1. Ania ti kidkiddawen ni Jehova kadatayo?

 MAYSA kadagiti kararagsakan a kanito iti biag ti agassawa ket ti pannakaipasngay ti anakda. Ngem uray ay-ayaten dagiti nagannak ti kayyanak nga anakda, saanda a kayat nga agnanayon lattan nga ubing ti anakda. Kinaagpaysuanna, madanaganda unay no saan a dumakkel ti anakda. Kasta met, nupay maragsakan ni Jehova no rugiantayon nga am-ammuen isuna, dina kayat nga agtalinaedtayo nga ubbing iti naespirituan. (1 Cor. 3:1) Imbes ketdi, kidkiddawenna nga “agbalin[tayo] a nataengan” a Kristiano.—1 Cor. 14:20.

2. Ania dagiti usigentayo iti daytoy nga artikulo?

² Ania ti kayat a sawen ti panagmataengan iti naespirituan? Kasanotayo nga agmataengan iti naespirituan? Ania ti maitulong dagiti natangken a naespirituan a makan iti panagmataengantayo? Ken apay a liklikantayo ti nalabes a panagtalek iti bagi? Iti daytoy nga artikulo, usigentayo ti sungbat dagita a saludsod.

ANIA TI KAYAT A SAWEN TI PANAGMATAENGAN ITI NAESPIRITUAN?

3. Ania ti kayat a sawen ti panagbalin a Kristiano a nataengan iti naespirituan?

³ Iti Biblia, ti Griego a sao a naipatarus kas “nataengan” ket mabalin met a kaipapananna ti “manakem,” “perpekto,” ken “kompleto.” a (1 Cor. 2:6) No kasano a ti ubing ket agtultuloy a dumakkel agingga nga agbalin nga adulto, masapul met nga itultuloytayo a padakkelen ti ayattayo ken Jehova. Iti kasta, agmataengantayo iti naespirituan. Siempre, uray no nataengantayon iti naespirituan, masapul nga itultuloytayo latta ti rumang-ay. (1 Tim. 4:15) Amintayo, agraman dagiti agtutubo ken ubbing, ket kabaelantayo ti agmataengan iti naespirituan. Ngem kasanotayo a maibaga a ti  maysa a Kristiano ket nataenganen iti naespirituan?

4. Kasanotayo a maibaga a ti maysa a Kristiano ket nataenganen iti naespirituan?

⁴ Ti Kristiano a nataengan iti naespirituan ket agbibiag maitunos iti amin a pagannurotan ti Dios, a saanna laeng a pilien ti kayatna a suroten. Siempre, gapu ta imperpekto, agkamali latta. Ngem ipakpakitana iti inaldaw a panagbiagna nga agpampanunot ken agtigtignay maitunos iti pagayatan ti Dios. Nakasuot kenkuana ti baro a personalidad ken agtultuloy nga ikagkagumaanna nga itunos ti panagpampanunotna iti panagpampanunot ti Dios. (Efe. 4:​22-24) Sinanayna ti bagina nga agaramid kadagiti nainsiriban a desision maibatay kadagiti linteg ken prinsipio ni Jehova, isu a saanna a kasapulan ti atiddog a listaan dagiti pagannurotan a mangidiktar iti aramidenna. No agaramid iti desision, takderanna dayta.—1 Cor. 9:​26, 27.

5. Ania dagiti peggad ti saan a panagbalin a nataengan iti naespirituan? (Efeso 4:​14, 15)

⁵ Iti sabali a bangir, no ti maysa a Kristiano ket saan a nataengan iti naespirituan, nalaka laeng a ‘maallilaw’ ken mayaw-awan kadagiti “ulbod a sursuro.” Mabalin met a nalaka a mamatpati kadagiti agim-imbento iti impormasion ken kadagiti apostata. b (Basaen ti Efeso 4:​14, 15.) Baka nalaka nga agimon, masair ti riknana, mannakiapa, ken nalaka a matnag iti sulisog.—1 Cor. 3:3.

6. Kasano a mayilustrar ti panagmataengan iti naespirituan? (Kitaen met ti ladawan.)

⁶ Kas nadakamat itay, ti Kasuratan inkomparana ti panagrang-ay iti naespirituan iti panagdakkel ti maysa nga ubing. Adu pay ti saan nga ammo ti maysa nga ubing isu a kasapulanna ti proteksion ken panangiwanwan ti maysa nga adulto. Kas pagarigan, kibinen ti ina ti bassit pay nga anakna no bumallasiwda iti kalsada. Bayat a dumakdakkel ti anakna, mabalin a palubosannan a bumallasiw nga is-isuna. Ngem palagipanna latta ti anakna a kumita nga umuna iti agsumbangir ken sa la bumallasiw no awanen ti aglabas a lugan. No adulton, ammonan a liklikan ti kasta a peggad. Kasapulan dagiti ubbing ti tulong dagiti adulto tapno maliklikanda ti peggad. Kasta met, masansan a kasapulan dagiti saan pay a nataengan iti naespirituan ti tulong dagiti nataenganen tapno makaaramidda kadagiti nainsiriban a desision ken maliklikanda dagiti  naespirituan a peggad. Iti sabali a bangir, no ti maysa a nataenganen iti naespirituan ket agaramid iti desision, panunotenna a naimbag dagiti prinsipio ti Biblia ken ti panangmatmat ni Jehova iti dayta. Kalpasanna, aramidenna ti umiso.

7. Kasapulan kadi dagiti nataenganen iti naespirituan ti tulong ti dadduma?

⁷ Kayatna kadi a sawen a saanen a kasapulan dagiti nataenganen iti naespirituan ti tulong ti dadduma? Saan. No dadduma, kasapulan met dagitoy a Kristiano ti tulong ti sabsabali. Ngem ti maysa a saan pay a nataengan iti naespirituan mabalin a namnamaenna nga ibaga ti sabsabali ti aramidenna wenno idesisionanda isuna. Iti sabali a bangir, ti nataengan iti naespirituan ket mabalin nga agpatulong kadagiti ad-adun ti kapadasan ken pannakaammoda, ngem ammona a namnamaen ni Jehova nga “ibaklay ti tunggal maysa ti bukodna nga awit.”—Gal. 6:5.

8. Iti ania a pamay-an nga agduduma dagiti nataengan iti naespirituan?

⁸ No kasano a saan nga agkakarupa dagiti adulto, dagiti Kristiano a nataengan iti naespirituan ket agduduma met dagiti naespirituan a kualidadda, kas iti sirib, tured, kinaparabur, ken empatia. Kasta met, no maipasango ti dua a Kristiano a nataengan iti naespirituan iti agpada a situasion, baka agduma ti desisionda ngem agpada a naibatay dagita iti Kasuratan. Nangnangruna a pudno dayta no masapul nga agdesisionda maibatay iti konsiensia. Isu a saanda a husgaran ti tunggal maysa no agdumada iti desision. Imbes ketdi, ti napateg kadakuada ket ti panagkaykaysada.—Roma 14:10; 1 Cor. 1:10.

KASANOTAYO NGA AGMATAENGAN KAS KRISTIANO?

9. Automatiko kadi nga agbalintayo a nataengan iti naespirituan? Ilawlawag.

⁹ Iti panaglabas ti tiempo, natural a dumakkel ti maysa nga ubing ket agbalin nga adulto. Ngem saan nga automatiko nga agbalin a nataengan iti naespirituan ti maysa a Kristiano. Kas pagarigan, inawat dagiti Kristiano idiay Corinto ti naimbag a damag, nagpabautisarda, immawatda iti nasantuan nga espiritu, ken nagunggonaanda kadagiti insuro ni apostol Pablo. (Ara. 18:​8-11) Ngem sumagmamano a tawen kalpasan ti bautismoda, adu latta ti saan a rimmang-ay iti naespirituan. (1 Cor. 3:2) Kasanotayo a maliklikan ti nabuntog a panagrang-ay iti naespirituan?

10. Ania ti masapul nga aramidentayo tapno agmataengantayo? (Judas 20)

¹⁰ Tapno agmataengantayo, masapul a kayattayo nga umuna ti agmataengan. Dagidiay “awanan kapadasan” kaykayatda ti agtalinaed nga ubbing iti naespirituan isu a saanda a rumang-ay. (Prov. 1:22) Ditay kayat ti agbalin a kas kadagidiay adulton ngem agdepdependeda pay laeng kadagiti nagannakda no agdesisionda. Imbes ketdi, kayattayo a datayo a mismo ti mangibaklay iti responsabilidadtayo a rumang-ay iti naespirituan. (Basaen ti Judas 20.) No ikagkagumaam pay laeng ti rumang-ay, ikararagmo ken Jehova nga ikkannaka ‘iti tarigagay ken iti pannakabalin a mangaramid iti amin a banag a pakaragsakanna.’—Fil. 2:13.

11. Ania a tulong ti maipapaay kadatayo tapno agbalintayo a nataengan iti naespirituan? (Efeso 4:​11-13)

¹¹ Ammo ni Jehova a ditay kabaelan ti agmataengan iti naespirituan a bukbukodtayo. Nakasagana dagiti agserserbi a papastor ken mannursuro iti kongregasion Kristiano a tumulong kadatayo tapno “agbalintayo a nataengan” iti naespirituan, “a kas iti kinanataengan ti Kristo.” (Basaen ti Efeso 4:​11-13.) Ipapaay met ni Jehova ti nasantuan nga espirituna tapno maadda kadatayo “ti panunot ni Kristo.” (1 Cor. 2:​14-16) Kanayonanna, impaisurat ti Dios ti uppat nga ebanghelio tapno maammuantayo no kasano a nagpanunot, nagsao, ken nagtignay ni Jesus bayat ti ministeriona ditoy daga. No tuladem ti panagpampanunot ken panagtigtignay ni Jesus, maragpatmo ti kalatmo nga agmataengan iti naespirituan.

 TI KINAPATEG TI NATANGKEN A NAESPIRITUAN A MAKAN

12. Ania dagiti “pagdamdamuan a doktrina maipapan iti Kristo”?

¹² Tapno agmataengantayo, masapul a saan laeng a dagiti “pagdamdamuan a doktrina maipapan iti Kristo,” wenno dagiti kangrunaan a pannursuro ti ammotayo. Karaman kadagita ti panagbabawi, pammati, bautismo, ken ti panagungar. (Heb. 6:​1, 2) Dagita ti dadduma kadagiti kangrunaan a pannursuro a patpatientayo kas Kristiano. Isu nga idi nangasaba ni apostol Pedro idi Pentecostes, insurona ti maipapan kadagita. (Ara. 2:​32-35, 38) Masapul a patientayo dagita a kangrunaan a pannursuro tapno agbalintayo nga adalan ni Kristo. Kas pagarigan, impakdaar ni Pablo nga asinoman a saan a mamati iti panagungar ket saan a maibilang kas pudno a Kristiano. (1 Cor. 15:​12-14) Ngem masapul a saantayo a mapnek a ti laeng ammotayo ket dagiti kangrunaan a pannursuro iti Biblia.

13. Ania ti masapul nga aramidentayo tapno magunggonaantayo iti natangken a naespirituan a makan a nadakamat iti Hebreo 5:14? (Kitaen met ti ladawan.)

¹³ Saan a kas kadagiti kangrunaan a pannursuro iti Biblia, ti natangken a naespirituan a makan ramanenna saan laeng a dagiti linteg ni Jehova no di ket uray pay dagiti prinsipiona a makatulong kadatayo a mangtarus iti panagpampanunotna. Masapul nga adalen, utoben, ken iyaplikartayo a naimbag dagiti masursurotayo iti Sao ti Dios. No aramidentayo dagita, sansanayentayo ti bagitayo nga agaramid kadagiti desision a mangparagsak ken Jehova. c—Basaen ti Hebreo 5:14.

14. Kasano a tinulongan ni Pablo dagiti taga-Corinto nga agmataengan?

¹⁴ Dagiti Kristiano a saan a nataengan iti naespirituan ket masansan a marigatan nga agaramid kadagiti umiso a desision no awan ti espesipiko a linteg nga ibaga ti Biblia. Dadduma met ti mangipapan a mabalinda nga aramiden dagiti kaykayatda no awan ti espesipiko a linteg nga ibaga ti Biblia. Mabalin pay nga agbirok ti dadduma iti pagannurotan uray no saan met a kasapulan dayta. Kas pagarigan, agparang a dagiti Kristiano a taga-Corinto kiniddawda ken Pablo nga ikkanna ida iti pagannurotan no mabalinda ti mangan kadagiti naidaton iti idolo. Imbes nga idiktar ni Pablo ti aramidenda, impaamirisna ketdi nga  adda ‘kalinteganda nga agpili’ maibatay iti ipalubos ti konsiensiada. Dinakamatna ti dadduma a prinsipio ti Kasuratan a makatulong kadakuada nga agdesision a nadalus ti konsiensiada ken saanda a maitibkol ti sabsabali. (1 Cor. 8:​4, 7-9) Tinulongan ngarud ni Pablo dagiti taga-Corinto nga agmataengan iti naespirituan tapno mausarda ti abilidadda nga agpanunot, imbes nga agdependeda iti dadduma wenno agbirokda kadagiti espesipiko a pagannurotan no agdesisionda.

15. Kasano a tinulongan ni Pablo dagiti Hebreo a Kristiano a rumang-ay iti naespirituan?

¹⁵ Adda napateg a masursurotayo iti insurat ni Pablo kadagiti Hebreo a Kristiano. Saan a nagtultuloy ti dadduma a rumang-ay iti naespirituan; “kasapulan[da] manen ti gatas imbes a natangken [a naespirituan] a makan.” (Heb. 5:12) Saanda nga intultuloy a sinursuro ken inawat dagiti baro a bambanag nga isursuro kadakuada ni Jehova babaen ti kongregasion. (Prov. 4:18) Kas pagarigan, adu a manamati a Judio ti mangibagbaga a kasapulan latta a masurot ti Mosaiko a Linteg uray no agarup 30 a tawenen a nagpatingga dayta maibatay iti subbot nga insakripisio ni Kristo. (Roma 10:4; Tito 1:10) Sigurado nga umdas koman dayta a tiempo tapno maakseptar dagiti Judio a Kristiano dayta a panagbalbaliw! Asinoman a makabasa iti impaisurat ti Dios ken Pablo kadagiti Hebreo, maibagana a daytoy a libro ket naglaon kadagiti natangken a naespirituan a makan. Dayta ti eksakto a kasapulan dagidiay a Kristiano tapno mapabileg ti pammatida nga adayo a nasaysayaat ti naipasdek a baro pamay-an ti panagdaydayaw ken Jehova babaen ken Jesus. Dayta met ti nangpabileg kadakuada nga agtultuloy a mangasaba uray busbusoren ida dagiti Judio.—Heb. 10:​19-23.

LIKLIKAN TI NALABES A PANAGTALEK ITI BAGI

16. Malaksid iti panagrang-ay iti naespirituan, ania pay ti masapul nga aramidentayo?

¹⁶ Saan laeng a panagmataengan ti kalattayo. Masapul met nga agreggettayo a mangtaginayon iti dayta. Isu a masapul a liklikantayo ti nalabes a panagtalek iti bagi. (1 Cor. 10:12) Rumbeng nga “itultuloy[tayo] a suboken” ti bagitayo tapno masiguradotayo nga agtultuloy ti panagrang-aytayo.—2 Cor. 13:5.

17. Kasano nga ipakita ti surat ni Pablo kadagiti taga-Colosas ti kinapateg ti panagtalinaed a nataengan iti naespirituan?

¹⁷ Iti surat ni Pablo kadagiti taga-Colosas, intampokna manen ti kinapateg ti panagtalinaed a nataengan iti naespirituan. Uray no nataenganen  iti naespirituan dagiti taga-Colosas, pinakdaaranna latta ida nga agannad tapno saanda a maimpluensiaan iti panagpampanunot daytoy a lubong. (Col. 2:​6-10) Ket ni Epafras, a nalawag a makaam-ammo unay kadagiti adda iti kongregasion, agtultuloy nga inkararagna nga “agbalin[da] metten a nataengan.” (Col. 4:12) Ti punto? Agpada a naawatan da Pablo ken Epafras a tapno mataginayon ti kinanataengan, kasapulan ti panagregget ken ti tulong ti Dios. Kayatda a dagiti taga-Colosas ket agtalinaed a nataengan iti naespirituan uray maipasangoda iti aniaman a pakasuotan.

18. Ania ti mabalin a mapasamak iti maysa a Kristiano a nataengan iti naespirituan? (Kitaen met ti ladawan.)

¹⁸ Pinakdaaran ni Pablo dagiti Hebreo a no saan nga agannad ti maysa a Kristiano a nataengan iti naespirituan, mabalin nga agnanayon a mapukawna ti anamong ti Dios. Posible a tumangken ti puso ti maysa a Kristiano agingga a saannan a mabigbig a kasapulanna ti agbabawi ken kasapulanna ti pammakawan ti Dios. Imbag laengen ta saan a dimmanon iti kasta a punto dagiti Hebreo. (Heb. 6:​4-9) Komusta ngay met dagiti nagbalin a di aktibo wenno nailaksid ita ngem agbabbabawin? Gapu iti kinapakumbaba ken panagbabawida, ipakpakitada a naidumada kadagiti tinukoy ni Pablo iti suratna. Ngem tapno makapagsublida ken Jehova, kasapulanda ti tulongna. (Ezek. 34:​15, 16) Mabalin a kiddawen dagiti panglakayen iti maysa nga eksperiensiado a kabsat a tumulong kadakuada a mangpabileg manen iti relasionda ken Jehova.

19. Ania ti masapul a kalattayo?

¹⁹ No ikagkagumaam ti agmataengan iti naespirituan, maragpatmo ti kalatmo! Itultuloymo ti mangan iti natangken a naespirituan a makan ken lallalo pay nga itunosmo ti panagpampanunotmo iti panagpampanunot ni Jehova. Ken uray nataengankan, aramidem ti amin a kabaelam nga agtalinaed a nataengan iti naespirituan.