1. Kasano nga agbalin a nasinged a gayyemmo ti maysa nga indibidual?

GAGANGAY a ti umuna nga addang tapno agbalin a nasinged a gayyemmo ti maysa a maam-ammom ket ti pannakilangenmo kenkuana. Bayat ti panagtungtongyo, maibagayo ti pampanunoten ken kapadasanyo, ket agbalinkayo nga aggayyem. Ngem adda dagiti lapped iti panangpatanor iti nasinged a pannakigayyem ken Jesus. Ania ti sumagmamano kadagita?

2. Ania ti umuna a lapped iti panagbalin a gayyem ni Jesus?

² Ti umuna a lapped ket saantayo a personal a naam-ammo ni Jesus. Kasta met ti situasion ti adu a Kristiano idi umuna a siglo. Nupay kasta, napaliiw ni apostol Pedro: “Inayatyo ti Kristo nupay saanyo a pulos nakita. Nupay saanyo a makita ita, impakitayo ti pammatiyo kenkuana.” (1 Ped. 1:8) Posible ngarud a maaddaantayo iti nasinged a relasion ken Jesus uray no saantayo a personal a naam-ammo.

3. Ania ti maikadua a lapped iti panagbalin a gayyem ni Jesus?

³ Ti maikadua a lapped ket saantayo a makasarita ni Jesus. No agkararagtayo, makisarsaritatayo ken Jehova. Pudno nga agkarkararagtayo iti nagan ni Jesus, ngem saantayo a makisarsarita kenkuana. Kinapudnona, saan a kayat ni Jesus nga agkararagtayo kenkuana. Apay? Gapu ta ti panagkararag ket pamay-an ti panagdaydayaw, ket ni laeng Jehova ti rumbeng a pagdayawan. (Mat. 4:10) Ngem maipakitatayo latta ti ayattayo ken Jesus.

4. Ania ti maikatlo a lapped, ken ania ti pagsasaritaantayo iti daytoy nga artikulo?

 ⁴ Ti maikatlo a lapped ket agnanaed ni Jesus idiay langit, isu a saantayo a literal a makalangen. Ngem adu latta ti maammuantayo maipapan ken Jesus uray no saantayo a makalangen. Repasuentayo ti uppat a banag a maaramidantayo a mangpabileg iti pannakigayyemtayo kenkuana. Ngem usigentayo nga umuna no apay a napateg a patanorentayo ti nasinged a pannakigayyem ken Kristo.

5. Apay a masapul nga agbalintayo a gayyem ni Jesus? (Kitaen met dagiti kahon nga “ Agbalinka a Gayyem ni Jehova no Gayyemmo ni Jesus” ken “ Balanse a Panangmatmat iti Akem ni Jesus.”)

⁵ Masapul nga agbalintayo a gayyem ni Jesus no kayattayo ti maaddaan iti nasayaat a relasion ken Jehova. Apay? Usigentayo ti dua a rason. Umuna, imbaga ni Jesus kadagiti adalanna: “Ay-ayatennakayo ti Ama, gapu ta ay-ayatendak.” (Juan 16:27) Imbagana pay: “Awan ti makapan iti Ama no saan a magna kaniak.” (Juan 14:6) No ikagkagumaam ti agbalin a gayyem ni Jehova a saanka a makigayyem nga umuna ken Jesus, kasla padpadasem ti sumrek iti maysa a pasdek a saanka a magna iti ruangan. Inusar ni Jesus ti umasping nga ilustrasion idi inladawanna ti bagina kas “ruangan a pagserkan dagiti karnero.” (Juan 10:7) Ti maikadua a rason ket naan-anay a naipakita ni Jesus dagiti kualidad ni Amana. Imbagana kadagiti adalanna: “Ti nakakita kaniak nakitana metten ti Ama.” (Juan 14:9) Gapuna, ti napateg a pamay-an tapno maam-ammotayo ni Jehova ket ti panangadaltayo iti biag ni Jesus. Bayat nga umad-adu ti ammotayo maipapan ken Jesus, dumakkel ti panagayattayo kenkuana. Ken bayat a  sumingsingedtayo ken Jesus, umuneg met ti ayattayo iti Amana.

6. Ania ti sabali pay a rason a masapul nga agbalintayo a gayyem ni Jesus? Ilawlawag.

⁶ Masapul nga agbalintayo a gayyem ni Jesus tapno masungbatan dagiti kararagtayo. Kayatna a sawen a saantay laeng a basta ibaga ti “iti nagan ni Jesus” iti ngudo ti kararagtayo. Masapul a matarusantayo no kasano nga us-usaren ni Jehova ni Jesus a mangsungbat iti kararagtayo. Imbaga ni Jesus kadagiti apostol: “Aramidekto . . . ti aniaman a kiddawenyo iti naganko.” (Juan 14:13) Nupay ni Jehova ti dumdumngeg ken mangsungsungbat iti kararagtayo, intedna ken Jesus ti autoridad a mangitungpal kadagiti desisionna. (Mat. 28:18) Sakbay ngarud a sungbatan ti Dios ti kararagtayo, kitaenna no inyaplikartayon ti balakad ni Jesus. Kas pagarigan, imbaga ni Jesus: “No pakawanenyo dagiti nakabasol kadakayo, pakawanennakayto met ni Amayo idiay langit; ngem no saanyo a pakawanen dagiti nakabasol kadakayo, saanto met a pakawanen ni Amayo dagiti basolyo.” (Mat. 6:14, 15) Nakapatpateg ngarud a tratuentayo ti sabsabali a kas iti naasi a panangtrato kadatayo ni Jehova ken ni Jesus!

7. Siasino ti magunggonaan iti pangsubbot a daton ni Jesus?

⁷ Dagidiay laeng addaan iti nasinged a relasion ken Jesus ti magunggonaan iti pangsubbot a datonna. Kasanotayo nga ammo? Imbaga ni Jesus nga ‘itedna ti biagna para kadagiti gagayyemna.’ (Juan 15:13) Dagiti matalek a tattao a nagbiag sakbay nga immay ni Jesus ditoy daga masapul nga am-ammuen ken ayatenda isuna. Mapagungarto dagiti tattao a kas kada Abraham, Sara, Moises, ken Rahab, ngem uray dagitoy a nalinteg nga adipen ni Jehova masapul a makigayyemda ken Jesus tapno agbiagda nga agnanayon.​—Juan 17:3; Ara. 24:15; Heb. 11:8-12, 24-26, 31.

8-9. Kas nailawlawag iti Juan 15:4, 5, ania ti maaramidantayo no gayyemtayo ni Jesus, ken apay a napateg dayta?

⁸ Maragsakantayo a makipagtrabaho ken Jesus iti panangasaba ken panangisuro iti naimbag a damag maipapan iti Pagarian. Maysa a mannursuro ni Jesus idi adda ditoy daga. Ket idi nakasublin idiay langit, kas ulo ti kongregasion, intultuloyna nga iwanwan ti trabaho a panangasaba ken panangisuro. Makitkita ken ap-apresiarenna ti panagreggetmo a tumulong iti adu a tattao tapno maam-ammoda isuna ken ti Amana. Kinapudnona, maitungpaltayo laeng daytoy a trabaho babaen ti tulong ni Jehova ken ni Jesus.​—Basaen ti Juan 15:4, 5.

⁹ Nalawag nga isuro ti Sao ti Dios a masapul nga ayatentayo ni Jesus ken pagtalinaedentayo dayta tapno maparagsaktayo ni Jehova. Usigentayo ti uppat a banag a mabalintayo nga aramiden tapno agbalintayo a gayyem ni Jesus.

10. Ania ti umuna nga addang iti panagbalintayo a gayyem ni Jesus?

¹⁰ (1) Am-ammuen ni Jesus. Maaramidtayo daytoy no basaentayo dagiti libro ti Biblia a Mateo, Marcos, Lucas, ken Juan. Bayat nga ut-utobentayo dagiti salaysay ti Biblia maipapan iti biag ni Jesus, masursurotayo nga ayaten ken respetuen ni Jesus gapu iti naasi a pannakilangenna kadagiti tattao. Kas pagarigan, uray no isu ti Apoda, saanna a trinato dagiti adalanna kas ad-adipen. Imbes ketdi, imbagana kadakuada ti pampanunoten ken rikriknana. (Juan 15:15) Idi naladingitda, nagladingit met ken nakipagsangit  kadakuada. (Juan 11:32-36) Uray dagiti bumusbusor binigbigda a nagbalin ni Jesus a gayyem dagidiay nangawat iti mensahena. (Mat. 11:19) No tuladentayo ti panangtrato ni Jesus kadagiti adalanna, sumayaat ti relasiontayo iti sabsabali, agbalintayo nga ad-adda a kontento ken naragsak, ken dumakkel ti apresasiontayo ken Kristo.

11. Ania ti maikadua nga addang iti panagbalin a gayyem ni Jesus, ken apay a napateg dayta?

¹¹ (2) Tuladen ti pampanunot ken ar-aramid ni Jesus. No ad-adda nga ammotayo ti panagpampanunotna ken tuladentayo dayta, nasingsinged met ti pannakigayyemtayo kenkuana. (1 Cor. 2:16) Kasanotayo a matulad ni Jesus? Kitaentayo ti maysa a pagarigan. Ad-adda a pinanunot ni Jesus no kasano a matulonganna ti sabsabali ngem iti panangparagsakna iti bagina. (Mat. 20:28; Roma 15:1-3) Gapu ta kasta ti panagpampanunotna, nagbalin a managsakripisio ken manangpakawan. Saan a nalaka a nasaktan iti imbaga dagiti tattao maipapan kenkuana. (Juan 1:46, 47) Ken saanna a pinanunot a saanen nga agbaliw dagiti tattao gapu laeng iti napalabas a kamalida. (1 Tim. 1:12-14) Imbaga ni Jesus: “Maammuanto ti amin a dakayo dagiti adalak​—no agiinnayatkayo.” (Juan 13:35) Nasayaat nga isaludsodmo iti bagim, “Tultuladek kadi ti ulidan ni Jesus ket ar-aramidek ti amin a kabaelak a makikappia kadagiti kakabsatko?”

12. Ania ti maikatlo nga addang iti panagbalin a gayyem ni Jesus, ken kasano a maaramidantayo dayta?

¹² (3) Suportaran dagiti kakabsat ni Kristo. Ti ar-aramidentayo para kadagiti kakabsat ni Jesus ket ibilangna a para metten kenkuana. (Mat. 25:34-40) Ti kangrunaan a pamay-an a masuportarantayo ida ket ti naan-anay a pannakiraman iti panangikasaba iti Pagarian ken iti trabaho a panagaramid iti ad-adalan nga imbilin ni Jesus nga itungpal dagiti pasurotna. (Mat. 28:19, 20; Ara. 10:42) Babaen laeng ti tulong ti ‘sabsabali a karnero’ a maitungpal dagiti kakabsat ni Kristo ti sangalubongan a panangasaba a maar-aramid ita. (Juan 10:16) No pasetnaka ti sabsabali a karnero, tunggal makiramanka iti daytoy a trabaho, saanmo laeng nga ipakpakita ti ayatmo kadagiti napulotan no di pay ket ken Jesus.

13. Kasanotayo a mayaplikar ti balakad ni Jesus iti Lucas 16:9?

¹³ Agbalintayo met a gayyem ni Jehova ken ni Jesus no agdonartayo kas suporta iti trabaho nga iwanwanwanda. (Basaen ti Lucas 16:9.) Kas pagarigan, mabalintayo ti agdonar para iti sangalubongan a trabaho, a mausar iti pannakaikasaba ti naimbag a damag kadagiti nasulinek a lugar, panagibangon ken panangmantener kadagiti pasilidad a maus-usar iti pudno a panagdaydayaw, ken panangtulong kadagiti nadidigra. Mabalintayo met a suportaran ti bukodtayo a kongregasion iti pinansial ken tulongan dagiti am-ammotayo nga agkasapulan. (Prov. 19:17) Dagitoy ti pamay-an a masuportarantayo dagiti kakabsat ni Kristo.

14. Kas naipakita iti Efeso 4:15, 16, ania ti maikapat nga addang iti panagbalin a gayyem ni Jesus?

¹⁴ (4) Suportaran dagiti urnos ti kongregasion Kristiano. Nasingsingedtayo ken Jesus nga ulo ti kongregasion no makikooperartayo kadagiti nadutokan a mangaywan kadatayo. (Basaen ti Efeso 4:15, 16.) Kas pagarigan, ikagkagumaantayo a saan a sayang ti pannakausar ti amin a Kingdom Hall. Isu nga adda dagiti kongregasion a napagtipon ken nabaliwan ti pagpatinggaan ti teritoriada. Gapu iti daytoy nga urnos, nakainuttayo iti adu a kuarta a naidonar iti organisasion. Ngem gapu iti daytoy, masapul nga  ag-adjust ti dadduma nga agibumbunannag iti baro a kasasaad. Mabalin nga adun a tawen a nagserbi iti maysa a kongregasion dagita a matalek nga agibumbunannag ket mabalin a nakasingsingeddan kadagiti kakabsat sadiay. Ngem ita, nakiddaw nga agserbida iti sabali a kongregasion. Maragsakan la ketdi ni Jesus a makakita iti kooperasion dagitoy a matalek nga adalan iti daytoy nga urnos!

15. Kasano a sumayaatto pay ti pannakigayyemtayo ken Jesus iti masanguanan?

¹⁵ Dagidiay napulotan iti nasantuan nga espiritu adda namnamada a makikadua ken Jesus iti agnanayon, kas kakaduana nga agturay iti Pagarian ti Dios. Aktual a kaduadanto ni Kristo​—makitada, makasaritada, ken makalangenda. (Juan 14:2, 3) Dagidiay addaan iti namnama nga agbiag nga agnanayon ditoy daga ket umawatto met iti ayat ken atension ni Jesus. Uray no saanda a makita ni Jesus, tumibker a tumibker ti pannakigayyemda kenkuana bayat a tagtagiragsakenda ti biag nga impaay kadakuada ni Jehova ken ni Jesus.​—Isa. 9:6, 7.

16. Ania dagiti bendision nga awatentayo gapu iti pannakigayyemtayo ken Jesus?

¹⁶ No awatentayo ti awis ni Jesus nga agbalin a gayyemna, magun-odtayo ti adu a bendision. Kas pagarigan, magunggonaantayo iti ayat ken suportana ita. Adda gundawaytayo nga agbiag nga agnanayon. Ken kapatgan iti amin, ti pannakigayyemtayo ken Jesus ket agresulta iti kasayaatan pay laeng a pannakigayyem​—ti nasinged a relasion iti Ama ni Jesus, ni Jehova. Anian a nagsayaat a pribilehio ti maawagan kas gayyem ni Jesus!