1. Ania ti masapul nga aramidentayo amin?

KAYATMO kadi ti makiraman iti lumba nga ammom a narigat, nangnangruna no agsakit wenno nabannogka? Siempre, saan. Ngem imbaga ni apostol Pablo nga agtartaray ti amin a Kristiano iti maysa a lumba. (Heb. 12:1) Ken masapul nga agibturtayo agingga iti panungpalan, ubingtayo man wenno nataengan, napigsa wenno nabannog, no kayattayo nga awaten ti gunggona nga ited ni Jehova.​—Mat. 24:13.

2. Sigun iti 2 Timoteo 4:7, 8, apay nga adda wayawaya ni Pablo nga agsao?

² Adda wayawaya ni Pablo nga agsao ta sibaballigi a ‘nagtaray agingga iti pagpatinggaan ti lumba.’ (Basaen ti 2 Timoteo 4:7, 8.) Ngem ania a lumba ti tuktukoyen ni Pablo?

3. Ania ti lumba a tinukoy ni Pablo?

³ Usaren no dadduma ni Pablo dagiti banag a maar-aramid iti paay-ayam iti nagkauna a Grecia a mangisuro kadagiti napateg a leksion. (1 Cor. 9:25-27; 2 Tim. 2:5) Adda dagiti gundaway nga inusarna ti panagtaray iti lumba a pangyilustrar iti Nakristianuan a dana ti panagbiag. (1 Cor. 9:24; Gal. 2:2; Fil. 2:16) Mangrugi ti maysa iti daytoy a “lumba” no idedikarna ti bagina ken Jehova ken agpabautisar. (1 Ped. 3:21) Makadanon iti finish line inton ited kenkuana ni Jehova ti gunggona a biag nga agnanayon.​—Mat. 25:31-34, 46; 2 Tim. 4:8.

4. Ania dagiti usigentayo iti daytoy nga artikulo?

⁴ Ania dagiti pagpadaan ti panagtaray iti atiddog a lumba ken ti biag dagiti Kristiano? Adda sumagmamano a pagpadaanda.  Usigentayo ti tallo kadagita. Umuna, masapul a surotentayo ti umiso a dalan; maikadua, masapul nga agpokustayo iti finish line; ken maikatlo, masapul nga agtultuloytayo nga agtaray uray adda dagiti pakarigatan.

5. Ania a dalan ti masapul a surotentayo, ken apay?

⁵ Iti literal a lumba, awaten laeng dagiti tumataray ti gunggona no surotenda ti dalan a pinili dagiti nangorganisar iti lumba. Kasta met, no kayattayo nga awaten ti gunggona a biag nga agnanayon, masapul a surotentayo ti Nakristianuan a dana ti panagbiag. (Ara. 20:24; 1 Ped. 2:21) Ngem kayat ni Satanas ken dagiti sumursurot kenkuana a surotentayo ti sabali a dalan; kayatda nga agtultuloytayo a “makiraman iti dakes a panagbiagda.” (1 Ped. 4:4) Uy-uyawenda ti dalan a pinilitayo ken ibagbagada a nasaysayaat ti dalan nga ayanda ta agturong dayta iti wayawaya. Ngem saan nga agpayso dayta.​—2 Ped. 2:19.

6. Ania ti masursurom iti kapadasan ni Brian?

⁶ Maammuanto met laeng ti asinoman a sumursurot kadagidiay naimpluensiaan ti lubong ni Satanas a ti pinilida a dalan ket saan nga agturong iti wayawaya no di ket iti pannakaadipen. (Roma 6:16) Kitaentayo ti napasamak ken Brian. Pinaregta dagiti nagannakna a surotenna ti Nakristianuan a dana ti panagbiag. Ngem idi tin-edyeren, nagduadua no naragsakto met laeng iti dayta. Pinili ni Brian a tuladen dagidiay mangsursurot iti impluensia ti lubong ni Satanas. “Saanko a nabigbig a ti pagarupko a wayawaya ti mangituggod kaniak iti nakaro a bisio,” kinunana. “Idi agangay, nagdroga, nagbartek, ken nagbalin nga immoral ti panagbiagko. Iti simmaganad a tawtawen, nagusarak metten iti napigpigsa a droga agingga a naadiktoakon. . . . Naglakoakon iti droga tapno masuportarak ti bisiok.” Ngem idi agangay, nagdesision ni Brian a surotenna dagiti pagalagadan ni Jehova. Binalbaliwanna ti dalan a pagpagnaanna ket nagpabautisar idi 2001. Pudpudno itan a naragsak ta sursurotennan ti Nakristianuan a dana ti panagbiag. *

7. Sigun iti Mateo 7:13, 14, ania a dua a dalan ti pagpiliantayo?

⁷ Nakapatpateg a pilientayo ti umiso a dalan! Kayat ni Satanas nga agsardengtayo amin nga agtaray iti nailet a dalan nga “agturong iti biag” ken umakartayo iti nalawa a dalan nga ayan ti kaaduan a tattao iti daytoy a lubong. Adu ti mayat iti dayta a dalan ken nalaka a pagnaan. Ngem dayta ket “agturong iti pannakadadael.” (Basaen ti Mateo  7:13, 14.) Tapno agtalinaedtayo iti umiso a dalan ken saantayo a mayaw-awan, masapul nga agtalektayo ken Jehova ken dumngegtayo kenkuana.

8. Ania ti aramiden ti maysa a tumataray no maitibkol?

⁸ Dagiti tumataray iti atiddog a lumba ket nakapokus iti sanguanan tapno saanda a maitibkol. Ngem posible latta a maitibkolda no aksidente a madungpar ida dagiti padada a tumataray wenno no mayabut dagiti sakada. No matumbada, tumakderda ket agtarayda manen. Nakapokusda saan nga iti nakaitibkolanda no di ket iti finish line ken iti gunggona a kayatda a maala.

9. Ania ti aramidentayo no maitibkoltayo?

⁹ Iti pannakilumbatayo, mabalin a maitibkoltayo iti adu a daras ta agkamalitayo iti sao ken aramid. Wenno mabalin a dagiti padatayo a tumataray ti makaaramid iti kamali a pakasaktantayo. Namnamaentayo dayta. Imperpektotayo amin, ken agtartaraytayo amin iti isu met laeng a nailet a dalan nga agturong iti biag. Isu a ditay maliklikan ti “agdidinnungpar” no dadduma. Binigbig ni Pablo a no dadduma, ‘adda pangibatayantayo nga agreklamo maibusor iti sabali.’ (Col. 3:13) Ngem imbes nga agpokustayo iti nakaitibkolantayo, agpokustayo iti gunggona nga agur-uray kadatayo. No maitibkoltayo, bumangontayo ken itultuloytayo ti agtaray. No makapungtot ken agsakit ti nakemtayo ken ditay kayat ti bumangon, ditayto makadanon iti finish line ken ditayto maala ti gunggona. Kasta met, baka agbalintayo a lapped kadagidiay mangikagkagumaan nga agtaray iti nailet a dalan nga agturong iti biag.

10. Kasano a maliklikantayo ti agbalin a “pakaitibkolan” ti sabsabali?

¹⁰ Ti sabali pay a pamay-an a maliklikantayo ti agbalin a “pakaitibkolan” ti padatayo a tumataray ket ti panangpagusto iti kayatda agingga a posible imbes nga ipilittayo ti kalintegantayo. (Roma 14:13, 19-21; 1 Cor. 8:9, 13) Dayta ti nakaidumaantayo kadagiti literal a tumataray iti lumba. Makikomkompetensiada iti dadduma a tumataray, ken ikagkagumaan ti tunggal maysa a maala ti gunggona. Ti bukodda a pagimbagan ti kangrunaan a pampanunotenda.  Isu a mabalin nga iwalinda ti dadduma tapno umun-unada. Ngem saantayo nga agkikinnompetensia. (Gal. 5:26; 6:4) Kalattayo nga adu ti makaduatayo a makadanon iti finish line ken makagun-od iti gunggona a biag. Ikagumaantayo ngarud nga iyaplikar ti balakad ni Pablo a ‘sapulentayo ti pagimbagan ti dadduma, saan la a ti bukodtayo a pagimbagan.’​—Fil. 2:4.

11. Ania ti masapul a pagpokusan ti maysa a tumataray, ken apay?

¹¹ Iti literal a lumba, saan laeng nga iti sanguanan ti pagpokusan dagiti tumataray no di pay ket iti finish line. Uray no saanda a makita ti literal a finish line, mabalinda a panunoten a nadanondan dayta ken awatendan ti gunggona. Agtalinaedda a nakapokus no kanayon a nalawag iti panunotda ti gunggonada.

12. Ania ti siaayat nga ipaay kadatayo ni Jehova?

¹² Iti lumba a pagtartarayantayo, adda garantisado a gunggona a siaayat nga ipaay ni Jehova kadagiti makaileppas iti lumba​—biag nga agnanayon idiay langit wenno iti paraiso a daga. Deskribiren ti Biblia daytoy a gunggona tapno mailadawantayo no kasanonto kasayaat ti biagtayo. No kanayontayo a pampanunoten daytoy a namnama, ad-adda a determinadotayo nga agibtur uray maitibkoltayo.

13. Apay nga adda bentahatayo kadagiti literal a tumataray?

¹³ Dagiti tumataray kadagiti paay-ayam dagiti Griego masapul a mapagballigianda dagiti pakarigatan, kas iti pannakabannog ken sakit ti bagbagi. Ngem ti laeng pagpannurayanda ket ti pannakasanayda ken ti bukodda a pigsa. Kaslatayo kadagidiay a tumataray ta masansanaytayo no kasano ti agtaray iti naespirituan a lumba. Ngem adda bentahatayo kadagiti literal a tumataray. Adda pangalaantayo iti di maib-ibus a pigsa. No agtalektayo ken Jehova, ikarkarina a sanayen ken papigsaennatayo!​—1 Ped. 5:10.

14. Kasano a matulongannatayo ti 2 Corinto 12:9, 10 iti panangsangotayo kadagiti pakarigatan?

¹⁴ Adu a pakarigatan ti masapul a sanguen ni Pablo. Malaksid iti pannakain-insulto ken pannakaidadanes, adda dagiti gundaway a nariknana a nakapuy ken masapul nga ibturanna ti inawaganna iti “siit ti lasag.” (2 Cor. 12:7) Ngem imbes a sumuko, imbilangna dagita kas gundaway tapno agtalek ken Jehova. (Basaen ti 2 Corinto 12:9, 10.) Gapu iti dayta, tinulongan ni Jehova ni Pablo iti amin a pakasuotanna.

15. No tuladentayo ni Pablo, ania ti mariknatayo?

¹⁵ Mabalin met a main-insulto wenno maidadanestayo gapu iti pammatitayo. Baka masapul met nga ibturantayo ti sakit wenno pannakabannog. Ngem no tuladentayo ni Pablo, dagita a pakarigatan ket agbalin a gundaway a mariknatayo ti naayat a suporta ni Jehova.

16. Uray no nakapuyen ti salun-atmo, ania ti mabalinmo nga aramiden?

¹⁶ Nakaiddaka kadi laengen wenno naka-wheelchair? Nakapuy kadin dagiti tumengmo wenno ti panagkitam? No wen, makapagtarayka pay la kadi a kadua dagiti agtutubo ken nasalun-at? Wen! Adu a nataenganen ken nakapuyen ti salun-atda ti agtartaray iti dalan ti biag. Saanda a kabaelan daytoy iti bukodda a pigsa. Ngem maipaayan ida ni Jehova iti bileg no dumngeg wenno agbuyada iti gimong babaen ti telepono wenno video streaming. Ken makiramramanda iti trabaho a panagaramid iti adalan babaen ti  panangasabada kadagiti doktor, nars, ken kakabagianda.

17. Ania ti marikna ni Jehova kadagidiay addaan iti pisikal a limitasion?

¹⁷ Dimo ipalubos a maupayka gapu iti pisikal a limitasionmo ket panunotem a saanmon a kaya ti agtaray iti dalan ti biag. Ay-ayatennaka ni Jehova gapu iti pammatim kenkuana ken iti nabayagen a panagib-ibturmo. Nangnangruna a kasapulam itan ti tulongna, ket saannakanto a baybay-an. (Sal. 9:10) Imbes ketdi, ad-addanto nga umasideg kenka. Kastoy ti imbaga ti maysa a kabsat a babai a masaksakit: “Gapu ta umad-adu ti sakitko, basbassit metten ti gundawayko a mangipakaammo iti kinapudno. Ngem ammok a naragsak ni Jehova uray bassit ti maar-aramidak, isu a naragsakak latta.” No nalidayka, laglagipem a saanka nga agmaymaysa. Panunotem ti ulidan ni Pablo, ken lagipem ti makaparegta nga imbagana: “Pagragsakak dagiti kinakapuy, . . . ta nabilegak no nakapuyak.”​—2 Cor. 12:10.

18. Ania ti nakarigrigat a situasion ti dadduma?

¹⁸ Adda pay sabali a pakarigatan a sangsanguen ti dadduma nga agtartaray iti dalan ti biag. Adda dagiti mapaspasaranda a saan a makita wenno maawatan ti dadduma. Kas pagarigan, masapul nga ibturanda ti depresion wenno nakaro a panagdandanag. Apay a nakarigrigat ti situasion dagitoy nga adipen ni Jehova nga ipatpategna? No natukkol ti ima ti maysa a tao wenno no naka-wheelchair, makita ti amin ti problemana isu a mabalin a matignayda a tumulong. Ngem mabalin a saan a nakadkadlaw ti problema dagidiay addaan iti emosional wenno mental a problema. Ti situasionda ket kas karigat ti natukkolan iti ima wenno saka. Ngem gapu ta di makita ti sabsabali ti mapaspasaranda a rigat, mabalin a saanda a maipaayan iti ayat ken asi a kasapulanda.

19. Ania ti masursurotayo iti ulidan ni Mefiboset?

¹⁹ No adda dagiti limitasionmo ken mariknam a saandaka a matartarusan, mabalin a maparegtaka iti ulidan ni Mefiboset. (2 Sam. 4:4) Masapul nga ibturanna ti kinabaldadona. Kasta met, di umiso ti panangtrato ni Ari David kenkuana gapu iti saan a husto a damag. Saan a basol ni Mefiboset dagiti sagsagabaenna. Ngem saan a nagbalin a negatibo; inapresiarna ti positibo a bambanag iti biagna. Agyamyaman iti kinaimbag nga impakita idi kenkuana ni David. (2 Sam. 9:6-10) Isu nga idi nagkamali ti desision ni Ari David, naawatan ni Mefiboset ti agpayso a makagapu. Saanna nga impalubos nga agsakit ti nakemna gapu iti kamali ni David. Ken saanna a  pinabasol ni Jehova iti inaramid ni David. Nagpokus ni Mefiboset no ania ti maaramidanna a mangsuporta iti ari a dinutokan ni Jehova. (2 Sam. 16:1-4; 19:24-30) Impaisurat ni Jehova ti nagsayaat nga ulidan ni Mefiboset iti Saona agpaay a pakagunggonaantayo.​—Roma 15:4.

20. Ania ti mabalin nga epekto ti panagdandanag iti dadduma, ngem makapagtalekda iti ania?

²⁰ Gapu iti nakaro a panagdandanag, adda dagiti kakabsat nga agnerbios ken saan a komportable a makilangen iti sabsabali. Baka marigatanda a makikadua iti dakkel a grupo, ngem umatenderda latta kadagiti gimong, asamblea, ken kombension. Saan a nalaka kadakuada ti makisarita kadagiti estranghero, ngem kasaritada latta ti sabsabali iti ministerio. No kasta ti kasasaadmo, masiguradom a saanka nga agmaymaysa. Adu ti padam a kasta ti riknana. Laglagipem a maragsakan ni Jehova iti amin-kararua a panagreggetmo. Ti agtultuloy a panagserbim ket pammaneknek a bembendisionannaka ni Jehova ken ipapaayna ti bileg a kasapulam. * (Fil. 4:6, 7; 1 Ped. 5:7) No agserserbika ken Jehova uray no adda pisikal wenno emosional a limitasionmo, makapagtalekka a maragragsakan kenka ni Jehova.

21. Iti tulong ni Jehova, ania ti kabaelantayo amin nga aramiden?

²¹ Imbag laengen ta agduma ti literal a lumba ken ti lumba a dakdakamaten ni Pablo. Iti literal a lumba idi tiempo ti Biblia, maymaysa laeng ti mangabak. Ngem iti lumba ti biag, amin a Kristiano a simamatalek nga agibtur ket umawat iti gunggona a biag nga agnanayon. (Juan 3:16) Ken iti literal a lumba, masapul a nasalun-at ken napigsa ti amin a tumataray; ta no saan, bassit ti tsansada a mangabak. Iti sabali a bangir, adu kadatayo ti addaan iti pisikal a limitasion, ngem agib-ibturtayo. (2 Cor. 4:16) Iti tulong ni Jehova, makadanontayo amin iti finish line!