1. Ania ti panagrikna ti dadduma no makisaritada kadagiti tattao iti ministerio? (Kitaen met ti ladawan.)

 KAS ili ni Jehova, mangaskasabatayo ta ay-ayatentayo ti nailangitan nga Amatayo ken kayattayo a tulongan dagiti tattao a mangam-ammo kenkuana. Adu a kakabsat ti talaga a maragragsakan a mangasaba. Ngem dadduma met ti marigrigatan. Apay? Mabalin a managbabain ti dadduma ken nababa ti kompiansada iti bagida. Adda met dagiti saan a komportable a mapan kadagiti tattao a saan a nangnamnama iti ipapanda. Mabuteng met ti dadduma ta baka saan ida a kayat a kasarita dagiti tattao. Naisuro met iti dadduma a liklikanda ti nabara a saritaan agingga a posible. Nupay ay-ayatenda unay ni Jehova, marigatan latta dagitoy a kakabsat a makisarita kadagiti saanda nga am-ammo tapno ikasaba ti naimbag a damag. Ngem ammoda a nagpateg daytoy a trabaho isu a regular latta a mangaskasabada. Maragragsakan la ketdi ni Jehova iti ar-aramidenda!

2. No saanmo unay a maen-enjoy ti ministeriom, apay a saanka koma a maupay?

² No dadduma, saanmo kadi a maen-enjoy ti ministeriom gapu kadagiti kasta a rikna? No wen, saanka koma a maupay. No nababa ti kompiansam iti bagim, mabalin nga ipakitana a napakumbabaka ken saanmo a kayat a mapan kenka ti atension. Ipakitana met a saanmo a kayat ti makiriri. Normal laeng a madismayaka no saandaka a kayat a kasarita ti dadduma lalo ta ammom a pagsayaatanda ti ar-aramidem. Ammo unay ti nailangitan nga Amam dagiti pakaipaspasanguam ken kayatnaka a tulongan. (Isa. 41:13) Iti daytoy nga artikulo, pagsasaritaantayo ti lima a suhestion no kasanotayo a mapagballigian dagiti kasta a rikna ken no kasanotayo nga agbalin a naragragsak iti ministerio.

 IPALUBOSMO A PABILGENNAKA TI SAO TI DIOS

3. Ania ti nakatulong ken propeta Jeremias a mangasaba?

³ Uray iti napalabas, us-usaren ti Dios ti Saona a mangpabileg kadagiti adipenna no makaawatda iti narigat nga annongen. Kas pagarigan, madanagan ni propeta Jeremias idi imbaon ni Jehova a mangasaba. Imbaga ni Jeremias: “Saanko nga ammo ti agsao, ta maysaak laeng nga ubing.” (Jer. 1:6) Kasanona a napagballigian ti nababa a kompiansana iti bagina? Pinabileg isuna ti sao ti Dios. Imbagana: “Kasla sumsumged nga apuy dayta a napupok kadagiti tulangko, ken nabannogakon a mangtepteppel iti dayta.” (Jer. 20:​8, 9) Nupay naibaon ni Jeremias iti narigat a teritoria, naaddaan isuna iti bileg a kasapulanna gapu met laeng iti mensahe nga inkasabana.

4. Ania ti mapasamak no basaentayo ti Sao ti Dios ken utobentayo dayta? (Colosas 1:​9, 10)

⁴ Mapabpabileg dagiti Kristiano iti mensahe ti Sao ti Dios. Idi sinuratan ni apostol Pablo ti kongregasion ti Colosas, imbagana a no maaddaanda iti umiso a pannakaammo, matignayda nga ‘agbiag a makaay-ayo ken Jehova bayat nga ar-aramidenda ti tunggal nasayaat nga aramid.’ (Basaen ti Colosas 1:​9, 10.) Karaman iti dayta a nasayaat nga aramid ti panangikasaba iti naimbag a damag. Isu a no basaentayo ti Sao ti Dios ken utobentayo dayta, bumileg ti pammatitayo ken Jehova ken agbalin a nalawlawag kadatayo ti kinapateg ti panangikasaba iti mensahe ti Pagarian.

5. Kasanotayo a mas makasursuro iti panagbasa ken panagadaltayo iti Biblia?

⁵ Tapno mas makasursuroka iti Sao ti Dios, masapul a saanka nga agap-apura nga agbasa, agadal, ken agutob. Ikkam dayta iti umdas a tiempo. No adda mabasam a teksto a dimo maawatan, saanmo a basta labsan lattan. Imbes ketdi, usarem ti Watch Tower Publications Index wenno ti Giya iti Panagsukimat Para Kadagiti Saksi ni Jehova tapno maawatam ti pannakailawlawag ti bersikulo. No saanka nga agap-apura nga agadal, bumileg ti panagtalekmo a talaga a pudno ti Sao ti Dios. (1 Tes. 5:21) No mas kombinsidoka, mas ma-enjoy-mo nga ikasaba dagiti nasursurom.

AGSAGANAKA A NAIMBAG PARA ITI MINISTERIO

6. Apay a masapul nga agsaganatayo a naimbag para iti ministerio?

⁶ No agsaganaka a naimbag para iti ministerio, mabalin a mas komportableka a  makisarita kadagiti tattao. Tinulongan ni Jesus dagiti adalanna nga agsagana sakbay nga imbaonna ida iti ministerio. (Luc. 10:​1-11) Gapu ta sinurotda ti insuro ni Jesus kadakuada, nakaad-adu ti naaramidanda ket dayta ti nangparagsak kadakuada.—Luc. 10:17.

7. Kasanotayo a makapagsagana para iti ministerio? (Kitaen met ti ladawan.)

⁷ Kasanotayo a makapagsagana para iti ministerio? Masapul a panunotentayo no ania ti ibagatayo ken no kasanotayo nga ibaga dayta iti natural ken iti bukodtayo a sasao. Makatulong met no nasaksakbay a mangpanunottayo iti dua wenno tallo a gagangay a reaksion dagiti makasabaantayo ken no ania ti aramidentayo iti tunggal situasion. Ket inton makisaritatayo kadagiti tattao, ikagumaantayo ti agrelaks, umisem, ken agbalin a mannakigayyem.

8. Kasano a dagiti Kristiano ket kas iti damili a pagkargaan a dinakamat ni apostol Pablo iti ilustrasionna?

⁸ Inyilustrar ni apostol Pablo ti akemtayo iti trabaho a panangasaba idi imbagana: “Addaan[tayo] iti gameng a naikabil kadagiti damili a pagkargaan.” (2 Cor. 4:7) Ania dayta a gameng? Isu ti makaisalakan a trabaho a panangikasaba iti mensahe ti Pagarian. (2 Cor. 4:1) Ania ti irepresentar dagiti damili a pagkargaan? Isuda dagiti adipen ti Dios a mangipakpakaammo iti naimbag a damag iti sabsabali. Idi panawen ni Pablo, agus-usar dagiti negosiante kadagiti damili a pagkargaan a pagikabilanda kadagiti napapateg a banag kas iti makan, arak, ken kuarta. Kasta met, intalek ni Jehova kadatayo ti nagpateg a mensahe ti naimbag a damag. Iti tulong ni Jehova, maaddaantayo iti bileg a simamatalek a mangipakaammo iti mensahetayo.

IKARARAGMO TI TURED

9. Kasanotayo a mapagballigian ti buteng iti tao wenno ti buteng a baka saandatayo a kayat a kasarita? (Kitaen met ti ladawan.)

⁹ No dadduma, mabalin a mabutengtayo iti tao wenno baka mabutengtayo amangan no saandatayo a kayat a kasarita. Kasanotayo a mapagballigian dayta? Kitaentayo ti kararag dagiti apostol idi naparitanda a mangasaba. Imbes nga agpaabakda iti buteng, inkararagda ken Jehova: “Paturedem dagiti adipenmo tapno maitultuloyda nga ibaga ti saom.” Dagus  a sinungbatan ni Jehova ti kararagda. (Ara. 4:​18, 29, 31) No mabutengtayo iti tao no dadduma, masapul met nga agpatulongtayo ken Jehova. Ikararagmo ken Jehova a ti koma ayatmo kadagiti tattao ti tumulong kenka a manglaban iti butengmo iti tao.

10. Kasanonatayo a tulongan ni Jehova a mangitungpal iti akemtayo kas Saksina? (Isaias 43:​10-12)

¹⁰ Pinilinatayo ni Jehova kas Saksina, ken ikarkarina a tulongannatayo nga agbalin a natured. (Basaen ti Isaias 43:​10-12.) Kitaentayo ti uppat laeng kadagiti pamay-an nga ar-aramidenna dayta. Umuna, adda kadatayo ni Jesus no ikaskasabatayo ti naimbag a damag. (Mat. 28:​18-20) Maikadua, dinutokan ni Jehova dagiti anghel a tumulong kadatayo. (Apoc. 14:6) Maikatlo, ipapaay ni Jehova kadatayo ti nasantuan nga espirituna kas katulongan tapno maipalagip kadatayo dagiti nasursurotayo. (Juan 14:​25, 26) Maikapat, ipapaay ni Jehova dagiti kakabsat a kakaduatayo. Iti tulong ni Jehova ken iti suporta dagiti naayat a kakabsat, kabaelantayo ti agbalin a natured ken agtultuloy a mangasaba.

MAKIBAGAYKA KEN AGBALINKA A POSITIBO

11. No addaka iti ministerio, ania ti aramidem tapno ad-adu ti makasabaam? (Kitaen met ti ladawan.)

¹¹ Maupayka kadi no manmano ti madanonmo iti balbalayda? Isaludsodmo iti bagim: ‘Ayan ngata ita dagiti tattao iti teritoriami?’ (Ara. 16:13) ‘Addada ngata iti pagtrabahuan, mall, wenno palengke?’ No kasta, baka ad-adu ti makasabaam no ag-street witnessing-ka. Imbaga ti maysa a brother a ni Joshua, “Nakitak nga ad-adu ti makasabaak kadagiti paggatangan, mall, paradaan ti lugan, wenno natao a lugar.” Kasta met, nakitada ken baketna a Bridget nga ad-adu a tattao ti madanonda iti balbalayda no mapanda iti malmalem ken kadagiti malem ti Domingo.—Efe. 5:​15, 16.

12. Kasanotayo a maammuan no ania ti patpatien wenno paginteresan dagiti tattao?

¹² No saan unay nga interesado dagiti tattao iti mensahetayo, ikagumaantayo nga ammuen ti patpatien wenno paginteresanda. Us-usaren da Joshua ken Bridget ti saludsod iti sango ti tract iti introduksionda. Kas pagarigan, no usarenda ti tract nga Ania ti  Makunam Maipapan iti Biblia?, ibagada: “Adda dagiti mamati a ti Biblia ket libro a naggapu iti Dios, ngem saan a patien dayta ti dadduma. Sika ngay, ania ti opinionmo?” Kaaduanna nga agturong dayta iti nasayaat a saritaan.

13. Apay a maibagatayo a naballigi latta ti ministeriotayo uray no saan a mangipangag dagiti tattao? (Proverbio 27:11)

¹³ Ti balligi ti ministeriotayo ket saan a nakadepende iti resulta ti panangasabatayo. Apay? Gapu ta ammotayo nga inaramidtayo ti kayat ni Jehova ken ti Anakna—ti mangsaksi. (Ara. 10:42) Uray no awan ti nakasaritatayo wenno saanda nga inawat ti mensahetayo, naragsaktayo latta ta ammotayo a naparagsaktayo ti nailangitan nga Amatayo.—Basaen ti Proverbio 27:11.

14. Apay a naragsaktayo no adda kabsat a makabirok iti interesado iti ministerio?

¹⁴ Maragsakantayo met no adda kabsat a makabirok iti interesado iti ministerio. Ti Pagwanawanan impadana ti trabahotayo iti panagbirok iti napukaw nga ubing. Adu ti agtitinnulong nga agbirok ket mapanda iti nagduduma a lugar. No masarakanen ti mapukpukaw nga ubing, saan laeng a ti nakabirok ti maragsakan, no di ket ti amin. Kasta met, ti trabaho a panagaramid iti adalan ket pagtitinnulongan ti amin iti kongregasion. Amin ket kasapulan tapno mawanas ti teritoria. Ket no adda interesado nga umayen makigimong, maragsakan ti amin.

AGPOKUSKA ITI AYATMO KEN JEHOVA KEN ITI KAARRUBAM

15. Kasano a makatulong ti panangyaplikar iti Mateo 22:​37-39 tapno naregregtatayo iti ministerio? (Kitaen met ti ladawan.)

¹⁵ Naregregtatayo a mangasaba no agpokustayo iti ayattayo ken Jehova ken iti kaarrubatayo. (Basaen ti Mateo 22:​37-39.) Panunotem laengen no kasano karagsak ni Jehova no makitkitanatayo a mangar-aramid iti trabaho nga intalekna kadatayo ken no kasano karagsak dagiti tattao no rugiandan ti agadal iti Biblia! Panunotem met a posible a maisalakan dagidiay umawat iti mensahetayo.—Juan 6:40; 1 Tim. 4:16.

16. Kasanotayo nga agbalin a naragsak iti ministerio uray no ditay makapanaw iti balaytayo? Mangted kadagiti pagarigan.

¹⁶ Saanka kadi a makapanaw iti balayyo gapu iti nagduduma a rason? No wen, panunotem  ti kayam nga aramiden tapno maipakitam ti ayatmo ken Jehova ken kadagiti tattao. Bayat ti COVID-19 pandemic, saan a makapanaw da Samuel ken Dania iti balayda. Iti dayta a narigat a tiempo, regular a nag-telephone witnessing-da, nagaramidda kadagiti surat, ken nangyadalda iti Biblia babaen ti Zoom. Kinasabaan ni Samuel dagiti naam-ammona iti clinic a pagpapaagasanna iti kanser. Imbagana: “Makabannog iti mental, pisikal, ken uray iti naespirituan dagiti rigat a mapaspasarantayo. Masapul nga ikagumaantayo ti agbalin a naragsak iti panagserbitayo ken Jehova.” Bayat a mapaspasamak dagita, natumba ni Dania ket naidalit iti iddana iti tallo a bulan. Kalpasanna, kasapulanna met ti agusar iti wheelchair iti innem a bulan. Imbagana: “Inkagumaak nga aramiden ti amin a kabaelak nga ipalubos ti situasionko. Nakasabaak ti maysa a nars a bimmisita kaniak ken uray dagiti agdeldeliber nga immay iti balaymi. Nagmayat met ti saritaanmi iti telepono iti maysa a babai nga agtrabtrabaho iti medical company.” Uray no saanen a kas iti dati ti maar-aramidan da Samuel ken Dania, inaramidda ti amin a kabaelanda isu a naragsakda.

17. Kasano nga ad-adda a makatulong kenka dagiti singasing iti daytoy nga artikulo?

¹⁷ Ikagumaam nga iyaplikar ti amin a lima a singasing iti daytoy nga artikulo. Tunggal singasing ket kas iti maysa a rekado ti maysa a putahe. No mapagkakadua ti amin a rekado, naim-imas ti maluto. No mayaplikar met ti amin a singasing, ad-adda a nakasaganatayo a manglaban kadagiti negatibo a rikna ket agbalintayo a naragragsak iti ministerio.