilegna idi ni Samson ket sigurado a mapabilegnatayo met.

12. Ania ti di umiso a desision a naaramid ni Samson, ket kasano a naiduma dayta kadagiti immun-una a kapadasanna?

¹² Imperpekto ni Samson a kas kadatayo, isu nga adda dagiti tiempo a nakaaramid kadagiti di umiso a desision. Makapaladingit dagiti resulta ti maysa a partikular a desisionna. Idi medio nabayag metten nga agserserbi ni Samson kas ukom, “nagayat iti maysa a babai nga agnagan iti Delaila nga agnanaed idiay Tanap ti Sorek.” (Uk. 16:4) Sakbayna, kayat idi ni Samson nga asawaen ti maysa a babai a Filisteo. Ngem urnos dayta “ni Jehova. . . . Agbirbirok ngamin ti Dios iti gundaway a makilaban kadagiti Filisteo.” Idi agangay, nakiturog ni Samson iti balay ti maysa a balangkantis idiay Gaza a siudad dagiti Filisteo. Iti dayta a gundaway, ti Dios inikkanna iti bileg ni Samson a mangparut ken mangipanaw kadagiti rikep ti ruangan ti siudad. Gapu iti dayta, saanen a natalged ti siudad. (Uk. 14:​1-4; 16:​1-3) Ngem mabalin a naiduma ti relasionna ken Delaila ta posible nga isu ket maysa nga Israelita.

13. Ania ti inaramid ni Delaila tapno maisagmakna ni Samson?

¹³ Inawat ni Delaila kadagiti Filisteo ti adu a kuarta tapno matraidorna ni Samson. Nagtalek kadi unay ni Samson ken Delaila—sobra kadi unay ti panagayatna kenkuana—nga uray la dina nailasin ti agpayso nga intension ni Delaila? Aniaman ti rason, maulit-ulit a pinilit ni Delaila ni Samson a mangipudno kenkuana iti paggapgapuan ti pigsana. Ket idi agangay, imbaga met laengen dayta ni Samson.  Makapaladingit ta impalubos ni Samson a maisagmak iti situasion a temporario a nakapukawan ti pigsana ken pabor ni Jehova.—Uk. 16:​16-20.

14. Ania dagiti napasamak ken Samson gapu ta nagtalek ken Delaila?

¹⁴ Nagsaem dagiti resulta ti panagtalek ni Samson ken Delaila imbes a ken Jehova. Tiniliw dagiti Filisteo ni Samson ken binulsekda. Naibalud idiay Gaza, a dagiti umili sadiay ket imbabainna idi, ken idiay a nagbalin a nanumo a paragiling iti bukbukel. Kalpasanna, naibabain idi naguummong dagiti Filisteo tapno agselebrarda. Nangipaayda iti adu a daton iti didiosenda a ni Dagon. Impagarupda ngamin a tinulonganna ida a mangtiliw ken Samson. Inruarda ni Samson iti pagbaludan sada impan iti pakaang-angayan ti selebrasion ‘tapno pagraragsakanda’ ken pagkakatawaanda.—Uk. 16:​21-25.

15. Kasano nga impakita ni Samson a nagtalek manen ken Jehova? (Uk-ukom 16:​28-30) (Kitaen ti ladawan iti akkub.)

¹⁵ Nakaaramid ni Samson iti nakaro a kamali. Ngem intultuloyna ti nagserbi ken Jehova. Nangpanunot iti gundaway tapno maitungpalna ti inted ti Dios nga annongenna kontra kadagiti Filisteo. (Basaen ti Uk-ukom 16:​28-30.) Impakpakaasi ni Samson ken Jehova: “Palubosannak a mangibales kadagiti Filisteo.” Sinungbatan ti pudno a Dios dayta a pakaasi ni Samson ken insublina ti naisangsangayan a pigsana. Kas resultana, ad-adu a Filisteo ti napapatay ni Samson iti dayta a gundaway no ikompara kadagiti napapatayna idin.

16. Ania ti masursurotayo iti kamali ni Samson?

¹⁶ Uray napadasan ni Samson dagiti nasaem a resulta ti kamalina, saan a nagsardeng a mangaramid iti pagayatan ni Jehova. Mabalin met nga agkamalitayo ken masapul a matubngar wenno maikkat kadatayo ti maysa a pribilehio. Ngem masapul a saantayo nga agsardeng nga agserbi ken Jehova. Laglagipentayo a nakasagana ni Jehova a mangpakawan kadatayo. (Sal. 103:​8-10) Uray no nakaaramidtayo kadagiti kamali, mabalinnatayo latta nga usaren ni Jehova, kas iti inaramidna idi ken Samson.

17-18. Ania ti nakaparegtaam iti kapadasan ni Michael? (Kitaen met ti ladawan.)

¹⁷ Kitaentayo ti kapadasan ti agtutubo a brother a ni Michael. Nakaad-adu ti ar-aramidenna iti panagserbina ken Jehova. Isu ket maysa a ministerial nga adipen ken regular  pioneer. Ngem makapaladingit ta nakaaramid iti kamali, isu a naikkat kenkuana dagiti pribilehiona iti kongregasion. “Sakbay dayta,” imbagana, “nakabis-busy-ak idi iti panagserbik ken Jehova. Ngem pagammuan ta nariknak a kasla awan metten ti maar-aramidak. Diak pulos pinanunot a panawannak ni Jehova. Ngem pinanunotko no maisublik pay ngata ti relasionko kenkuana wenno no makapagserbiak manen kenkuana iti kongregasion a kas iti dati.”

¹⁸ Nagsayaat ta saan a nagsardeng ni Michael nga agserbi ken Jehova. Innayonna: “Nagpokusak iti panangisublik iti relasionko ken Jehova babaen ti regular a panagkararagko kenkuana, panagadal, ken panagutob.” Idi agangay, naisubli ken Michael dagiti pribilehiona iti kongregasion. Agserserbi itan kas panglakayen ken regular pioneer. Imbagana: “Ti suporta ken panangparegta a maaw-awatko, nangruna manipud kadagiti panglakayen, ti nakatulong kaniak tapno mabigbigko nga ay-ayatennak latta ni Jehova. Makapagserbiak manen iti kongregasion a nadalus ti konsiensiak. Nasursurok iti daytoy a kapadasan a pakawanen ni Jehova ti asinoman a talaga nga agbabbabawi.” Makapagtalektayo nga usaren ken bendisionannatayo met ni Jehova uray no nakaaramidtayo iti kamali no la ket ta aramidentayo ti amin a kabaelantayo a mangilinteg kadagita ken itultuloytayo ti agtalek kenkuana.—Sal. 86:5; Prov. 28:13.

19. Kasanoka a napabileg iti ulidan ni Samson?

¹⁹ Iti daytoy nga artikulo, napagsasaritaantayo ti sumagmamano a makapainteres a pasamak iti biag ni Samson. Imperpekto ni Samson. Ngem saan a simmardeng nga agserbi ken Jehova uray idi nakaaramid iti kamali gapu ken Delaila. Kas resultana, saan a binaybay-an ni Jehova. Inusar manen ti Dios iti naisangsangayan a pamay-an. Ni Samson ket imbilang latta ni Jehova kas lalaki nga addaan iti nabileg a pammati ken inramanna iti listaan dagiti nabileg ti pammatida a tattao iti Hebreo kapitulo 11. Talaga a makaparegta a maammuan nga agserserbitayo iti kasta a nadungngo a nailangitan nga Amatayo a magagaran a mangpabileg kadatayo, nangruna no nakapuytayo! Isu a kas ken Samson, ipakaasitayo ken Jehova: “Lagipennak ket papigsaennak.”—Uk. 16:28.