1. Ania dagiti naespirituan a kalat a mabalintayo nga ikeddeng?

 KAS pudno a Kristiano, ay-ayatentayo unay ni Jehova. Kayattayo nga ipaay kenkuana ti kasayaatan a panagserbi. Ngem tapno maaramidtayo dayta, masapul a mangikeddengtayo kadagiti naespirituan a kalat, kas iti panangparang-ay kadagiti Nakristianuan a kualidad, panagsursuro kadagiti makatulong nga abilidad, ken panangpanunot kadagiti pamay-an nga agserbi wenno tumulong iti sabsabali. *

2. Apay a masapul a mangikeddengtayo kadagiti naespirituan a kalat ken ikagumaantayo a ragpaten dagita?

² Apay a kayattayo ti rumang-ay iti naespirituan? Kangrunaanna, kayattayo a paragsaken ti naayat a nailangitan nga Amatayo. Maragsakan ni Jehova no makitkitana a naan-anay nga us-usarentayo dagiti talento ken abilidadtayo iti panagserbi kenkuana. Kayattayo met ti rumang-ay iti naespirituan tapno ad-adda a matulongantayo dagiti kakabsat. (1 Tes. 4:9, 10) Kasano man kabayagtayon iti kinapudno, kabaelantayo amin ti rumang-ay iti naespirituan. Kitaentayo no kasano a maaramidtayo dayta.

3. Kas mabasa iti 1 Timoteo 4:12-16, ania ti imparegta ni apostol Pablo nga aramiden ni Timoteo?

³ Idi insurat ni apostol Pablo ti umuna a suratna ken Timoteo, eksperiensiadon a panglakayen dayta a mapagulidanan ken agkabannuag a lalaki. Ngem pinaregta latta ni Pablo nga itultuloyna ti rumang-ay iti naespirituan. (Basaen ti 1 Timoteo 4:12-16.) Bayat a pampanunotem a naimbag ti sasao ni Pablo, madlawmo a kayatna a rumang-ay ni Timoteo iti dua a pamay-an:  parang-ayenna dagiti Nakristianuan a kualidad kas iti ayat, pammati, ken kinadalus; ken dagiti abilidad kas iti panagbasa iti publiko, panangparegta, ken panangisuro. Pagsasaritaantayo ti ulidan ni Timoteo tapno makitatayo no kasano a ti panangikeddeng kadagiti rasonable a kalat ket makatulong tapno rumang-aytayo iti naespirituan. Ammuentayo met ti dadduma a pamay-an a mapalawatayo ti ministeriotayo.

4. Maitunos iti Filipos 2:19-22, apay nga adu ti naitulong ni Timoteo kas adipen ni Jehova?

⁴ Apay nga adu ti naitulong ni Timoteo kas adipen ni Jehova? Gapu kadagiti nagsayaat a Nakristianuan a kualidadna. (Basaen ti Filipos 2:19-22.) Iti panangdeskribir ni Pablo ken Timoteo, makitatayo nga isu ket napakumbaba, napudno, nagaget, ken mapangnamnamaan. Nadungngo ken maseknan met unay kadagiti kakabsat. Gapu iti dayta, ipatpateg ni Pablo ni Timoteo ken saan a nagkedked a mangitalek kenkuana kadagiti narigat nga annongen. (1 Cor. 4:17) Ad-adda met nga ayatennatayo ni Jehova ken ad-adu ti maitulongtayo iti kongregasion no parang-ayentayo dagiti kualidad a makaay-ayo kenkuana.—Sal. 25:9; 138:6.

5. (a) Kasano a maammuam no ania a Nakristianuan a kualidad ti kayatmo a parang-ayen? (b) Kas makita iti ladawan, ania ti ar-aramiden ti ub-ubing a sister tapno maragpatna ti kalatna nga ad-adda nga ipakitana ti empatia iti sabsabali?

⁵ Mangpilika iti espesipiko a kalat. Agkararagka ken panunotem no ania dagiti paset ti personalidadmo ti masapul a parang-ayem. Mangpilika iti maysa a kayatmo a parang-ayen. Kas pagarigan, kayatmo kadi nga ad-adda nga ipakita ti empatia wenno maparayray ti tarigagaymo a tumulong kadagiti kapammatiam? Kayatmo kadi ti agbalin nga ad-adda a mannakikappia ken manangpakawan? Mabalinka nga agkiddaw iti singasing ti pagtaltalkam a gayyem no kasanoka a rumang-ay.—Prov. 27:6.

6. Kasanom a maragpat ti kalatmo a parang-ayen ti maysa a kualidad?

⁶ Ikagumaam a ragpaten ti kalatmo. Kasanom a maaramid dayta? Ti maysa a pamay-an ket adalem a naimbag ti kualidad a kayatmo a parang-ayen. Kas pagarigan, baka kayatmo nga agbalinka nga ad-adda a manangpakawan. Mabalinmo a rugian dayta babaen ti panangbasam ken panangutobmo kadagiti dinakamat ti Biblia nga ulidan dagidiay sibubulos a nangpakawan ken saan a nangpakawan. Usigentayo ti ulidan ni Jesus. Situtulok a pinakawanna  ti sabsabali. (Luc. 7:47, 48) Nagpokus met iti potensialda, saan a kadagiti nagkamalianda. Ngem naiduma dagiti Fariseo idi kaaldawan ni Jesus ta ‘tagtagibassitenda ti sabsabali.’ (Luc. 18:9) No nautobmon dagita a pagarigan, isaludsodmo iti bagim: ‘Ania ti makitkitak iti dadduma? Ania kadagiti kualidadda ti kangrunaan a kitkitaek?’ No marigatanka a mangpakawan iti maysa a tao, padasem nga isurat ti amin a nagsayaat a kualidadna. Kalpasanna, isaludsodmo iti bagim: ‘Ania ngata ti panangkita kenkuana ni Jesus? Pakawanenna ngata?’ No aramidentayo dayta, mabalbaliwan ti panagpampanunottayo. Iti damo, mabalin a marigatantayo a mangpakawan iti maysa a nakasair kadatayo. Ngem no itultuloytayo nga ikagumaan ti mangpakawan, agbalintayto nga ad-adda a situtulok a mangpakawan.

7. Maitunos iti Proverbio 22:29, kadagiti ania a pamay-an nga us-usaren ita ni Jehova dagiti eksperto a trabahador?

⁷ Ti sabali pay a kalat a mabalinmo nga ikeddeng ket ti agsursuro iti makatulong nga abilidad. Panunotem no kasano kaadu a trabahador ti kasapulan tapno maibangon dagiti pasilidad ti Bethel, Assembly Hall, ken Kingdom Hall. Adu kadakuada ti nakasursuro kadagiti abilidadda ta nakipagtrabahoda kadagiti eksperiensiado a kakabsat. Kas makita iti ladawan, agpada a dagiti kakabsat a lallaki ken babbai ket makasursuro kadagiti abilidad a makatulong iti panangmantener kadagiti Assembly Hall ken Kingdom Hall. Gapu kadagita ken iti dadduma pay a pamay-an, ni Jehova a Dios, “ti Ari iti agnanayon,” ken ni Kristo Jesus, “ti Ari [dagiti] . . . ar-ari,” us-usarenda dagiti eksperiensiado a trabahador a mangaramid kadagiti nakaskasdaaw a bambanag. (1 Tim. 1:17; 6:15; basaen ti Proverbio 22:29.) Kayattayo ti aggaggaget ken usarentayo dagiti abilidadtayo a mangipadayag ken Jehova, saan nga iti bagitayo.—Juan 8:54.

8. Kasanom a maammuan no ania nga abilidad ti kayatmo a sursuruen?

⁸ Mangpilika iti espesipiko a kalat. Ania nga abilidad ti mabalinmo a sursuruen? Damagem kadagiti panglakayenyo ken nalabit iti manangaywan iti sirkitoyo no ania nga abilidad ti mabalinmo a sursuruen. Kas pagarigan, no isingasingda a parang-ayem ti abilidadmo nga agsao ken mangisuro, damagem no ania nga espesipiko nga aspeto ti panagpalawag ti masapul a parang-ayem. Kalpasanna, mangaramidka kadagiti praktikal a pamay-an tapno rumang-ayka. Kasano?

9. Kasanom a maragpat ti kalatmo nga agsursuro iti maysa nga abilidad?

⁹ Ikagumaam a ragpaten ti kalatmo. Ipapantayo a kayatmo a parang-ayen ti abilidadmo a mangisuro. Adalem a naimbag ti broshur nga Agbalin a Nalaing nga Agbasa ken Mangisuro. No naikkanka iti paset iti gimong iti tengnga ti lawas, mabalin a kiddawem iti kualipikado a brother a denggennaka bayat nga agprakpraktiska ken mangted kadagiti suhestion tapno rumang-ayka. Ti koma reputasionmo ket saanka laeng a naabilidad no di ket nagaget ken mapangnamnamaan pay.—Prov. 21:5; 2 Cor. 8:22.

10. Mangted iti pagarigan no kasanotayo a maparang-ay ti maysa nga abilidad.

¹⁰ Kasanon no marigatanka nga agsursuro iti maysa nga abilidad a kayatmo a parang-ayen? Dika sumuksuko! Marigatan idi nga agbasa ti brother a ni Garry. Malagipna a permi ti bainna no agbasa iti napigsa kadagiti gimong. Ngem intultuloyna ti nagporsegi. Imbagana a gapu kadagiti pannakasanay a naawatna, makapagpalawagen kadagiti gimong iti Kingdom Hall, asamblea sirkito, ken kombension!

11. Kas ken Timoteo, ania ti makatulong tapno maibaklaytayo dagiti kanayonan a responsabilidad?

 ¹¹ Nagbalin kadi ni Timoteo a nakalalaing a pumapalawag wenno mannursuro? Saan nga ibaga ti Biblia. Ngem sigurado a rimmang-ay ni Timoteo ken nagbalin a mas epektibo iti panangibaklayna kadagiti responsabilidadna gapu ta sinurotna ti balakad ni Pablo. (2 Tim. 3:10) Kasta met, no parang-ayentayo dagiti abilidadtayo, agbalintayto a kualipikado a mangibaklay kadagiti kanayonan a responsabilidad.

12. Ania ti naitulongen kenka ti sabsabali?

¹² Magunggonaantay amin iti panagserbi ti sabsabali. No mayospitaltayo, agyamyamantayo iti panangbisita dagiti panglakayen nga agserserbi iti Hospital Liaison Committee wenno iti Patient Visitation Group. No maipasangotayo iti narigat a situasion, apresiarentayo no iwayaan ti maysa a manangisakit a panglakayen ti dumngeg ken mangliwliwa kadatayo. No agkasapulantayo iti tulong iti panangyadal iti Biblia, maragsakantayo no adda eksperiensiado a payunir a makikadua ken mangted kadagiti suhestion. Maragsakan amin dagitoy a kakabsat a tumulong kadatayo. Agbalintayo met a naragsak no sisasaganatayo nga agserbi kadagiti kakabsat. “Naragragsak ti mangted ngem ti umawat,” imbaga ni Jesus. (Ara. 20:35) No kayatmo ti ad-adda nga agserbi kadagita a pamay-an wenno iti dadduma pay, ania dagiti makatulong tapno maragpatmo dagiti kalatmo?

13. No mangikeddengtayo iti kalat, ania ti masapul a laglagipentayo?

¹³ Dika mangikeddeng iti kalat a saan nga espesipiko. Kas pagarigan, baka mapanunotmo, ‘Kayatko nga ad-adu ti maaramidak iti kongregasion.’ Ngem baka marigatanka a mangammo no kasano a maragpatmo dayta a kalat, ken imposible pay ketdi a maammuam no naragpatmon dayta. Isu a mangpilika iti nalawag ken espesipiko a kalat. Mabalin pay ketdi nga isuratmo dayta ken iplanom no kasanom a maragpat.

14. Apay a masapul a nakasaganatayo nga ag-adjust no mangikeddengtayo iti kalat?

¹⁴ Masapul met a nakasaganatayo nga ag-adjust no mangikeddengtayo iti kalat. Apay? Saantayo ngamin a makontrol dagiti posible a mapasamak. Kas pagarigan, timmulong ni apostol Pablo a mangbuangay iti baro  a kongregasion iti siudad ti Tesalonica. Ken sigurado a kalatna ti agtalinaed sadiay ken tulongan dagiti kabbaro a Kristiano. Ngem gapu kadagiti bumusbusor, napilitan ni Pablo a mangpanaw iti dayta a siudad. (Ara. 17:1-5, 10) No nagtalinaed ni Pablo, mabalin koma a pinagpeggadna ti biag dagiti kakabsat. Ngem saan nga insardeng ni Pablo ti tumulong kadakuada. Imbes ketdi, nakibagay iti nagbalbaliw a kasasaad. Idi agangay, imbaonna ni Timoteo a mangasikaso kadagiti naespirituan a kasapulan dagiti kabbaro a kakabsat idiay Tesalonica. (1 Tes. 3:1-3) Sigurado a nakaragragsak dagiti taga-Tesalonica idi situtulok ni Timoteo a mapan agserbi iti sadinoman nga agkasapulan!

15. Kasano maapektaran dagiti kalattayo no agbalbaliw ti kasasaadtayo? Iyilustrar.

¹⁵ Adda masursurotayo iti napasamak ken Pablo idiay Tesalonica. Baka adda kayattayo a pribilehio ti panagserbi, ngem gapu ta nagbalbaliw ti kasasaadtayo, saantayon a maragpat dayta. (Ecl. 9:11) No kasta ti kasasaadmo, mangpilika iti sabali a kalat a kabaelam a ragpaten. Kasta ti inaramid ti agassawa a da Ted ken Hiedi. Gapu iti problema iti salun-at, masapul a panawanda ti Bethel. Ngem ay-ayatenda ni Jehova isu a nangbirokda iti sabali a pamay-an tapno mapalawada ti ministerioda. Umuna, nag-regular pioneer-da. Idi agangay, naapointaranda kas special pioneer, ken na-train ni Ted nga agbalin a suno a manangaywan iti sirkito. Ngem nabaliwan ti maikalikagum nga edad para kadagiti manangaywan iti sirkito. Limbesen ti edad da Ted ken Hiedi para iti dayta a pribilehio. Naladingitanda, ngem ammoda a makapagserbida pay ken Jehova iti sabali a pamay-an. Imbaga ni Ted, “Nasursuromi a saankami nga agpokus iti maysa laeng a pribilehio ti panagserbi.”

16. Ania ti masursurotayo iti Galacia 6:4?

¹⁶ Saantayo a makontrol ti amin a mapasamak iti biagtayo. Isu a laglagipentayo a napategtayo ken Jehova, saan a gapu kadagiti pribilehio ti panagserbi a tagtagiragsakentayo. Masapul a saantayo nga ikomkompara dagiti pribilehiotayo kadagiti pribilehio a tagtagiragsaken ti dadduma. Imbaga ni Hiedi, “Saanka a naragsak no ikomparam ti biagmo iti biag ti sabsabali.” (Basaen ti Galacia 6:4.) Masapul a mangpanunottayo kadagiti pamay-an a tumulong iti sabsabali ken makapagserbitayo ken Jehova. *

17. Ania dagiti mabalin nga aramidem tapno makualipikarka kadagiti pribilehio ti panagserbi?

¹⁷ Posible nga ad-adu a pribilehio ti panagserbi ti magun-odam no pagtalinaedem a simple ti biagmo ken liklikam ti di kasapulan a panagutang.  Mangikeddengka kadagiti babassit a kalat a makatulong kenka a mangragpat iti daddadakkel a kalat. Kas pagarigan, no kalatmo ti ag-regular pioneer, mabalinmo kadi ti agtultuloy pay laeng nga agserbi kas auxiliary pioneer? No ti kalatmo ket agserbi kas ministerial nga adipen, mabalin kadi nga ad-adu ti orasmo iti panangasaba, ken panangbisita kadagiti masakit ken nataengan a kakongregasionmo? Makatulong dagiti kapadasam ita tapno makualipikarkanto kadagiti kanayonan a pribilehio ti panagserbi. Determinadoka koma a mangaramid iti amin a kabaelam iti aniaman nga asaynment a naited kenka.—Roma 12:11.

18. Kas iyilustrar ti ladawan, ania ti masursurom iti ulidan ni Beverley?

¹⁸ Saan a gapu ta nataengantayon ket ditay makaragpaten kadagiti naespirituan a kalat. Kitaentayo ti ulidan ti 75 ti tawenna a sister a ni Beverley. Adda ti nakaro a sakitna isu a marigatan a magna. Ngem kayatna unay ti naan-anay a makiraman iti kampania para iti Memorial. Isu a nangikeddeng kadagiti espesipiko a kalat. Idi naragpat ni Beverley dagita, permi ti ragsakna. Naparegtana met ti dadduma nga aggaggaget iti ministerio. Ipatpateg ni Jehova ti ar-aramiden dagiti nataengan a kakabsattayo uray no limitado ti maar-aramidanda gapu iti kasasaadda.—Sal. 71:17, 18.

19. Ania ti dadduma a naespirituan a kalat a mabalintayo nga ikeddeng?

¹⁹ Mangikeddengka kadagiti kalat a kabaelam a ragpaten. Parang-ayem dagiti kualidad a mangparagsak ken Jehova. Agsursuroka kadagiti abilidad tapno ad-adu ti maaramidam para iti Dios ken iti organisasionna. Mangpanunotka kadagiti pamay-an tapno ad-adda a makapagserbika kadagiti kakabsat. * Kas ken Timoteo, iti tulong ni Jehova, “makita ti amin a tattao ti panagrang-aymo.”—1 Tim. 4:15.