Nayanakak idi 1955. Siak ti buridek iti tallo a lallaki. Dimmakkelak iti asideg ti makin-abagatan a kosta ti Finland, iti lugar a maaw-awagan itan iti siudad ti Vantaa.

Nabautisaran ni Nanang kas maysa a Saksi ni Jehova sumagmamano a tawen sakbay a nayanakak. Ngem binusor ni Tatang ti kinapudno ken saanna a kayat nga iyadalannakami ni Nanang ken itugotnakami kadagiti gimong. Isu nga isursuronakami ni Nanang kadagiti kangrunaan a kinapudno ti Biblia no awan ni Tatang.

Manipud kinaubingko, inkagumaakon ti nagmatalek ken Jehova. Kas pagarigan, idi pito ti tawenko, nakapungtot kaniak ti maestrak gapu ta saanko a kayat a kanen ti verilättyjä (dara a pancake dagiti taga-Finland). Piniselna dagiti pingpingko tapno agungap ti ngiwatko sana impilit nga isubo kaniak ti pancake. Imbag laengen ta natippayko ti tinidor iti imana.

Idi 12 ti tawenko, natay ni Tatang, isu a nawayaakon a makagimong. Nakasingsingpet dagiti kakabsat, ket dayta ti nangparegta kaniak a rumang-ay iti naespirituan. Rinugiak a basaen ti Biblia iti inaldaw ken adalen a naimbag dagiti publikasiontayo. Nakatulong dagita a nagsayaat a rutina ti panagadal isu a natignayak nga agpabautisar idi 14 ti tawenko, idi Agosto 8, 1969.

Apaman a naturposko ti panageskuelak, rinugiak ti ag-regular pioneer. Sumagmamano a lawas  kalpasanna, immakarak iti lugar a dakdakkel ti panagkasapulanna, idiay Pielavesi, nga asideg iti sentro ti Finland.

Idiay Pielavesi, naam-ammok ti balasang a ni Sirkka nga agbalin a dungdungnguek nga asawa. Nagustuak ti kinapakumbabana ken ti nauneg a panagayatna ken ni Jehova. Dina kayat ti agbalin a natan-ok wenno nabaknang. Agpada a kayatmi ti agserbi ken Jehova iti amin a kabaelanmi, aniaman ti pribilehio a maited kadakami. Nagkasarkami idi Marso 23, 1974. Imbes nga ag-honeymoon-kami, napankami iti Karttula, lugar a dakdakkel ti panagkasapulanna kadagiti agibumbunannag.

Manipud idi nagkasarmi, impakita ni Jehova nga ipaayna dagiti material a kasapulanmi no iyun-unami ti Pagarianna. (Mat. 6:33) Kas pagarigan, idiay Karttula, awan luganmi. Idi damo, agbisbisikletakami laeng. Ngem nakalamlam-ek no winter. Tapno mawanasmi ti nakalawlawa a teritoriami, kasapulanmi a talaga ti lugan. Ngem awan ti igatangmi.

Dimi ninamnama a pasiarennakami ti maysa a manongko. Imbagana nga ipadawatna kadakami ti luganna. Nabayadanen ti insurance dayta. Gasolinaanmi laengen. Isu nga adda luganmin!

Talaga nga impakita ni Jehova kadakami nga isunan ti makaammo iti amin a kasapulanmi. Ti laeng aramidenmi ket iyun-una ti Pagarianna.

Bayat ti panageskuelami iti Pioneer Service School idi 1978, pinaregtanakami ti maysa kadagiti instruktormi a ni Raimo Kuokkanen, a nga agaplaykami iti Gilead School. Isu a rinugianmi ti agsursuro iti Ingles tapno makualipikarkami nga ageskuela. Nupay kasta, idi 1980, sakbay pay nga agaplaykami, naawiskami nga agserbi iti sanga nga opisina iti Finland. Iti dayta a tiempo, saan a mabalin nga ag-Gilead dagiti Bethelite. Ngem kayatmi ti agserbi iti sadinoman a pangibaonan kadakami ni Jehova, saan nga iti kayatmi. Isu nga inawatmi ti awis. Ngem intultuloymi latta ti nagsursuro iti Ingles tapno nakasaganakamin no bilang maawiskami nga ag-Gilead.

Sumagmamano a tawen kalpasanna, inaprobaran ti Bagi a Manarawidwid a mabalinen nga ag-Gilead dagiti Bethelite. Dagdagus a nagaplaykami ngem saan a gapu ta saankamin a naragsak iti Bethel. Ti agpayso, nakaragragsakkami!  Kayatmi laeng ti ad-adda pay a makatulong iti lugar a dakdakkel ti panagkasapulanna no kualipikadokami. Naawatkami iti Gilead ken naggraduarkami iti maika-79 a klase idi Septiembre 1985. Ti asaynmentmi ket iti Colombia.

Iti Colombia, ti umuna nga asaynmentmi ket iti sanga nga opisina. Inaramidko ti amin a kabaelak para iti asaynmentko. Ngem kalpasan ti makatawen, nariknak a kasla kasapulanmi ti panagbalbaliw. Daydi ti umuna ken maudi a gundaway iti biagko a nagkiddawak iti sabali nga asaynment. Kalpasanna, naibaonkami kas misionero iti siudad ti Neiva, iti rehion ti Huila.

Magusgustuak ti mangasaba. Idi agpaypayunirak idiay Finland, gapu ta awan pay ti asawak, no dadduma, mangasabaak iti nakasapsapa agingga iti nakarabrabiin. Ket idi kakaskasarmi ken ni Sirkka, adu nga aldaw nga agmalmalemkami a mangasaba. No adayo dagiti teritoriami, maturogkami no dadduma iti uneg ti luganmi tapno maksayan ti tiempomi nga agbiahe ken tapno nasapsapakami a mangasaba kabigatanna.

Kas misionero, nariknami manen ti regta a nariknami idi iti ministerio. Rimmang-ay ti kongregasionmi. Nakadaydayaw, nakaay-ayat, ken manangapresiar dagiti kakabsat iti Colombia.

Adda dagiti ili nga asideg iti teritoriami iti Neiva nga awan pay ti Saksina. Maseknanak unay no kasano a makadanon kadagita a lugar ti naimbag a damag. Ngem adda gubat kadagita a lugar gapu kadagiti gerilia, ket delikado para kadagiti saan a lumugar ti mapan sadiay. Isu nga inkararagko nga adda koma agnanaed iti maysa kadagita nga ili nga agbalin a Saksi. Pampanunotek a tapno agbalin a Saksi dayta a tao, masapul nga agyan pay laeng idiay Neiva. Inkararagko met nga inton mabautisaran, rumang-ay koma iti naespirituan sa agsublinto iti lugarda tapno isunton ti mangasaba. Ngem diak ammo nga adda gayam nasaysayaat a solusion ni Jehova.

Di nagbayag kalpasan dayta, rinugiak nga iyadalan iti Biblia ti maysa nga agtutubo nga agnagan Fernando González, a taga-Algeciras, maysa kadagiti ili nga awan Saksina. Agbiahe ni Fernando iti nasurok a 50 a kilometro (30 mi) nga agpa-Neiva tapno agtrabaho. Nakasagana a naimbag kada agadalkami ken dagus a rinugianna nga atenderan ti amin a gimong. Sipud idi umuna a lawas ti panagadalna, awisen ni Fernando ti dadduma a kailianna tapno iranudna dagiti nasursurona iti panagadalna iti Biblia.

Nabautisaran ni Fernando idi Enero 1990, innem laeng a bulan kalpasan a nangrugi nga agadal. Kalpasanna, nag-regular pioneer. Gapu ta addan maysa a Saksi a taga-Algeciras, natalgeden nga agibaon ti sanga nga opisina kadagiti special pioneer iti dayta a lugar. Ket idi Pebrero 1992, addan nabukel a kongregasion iti dayta nga ili.

Iti la kadi ili ni Fernando ti nangasabaanna? Saan! Kalpasan nga inkasarna ni Olga, immakarda iti San Vicente del Caguán, sabali pay nga ili nga awan ti Saksina. Timmulongda sadiay a mangipasdek iti kongregasion. Idi 2002, naapointaran ni Fernando nga agserbi kas manangaywan iti sirkito, ket agingga ita, itultuloyda ken ni baketna ti agserbi iti sirkito.

 Nasursurok iti daytoy a kapadasan a nagpateg ti panangikararag kadagiti espesipiko a banag mainaig kadagiti nateokratikuan nga asaynmenttayo. Kabaelan ni Jehova nga aramiden dagiti banag a saantayo a kaya. Laglagipentayo a daytoy ket panaganina, saan a panaganitayo.—Mat. 9:38.

Idi 1990, naapointarankami nga agserbi kas agdaldaliasat a manangaywan. Ti umuna a sirkito a nagserbianmi ket iti kabesera a siudad ti Bogotá. Nadanagankami ta baka saanmi a kabaelan ti asaynmentmi. Ordinariokami laeng nga agassawa. Awan ti naisangsangayan nga abilidadmi, ken saankami a naruam nga agyan iti siudad. Ngem tinungpal ni Jehova ti karina a mabasa iti Filipos 2:13: “Ti Dios ti mangpabpabileg kadakayo, nga ipapaayna kadakayo ti tarigagay ken ti pannakabalin a mangaramid iti amin a banag a pakaragsakanna.”

Idi agangay, naibaonkami iti maysa a sirkito iti siudad ti Medellín, a dinakamatko iti rugrugi. Naruamen dagiti tattao idiay kadagiti gulo iti kalsada, isu a saandan a mabuteng. Kas pagarigan, adda maysa a gundaway a mangyad-adalak iti Biblia idi adda bigla a nagpipinnaltog iti ruar ti balay ti iyad-adalak. Kumlebak koma idin, ngem intultuloy met latta ti iyad-adalak iti Biblia a basaen ti parapo. Saan man la a nakigtot! Idi nalpasnan ti nagbasa, imbagana a rummuar biit. Idi kuan, nagsubli a kuyogkuyogna ti dua a babassit nga annakna sa sikakalmado nga imbagana, “Pasensiakan a, innalak lang dagiti annakko.”

Saan laeng a daydiay ti gundaway a nagpeggad ti biagmi. Naminsan, bayat nga agbalaybalaykami, nagtartaray ni baketko nga immay kaniak a nakapuspusiaw. Imbagana a dandani kano napaltogan. Napakigtotanak. Ngem idi kuan, naammuanmi a saan gayam a ni Sirkka ti puntiria ti nagpaltog no di ket ti lalaki a limmabas iti abayna.

Idi agangay, naruamkamin kadagiti mapaspasamak a gulo. Naparegtakami iti kinatibker dagiti kakabsat sadiay a maipaspasango kadagiti kasta a situasion wenno nakarkaro pay. Napanunotmi a no tultulongan ida ni Jehova, tulongannakami met. Kanayon a sinurotmi ti balakad dagiti panglakayen sadiay. Nagan-annadkami ken impabiangmin ti amin ken Jehova.

Siempre, adda dagiti situasion a saan a kas kapeggad iti ninamnamami. Naminsan, adda nangngegko a kasla dua a babbai nga agbimbinnugkaw iti ruar ti balay ti sarsarungkarak. Saanko a kayat ti agbuya kadagiti agaapa, ngem imbaga ti bumalay a mapankami iti berandada. Idi kuan, naammuanmi a ti “agap-apa” ket dua gayam a parrot a mangtultulad kadagiti kaarrubada.

Idi 1997, naapointaranak nga agisuro iti Ministerial Training School. b Maap-apresiarko a kanayon ti umatender kadagiti nateokratikuan nga eskuelaan, ngem diak pulos napanunot ti  maaddaan iti makaparagsak a pribilehio nga agisuro.

Idi agangay, nagserbiak kas manangaywan iti distrito. Ngem idi nagpatinggan dayta nga urnos, nagsubliak kas manangaywan iti sirkito. Isu nga iti uneg ti nasurok a 30 a tawen, tinagiragsakko ti nagserbi kas instruktor ken agdaldaliasat a manangaywan. Gapu kadagitoy nga annongen, naaddaanak iti nakaad-adu a bendision. Ngem saan a kanayon a nalaka ti bambanag. Ilawlawagko no apay.

Naturedak ken napigsa ti pakinakemko. Nakatulong dagita tapno masangok dagiti narigat a situasion. Ngem adda dagiti gundaway a masobraak ti kinaregtak a mangkorehir kadagiti bambanag iti kongregasion. Naminsan, kasta unay ti gagarko a mangiparegta iti dadduma nga agbalinda a naayat ken rasonable. Ngem ti agpayso, kadagidiay a gundaway, uray siak ket diak maipakpakita dagita a kualidad.—Roma 7:​21-23.

Gapu kadagiti pagkamkamaliak, maup-upayak unay no dadduma. (Roma 7:24) Dimtengak iti punto nga inkararagko ken Jehova a nasaysayaat laengen nga agsardengak kas misionero ket agsubliak lattan idiay Finland. Iti dayta met la a rabii, nakigimongak. Gapu iti pammaregta a nangngegko sadiay, nakombinsirak a masapul nga agtalinaedak iti asaynmentko, ken itultuloyko a labanan dagiti pagkapuyak. Agingga ita, matuktukay ti pusok no malagipko no kasano a nalawag a sinungbatan ni Jehova dayta a kararagko. Kasta met, apresiarek unay ti panangtultulongna kaniak tapno mapagballigiak dagiti pagkapuyak.

Dakkel ti utangmi a naimbag a nakem ken Jehova gapu iti pribilehiomi nga agserbi iti amin-tiempo iti dandani intero a panagbiagmi. Agyamyamanak met unay ken Jehova ta impaayannak iti naayat ken matalek nga asawa.

Dandaniakon agtawen iti 70 ket ibbatakton dagiti pribilehiok kas instruktor ken agdaldaliasat a manangaywan, ngem saanak a malidayan. Apay? Gapu ta patiek a ti mangparagsak ken Jehova ket ti panagserbitayo kenkuana a sieemma ken ti panangidaydayawtayo kenkuana babaen ti puso a napno iti ayat ken panagyaman. (Mik. 6:8; Mar. 12:​32-34) Saantayo a kasapulan ti naisangsangayan a pribilehio tapno maidaydayawtayo ni Jehova.

No lagipek dagiti tinagiragsakko a pribilehio, maamirisko a naawatko dagita saan a gapu ta nalalaingak ngem iti dadduma wenno gapu ta addaanak kadagiti naisangsangayan nga abilidad. Adayo a kasta! Imbes ketdi, intalek kaniak ni Jehova dagitoy a pribilehio gapu iti nagpaiduma a kinaimbagna. Inikkannak kadagiti pribilehio iti laksid dagiti pagkapuyak. Ammok a maitungtungpalko dagitoy nga annongek gapu laeng iti tulong ni Jehova. Isu a maibagak nga ad-adda a nakitak ti bileg ti Dios gapu kadagiti pagkapuyak.—2 Cor. 12:9.