1. Ania ti reaksion ni Pedro idi nakakalapda iti adu nga ikan babaen ti milagro?

 NAGPATPATNAG a nagkalap ni Pedro ngem awan ti nakalapanna. Ngem imbaga ni Jesus: “Ipanmo iti adalem, ket iwayatyo dagiti iketyo ta agkalapkayo.” (Luc. 5:4) Nagduadua ni Pedro no adda aniaman a makalapanna. Ngem inaramidna ti naibilin kenkuana. Idi inwayatda dagiti iket, napigis dagita gapu ta nakaad-adu ti nakalapanda. Idi nabigbig ni Pedro ken dagiti kakaduana a milagro dayta, “kasta unay ti siddaaw[da].” Imbaga ni Pedro: “Adaywannak, Apo, ta maysaak a managbasol.” (Luc. 5:​6-9) Nalawag a narikna ni Pedro a saan a maikari a makikadua ken Jesus.

2. Apay a makatulong no usigentayo ti ulidan ni Pedro?

² Husto ni Pedro—“managbasol” isuna. Ipakita ti Biblia nga adda dagiti naibaga ken naaramidna a nagbabbabawyanna idi agangay. No dadduma, mariknam kadi a kaslaka ken Pedro? Adda kadi naalas nga ugalim a kayatmo a balbaliwan? Wenno pagkapuyam a nabayagen a lablabanam? No adda, makatulong no adalem ti ulidan ni Pedro. Kasano? Panunotem daytoy: Saan koma lattan nga inraman ni Jehova dagiti pagkapuyan ni Pedro kadagiti impaisuratna iti Biblia. Ngem impaisuratna dagita tapno makasursurotayo. (2 Tim. 3:​16, 17) No adalentayo ti maipapan iti daytoy a lalaki nga addaan kadagiti pagkapuyan ken marikrikna a kas kadatayo, makatulong dayta tapno maawatantayo a saan nga ekspektaren ni Jehova a perpektotayo. Kayatna nga itultuloytayo ti agporsegi—itultuloytayo ti agserbi kenkuana—uray adda dagiti pagkapuyantayo.

3. Apay a masapul nga itultuloytayo ti agporsegi?

³ Apay a masapul nga itultuloytayo ti agporsegi? Ngamin, agbalintayo  nga eksperto no kanayontayo nga agensayo. Kas pagarigan: Mabalin nga adu a tawen nga agensayo ti maysa a musikero tapno agbalin nga eksperto a mangtokar iti instrumentona. Bayat ti panagensayona, mabalin a mamin-adu nga agkamali. Ngem agbalin nga eksperto no itultuloyna ti agensayo. Uray inton eksperton a musikero, mabalin nga agkamalinto latta. Ngem saan a sumuksuko. Itultuloyna a pasayaaten ti talentona. Kasta met laeng kadatayo. Uray no baka panagriknatayo ket napagballigiantayon ti maysa a pagkapuyan, mabalin nga agkamalitayonto manen. Ngem itultuloytayo latta ti rumang-ay. Amintayo ket makaibaga wenno makaaramid kadagiti banag a pagbabawyantayto. Ngem no saantayo a sumuko, tulongannatayo ni Jehova nga agtultuloy nga agprogreso. (1 Ped. 5:10) Usigentayo ti ulidan ni Pedro a nagtultuloy a nagporsegi. Uray no adda dagiti nagkamalianna, kinaasian latta ni Jesus. Dayta ti mangparegta kadatayo nga agtultuloy nga agserbi ken Jehova.

4. Iti Lucas 5:​5-10, ania ti imbaga ni Pedro maipapan iti bagina, ngem ania ti impasigurado ni Jesus?

⁴ Awan ti mabasa iti Biblia no apay nga imbaga ni Pedro a “managbasol” isuna wenno no ania dagiti basol a pampanunotenna idi. (Basaen ti Lucas 5:​5-10.) Ngem mabalin nga adda dagiti naaramidna a nakaro a kamali. Nadlaw ni Jesus a mabuteng ni Pedro. Posible a gapu ta narikna ni Pedro a saan isuna a maikari. Ammo met ni Jesus a kaya ni Pedro ti agtalinaed a matalek. Gapu iti dayta, kastoy ti makapabang-ar nga imbaga ni Jesus ken Pedro: “Dikan agbuteng.” Saan a nalipatan ni Pedro ti panagtalek ni Jesus kenkuana. Idi agangay, pinanawan ni Pedro ken ti kabsatna a ni Andres ti negosioda a panagkalap ket nagbalinda nga amin-tiempo a pasurot ti Mesias. Gapu iti dayta a desisionda, adu ti naisangsangayan a bendisionda.—Mar. 1:​16-18.

5. Ania dagiti bendision a naawat ni Pedro idi napagballigianna ti butengna ken inawatna ti awis ni Jesus?

⁵ Adu ti nagsayaat a kapadasan ni Pedro kas pasurot ni Kristo. Nakitana a pinaimbag ni Jesus dagiti masakit, pinaruarna dagiti demonio, ken pinagungarna pay ketdi dagiti natay. b (Mat. 8:​14-17; Mar. 5:​37, 41, 42) Nasirmata met ni Pedro ti agbalin a saad ni Jesus iti Pagarian ti Dios ket dina pulos nalipatan dayta. (Mar. 9:​1-8; 2 Ped. 1:​16-18) Wen, pulos a saan koma a nakita dagita ni Pedro no saan a nagbalin a pasurot ni Jesus. Nakaragragsak la ketdi  ta napagballigianna ti aniaman a negatibo a riknana maipapan iti bagina isu a saan a naikapis kadagita a bendision!

6. Dagus kadi a napagballigian ni Pedro dagiti pagkapuyanna? Ilawlawag.

⁶ Iti laksid dagiti nakita ken nangngeg ni Pedro, adda latta dagiti pagkapuyanna. Kitaentayo ti sumagmamano a pagarigan. Idi imbaga ni Jesus a mapasaranna ti rigat ken matay kas kaitungpalan ti padto ti Biblia, tinubngar ni Pedro. (Mar. 8:​31-33) Maulit-ulit met a nagsusupiat da Pedro ken ti dadduma nga apostol no asino kadakuada ti katan-okan. (Mar. 9:​33, 34) Iti maudi a rabii sakbay a matay ni Jesus, bigla a piningas ni Pedro ti lapayag ti maysa a lalaki. (Juan 18:10) Iti daydi met la a rabii, nagbuteng ni Pedro isu a namitlo nga inlibakna nga am-ammona ti gayyemna a ni Jesus. (Mar. 14:​66-72) Kas resultana, nagsangit ni Pedro gapu iti napalalo a ladingitna.—Mat. 26:75.

7. Idi napagungaren ni Jesus, ania a gundaway ti naited ken Pedro?

⁷ Saan a binaybay-an ni Jesus ti maup-upay nga apostolna. Idi napagungaren ni Jesus, inikkanna ni Pedro iti gundaway a mangpaneknek nga ay-ayatenna latta isuna. Inawis ni Jesus ni Pedro a sipapakumbaba nga agserbi kas pastor dagiti karnerona. (Juan 21:​15-17) Situtulok nga inawat dayta ni Pedro. Adda isuna idiay Jerusalem idi aldaw ti Pentecostes ken karaman kadagiti immuna a dinutokan ti nasantuan nga espiritu.

8. Ania ti nakaro a kamali ni Pedro idiay Antioquia?

⁸ Ni Pedro ket maysan a Kristiano a dinutokan ti espiritu. Ngem uray kalpasan dayta, adda latta dagiti pagkapuyanna. Idi 36 C.E., imbaon ti Dios ni Pedro a mapan ken Cornelio a maysa a Gentil. Iti dayta a tiempo, ni Cornelio ket dinutokan ti nasantuan nga espiritu, a nalawag nga ebidensia a “saan a mangidumduma ti Dios.” Dagiti Gentil ket agbalinen a paset ti kongregasion Kristiano. (Ara. 10:​34, 44, 45) Kalpasanna, makikadkaduan ni Pedro kadagiti Gentil iti pannangan, a dina pay pulos inar-aramid idi. (Gal. 2:12) Ngem para iti dadduma a Judio a Kristiano, saan a rumbeng nga agkakadua a mangan dagiti Judio ken Gentil. Idi simmangpet idiay Antioquia ti dadduma a kasta ti opinionda, insardeng ni Pedro ti makikadua kadagiti kakabsat a Gentil iti pannangan. Mabalin a mabuteng di la ket ta masairna ti rikna dagiti Judio a Kristiano. Idi nakita ni apostol Pablo dayta a panaginsisingpet ni Pedro, tinubngarna iti sanguananda amin. (Gal. 2:​13, 14) Uray nagkamali ni Pedro, intultuloyna ti nagporsegi. Ania ti nakatulong kenkuana?

9. Kasano nga ipakita ti Juan 6:​68, 69 a napudno ni Pedro?

⁹ Napudno ni Pedro. Dina impalubos nga adda aniaman a mangpasardeng kenkuana a sumurot ken Jesus. Impakitana dayta idi adda imbaga ni Jesus a saan a naawatan dagiti adalanna. (Basaen ti Juan 6:​68, 69.) Adu ti nagsardeng a simmurot ken Jesus idi dida nauray ti panangilawlawagna wenno dida inammo ti kaipapanan ti imbagana. Ngem saan a kasta ni Pedro. Imbagana a ni laeng Jesus ti addaan iti “sasao a makaited iti biag nga agnanayon.”

10. Kasano nga impakita ni Jesus nga agtaltalek ken Pedro? (Kitaen met ti ladawan.)

¹⁰ Saan a binaybay-an ni Jesus ni Pedro. Iti maudi a rabii sakbay a matay ni Jesus, ammona a baybay-an isuna ni Pedro ken ti dadduma nga apostol. Ngem imbaga latta ni Jesus nga agtalek ken Pedro a makasubli ken agtalinaed a matalek. (Luc. 22:​31, 32) Naawatan ni Jesus a “magagaran ti espiritu, ngem nakapuy ti lasag.”  (Mar. 14:38) Isu nga uray inlibak ni Pedro, saan a naawanan ni Jesus iti namnama iti dayta nga apostolna. Idi napagungaren ni Jesus, nagpakita ken Pedro—posible nga idi agmaymaysa ni Pedro. (Mar. 16:7; Luc. 24:34; 1 Cor. 15:5) Naparegta la ketdi ti maup-upay nga apostol!

11. Kasano nga impasigurado ni Jesus ken Pedro nga ipaay ni Jehova dagiti kasapulanna?

¹¹ Impasigurado ni Jesus ken Pedro nga ipaay ni Jehova dagiti kasapulanna. Idi napagungar ni Jesus, nangaramid iti milagro tapno tulonganna ni Pedro ken ti dadduma pay nga apostol a makakalap manen iti adu nga ikan. (Juan 21:​4-6) Awan duadua a dayta a milagro ti nangipasigurado ken Pedro a kabaelan ni Jehova nga ipaay dagiti material a kasapulanna. Posible a nalagip ti apostol ti imbaga ni Jesus nga ipaay ni Jehova dagiti kasapulan dagidiay itultuloyda a “sapulen nga umuna ti Pagarian.” (Mat. 6:33) Nakatulong ken Pedro amin dagita tapno iyun-unana ti panangasaba, imbes a ti negosiona a panagkalap. Situtured a nangasaba idi aldaw ti Pentecostes 33 C.E., ket natulonganna ti rinibu a mangakseptar iti naimbag a damag. (Ara. 2:​14, 37-41) Kalpasanna, tinulonganna dagiti Samaritano ken Gentil a makasursuro maipapan ken Kristo ken agbalin a pasurotna. (Ara. 8:​14-17; 10:​44-48) Talaga a naisangsangayan ti panangusar ni Jehova ken Pedro tapno mayapon iti kongregasion ti amin a klase ti tattao.

12. No kanayon a panunotentayo ti ulidan ni Pedro, ania ti masapul a laglagipentayo no adda pagkapuyan a nabayagen a lablabanantayo?

¹² Matulongannatayo ni Jehova nga agtultuloy nga agporsegi. Baka marigatantayo nga agtultuloy nga agserbi nangruna no adda pagkapuyan a nabayagen a lablabanantayo. No dadduma, dagiti pagkapuyantayo ket kasla narigrigat ngem kadagiti pagkapuyan ni Pedro. Ngem kabaelannatayo a pabilgen ni Jehova tapno saantayo a sumuko. (Sal. 94:​17-19) Kas pagarigan, adu a tawen a homoseksual ti maysa a brother sakbay a nagbalin a Saksi. Insardengna ti immoral nga ar-aramidna ken sinurotna dagiti pagalagadan ti Biblia. Ngem adda latta dagiti panawen a lablabananna dagiti di umiso a tarigagayna. Ania ti nakatulong kenkuana nga agtultuloy nga agporsegi? Inlawlawagna: “Pabpabilgennatayo ni Jehova.” Imbagana pay: “Gapu ta tultulongannak ti espiritu ni Jehova . . . , nakitak a kabaelantayo ti  [agtultuloy a magna] iti dalan ti kinapudno . . . Us-usarennak ni Jehova, ket iti laksid dagiti pagkapuyak, agtultuloy a pabpabilgennak.”

13. Kasanotayo a matulad ti ulidan ni Pedro, kas naisurat iti Aramid 4:​13, 29, 31? (Kitaen met ti ladawan.)

¹³ Kas iti naammuantayo, nakaaramid ni Pedro iti dadduma a nakaro a kamali ta nagbuteng iti tao. Ngem timmured gapu ta nagkararag ken Jehova. (Basaen ti Aramid 4:​13, 29, 31.) Maparmektayo met ti butengtayo. Kitaentayo ti napasamak ken Horst, a maysa a barito a brother idiay Germany idi iturturayan dayta dagiti Nazi. Saan a namnaminsan a naibagana ti “Heil Hitler!” (“Ni Hitler ti Mangisalakan Kadatayo!”) gapu iti panangpilit dagiti mannursuro ken kaklasena. Ngem saan nga inungtan dagiti nagannakna. Nagkararagda ketdi a tallo ken kiniddawda ken Jehova a paturedenna ni Horst. Tinulongan dagiti nagannakna ken nagtalek ken Jehova isu a nakapagtalinaed ni Horst a matalek. Idi agangay, imbagana: “Pulos a saannak a binaybay-an ni Jehova.” c

14. Kasano a maparegta dagiti naayat a pastor dagiti maup-upay?

¹⁴ Saan a mauma da Jehova ken Jesus kadatayo. Kalpasan nga inlibak ni Pedro ni Kristo, masapul a mangaramid iti napateg a desision. Sumardeng kadi wenno itultuloyna ti agporsegi kas adalan ni Kristo? Impakaasi ni Jesus ken Jehova a saan koma a kumapuy ti pammati ni Pedro. Imbaga ni Jesus ken Pedro dayta a kararagna ken nagtalek nga inton agangay, mapabileg ni Pedro dagiti kakabsat. (Luc. 22:​31, 32) Kada malagip ni Pedro dagita nga imbaga ni Jesus, sigurado a maparparegta! No masapul met a mangaramidtayo kadagiti napateg a desision, mabalin nga usaren ni Jehova dagiti naayat a pastor tapno paregtaendatayo  nga agtalinaed a matalek. (Efe. 4:​8, 11) Kasta a panangliwliwa ti ikagkagumaan nga aramiden ni Paul a nabayagen a panglakayen. Ibagbagana kadagiti kakabsat a maup-upay ken kayatdan ti sumuko a laglagipenda no kasano nga inyasideg ida ni Jehova iti kinapudno. Kalpasanna, ipasiguradona kadakuada a gapu iti napudno nga ayat ni Jehova, saan a mauma kadakuada. Imbaga ni Paul: “Nagadun ti nakitak a maup-upay ngem agtultuloyda latta nga agporporsegi nga agserbi gapu iti tulong ni Jehova.”

15. Kasano a paneknekan dagiti kapadasan da Pedro ken Horst a husto ti ibagbaga ti Mateo 6:33?

¹⁵ No impaay ni Jehova dagiti material a kasapulan ni Pedro ken ti dadduma pay nga apostol, ipaayna met dagita no iyun-unatayo ti ministerio iti biagtayo. (Mat. 6:33) Kalpasan ti Gubat Sangalubongan II, ti nadakamaten a ni Horst ket nagplano nga agpayunir. Marigrigat isu a nagduadua no kayana a suportaran ti panagpayunirna. Ania ti inaramidna? Sinubokna no talaga nga ipaay ni Jehova dagiti kasapulanna. Makalawas a sinuportaranna ti ministerio iti lawas ti bisita ti manangaywan iti sirkito. Iti ngudo ti lawas, nasdaaw ta adda sobre nga inyawat kenkuana ti manangaywan iti sirkito, ngem dina imbaga no naggapuan dayta. Naglaon dayta iti kuarta nga umdas a makatulong iti kinapayunirna iti sumagmamano a bulan. Imbilang ni Horst dayta a regalo kas garantia nga ipaay ni Jehova dagiti kasapulanna. Inusarna ti intero a biagna a nangyun-una kadagiti interes ti Pagarian.—Mal. 3:10.

16. Apay a nasayaat nga adalentayo ti ulidan ni Pedro ken dagiti insuratna?

¹⁶ Nakaragragsak la ketdi ni Pedro ta saan isuna a binaybay-an ni Jesus kas iti impakaasina idi damo! Intultuloy ni Kristo a sanayen ni Pedro nga agbalin a matalek nga apostol ken nagsayaat nga ulidan para kadagiti Kristiano. Adu ti napateg a masursurotayo iti dayta a panangsanay. Adu kadagita ti karaman iti dua a surat ni Pedro para kadagiti kongregasion idi umuna a siglo. Ilawlawag ti sumaruno nga artikulo ti dadduma a palagip kadagita a suratna ken no kasano a mayaplikartayo ita dagita.