Sakbay unay a matay ni Jesus, apay a kinotarna ti imbaga ni David iti Salmo 22:1?

Karaman kadagiti maudi nga imbaga ni Jesus sakbay ti ipapatayna ket ti mabasa iti Mateo 27:46: “Diosko, Diosko, apay a binaybay-annak?” Idi imbaga dayta ni Jesus, tinungpalna ti imbaga ni salmista a David a naisurat iti Salmo 22:1. (Mar. 15:34) Saan nga umiso nga ipapantayo a kinotar ni Jesus dagita a sasao gapu ta naupay wenno kimmapuy biit ti pammatina. Interamente a naawatan ni Jesus ti rason no apay a masapul a matay, isu a timmulok iti dayta. (Mat. 16:21; 20:28) Ammona met nga iti tiempo ti ipapatayna, masapul nga ikkaten ni Jehova ti aniaman a ‘proteksionna’ kenkuana. (Job 1:10) Impalubos ngarud ni Jehova a paneknekan ni Jesus a makapagtalinaed a matalek nupay nasaem ti ipapatayna.​—Mar. 14:35, 36.

Apay ngarud nga imbaga ni Jesus ti sasao iti daytoy a salmo? Nupay ditay masigurado ti kaipapanan dayta, usigentayo ti dadduma a posibilidad. *

Idi imbaga ni Jesus dagita a sasao, ipagpaganetgetna kadi a saan a bumallaet ni Jehova iti ipapatayna? Masapul a bayadan ni Jesus ti subbot nga awan ti tulong ni Jehova. Isu ket maysa idi a tao ken masapul a “matay para iti amin a tattao.”​—Heb. 2:9.

Idi kinotar ni Jesus ti dadduma a sasao iti dayta a salmo, kayatna kadi a panunoten ti dadduma ti intero a salmo? Gagangay idi a  tiempo nga ikabesa dagiti Judio ti adu a salmo. No mangngegda ti maysa a berso wenno bersikulo ti salmo, natural laeng a malagipda ti intero a salmo. No kasta idi ti pampanunoten ni Jesus, tinulonganna ngarud dagiti pasurotna a Judio a manglagip iti adu a padto a linaon daytoy a salmo maipapan kadagiti pasamak a konektado iti ipapatayna. (Sal. 22:7, 8, 15, 16, 18, 24) Kasta met, dagiti maudi a bersikulo ti salmo idaydayawda ni Jehova ken deskribirenda isuna kas Ari iti intero a daga.​—Sal. 22:27-31.

Idi kinotar ni Jesus ti imbaga ni David, ibagbagana kadi nga isu ket inosente? Sakbay ti ipapatay ni Jesus, inibturanna ti illegal a bista, a napabasol iti panagtabbaaw wenno panagsao maibusor iti Dios. (Mat. 26:65, 66) Uray nakarabrabiin, inap-apura a bistaen ti Sanhedrin ket dida sinurot dagiti legal a pagannurotan. (Mat. 26:59; Mar. 14:56-59) Idi kinotar ni Jesus dagita a sasao sana pinagbalin a retorikal a saludsod, mabalin a kayatna nga ipaganetget ti kinapudno nga awan ti inaramidna a pakaikarianna iti dayta a kita ti pannusa.

Ipalpalagip met kadi idi ni Jesus iti sabsabali nga uray no naipalubos nga agsagaba ni David, a nangisurat iti daytoy a salmo, dina kayat sawen a napukawna ti pabor ni Jehova? Ti saludsod ni David dina kayat a sawen a kimmapuy ti pammatina. Idi insaludsodna dayta, imbagana nga agtalek a maisalakan ni Jehova dagiti adipenna, ket intultuloy a binendisionan ni Jehova. (Sal. 22:23, 24, 27) Umasping iti dayta, uray no “ti Anak ni David” a ni Jesus ket nagsagaba iti pagtutuokan a kayo, dina kayat a sawen a napukawna ti pabor ni Jehova.​—Mat. 21:9.

Iyeb-ebkas kadi idi ni Jesus ti nakaro a ladingitna iti panangikkat ni Jehova iti proteksionna kenkuana tapno naan-anay a mapaneknekanna ti kinamatalekna? Saan nga orihinal a panggep ni Jehova nga agsagaba ken matay ti Anakna. Nagbalin laeng a kasapulan dayta idi nagrebelde dagiti immuna a nagannaktayo. Awan a pulos ti dakes nga inaramid ni Jesus, ngem masapul nga agsagaba ken matay tapno masungbatan dagiti isyu a pinataud ni Satanas ken tapno ipaayna ti subbot a kasapulan tapno maisubli ti napukaw ni Adan. (Mar. 8:31; 1 Ped. 2:21-24) Maitungpal laeng dayta no ikkaten biit ni Jehova ti proteksionna ken Jesus iti damo a gundaway iti biagna.

Kayat kadi idi ni Jesus a tulongan dagiti pasurotna a panunotenda ti rason nga impalubos ni Jehova a matay isuna iti kasta a pamay-an? * Ammo ni Jesus nga adu ti maitibkol iti ipapatayna kas kriminal iti pagtutuokan a kayo. (1 Cor. 1:23) No pinanunot dagiti pasurotna ti pudno a rason ti ipapatayna, maawatanda ngarud ti pudno a kaipapanan dayta. (Gal. 3:13, 14) Iti kasta, ibilangda isuna kas Manangisalakan, saan a kas kriminal.

Aniaman ti rason a kinotar ni Jesus dagita a sasao, nabigbigna a ti mapaspasaranna idi ket paset ti pagayatan ni Jehova para kenkuana. Di nagbayag kalpasan a kinotar ni Jesus dayta a salmo, kinunana: “Natungpalen!” (Juan 19:30; Luc. 22:37) Wen, gapu iti apagbiit a panangikkat ni Jehova iti proteksionna, naan-anay a naitungpal ni Jesus ti amin a nakaibaonanna ditoy daga. Naitungpalna met ti amin a banag a naisurat maipapan kenkuana “iti Linteg ni Moises ken kadagiti Propeta ken kadagiti Salmo.”​—Luc. 24:44.